បង្វែរអារម្មណ៍របស់អ្នកមកទស្សនានូវខូឡិកហ្សិនដ៏ប្រណីតពីយុវជនឆ្នើមសម័យនិម្មិត
FASHION & BEAUTY 4 years agoនារាត្រីថ្ងៃទី២៣ ខែវិច្ឆិកា កន្លងទៅថ្មីៗនេះ ក្រុមយុវជនស្ម័គ្រចិត្តមួយក្រុមមានរហស្សនាមថា«សម័យនិម្មិត» និងអ្នកច្នៃម៉ូដដ៏មានប្រជាប្រិយភាពក្នុងវិស័យហ្វេហ្សិនលោកម៉ែន សីហា (Oliva Kong) បានរួមគ្នាបង្កើតនូវទស្សនីយភាពដ៏អស្ចារ្យនៃការដើរបង្ហាញម៉ូដហ្វេហ្សិនស្ថិតក្នុង Diamond Twin Tower កោះពេជ្យ។ ខូឡិកហ្សិនដែលត្រូវបានក្រុមយុវជនទាំង៥រូប និងមានការផ្តល់មតិយោបល់បន្ថែមពីរៀមច្បង Oliva Kong បានច្នៃឡើងនេះសុទ្ធសឹងតែប្រមូលផ្តុំនូវសំរាម និងប្លាស្ទិកនានា ច្នៃជាខូឡិកហ្សិនប្រមាណជាង៣០ឈុតដើម្បីធ្វើការផ្សព្វផ្សាយពីផលប៉ះពាល់នៃការបោះចោលសំរាមឥតសណ្តាប់ធ្នាប់ ក៏ដូចជាការបង្ហាញនូវទិដ្ឋភាពមួយចំនួនទាក់ទងនឹងប្រភពសត្វកម្រក្នុងប្រទេសកម្ពុជាផងដែរ។ ម៉្យាងវិញទៀត ថ្វីដ្បិតតែខូឡិកហ្សិនដ៏ប្រណីតទាំងអស់នេះមានការរចនាពីសំរាម និងប្លាស្ទិកនានាក៏ពិតមែន ប៉ុន្តែសមិទ្ធិផលទាំងនេះបានបង្កប់ទៅដោយអត្ថន័យដ៏ជ្រាលជ្រៅ តួយ៉ាង ប្រជាជនខ្មែរគួរបោះចោលសំរាមឲ្យមានសណ្តាប់ធ្នាប់ និងជាពិសេសអ្នកកំពុងរស់នៅក្នុងតំបន់ដែលមានសត្វកម្រអស់គួររួមគ្នាថែររក្សា និងអភិរក្សពូជសត្វកម្រស្ទើរតែបាត់បង់ឲ្យរស់រានមានជីវិតជាដើម។
ទន្ទឹមនឹងនេះផងដែរ តាមរយៈនៃការដើរបង្ហាញម៉ូដហ្វេហ្សិនពីក្រុមយុវជនស្ម័គ្រចិត្តសម័យនិម្មិត និងអ្នកច្នៃម៉ូដដ៏មានប្រជាប្រិយភាពក្នុងវិស័យហ្វេហ្សិនលោក Oliva Kong សង្ឃឹមថាប្រជាជនខ្មែរនឹងរួមគ្នាសម្អាតបរិស្ថានឲ្យមានសោភ័ណភាពគ្រប់ទីកន្លែង ក៏ដូចការថែរក្សាប្រភពសត្វកម្រក្នុងប្រទេសនឹងមានការរីកចម្រើនថែមទាំងផង។ មិនត្រឹមតែប៉ុណ្ណោះ ថវិកាដែលបានទទួលពីការលក់សំបុត្រចូលរួមនៃកម្មវិធីការដើរបង្ហាញម៉ូដហ្វេហ្សិននឹងផ្តល់ជូនមូលនិធិមន្ទីរពេទ្យគន្ធបុប្ផារាជធានីភ្នំពេញទៀតផង៕
Article by PAN SIVLY
Image Courtesy: សម័យនិម្មិត