រឿងរ៉ាវរបស់ម៉ែ ហាក់បានបង្រៀនកូនឲ្យកាន់តែរឹងមាំនិងចេះតស៊ូនៅក្នុងជីវិតថែមមួយកម្រិតទៀត
NEWS 5 years ago ពេលកូនជួបឧបសគ្គក្នុងជីវិតម្ដងៗ ហើយក្រលេកមកមើលអ្នកម្តាយនៅផ្ទះ ទើបកូនដឹងថាម៉ែបានតស៊ូដល់កម្រិតណា ម៉ែលំបាកប៉ុណ្ណា ម៉ែមានសម្ពាធយ៉ាងណា ក៏ប៉ុន្តែម៉ែនៅតែរឹងមាំ ហើយម៉ែនៅតែជាមនុស្សដែលតែងតែលើកទឹកចិត្តកូនជានិច្ចបើទោះបីជាមានពេលខ្លះកូនបានធ្វើទង្វើមិនគប្បីដាក់ម៉ែយ៉ាងណាក្តី។ ម៉ែពិតជាព្រះរស់ឈ្មោះម្តាយមួយអង្គដែលតែងតែសន្ដោសប្រណី ផ្តល់ដំបូន្មានថ្មីៗ បង្រៀនកូនគ្រប់អ្វីៗ និងជាដួងច័ន្ទបំភ្លឺផែនដីរបស់កូនៗជានិច្ចកាល។ កូនពិតជាមានមោទកភាពណាស់ និងពិតជាចង់ដឹងពីរឿងរ៉ាវនៃការតស៊ូរបស់អ្នកម៉ែដែលបានហែលកាត់កន្លងមកណាស់ ហើយពិតជាចង់រៀនសូត្រពីបទពិសោធន៍របស់អ្នកម្តាយណាស់។ តើម៉ែអាចនិទានប្រាប់កូនផងបានទេ?
«និទានម៉ែ» គឺជាសៀវភៅលើកទឹកចិត្តថ្មីរៀបរាប់អំពីរឿងរ៉ាវរបស់ម៉ែតាំងពីកុមារភាព រហូតដល់ម៉ែបានចិញ្ចឹមបីបាច់ថែរក្សាកូនលុះដល់ជីវិតចុងក្រោយ។ ចំណងជើងថ្មីនេះជាស្នាដៃនិពន្ធរបស់អ្នកនិពន្ធវ័យក្មេង តុន ច័ន្ទរិទ្ធិ ដែលជាម្ចាស់ស្នាដៃសៀវភៅលើកទឹកចិត្ត «អ្នកពិតជាពិសេស តោះ!ទៅមុខទៀត»។ «និទានម៉ែ» ជាសៀវភៅបែបទស្សនវិជ្ជាមួយនិយាយអំពីការតស៊ូ ប្រឹងប្រែង អត់ធ្នត់របស់អ្នកម្តាយគ្រប់រូប ដែលចែកចេញជា បីផ្នែកធំៗ។ ផ្នែកទីមួយអ្នកនិពន្ធបានពិពណ៌នាពីបឋមវ័យរបស់ម្តាយដែលអ្នកម៉ែបានចាប់កំណើតតាំងតែពីលើកដំបូង។ ផ្នែកទីពីរ ច័ន្ទរិទ្ធិ បានរៀបរាប់ពីវ័យកណ្ដាលរបស់អ្នកម្តាយដែលទទួលបន្ទុកធ្ងន់ក្នុងគ្រួសារនិង ចុងក្រោយដំណើរជីវិតរបស់ម៉ែឈានដល់ វ័យចំណាស់ហើយនេះគឺជាផ្នែកទីបីរបស់សៀវភៅ។ លើសពីនេះទៅទៀត ក្នុងសៀវភៅក៏បន្ថែមផងដែរនូវ បណ្ដាំចុងក្រោយ របស់ម៉ែ មុននឹងអ្នកម្ដាយលាកូននៅនាទីចុងក្រោយ។ សៀវភៅដែលមានកម្រាស់ជាង ២០០ ទំព័រនេះ នឹងបកស្រាយនូវអ្វីដែលអ្នកម្ដាយគ្រប់រូបចង់បង្ហាញប្រាប់កូនៗឲ្យបានយល់ពីបំណងម៉ែ ដែលតែងតែចង់ឲ្យកូនៗល្អ។ លើក្របសៀវភៅដែលមានរូបអ្នកម្តាយរបស់ខ្លួនផងនោះ លោក តុន ច័ន្ទរិទ្ធិ បានប្រាប់ឲ្យដឹងថា សៀវភៅនេះបង្កើតឡើងដើម្បីទុកជាអនុស្សាវរីយ៍ដែលខ្លួនបានរស់នៅជាមួយនឹងអ្នកម្តាយជាយូរមកហើយ ម្យ៉ាងក៏ចង់ចែករំលែកនូវទស្សននិងបំណងប្រាថ្នារបស់អ្នកម្តាយទាំងឡាយដើម្បីឲ្យកូនៗបានអាននិងយល់ផងដែរ។ តុន ច័ន្ទរិទ្ធិ បានបន្ថែម៖ «និទានម៉ែ និយាយលម្អិតតាំងពីកំណើតរបស់ម៉ែ ចឹងយើងលើកទឹកចិត្តពួកគាត់ពីកំណើតរបស់ពួកគាត់ រហូតដល់គាត់ជ្រើសរើសដៃគូ និងជីវិតនៅពេលចាស់តើពួកគាត់អាចធ្វើអីខ្លះ។» អ្នកនិពន្ធធ្លាប់រៀនជំនាញអក្សរសាស្រ្តខ្មែរ រូបនេះក៏បានប្រាប់ពីបំណងដែលចង់ឲ្យអ្នកអានមានអារម្មណ៍ថាបាននៅកៀកជាមួយនឹងអ្នកម្តាយរបស់ខ្លួននៅពេលដែលបានអានសៀវភៅនេះផងដែរ។
តុន ច័ន្ទរិទ្ធិ
យ៉ាងណាមិញ «និទានម៉ែ» នៅពុំទាន់បានបោះពុម្ពផ្សាយនៅឡើយទេ ក៏ប៉ុន្តែ អ្នកនិពន្ធដែលមានវ័យ ២៣ឆ្នាំ រូបនេះក៏បានបង្ហើបពីគម្រោងចេញផ្សាយសៀវភៅរបស់ខ្លួននៅថ្ងៃដែលអ្នកម្ដាយបានផ្ដល់កំណើតដល់ខ្លួនតែម្ដង ពោលគឺនៅថ្ងៃទី១៣ ខែវិច្ឆិកាខាងមុខផងដែរ។
គួរជម្រាបផងដែរថា តុន ច័ន្ទរិទ្ធិគឺជា អ្នកនិពន្ធដែលចូលចិត្តទំនោរនិយមសរសេរសៀវភៅបែបលើកទឹកចិត្តនិងសៀវភៅទស្សនវិជ្ជាមួយរូបដែលកំពុងតែមានប្រជាប្រិយភាពក្នុងស្រទាប់មិត្តអ្នកអានទាំងឡាយនៅកម្ពុជា។ ច័ន្ទរិទ្ធិ បានសរសេរប្រលោមលោកជាច្រើនចំណងជើង ក៏ប៉ុន្តែគេទើបតែបោះពុម្ពផ្សាយបានតែមួយចំណងជើងប៉ុណ្ណោះគឺ «អ្នកពិតជាពិសេស តោះ! ទៅមុខទៀត»ដែលជាសៀវភៅលើកចិត្តដែលកំពុងតែល្បីល្បាញ។ ជាចុងក្រោយ ច័ន្ទរិទ្ធិ ក៏បានឆ្លៀតសូមអរគុណដល់បណ្តាមិត្តអ្នកអានទាំងអស់ដែលតែងតែនិយមគាំទ្រនូវស្នាដៃរបស់លោកកាលពីពេលកន្លងមកផងដែរ។ តុន ច័ន្ទរិទ្ធិ «ប្រសិនបើគ្មានពួកគាត់ ក៏ខ្ញុំមិនអាចមកដល់ទីនេះហើយក៏មិនមានស្នាដៃថ្មីទៀតដែរ»៕
Article by KEO SONG