Speakeasy មិនមែនមានន័យថាបារដែលស្រួលនិយាយគ្នាទេ តែវាគឺជាបារដែលបើកលក់គ្រឿងស្រវឹងបែបសម្ងាត់ និងលាក់បាំងដែលមើលពីខាងក្រៅទៅសឹងតែមិនដឹងថាជាបារ ឬកន្លែងជួបជុំជជែកគ្នាឡើយ។ Speakeasy ខ្លះមានតែទ្វារតូចមួយ គ្មានផ្លាក គ្មានឈ្មោះ ឬឡូហ្កូសម្គាល់ណាមួយឡើយ រហូតដល់គេបើកទ្វារ ចូលតាមច្រកសម្ងាត់ របស់បារនោះទើបបានគេឃើញមានការតុបតែង ជាលក្ខណៈបារ មានភ្លើងពណ៌ កន្លែងអង្គុយលេង កន្លែងច្រៀងរាំអមជាមួយនឹងការចាក់ភ្លេងតាមទំនោរបាររបស់គេ។ ខ្លះមានទីតាំងនៅក្នុងផ្លូវតូចដែលមិនសូវមានមនុស្សឆ្លងកាត់ច្រើន ខ្លះទៅនៅក្នុងហាងកាត់សក់ ឬហាងលក់សម្ភារផ្សេងៗ ហើយខ្លះទៀតក៏នៅក្រោមដីជាដើម។ Speakeasy បារខ្លះក៏បានបម្លែងខ្លួនជាភោជនីយដ្ឋានបម្រើម្ហូបជាច្រើនមុខក៏មាន។ Speakeasy គឺជាបារដែលមនុស្សទូទៅពិបាករក ហើយអ្នកដែលបានស្គាល់ ភាគច្រើនគឺគេដឹងតាមគ្នា ឬជាអ្នកដែលនិយមចូលចិត្តរុករកកន្លែងប្លែកៗ។ ក៏ប៉ុន្តែនៅក្នុងសម័យ អ៊ីនធើណែត នេះគេហាក់មិនពិបាករកឡើយ ព្រោះបារដែលមានលក្ខណៈជា Speakeasy ខ្លះបានផ្សព្វផ្សាយនៅក្នុងបណ្ដាញសង្គមនិងអ៊ីនធើណែតជាដើម។
Image Courtaesy: Menaka Lounge
Speakeasy មានដើមកំណើតនៅប្រទេសអាមេរិកក្នុងអំឡុងឆ្នាំ ១៩២០-១៩៣៣ ដែលកាលនោះគ្រឿងស្រវឹងត្រូវបានហាមឃាត់ប្រើប្រាស់ ហើយបារនេះក៏ត្រូវបានបង្កើតឡើងដោយដាក់លក់គ្រឿងស្រវឹងលក្ខណៈខុសច្បាប់។ ក៏ប៉ុន្តែរហូតមកដល់បច្ចុប្បន្ននេះ Speakeasy បានក្លាយជាគំរូម៉ូតបារមួយដ៏ពេញនិយមនៅទូទាំងពិភពលោក មិនថានៅ អាមេរិក បារាំង ឬប្រទេសសឹង្ហបុរីឡើយ ហើយឥឡូវនេះក៏បានហូរចូលមកកម្ពុជាដោយសម្ងំលាក់ខ្លួននៅក្រុងភ្នំពេញនិង ខេត្តសៀមរាប ហើយកំពុងតែស្រូបទាញប្រជាប្រិយភាពយ៉ាងខ្លំាងពីសំណាក់ភ្ញៀវទេសចរជាតិ និង អន្តរជាតិជាច្រើនផងដែរ។ សូវរីនសូមណែនាំបារជាលក្ខណៈ Speakeasy មួយចំនួនដែលមានវត្តមាននៅក្រុងភ្នំពេញដូចជា៖ Batt Bong, Underground, Long After Dark និងនៅសៀមរាបដូចជា Menaka Lounge ជាដើម៕
Article by KEO SONG