Sovrin
Sovrin
ខែភទ្របទជាខែដែលប្រជាពលរដ្ឋខ្មែរទូទាំងប្រទេសម្នីម្នាទៅវត្តអារាមនានាដើម្បីប្រារព្ធពិធីបុណ្យ កាន់បិណ្ឌនិងភ្ជុំបិណ្ឌដែលជាទំនៀមទម្លាប់ប្រពៃណីតាំងពីយូរលង់ណាស់មកហើយ។ មុនពេលទៅវត្ត ប្រជាជនខ្មែរយើងនៅតាមភូមិស្រុកនានានិយមវេចអន្សមភ្ជុំ ព្រមទាំងនំបត់នំគមដើម្បីទៅវត្តប្រគេនព្រះ សង្ឃអមជាមួយចង្ហាន់បង្អែមចម្អាបផ្សេងៗតាមការនិយមរៀងខ្លួនៗ។ ដោយឡែកនៅប៉ែកខាងស្រុកបាភ្នំ និង ស្រុកកំពង់ត្របែកខេត្តព្រៃវែង និង នៅខេត្តស្វាយរៀងឯណោះវិញ អ្នកស្រុកមានទម្លាប់វេចនំពិសេស ម្យ៉ាងដែលល្បីប្រចាំតំបន់ទាំងពីរនេះ ដែលពួកគាត់នាំគ្នាហៅតៗគ្នារត់មាត់ថា «នំត្នោតអង្ករ»។ តោះ មក ស្តាប់អ្នកស្រុកព្រៃវែងណែនាំពីគ្រឿងផ្សំ និងវិធីធ្វើនំខាងលើទាំងអស់គ្នា!
លោក សុភ័ក្រ មានស្រុកកំណើតនៅភូមិតាប្រុយ ឃុំព្រៃពោន ស្រុកកំពង់ត្របែក ខេត្តព្រៃវែង ដែលចេះ រូបមន្តធ្វើនំនេះតពីម្តាយបង្កើតរបស់លោកបានរៀបរាប់ថា គ្រឿងផ្សំសំខាន់ៗដើម្បីចម្អិននំត្នោតអង្កររួមមាន ត្នោតទំមួយផ្លែឬពីរផ្លែ (អាស្រ័យតាមទំហំផ្លែត្នោត) អង្ករដំណើប ១០កំប៉ុង ដូងទុំចំនួនពីរផ្លែ (ច្របាច់យកខ្ទិះ) ស្ករស ១គីឡូក្រាម អំបិល ១ស្លាបព្រាបាយ និង ស្លឹកកំពូលត្នោត (ហាល និងច្រៀកសម្អាតរួច) ប្រើសម្រាប់វេចខ្ចប់។ ប៉ុន្តែនៅតំបន់ខ្លះក៏គេប្រើស្លឹកចេកសម្រាប់វេចជំនួសស្លឹកត្នោតដូចនំអន្សមធម្មតាដែរ។
ចំពោះវិធីធ្វើដំបូងត្រូវយកខ្ទិះដូងមកកូរឲ្យឡើងប្រេងឈ្ងុយ ទើបសឹមដាក់ម្សៅត្នោត (ផ្លែត្នោតទុំច្របាច់ ឬកោសយកសាច់) ដែលច្របាច់រួចចូលគ្នាហើយកូរវាឲ្យសព្វល្អ។ បន្ទាប់មកត្រូវដាក់អង្ករដំណើបចូល និងកូរវាឲ្យដាច់ទឹក។ បន្ទាប់មកទៀត ត្រូវយកស្ករស និងអំបិលបង់ចូលទៅក្នុងល្បាយម្សៅត្នោត ដោយកម្តៅនឹងភ្លើងកូរច្របល់ឲ្យសព្វសិន រួចទើបយកអង្ករដែលត្រាំទុកចាក់ចូលល្បាយម្សៅត្នោតនោះ។
គេបន្តកូរល្បាយនោះរហូតឡើងស្អិតរមួត ទើបដាក់ចុះយកមកវេចជាអន្សមច្រកនឹងស្លឹកត្នោតដែលបានរៀបចំរួចស្រេច។ ក្រោយពេលវេចហើយ គេតម្រៀបនំទាំងនោះ ក្នុងឆ្នាំងស្ងោរដែលមានទ្រាប់ស្លឹកត្នោតឬស្លឹកល្ហុង និងរាយស្លឹកទាំងនោះគ្របពីលើថែមទៀតផង។ ដើម្បីចម្អិននំឲ្យបានឆ្អិនល្អ ត្រូវស្ងោរទុករយៈពេលប្រមាណពីរម៉ោងកន្លះ (យូរឬឆាប់អាស្រ័យលើចំនួននំដែលបានវេច) សឹមស្រង់ចេញ។
នៅពេលស្រង់នំ ចៀសវាងការបន្ថយភ្លើង ព្រោះបើពុំដូចនោះទេ នំនឹងចូលទឹក ហើយរក្សាទុកពុំបានយូរឆាប់ខូចផ្អូម ហើយថែមទាំងបណ្តាលឲ្យសាច់នំរីកហូបមិនឆ្ងាញ់ឡើយ។ សូមបញ្ជាក់ត្រង់ចំណុចមួយទៀត ដើម្បីធ្វើឲ្យនំត្នោតអង្ករមានរសជាតិឆ្ងាញ់គួរឲ្យចង់ទទួលទាននោះ គឺមិនត្រូវប្រើស្ករត្នោតជំនួសស្ករសទេ ព្រោះអ្នកស្រុកព្រៃវែងអះអាងថា ស្ករត្នោតពិបាកស្ងោរនំ ធ្វើឲ្យនំត្នោតអង្ករមិនសូវរីក និងស្វិតល្អទេហើយរសជាតិរបស់វាក៏ប្រែប្រួលខុសពីរូបមន្តដើមដែរ។ ម្យ៉ាងវិញទៀត ដើម្បីវេចនំអន្សមបានណែនជិតល្អ គេត្រូវ អនុវត្តតាមរបៀបក្បួនខ្នាតនៃការចងចំណងពីបុរាណរបស់អ្នកស្រុកផ្ទាល់ រីឯខ្សែចំណងដែលគេនិយម ប្រើនោះ គឺស្លឹករំចេកហាលថ្ងៃស្ងួត៕
Article by SRIN SOKMEAN
