គំនូរឌីជីថលក្នុងរចនាប័ទ្មសិល្បៈបុរាណខ្មែរកំពុងទទួលការបោះសម្លេងពីស្រទាប់យុវវ័យ
NEWS 4 years agoតាមរយៈគំនូរជាច្រើនផ្ទាំងដែលត្រូវបានគូរឡើងដោយវិចិត្រករគ្រប់រូបតែងបង្ហាញនូវអត្តសញ្ញាណ ឬចំណុចសម្គាល់មួយចំនួនដ៏សំខាន់ ដើម្បីបង្ហាញពីផ្នត់គំនិតរបស់ពួកគេទៅកាន់ទស្សនិកជនជាតិ និងអន្តរជាតិ។ ជាក់ស្តែង វិចិត្រករខ្មែរច្រើនរូបកំពុងមមាញឹកយ៉ាងខ្លាំងជាមួយនឹងគម្រោង ឬកិច្ចការផ្សេងៗយ៉ាងច្រើនក្រៃលែង តួយ៉ាង ការគូរគំនូរលើក្រដាស ការគូរគំនូរលើជញ្ជាំង ឬការគូរគំនូរឌីជីថលដែលប្រកបទៅដោយសិល្បៈបុរាណ ឬក្នុងទម្រង់សហសម័យក្នុងការបង្កើតជាសមិទ្ធិផលល្អឯកមួយដែលអាចផ្សព្វផ្សាយដល់មនុស្សជំនាន់ក្រោយអាចយល់ដឹងពីសម្បត្តិវប្បធម៌ ប្រពៃណី និងសិល្បៈដែលជាកេដំណែលតាំងពីបុរាណកាលផងដែរ។
លោក សុត សេរី ជានិស្សិតដែលបានបញ្ចប់ការសិក្សាផ្នែកឌីហ្សាញនៃវិទ្យាស្ថានស៊ីតិក ជាវិចិត្រករគំនូរបែបឌីជីថលរចនាប័ទ្មបុរាណដ៏មានប្រជាប្រិយភាពបំផុតដែលកំពុងឈានមុខបោះសម្លេងយ៉ាងខ្លាំងពីស្រទាប់យុវវ័យ។ ថ្វីដ្បិតតែការសិក្សា និងការងាររបស់លោកមានភាពខុសគ្នាបន្តិចក៏ពិតមែន ប៉ុន្តែគោលបំណង និងក្តីស្រឡាញ់សិល្បៈខ្មែរពីបុរាណកាលមកតែងដក់ជាប់នៅក្នុងដួងចិត្តរបស់លោកជានិច្ច ហើយកិច្ចការទាំងអស់នេះ បានជំរុញទឹកចិត្តលោកយ៉ាងមុតមាំក្នុងការគូរគំនូរនីមួយៗប្រកបដោយប្រណីតភាព និងមានតម្លៃផងដែរ។ ទន្ទឹមនឹងជំនួបជាមួយនឹងវិចិត្រករវ័យក្មេង សេរី បានលើកឡើងផងដែរថា «ខ្ញុំចាប់ផ្តើមគូរគំនូរទាំងពីខ្ញុំនៅកុមារភាពមកម៉្លេះ ហើយសម្រាប់ទំនោរនៃប្រភេទគំនូរដែលខ្ញុំគូរនោះភាគច្រើនគឺប្រភេទរឿងព្រេងនិទានខ្មែរ តួអង្គដែលបានសម្តែងពីបុរាណជាដើម»។ លោកបានបន្តយ៉ាងដូច្នេះថា «អ្វីដែលទាក់ចិត្តខ្ញុំក្នុងការគូរគំនូរប្រភេទនឹងក៏ព្រោះតែខ្ញុំចាំបានថាកាលនឹងសាលារបស់ខ្ញុំគេមានបណ្ណាល័យចល័តសម្រាប់ឲ្យសិស្សខ្ចីសៀវភៅអាន ហើយខ្ញុំក៏បានអានសៀវភៅប្រភេទរឿងព្រេងនិទាននោះ ខ្ញុំក៏បានចាប់ចិត្តជាមួយនឹងសាច់រឿង តួអង្គបុរាណៗ ហើយខ្ញុំក៏ចាប់ផ្តើមរិះរកវិធីសាស្ត្រជាច្រើនសម្រាប់ហ្វឹកហាត់ការគូររបស់ខ្ញុំ»។ មិនត្រឹមតែប៉ុណ្ណោះ ក្រៅពីស្នាដៃនៃការគូរគំនូរជាប្រភេទរឿងនិទាន តួអង្គបុរាណៗមួយចំនួន សេរី ក៏គូរគំនូរដែលទាក់ទងនឹងប្រពៃណីខ្មែរ វត្ថុអនុស្សាវរីយ៍នានា និងឧបករណ៍តន្ត្រីមួយចំនួនដែលមាននៅក្នុងទសវត្សរ៍ទី៦០ថែមទៀតផង។
ម៉្យាងវិញទៀត ស្នាដៃនៃការគូរគំនូរនីមួយៗរបស់វិចិត្រករម្នាក់នេះ ធ្វើឲ្យប្រិយមិត្ត ក៏ដូចជាយុវជនច្រើននឹកឃើញទៅដល់អតីតកាលមួយរំពេចតែម្តង។ ជាក់ស្តែង គំនូរមាន «វារៈឡើងស័ក» ដែលបានរំឮកដល់ថ្ងៃទីបីនៃបុណ្យចូលឆ្នាំខ្មែរប្រពៃណីជាតិ ហើយក្នុងនោះគេសង្កេតឃើញថាសសរដែលមាននៅក្នុងគំនូរនោះ គឺជាសសរបុរាណដែលមានស្ថិតនៅក្នុងវត្តគរ នៃក្រុងបាត់ដំបង។ លើសពីនេះទៅទៀត គំនូរមួយផ្ទាំងដែលមានឈ្មោះថា «បងប្អូនស្រី» ជាប្លង់មួយនៃការសម្តែងរបាំព្រះរាជទ្រព្យ បានរំឭកដល់ព្រះបុត្រីនៃសម្តេចរាជបុត្រីព្រះរៀម នរោត្តម បុប្ផាទេវី ដែលទ្រង់បានយាងសោយព្រះពិរាល័យ កាលពីថ្ងៃទី១៨ ខែវិច្ឆិកា ឆ្នាំ ២០១៩ ផងដែរ។
ឆ្លៀតក្នុងឱកាសនេះដែរ លោក សុត សេរី បានបង្ហាញនូវចំណាប់អារម្មណ៍យ៉ាងដូច្នេះថា អ្នកគូរគំនូរជាច្រើន មិនថាគាត់គូរលើឌីជីថល ឬក្រដាសនោះទេ គួរតែបង្ហាញសមត្ថិភាព និងស្នាដៃរបស់ខ្លួនក្នុងកម្មវិធីនានាឲ្យបានច្រើន ទោះបីស្នាដៃរបស់យើង និងសមត្ថិភាពរបស់យើងនៅមានកម្រិតក៏ដោយគួរតែបង្ហាញឲ្យប្រិយមិត្តបានឃើញ និងទទួលនូវមតិយោបល់របស់អ្នកគាំ ដើម្បីស្ថាបនាខ្លួនឲ្យកាន់តែប្រសើរ»៕
Article by PAN SIVLY