ទាំងអស់គ្នាយើងអាចកាត់បន្ថយការប្រើប្រាស់ប្លាស្ទិកដើម្បីការពារសុខភាពភពផែនដី
TRAVEL & LIVING 5 years agoជួនចំខែកក្កដានេះគឺជាទិវាពិភពលោកគ្មានប្លាស្ទិក ក៏ប៉ុន្តែនៅឆ្នាំ២០១៩នេះសំរាមប្លាស្ទិកបានក្លាយជាបញ្ហាដ៏ធំមួយស្របពេលដែលអាស៊ីអាគ្នេយ៍ក្លាយជាធុងសំរាមរបស់ប្រទេសលោកខាងលិចអាមេរិចនិងកាណាដាជាដើម។ បញ្ហានេះបានក្លាយជាហានិភ័យដ៏ខ្ពស់មួយដែលត្រូវបានគេព្រួយបារម្ភខ្លាំងដល់បរិស្ថាននិងសុខភាពភាវរស់ទាំងឡាយ។ ជារៀងរាល់ថ្ងៃថង់ប្លាស្ទិកប្រមាណជាង ដប់លានថង់ត្រូវបានគេប្រើប្រាស់ជាប្រចាំនៅកម្ពុជា នេះបើយោងតាមរបាយការណ៍ពិសេសមួយរបស់មូលនិធិ ACRA ដែលបានចុះផ្សាយកាលពីពេលកន្លងទៅ។ ចំនួនដ៏ច្រើនលើសលប់នេះ បានធ្វើឲ្យអ្នកស្រលាញ់បរិស្ថាននិងស្ថាប័នពាក់ព័ន្ធជាច្រើនទៀតមានការព្រួយបារម្ភខ្លាំង អំពីអនាគតនៃសម្រស់កម្ពុជា។ តើប្លាស្ទិកអាចប៉ះពាល់ដល់សុខភាពមនុស្សនិងបរិស្ថានយ៉ាងដូចម្តេចខ្លះ ទើបបានជាគេបារម្ភពីវាខ្លាំងដល់ថ្នាក់នេះ?
ប្លាស្ទិកអាចធ្វើឲ្យយើងកើតនូវជំងឺមហារីក នៅពេលដែលវាត្រូវកម្តៅព្រះអាទិត្យខ្លាំង។ នៅពេលដែលយើងយកវាទៅដុតចោល វានឹងបញ្ចេញជាតិពុលដែលធ្វើឲ្យខ្យល់កខ្វក់និងបំពុលបរិយាកាស ហើយការបំភាយជាតិគីមីនេះទៀតសោតក៏អាចជះឥទ្ធិពលដល់មនុស្ស សត្វ និងរុក្ខជាតិផងដែរ។ សារជាតិគីមីទាំងនោះក៏អាចចូលទៅបំផ្លាញប្រព័ន្ធភាពស៊ាំ ដែលអាចធ្វើឲ្យយើងងាយទទួលរងនូវមេរោគឱកាសនិយម និងងាយឈឺទៀតផង។ នេះបើតាមការឲ្យដឹងពី លោក សាន ដារ៉ាវីត ប្រធានក្រុមយុវជនសំរាម។
លោក សាន ដារ៉ាវីត
តើត្រូវធ្វើដូចម្តេចដើម្បីឲ្យប្រជាជនកម្ពុជាកាត់បន្ថយការប្រើប្រាស់ប្លាស្ទិកទាំងអស់នេះបាន?
ការបញ្ឈប់ការប្រើប្រាស់ថង់ឬសម្ភារៈប្លាស្ទិក គឺពិតជាពិបាកណាស់ស្របពេលដែលប្រជាជនកម្ពុជាបានបន្សាំរបស់ទាំងអស់នេះក្លាយជាសម្ភារៈដែលត្រូវប្រើប្រាស់ជាចាំបាច់ប្រចាំថ្ងៃរួចទៅហើយ។ កញ្ញា ក្រិច ស្រីនាង សហស្ថាបនិកនៃគម្រោង អេកូឡាយ (Ecolife) បានផ្តល់នូវគន្លឹះក្នុងការកាត់បន្ថយប្លាស្ទិកពីការប្រើថង់ប្លាស្ទិក ជំនួសឲ្យការប្រើប្រាស់នូវថង់ដែលធ្វើពីក្រណាត់ ឬ Eco bag ដើម្បីវេចខ្ចប់ឬដាក់នូវម្ហូបពីផ្សារវិញ។ ការ បញ្ចុះបញ្ចូលអ្នកផ្ទះឲ្យចេះកាត់បន្ថយការប្រើប្រាស់ប្លាស្ទិកក៏ជារឿងមួយដែលមិនងាយស្រួលដែរ ព្រោះថាមានសម្ភារៈប្លាស្ទិកជាច្រើនត្រូវបានពួកគាត់ទំលាប់ប្រើប្រាស់ជាប្រចាំ និងក្លាយជារបស់ដែលងាយស្រួលប្រើសម្រាប់គាត់ទៅហើយ។ ក៏ប៉ុន្តែយើងអាចបញ្ជ្រាបការយល់ដឹងតាមរយៈការផ្តល់ជាចំណេះដឹងសុខភាពសម្រាប់គាត់វិញបាន។ ឧទាហរណ៍ យើងអាចប្រាប់គាត់ថាការប្រើប្រាស់ថង់ប្លាស្ទិកដាក់ទឹកស៊ុបឬរបស់ដែលក្តៅអាចធ្វើឲ្យវាបញ្ជេញសារជាតិពុលប៉ះពាល់ដល់សុខភាពជាដើម។ កញ្ញា ក្រិចស្រីនាង ក៏បានបន្ថែមទៀត ឲ្យចេះ កែច្នៃរបស់របរ ឬសម្ភារៈដែលលែងប្រើប្រាស់នោះឲ្យមានប្រយោជន៍ឡើងវិញ ឬក៏សម្អាតនិងប្រើប្រាស់វាម្តងទៀត ហើយប្រសិនជាអាចយើងគួរតែបរិច្ចាគទៅឲ្យអ្នកផ្សេងដែលកំពុងតែត្រូវការវាឬក៏មានគំនិតច្នៃវា ជាជាងបោះចោល។ មួយវិញទៀតប្រសិនជាអាចយើងគួរតែកុំចំណាយ លើរបស់ណាដែលមិនចាំបាច់ខ្លាំងពេក។
កញ្ញា ក្រិចស្រីនាង
Think Plastic គឺជាទំព័រហ្វេសប៊ុកដ៏ពេញនិយមមួយដែលបានផ្តល់នូវវីដេអូដ៏មានប្រយោជន៍ជាច្រើនពាក់ព័ន្ធជាមួយនឹងការប្រើប្រាស់ប្លាស្ទិកនេះ។ កញ្ញា អាត សុធាវី ជាស្ថាបនិកគម្រោង Think Plastic ត្រូវបាន កោតសរសើរ ពីសំណាក់អ្នកនិយមចូលចិត្តលេងបណ្តាញសង្គមជាច្រើនតាមរយៈវីដេអូអប់រំអំពីប្លាស្ទិកនេះផងដែរ។ តាមរយៈ សូវរីន កញ្ញា អាត សុធាវី បានប្រាប់ថា ការប្រើប្រាស់ប្លាស្ទិក អាចមានផលប៉ះពាល់ទៅដល់សុខភាពមនុស្ស ហើយសំណល់ប្លាស្ទិកក៏អាចប៉ះពាល់ទៅដល់បរិស្ថានលក្ខណៈយូរអង្វែង។ នៅក្នុងជីវភាពរស់នៅប្រចាំថ្ងៃ យើងគ្រប់គ្នាប្រើប្រាស់ប្លាស្ទិកជាច្រើន ប៉ុន្តែយើងអាចចូលរួមកាត់បន្ថយបានដូចជា យកដបទឹកដែលអាចប្រើប្រាស់ឡើងវិញបានដាក់តាមខ្លួន ប្រើថង់ក្រណាត់ និង យកប្រអប់ពេលទៅទិញអាហារខ្ចប់ជាដើម។ ចំពោះម្ចាស់ភោជនីយដ្ឋាន និងហាងកាហ្វេនានា លើកទឹកចិត្តឲ្យប្រើប្រាស់កែវ ដើម្បីដាក់ទឹក និងកាហ្វេពេលដែលភ្ញៀវញាំក្នុងហាង។ ការលើកទឹកចិត្តក្នុងការកាត់បន្ថយប្លាស្ទិកក៏ត្រូវបានលើកទឹកចិត្ត ហើយប្រសិនបើកុំប្រើប្រាស់ប្លាស្ទិកតែម្តងគឺកាន់តែល្អ។
កញ្ញា អាត សុធាវី
កញ្ញា វត្ថា វិច្ឆិកា គឺជាម្ចាស់ហាងលក់គ្រឿងក្រអប់ដែលកែច្នៃពីធម្មជាតិ ដូចជាសាប៊ូធ្វើពីប្រេងដូង និងរបស់របរប្រើប្រាស់ជាច្រើនទៀតដែលមានយីហោឈ្មោះថា «ដៃខ្មែរ»។ កញ្ញា ក៏ជាសហគ្រិនសង្គមមួយរូបដែលបានចូលរួមចំណែកក្នុងការកាត់បន្ថយការប្រើប្រាស់ប្លាស្ទិក ហើយក៏ជាអ្នកស្រលាញ់បរិស្ថានមួយរូបផងដែរ។ ក្នុងនាមជាសហគ្រិនមួយរូប កញ្ញាបានចែករំលែកនូវការយល់ឃើញមួយថា ប្លាស្ទិកគឺជាបញ្ហានៅលើពិភពលោក ហើយយើងគួរតែបណ្តុះគំនិតស្រលាញ់បរិស្ថាន។ ប្រសិនបើយើងមានគំនិតគិតទៅលើរឿងទាំងអស់នោះហើយ នោះមិនមានអ្វីមកអាចរារាំងយើងឲ្យស្វែងរកវិធីដើម្បីកាត់ផ្តាច់ប្លាស្ទិកបាននោះទេ។ មិនថានៅក្នុងអាជីវកម្មឬជីវិតរស់នៅប្រចាំថ្ងៃឡើយ ជាក់ស្តែងនៅក្នុងអាជីវកម្មដៃខ្មែរ និង ហាង Dai Khmer Refill station ស្រាប់ គឺពួកយើងតែងតែរកវិធីធ្វើយ៉ាងណាដើម្បីបំបាត់ប្លាស្ទិកឲ្យបាន ១០០ ភាគរយចេញពីសិប្បកម្មក៏ដូចជាហាងរបស់យើងផ្ទាល់ផងដែរ៕
កញ្ញា វត្ថា វិច្ឆិកា
Article by KEO SONG