CULT វេទិកាដែលប្រមែប្រមូលគ្រប់ម៉ាកយីហោនៃសហគ្រាសសង្គមស្ថិតក្រោមដំបូលតែមួយ
NEWS 5 years ago មានមនុស្សមិនច្រើនឡើយដែលដឹងថា កម្ពុជាមានសហគ្រាសសង្គមជាច្រើនដែលកំពុងតែនាំគ្នាបង្កើតនូវផលិតផល ផ្ទាល់ខ្លួនក្រោមស្លាកយីហោក្នុងស្រុកដែលធ្វើដោយដៃដើម្បី បំពេញនូវតម្រូវការទីផ្សារ។ សហគ្រាសសង្គមធុនតូចទាំងអស់នោះភាគច្រើនសុទ្ធ សឹងតែផលិតនូវគ្រឿងវាយនភណ្ឌ គ្រឿងអលង្ការ គ្រឿងក្រអូបនិងសម្ភារៈដទៃទៀតធ្វើដោយដៃដែល មានគុណភាពមិនចាញ់ផលិតផលដទៃប៉ុន្មានឡើយ។ ក៏ប៉ុន្តែដោយសារតែកង្វះហិរញ្ញវត្ថុ ក្នុងការធ្វើទីផ្សារបានធ្វើឲ្យពួកគេបាត់បង់នូវឱកាសក្នុងការពង្រីកអាជីវកម្មក៏ដូចជាឱកាសក្នុងការផ្សព្វផ្សាយនូវផលិតផលរបស់ខ្លួន។ ដោយសារតែហេតុនេះហើយទើបបានធ្វើឲ្យសហគ្រិនសង្គមបរទេសពីររូប សម្រេចចិត្តបង្កើតនូវវេទិកាទីផ្សារមួយដើម្បីប្រមែប្រមូលនូវស្លាកយីហោតូចៗទាំងអស់នោះ ឲ្យស្ថិតនៅក្រោមដំបូលតែមួយដើម្បីបង្កើតឲ្យមានឱកាសក្នុងការផ្សព្វផ្សាយនូវផលិតផលរបស់ខ្លួនក៏ដូចជាជំរុញទឹកចិត្តសហគ្រិន ដើម្បីបន្តបង្កើតនូវអ្វីដោយខ្លួនឯងផងដែរ។ វេទិកានេះមានឈ្មោះថា ខាល «CULT (Cambodia's Ultimate Lifestyle Trade )» បង្កើតឡើងដោយកញ្ញា ខេធី នីកូឡាស (Katia Nicolas) និងដៃគូមួយរូបទៀត តាំងពីពាក់កណ្ដាលឆ្នាំ ២០១៦ មក។
ខេធី ដែលជាអ្នករចនាម៉ូដជនជាតិបារាំងនិងធ្លាប់ជានិស្សិតផ្នែកបរិស្ថានមួយរូបផងនោះបានបង្កើតនូវស្លាកយីហោផ្ទាល់ខ្លួនមួយនៅកម្ពុជាដែលមានឈ្មោះថា «Good Krama»។ តាមរយៈស្លាកយីហោនេះហើយដែលបានធ្វើឲ្យកញ្ញាខេធី ប្រឡូកក្នុងវិស័យហ្វេសហ្សិននៅកម្ពុជាកាន់តែជ្រៅហើយបានធ្វើឲ្យកញ្ញាបានដឹងថា មានស្លាកយីហោសម្លៀកបំពាក់និងគ្រឿងវាយនភណ្ឌតូចៗជាច្រើនទៀតដែលកំពុងតែលាក់ខ្លួនគ្រប់ទីកន្លែងនិងបានឃើញពីសក្តានុពលនៃផលិតផលទាំងអស់នេះហើយទើបសម្រេចចិត្តបង្កើត «CULT» នេះឡើង។ យ៉ាងណាមិញដោយសារតែការវិលត្រលប់ទៅអ៊ឺរ៉ុបវិញ ការរៀបចំព្រឹត្តិការណ៍នេះនឹងត្រូវផ្ទេរឲ្យ ខារ៉ូឡា ក្រេន (Carola Krainz) ជាអ្នករៀបចំកម្មវិធីបន្តទៀត។
CULT គឺជាកម្មវិធីមួយបង្កើតឡើងជាផ្សារ ក្នុងគោលបំណងដើម្បីឲ្យសហគ្រាសសង្គមតូចៗ ក៏ដូចជា អង្គការនិងស្ថាប័នសង្គមក្នុងស្រុកជាច្រើនទៀតឲ្យមានឱកាសដើម្បីតាំងបង្ហាញ និងដាក់លក់នូវផលិតផលរបស់ខ្លួន។ កម្មវិធីនេះបង្កើតឡើងដោយមានការចូលរួមពីសំណាក់សហគ្រាសសង្គមដែលផលិតនូវសម្លៀកបំពាក់ កន្សែង កូនតុក្កតាតូចៗ គ្រឿងអលង្ការ និង គ្រឿងក្រអូបផ្សេងៗទៀត មិនតិចជាង១០ ម៉ាកឬយីហោឡើយ ។ ការបង្កើតជាកម្មវិធីផ្សារនេះឡើងបានកៀរគរនូវអតិថិជនជាច្រើនដែលភាគច្រើនសុទ្ធសឹងតែជាបរទេសដែលនិយមចូលចិត្តប្រើប្រាស់នូវផលិតផលធ្វើដោយដៃបានចូលរួមគាំទ្រនូវអ្វីដែលស្នាដៃផលិតដោយកូនខ្មែរ។ បួនដងក្នុងមួយឆ្នាំ CULT បង្កើតនូវប្រធានបទផ្សេងៗគ្នាស្របទៅតាមថ្ងៃដែលបានប្រព្រឹត្តិដូចជាថ្ងៃបុណ្យណូអែល ថ្ងៃទិវាសិទ្ធិនារីអន្តរជាតិ នឹងពាក់កណ្តាលឆ្នាំជាដើម។ កាលពីថ្ងៃទី ២៧ ខែមេសា CULT បានប្រព្រឹត្តិទៅនៅ វិចិត្រសាលក្បាច់ ក្រោមប្រធានបទ « It’s Fashion revolution» ដែលមានមនុស្សចូលរួមយ៉ាងច្រើនកុះករ ហើយក្នុងនោះផងដែរក៏មានកម្មវិធីកំសាន្តសប្បាយ ការសម្តែងសិល្បៈរបស់សិល្បករក៏ដូចជាការបង្ហាញនូវស្នាដៃរបស់អ្នករចនាម៉ូដល្បីៗនៅកម្ពុជាជាច្រើនរូបទៀតផង។
លោក ធឿន ចន្ថា ដែលជាម្ចាស់យីហោម៉ាក Angkor Bullet Jewelry ជាសហគ្រាសផលិតគ្រឿងអលង្ការធ្វើពីគ្រាប់កាំភ្លើង ដែលធ្លាប់បានដាក់តាំងលក់បង្ហាញនូវផលិតផលខ្លួនក្នុងវេទិកា CULT នេះបានប្រាប់សូវរីនឲ្យដឹងផងដែរថា « CULT បានជួយផ្សព្វផ្សាយនិងជួយស្វែងរកទីផ្សារ សម្រាប់ផលិតករដែលផលិតនៅតាមសហគមន៍របស់យើងឲ្យគាត់មានការងារធ្វើបន្ថែម ហើយ CULT ក៏បានជួយស្វែងរកអតិថិជនថ្មីៗឲ្យយើងបន្ថែមទៀតផងដែរ៕»
Article by KEO SONG