Sovrin
Sovrin
«សម័យនិម្មិត» បង្ហាញនូវគោលគំនិតដ៏ចម្បងមួយចំនួននៃការដើរបង្ហាញម៉ូដហ្វេហ្សិនខាងមុខនេះ
FASHION & BEAUTY 5 years ago
កាកសំណល់ គ្រប់ប្រភេទដែលតែងរាយប៉ាយឥតសណ្តាប់ធ្នាប់ពីកន្លែងមួយ ទៅកាន់កន្លែងមួយទៀតបានធ្វើឲ្យសោភ័ណភាព ក៏ដូចជាសម្រស់ដ៏ស្រស់ស្អាតក្នុងទីក្រុង ឬតំបន់ទេសចរណ៍មួយចំនួនត្រូវបានបាត់បង់ស្ទើរទាំងស្រុង ហើយនេះជាកត្តាមួយជះឥទ្ធិពលដល់សត្វពាហនៈ ធម្មជាតិ និងសុខភាពរបស់មនុស្សជាដើម។ ជាក់ស្តែង ក្នុងចំណោមកាកសំណល់ដែលត្រូវបានគេបោះចោលឥតសណ្តាប់ធ្នាប់ទាំងនោះ សុទ្ធសឹងតែអាចយកមកកែច្នៃទៅជាវត្ថុប្រើប្រាស់ផ្សេងៗក្នុងជីវភាពរស់នៅប្រចាំថ្ងៃ ថែមទាំងជាសកម្មភាពដ៏គំរូមួយនៃការចូលរួមថែទាំបរិស្ថានឲ្យស្រស់បំព្រងបានមួយកម្រិតទៀតផងដែរ។
ស្របទៅតាមមូលហេតុខាងលើនេះ បានទាក់ចិត្តឲ្យយុវជនមួយក្រុមដែលមានរហស្សនាមថា «សម័យនិម្មិត» រួមគ្នាប្រមូលកាកសំណល់គ្រប់ទីកន្លែងក្នុងរាជធានីភ្នំពេញ មកច្នៃធ្វើជាឈុតសម្លៀកបំពាក់យ៉ាងប្រណីតប្រមាណជាង ៣០ ឈុត សម្រាប់កម្មវិធីការដើរបង្ហាញម៉ូដហ្វេហ្សិននាពេលខាងមុខនេះ។ «សម័យនិម្មិត» ជាក្រុមយុវជនវ័យក្មេងមានសមាជិកប្រាំនាក់ដោយមាន កញ្ញា ងួន ចាន់ស្រីម៉ា ជាប្រធានក្រុម រីឯ លោក ជា សុធារ៉ា លោក សៅ សារ៉ាត់ លោក ងួនឡេង ម៉េងក័ង និងកញ្ញា ច័ន្ទណារិទ្ធ នារការ ជាសមាជិក ដែលបានបង្កើតឡើងក្នុងឆ្នាំ២០១៩ នេះ។ ថ្វីដ្បិតតែសម័យនិម្មិតទើបតែមានវត្តមានពិតមែន ប៉ុន្តែផ្នត់គំនិតសំខាន់ៗមួយចំនួនរបស់ពួកគេ បានផ្សារភ្ជាប់ទៅនឹងគោលបំណងបួនយ៉ាងដូចជា៖ បញ្ហាបរិស្ថាន ការអភិរក្ស និងការពារសត្វស្លាបក្នុងប្រទេសកម្ពុជា ការបង្ហាញនូវស្នាដៃសិល្បៈ និងការស្វែងរកជំនួយដល់មន្ទីពេទ្យគន្ធបុប្ផា។ ទន្ទឹមនឹងនេះ កញ្ញា ងួន ចាន់ស្រីម៉ា ជាប្រធានក្រុមបានឲ្យដឹងផងដែរថា កម្មវិធីការដើរបង្ហាញម៉ូដហ្វេហ្សិននេះ ជាសារមួយដ៏សំខាន់ដែលចង់បង្ហាញឲ្យប្រជាជនខ្មែរចេះស្រឡាញ់ ថែរក្សា ការពារបរិស្ថាន ចេះទុកដាក់សំរាមឲ្យបានត្រឹមត្រូវ ជាពិសេស កាត់បន្ថយនូវការប្រើប្រាស់ប្លាស្ទិកនេះតែម្តង។ ដោយឡែក ប្រសិនបើយើងបង្វែរអារម្មណ៍មកទស្សនានូវខូឡិកហ្សិននីមួយៗឃើញថាឈុតនីមួយៗច្នៃឡើងក្នុងទម្រង់សត្វស្លាបក្នុងប្រទេសកម្ពុជា។ អត្ថន័យនៃឈុតសម្លៀកបំពាក់នីមួយៗ ជាការអំពាវនាវដល់ប្រជាពលរដ្ឋទាំងអស់ចូលរួមអភិរក្សប្រភេទសត្វស្លាបទាំងអស់ឲ្យបានច្រើន ក៏ព្រោះតែប្រភេទសត្វស្លាបទាំងនោះមានសារៈសំខាន់យ៉ាងខ្លាំងចំពោះប្រព័ន្ធអេកូឡូស៊ីផងដែរ។
សម័យនិម្មិតនឹងប្រារព្ធនូវកម្មវិធីរបស់ខ្លួននាថ្ងៃទី៩ ខែវិច្ឆិកា ឆ្នាំ២០១៩ ខាងមុខនេះ។ យ៉ាងណាមិញ ការចូលរួមកម្មវិធីការដើរបង្ហាញម៉ូតនេះតម្រូវឲ្យអ្នកគាំទ្រទាំងអស់ជាវសំបុត្រចូលរួមក្នុងតម្លៃ២០០០០ រៀល សម្រាប់ថវិកាដែលបានមកពីការលក់សំបុត្រនឹងត្រូវបរិច្ចាគជូនមន្ទីពេទ្យគន្ធបុប្ផា រាជធានីភ្នំពេញ៕
Article by PAN SIVLY
Image Courtesy: OR SEREIROMNIR
