សៀវភៅគ្រប់ប្រភេទរាប់ម៉ឺនក្បាលកំពុងស្វាគមន៍ប្រិយមិត្តអ្នកអានក្នុងពិព័រណ៍សៀវភៅ
NEWS 4 years ago នេះជាលើកទី៨ហើយដែលបណ្ណាល័យជាតិបានរៀបចំនូវព្រឹត្តិការណ៍ដ៏ធំសម្បើមនៃពិព័រណ៍សៀវភៅ នាព្រឹកថ្ងៃទី១៣ ខែធ្នូ ក្រោមប្រធានបទ «ផ្តើមក្តីស្រមៃដៃកាន់សៀវភៅ»។ ទន្ទឹមនឹងការតាំងពិព័រណ៍សៀវភៅនេះដែរ គេសង្កេតឃើញមានចម្រុះប្រភេទសៀវភៅជាច្រើនក្បាល តួយ៉ាង ប្រភេទសៀវភៅសម្រាប់កុមារ ប្រភេទសៀវភៅប្រលោមលោក ប្រភេទសៀវភៅតម្រង់ទិស ឬប្រភេទសៀវភៅលើកទឹកចិត្តផ្សេងៗទៀតដែលកំពុងមានការគាំទ្រយ៉ាងខ្លាំងពីសំណាក់យុវជន ឬសិស្សានុសិស្ស ក៏មានវត្តមាននៅទីនោះផងដែរ ជាពិសេស អ្នកអាចយកសៀវភៅរបស់អ្នកដែលមានសភាពល្អមកធ្វើការផ្លាស់ប្តូរជាមួយនឹងប្រភេទសៀវភៅដទៃទៀតបានដោយសេរីថែមទៀតផង។ មិនត្រឹមតែប៉ុណ្ណោះ ចំពោះស្តង់សៀវភៅនីមួយៗដែលមានប្រមាណជាង១៥០ស្តង់នេះក៏មានការលក់បញ្ចុះតម្លៃយ៉ាងពិសេស និងផ្តល់ជាវត្ថុអនុស្សាវរីយ៍ផ្សេងៗជាច្រើនដែលបានទាក់ចិត្តដល់ប្រិយមិត្តអ្នកអានជាទីស្នេហា គ្រប់រូបឲ្យមកកាន់ក្នុងពិព័រណ៍សៀវភៅឲ្យបានកុះករ ដើម្បីងាយស្រួលក្នុងការផ្សព្វផ្សាយនូវអត្ថន័យខ្លឹមសារនានាទាក់ទងនឹងចំណេះដឹងទូទៅជាដើម។
គួរជម្រាបផងដែរថា ពិព័រណ៍សៀវភៅលើកទី៨នឹងប្រព្រឹត្តទៅចំនួនបីថ្ងៃ ពោលគឺចាប់ផ្តើមនៅថ្ងៃទី១៣ ខែធ្នូ ឆ្នាំ២០១៩ រហូតដល់ ថ្ងៃទី១៥ ខែធ្នូ ឆ្នាំ២០១៩ ចាប់ពីម៉ោង៧ព្រឹក រហូតដល់៧យប់ផងដែរ៕
Article by PAN SIVLY