មកស្គាល់សិល្បករគំនូរមួយរូបដែលគូររូបម្តងដៃពីរលើជញ្ជាំងតាមផ្លូវ «Alley Way»
NEWS 5 years agoគំនូរលើជញ្ជាំងជាច្រើនស្ថិតនៅផ្លូវតូចមួយក្បែររាជវាំងដែលបានទាក់ទាញមនុស្សឲ្យមកថតរូបគ្រប់ៗគ្នានោះគឺជាស្នាដៃគំនូររបស់សិល្បករខ្មែរនិងបរទេសមួយក្រុមក៏ប៉ុន្តែភាគច្រើនសុទ្ធសឹងតែជាស្នាដៃរបស់សិល្បករ «យី កក្កដា» ដែលរៀបចំឡើងដោយក្រុមសិល្បៈគំនូរលើជញ្ជាំង «Cambodia Urban Art»។ ការជ្រើសរើសទីតាំងផ្លូវ «Alley Way» នេះក៏ជាការផ្តល់យោបល់ដោយ កក្កដា ផងដែរ ព្រោះដោយសារលោកបានសម្លឹងឃើញថាកន្លែងនោះគឺជាទីតាំងដ៏ល្អមួយដែលមានជញ្ជាំងកោង មើលឃើញស្អាត។ យី កក្កដា គឺជាសិល្បករគំនូរមួយរូបដែលមានសមត្ថភាពខុសប្លែកពីគេ ពោលគឺក្នុងពេលតែមួយ កក្កដាអាចគូររូបបានដល់ទៅពីរ ដោយដៃទាំងពីរតែម្តង។ សមត្ថភាពគូរគំនូម្តងពីរ តាំងពីកុមារភាពនេះ បានធ្វើឲ្យកក្កដាទទួលបានជ័យលាភីក្នុងការប្រកួតគំនូរជាមួយអង្គការ យូណេស្កូ នៅវ័យ ១២ឆ្នាំ ថែមទៀតផង។ កក្កដា បានលើកឡើងពីចំណង់ចំណូលចិត្តរបស់ខ្លួនថា គំនូរដែលលោកផ្តោតខ្លាំងបំផុតគឺវត្ថុបុរាណ វប្បធម៌ អរិយ្យធម៌ សិល្បៈខ្មែរ។ «ខ្ញុំចូលចិត្តគូររូបគំនូរលើជញ្ជាំងតាមផ្លូវសាធារណៈ ដើម្បីបង្ហាញអំពីសិល្បៈខ្មែរ ចង់ចែករំលែកទៅយុវជនជំនាន់ក្រោយដែលទើបតែរៀនផ្នែកសិល្បៈ និងអ្នកដែលស្រលាញ់សិល្បៈខ្មែរ ខ្ញុំចង់គូររូបប្រពៃណីវប្បធម៌ខ្មែរដើម្បីផ្សព្វផ្សាយទៅឲ្យបរទេសបានស្គាល់អំពីអត្តសញ្ញាណជាតិផងដែរ» យី កក្កដា បានប្រាប់សូវរីន។ លោកបានបន្តទៀតថា៖ « ភាគច្រើនរូបគំនូរដែលខ្ញុំគូរលើជញ្ជាំងតែងតែមានសាច់រឿង ដូចជាវប្បធម៌ សិល្បៈ បច្ចុប្បន្នកាល អតីតកាល និងអនាគតកាលជាដើម»។
លោក យី កក្កដា
ពីកុមារកំព្រាដែលមានស្រុកកំណើតនៅខេត្តបាត់ដំបង លោក យី កក្កដា ត្រូវបានគេស្គាល់ថាជាសិល្បៈករវ័យក្មេង ដែលមានបច្ចេកទេសគូររូបចម្លែកពីគេ ពោលគឺការគូររូបដោយប្រើដៃទាំងសងខាងក្នុងពេលតែមួយ។ មានវ័យ ត្រឹមតែ ២៣ឆ្នាំ ប៉ុន្តែសិល្បកររូបនេះ មានបទពិសោធន៍តស៊ូក្នុងជីវិតជាច្រើន ទាំងការតស៊ូក្នុងសង្គម និងការរៀនសូត្រការងារសិល្បៈ។ បន្ទាប់ពីកសាងស្នាដៃជាច្រើន ទាំងការរកកម្រៃ និងការស្ម័គ្រចិត្ត សិល្បករ កក្កដា ក៏នឹងមានគម្រោងផលិតជាសៀវភៅរៀបរាប់ពីជីវប្រវត្តិផ្ទាល់ខ្លួន ដើម្បីលើកទឹកចិត្តដល់យុវជនដទៃទៀតឲ្យចេះតស៊ូក្នុងជីវិត បូករួមទាំងគន្លឹះគូរគំនូរផ្ទាល់ខ្លួនរបស់លោកផងដែរ។ ដ្បិតតែមានការគាំទ្រច្រើនគួរសម ប៉ុន្តែកត្តាជីវភាពនៅមិនទាន់មានភាពធូរស្រាលនៅឡើយទេ។ បើទោះជាយ៉ាងនេះក្តី លោកនៅតែបន្តការងារសិល្បៈរបស់លោកមិនដែលរួញរា។ គោលបំណងមួយរបស់ កក្កដា គឺ ការគូរគំនូរឲ្យបានច្រើន ជាប្រយោជន៍ដល់ចំណីចក្ខុរបស់សាធារណជន។ ស្នាដៃមួយរបស់កក្កដាកាលពីឆ្នាំទៅ នៅខេត្តបាត់ដំបង លោកបានគូរគំនូរដោយស្ម័គ្រចិត្តនៅផ្សាររាត្រីបាត់ដំបងដោយដៃទាំងពីរដែលលោកបានរំពឹងថាបានហើយត្រឹមតែប្រមាណ១០ថ្ងៃ ប៉ុន្តែដោយសារភ្លៀងផង ទើបត្រូវពន្យារពេលដល់មួយខែ។ ក្រៅពីអាជីពដែលគេស្គាល់ថា ជាអ្នកគំនូរ លោក យី កក្កដា ក៏មានជំនាញក្នុងការងារសិល្បៈផ្សេងៗទៀត ដូចជា ឌីហ្សាញហាង ដេគ័រផ្ទះ ឬហាងកាហ្វេ និងលេងតន្រ្តីទៀតផង។ ត្រលប់មកផ្លូវ «Alley Way» នេះវិញ តាមរយៈគេហទំព័រទស្សនាវដ្តីសូវរីន កក្កដាក៏បានសម្តែងអារម្មណ៍សប្បាយរីករាយដែលលោកបានឃើញគេថតជាមួយនឹងគំនូរស្នាដៃរបស់លោក រួចបង្ហោះយ៉ាងព្រោតព្រៀតក្នុងបណ្តាញសង្គមផងដែរ៕
Article by VA SONYKA & KEO SONG