Sovrin
Sovrin
កូនស្រីជាបុគ្គលដែលគួរមានឥរិយាបថល្អនេះហើយជាហេតុដែលគួរមានសាលាវិជ្ជាជីវៈកូនប្រសាស្រី
NEWS 5 years ago
«កូនមានចំណេះដឹង កូនមានសមត្ថភាពដែលអាចទាញកូនឲ្យឡើងទៅកន្លែងខ្ពស់បាន ប៉ុន្តែប្រសិនបើកូនគ្មានសុជីវធម៌ និងឥរិយាបថសមរម្យនោះទេ វានឹងទាញកូនឲ្យធ្លាក់ចុះមកវិញមិនខាននៅថ្ងៃណាមួយ» នេះគឺជាសម្តីរបស់ អ្នកស្រី លឹម មូលីរតនា ដែលកំពុងតែអង្គុយរាបសាទូន្មានទៅកាន់សិស្សស្រីប្រមាណ១០នាក់ក្នុងថ្នាក់រៀនមួយដែលមានតាំងលម្អទៅដោយសម្ភារប្រើប្រាស់ខ្មែរបុរាណរួមជាមួយរូបភាពបង្ហាញអំពីឥរិយាបថរបស់ស្ត្រី៤ទៅ៥ផ្ទាំងលាយឡំនឹងពាក្យស្លោកអប់រំទៅលើសុជីវធម៌ផងដែរ។
ជាមួយបំណងបណ្តុះផ្នត់គំនិតយុវវ័យជំនាន់ក្រោយឲ្យចេះស្រឡាញ់វប្បធម៌ អរិយធម៌ និងប្រកាន់ខ្ជាប់នូវទំនៀមទម្លាប់ប្រពៃណីខ្មែរដ៏ផូរផង់ ពិសេសលើកកម្ពស់ស្ត្រីក្នុងសម័យទំនើបកុំឲ្យជ្រួលជ្រើមជ្រុលនិយមទៅតាមលំហូរចូលវប្បធម៌បរទេស អ្នកស្រី លឹម មូលីរតនា បានបង្កើតសាលាវិជ្ជាជីវៈមួយក្រោមស្លាកយីហោ «សាលាវិជ្ជាជីវៈកូនប្រសាស្រី» ដែលផ្តោតបង្រៀនទៅលើផ្នែកសុជីវធម៌ និងការរៀបចំឥរិយាបថតាមទំនៀមប្រពៃណីខ្មែរយើង។ រយៈពេលបើកដំណើរការសាលាប្រមាណពីរទសវត្សរ៍ នាយិកា និងជាគ្រូបង្រៀនវ័យ៤០ឆ្នាំរូបនេះបានបណ្តុះបណ្តាលសិស្សស្រីច្រើនរាប់មិនអស់ សំខាន់សុទ្ធសឹងជាសិស្សដែលមកពីគ្រួសារអ្នកមានមុខមាត់ក្នុងសង្គមផងដែរ។ «ឪពុកម្តាយមួយចំនួនគិតថាមុខវិជ្ជានេះអាចមិនសំខាន់ ក៏ព្រោះកូនៗរបស់ពួកគេទទួលបានការអប់រំកម្រិតស្តង់ដារនៅសាលាអន្តរជាតិ។ ប៉ុន្តែធាតុពិតការព្រងើយកន្តើយនេះហើយដែលធ្វើឲ្យកូនមានទំនោរតាមវប្បធម៌បរទេស ក្លាយជាមនុស្សឯករាជ្យមិនខ្វល់ពីអ្នកណា មានអត្តចរិតមិនសមរម្យ កាយវិការឆ្គាំឆ្គង ព្រមទាំងសម្តីមិនពីរោះពិសាបាត់បង់នូវអ្វីដែលជាអត្តចរិតកូនខ្មែរដែលជាទីស្រឡាញ់របស់អ្នកផងទាំងពួង»។ អ្នកស្រីលើកឡើងដូច្នេះក្នុងន័យក្រើនរំឭកឲ្យឪពុកម្តាយគ្រប់រូបដែលបញ្ចូនកូនទៅរៀននៅសាលាអន្តរជាតិគប្បីចំណាយពេលអប់រំកូនបន្ថែមនៅផ្ទះជាជាងពឹងផ្អែកលើការអប់រំតែមួយមុខនៅសាលារៀន ព្រោះបើផ្អែកតាមបទពិសោធន៍បង្រៀនកន្លងមកសិស្សភាគច្រើនដែលមានបញ្ហាឆ្គាំឆ្គងសុទ្ធតែជាសិស្សរៀននៅសាលាអន្តរជាតិបើធៀបទៅនឹងសាលារដ្ឋ។
មុខវិជ្ជាសុជីវធម៌និងការរៀបចំឥរិយាបថ អ្នកគ្រូ លឹម មូលីរតនា បង្រៀនតាំងពីរបៀបសំពះ ការស្លៀកពាក់ ឥរិយាបថដេក ដើរ ឈរ អង្គុយ ការហូបចុក ការរៀបចំអត្តចរិត ការប្រើភាសាទំនាក់ទំនង សុជីវធម៌នៅតាមទីកន្លែង រហូតដល់ស្វែងយល់ពីវប្បធម៌អរិយធម៌ ប្រពៃណី និងប្រវត្តិសាស្ត្រខ្មែរផងដែរ។ កំឡុងពេលបង្រៀនជារឿយៗអ្នកគ្រូតែងធ្វើការណាត់ជួបអាណាព្យាបាលដើម្បីពិភាក្សាអំពីការវិវត្តរបស់កូន ក៏ដើម្បីឲ្យឪពុកម្តាយផ្លាស់ប្តូរទម្លាប់ដែលធ្លាប់តែអប់រំកូនមិនស្តាប់រាល់ដងមកជាការអប់រំមួយដែលមានប្រសិទ្ធភាព និងទទួលយកបានទាំងសងខាង។ កន្លងមកសិស្សដែលមករៀននៅសាលាវិជ្ជាជីវៈកូនប្រសាស្រីមានអាយុចន្លោះពី ១១ឆ្នាំដល់ ៣៥ឆ្នាំ សិស្សភាគច្រើនជាស្ត្រីប៉ុន្តែបុរសក៏មានដែរគ្រាន់តែចំនួនតិចជាង។ «ខ្ញុំធ្លាប់ទទួលបានព័ត៌មានពីឪពុកម្តាយមួយដែលគាត់និយាយថា គាត់ពិតជាសោកស្តាយ និងភ្លឺភ្នែកនៅពេលឃើញកូនរបស់គាត់មានអត្តចរិតទៅតែឯងមិនខ្វល់ពីអ្នកណាទាំងអស់ ខណៈគេមានវ័យ២០ឆ្នាំទៅហើយដែលជាវ័យពិបាកពត់លត់ដំបំផុត»។ ជាការពិតដែលវិជ្ជាជីវៈផ្នែកសុជីវធម៌និងការរៀបចំឥរិយាបថអាចចូលរៀនបានគ្រប់វ័យ ប៉ុន្តែបើតាមការឲ្យដឹងពីអ្នកគ្រូ លឹម ម៉ូលីរតនា វ័យចន្លោះពី៧ឆ្នាំ ដល់១០ឆ្នាំ គឺជាវ័យដែលស័ក្តិសម និងងាយអប់រំបំផុត ព្រោះក្មេងក្នុងវ័យនេះរៀនឆាប់ចាប់បាន ហើយកាន់តែសំខាន់ឪពុកម្តាយជាគំរូចម្បងដែលតម្រូវរួមចំណែកក្នុងការអប់រំផងដែរ។
ដោយឡែកងាកមកជជីកសួរអំពីដំណើរដើមទងនៃការបង្កើតសាលាវិជ្ជាជីវៈកូនប្រសាស្រី អ្នកស្រី លឹម មូលីរតនា បានរៀបរាប់យ៉ាងក្បោះក្បាយដូច្នេះ ដោយមានចំណេះផ្នែកធ្វើម្ហូបពីចុងភៅដែលធ្វើការនៅក្នុងភោជនីយដ្ឋានរបស់អ្នកម្តាយ អ្នកស្រីបានបន្តអាជីពជាគ្រូបង្រៀនធ្វើម្ហូបនៅអង្គការមួយក្នុងរាជធានីភ្នំពេញ។ អ្នកស្រីបានវិវត្តខ្លួនក្លាយជាគ្រូបង្រៀនផ្នែកសីលធម៌នៅខណៈពេលដែលអង្គការខ្វះគ្រូបង្រៀនមុខវិជ្ជាផ្នែកនេះ។ ជាគ្រូបង្រៀនពោរពេញដោយទេពកោសល្យខាងផ្នែកមើលចិត្តមនុស្ស ម្យ៉ាងដោយឃើញក្មេងជំនាន់ក្រោយមានបញ្ហាជាមួយគ្រួសារច្រើន ព្រមទាំងចង់ឲ្យក្មេងៗនៅតែរក្សាច្បាប់ទម្លាប់ប្រពៃណីខ្មែរ អ្នកស្រីបានសម្រេចចិត្តលាឈប់ពីអង្គការមកបើកដំណើរការសាលាបណ្តុះបណ្តាលវិជ្ជាជីវៈផ្នែកសុជីវធម៌ និងការរៀបចំឥរិយាបថ ព្រមទាំងមុខវិជ្ជាធ្វើម្ហូបផងដែរ។ «ខ្ញុំបើកសាលានេះឡើងក្នុងគោលបំណងផ្តល់ការអប់រំដល់ក្មេងជំនាន់ថ្មី និងជាចំណែកមួយជួយសង្គមជួយរក្សានូវអ្វីដែលជាទំនៀមទម្លាប់របស់ខ្មែរយើងដោយមិនរំពឹងទាំងស្រុងលើប្រាក់ចំណូលឡើយ»។
ជាចុងក្រោយ អ្នកគ្រូ លឹម មូលីរតនា បានមានមតិផ្តាំផ្ញើដែរថា ចំពោះឪពុកម្តាយដែលឲ្យកូនចូលរៀននៅសាលាអន្តរជាតិគួរគប្បីបន្ថែមការអប់រំនៅផ្ទះទៅលើសុជីវធម៌ និងឥរិយាបថឲ្យបានច្រើន។ ការនិយាយដូច្នេះមិនមែនមានន័យថាសាលាអន្តរជាតិមិនល្អនោះទេ ហើយក៏មិនមែនមានន័យថាឲ្យពួកគេជ្រុលនិយមទៅនឹងវប្បធម៌បុរាណពេកដែរ គ្រាន់តែមិនចង់ឲ្យកូនខ្មែរគ្រប់រូបងប់ងល់ទៅលើវប្បធម៌បរទេសហើយភ្លេចនូវអ្វីដែលជាទំនៀមទម្លាប់ក៏ដូចជាប្រពៃណីរបស់ជាតិសាសន៍ខ្លួន។ រីឯចំពោះមាតាបិតាដែលកូនមានបញ្ហាទាក់ទងនឹងអត្តចរិតមិនសមរម្យឥរិយាបថឆ្គាំឆ្គងអាចមកធ្វើការពិភាក្សា និងឲ្យកូនចូលរៀននៅសាលាវិជ្ជាជីវៈកូនប្រសាស្រីដែលនឹងជួយពង្រឹងបានមួយផ្នែកទៀតផងដែរ។
សាលាវិជ្ជាជីវៈកូនប្រសាស្រីមានទីតាំងស្ថិតនៅលើផ្លូវលេខ ២៨៨ សង្កាត់អូឡាំពិក ក្បែរទៅនឹងសាកលវិទ្យាល័យធនធានមនុស្ស៕
Article by HEM SOKKHIM
