ជម្រើសគុយទាវឆ្ងាញ់ប្រចាំត្រកូលនៃហាងគុយទាវល្បី៥ទីតាំងនៅភ្នំពេញ
TRAVEL & LIVING 4 years ago១. គុយទាវគោកទឹកសៀង និង គុយទាវភ្នំពេញ ភោជនីយដ្ឋានអ៊ុយគុយទាវ
គ្រាន់តែឮឈ្មោះអ៊ុយគុយទាវ មិត្តអ្នកអានច្បាស់ជាអាចកាត់ន័យយល់បានប្រាកដថាភោជនីយដ្ឋាននេះមានជំនាញឯកទេសចម្អិនគុយទាវ ប៉ុន្តែសូមបញ្ជាក់ថាគុយទាវប្រចាំត្រកូលលក់ដាច់បំផុតនៅទីនេះគឺគុយទាវពិសេសម្យ៉ាងដែលមានឈ្មោះថា “គុយទាវគោកទឹកសៀង”។ គុយទាវនេះមានលក្ខណៈពិសេសខុសប្លែកពីគុយទាវណាៗទាំងអស់ត្រង់ថា វាត្រូវបានចម្អិនឡើងដោយការលាយបញ្ចូលរវាងសាច់ជ្រូកចិញ្ច្រាំ និងសាច់ជ្រូកចំណិតស្តើងៗ រួមជាមួយកំណកខ្លាញ់ជ្រូកបំពងស្រួយតូចៗ ច្របល់ចូលជាតិគ្នានឹងរសជាតិទឹកសៀងតែមួយគ្មានពីរប្រចាំហាងលាយនឹងខ្ញី និង ខ្ទឹមបារាំង ដែលជារូបមន្តពិសេសច្នៃប្រតិដ្ឋដោយកូនចៅចិនឈ្មោះ លូ ម៉េង ជាមេចុងភៅប្រចាំហាងដែលមានបទពិសោធន៍ខាងផ្នែកអាហារប្រភេទគុយទាវជាយូរឆ្នាំណាស់មកហើយ។ ទន្ទឹមនឹងនេះ “គុយទាវភ្នំពេញ” ក៏ជាជម្រើសគុយទាវដ៏ឆ្លាតវៃមួយមុខទៀតនៅអ៊ុយគុយទាវផងដែរ ដែលជាអត្តសញ្ញាណគុយទាវបែបអាស៊ីដ៏ល្បីល្បាញចម្អិនដោយមានរួមបញ្ចូលសាច់ចម្រុះជាច្រើនប្រភេទ រួមមាន សាច់ជ្រូកចិញ្រ្ចាំ ឆ្អឹងស៊ុប បាក់សៀក សាច់បង្គា និង គ្រឿងក្នុងជ្រូក។ គុយទាវទាំងពីរប្រភេទនេះមាននៅគ្រប់សាខាទាំងអស់របស់ហាងអ៊ុយគុយទាវ។
គុយទាវគោកទឹកសៀងគុយទាវភ្នំពេញ
២. គុយទាវកន្សោមកូន អាហារដ្ឋានអូរប្ញស្សី
ហាងគុយទាវអូរប្ញស្សីជាអាហារដ្ឋានដែលមានឯកទេសខាងគុយទាវនិងមីស៊ុបរាប់ទសវត្សរ៍មកហើយប្រចាំទីក្រុងភ្នំពេញ តាំងពីភ្នំពេញនៅមានឈ្មោះជារដ្ឋធានីនៅឡើយម្ល៉េះ ពោលគឺបើកអាជីវកម្មលក់គុយទាវតាំងពីឆ្នាំ១៩៨១ មកម្ល៉េះ។ នៅទីនោះ មានលក់ គុយទាវឆ្អឹងស៊ុប ប្រហិតសាច់គោសុទ្ធ គ្រឿងក្នុង ប្រហិតសាច់ជ្រូក ឬ បាក់សៀក មីគាវ និងជម្រើសជាច្រើនប្រភេទទៀត។ អ្វីដែលរឹតតែពិសេសនោះ គុយទាវអូរប្ញស្សី សព្វថ្ងៃដែលធ្លាប់ជាអាជីវកម្មលក្ខណៈគ្រួសារខ្នាតតូចបានធ្វើទំនើបអាជីវម្មរបស់ខ្លួនក្លាយជាភោជនីយដ្ឋានដែលមាននិមិត្តសញ្ញាពាណិជ្ជកម្មច្បាស់លាស់ដែលមានរូបចានគុយទាវអក្សរចិននិងចង្កឹះមួយគូទ្រអក្សរ Orussey Noodle Restaurant ជាសម្គាល់។ ហាងនេះបានបន្ថែមប្រភេទគុយទាវរសជាតិថ្មីសម្រាប់ពេលរសៀលដែលលោកអ្នកគួរសាកល្បង ក្នុងនោះរួមមាន គុយទាវផាក់ឡូវ ៥មុខពិសេស គុយទាវកន្សោមកូន និង គុយទាវសាច់ស្រួយប្រចាំហាង។ លោកអ្នកអាចរកទទួលទានបាននៅក្នុងចំណោមសាខាទាំង៣ គឺ សាខាដើម ផ្លូវទេពផន ទល់មុខផ្សារអូរប្ញស្សី សាខាទីពីរ ផ្លូវហ្សាលដឺហ្គោលកែងនឹងផ្លូវសុកហុក និង សាខាទីបី ទើបនឹងបើកថ្មី កែងស្តុបស្រែអំបិល ផ្លូវត្រសក់ផ្អែម។
គុយទាវផាក់ឡូវ ៥មុខពិសេស
៣. គុយទាវឡាវ និង គុយទាវខពោះគោ ហាងគុយទាវទសវត្សរ៍ ៦០
បើនិយាយដល់គុយទាវឡាវ លោកអ្នកច្បាស់ជានឹកឃើញដល់ទឹកដីប្រទេសឡាវដែលជាប្រទេសជិតខាងព្រំប្រទល់ខាងជើងប្រទេសកម្ពុជាយើងជាមិនខាន ព្រោះទេសចរខ្មែរយើងដែលទៅដល់ទីនោះ កម្រថារំលងមិនសាកល្បងអាហារប្រពៃណីអត្តសញ្ញាណប្រទេសនោះណាស់។ ប៉ុន្តែគុយទាវនេះក៏ជាអាហារពេញនិយមមួយមុខដែររបស់អ្នកស្រុកស្ទឹងត្រែង ជាប់ព្រំដែនសីមាឡាវ។ ដោយសារកិត្យានុភាពមិនចេះរីងស្ងួតរបស់គុយទាវប្រចាំតំបន់មួយមុខនេះ ទើបហាងគុយទាវទសវត្សរ៍ទី៦០ បានសម្រិតសម្រាំងនូវរសជាតិដើមនៃគុយទាវឡាវនេះមកបម្រើអតិថិជនរស់នៅក្រុងភ្នំពេញដែលពេញនិយម ឬ ចង់សាកល្បងទទួលទានវា។ ក្រៅពីគុយទាវឡាវដែលប្លែកខុសពីគុយទាវធម្មតា ត្រង់រសជាតិទឹកស៊ុប និង ការទទួលទានរួមជាមួយបន្លែស្រស់ស្រដៀងខគោនោះ ហាងដ៏មានប្រជាប្រិយភាពតាំងពីឆ្នាំ១៩៩៩នេះ ក៏មានគុយទាវពិសេសមួយប្រភេទទៀតដែរ នោះគឺ គុយទាវខពោះគោ រូបមន្តដើមរបស់អ្នកស្រុកមេមត់ ខេត្តត្បូងឃ្មុំ។ គុយទាវខពោះគោនៅទីនោះមានលក្ខណៈពិសេសត្រង់ថាគឺ មានក្លិនស្រាលប្រហើរ មិនសូវធុំក្លិនគោនិងគ្រឿងខគោខ្លាំងពេកនោះទេ ព្រោះមានប្រើមើមត្រាវកាត់បន្ថយក្លិនឆួលខ្លាំង ទើបធ្វើឲ្យរសជាតិពេលទទួលទានទៅមិនងាយទ្រលាន់។ ហាងគុយទាវទសវត្សរ៍៦០ មានបីសាខា គឺ សាខាដើម កែងផ្លូវចម្រុះជ្រូកជាប់ស្ថានទូតចិន សាខាទីពីរ ស្ថិតនៅកោះពេជ្រ និង សាខាទីបី ស្ថិតនៅផ្សារទំនើប Eden Mall ផ្លូវបឹងកក់ ។
គុយទាវឡាវគុយទាវខពោះគោ
៤. គុយទាវបាត់តាឡិត ហាងគុយទាវយាយវ៉ែនតា
បាត់តាឡិត ជាឈ្មោះប្រហិតអ្នកស្រុកបាត់ដំបងមួយបែបដែលច្នៃចេញពីពងទាស្រោបពោះវៀន ដែលអាចរកបានតែមួយកន្លែងគត់នៅទីក្រុងភ្នំពេញយើងសព្វថ្ងៃនេះ គឺនៅហាងគុយទាវយីហោ “គុយទាវពងទាយាយវ៉ែនតា” ម្តុំផ្សារទួលទំពូង ដែលអតិថិជនប្រចាំហាងនោះនិយមកុម្ម៉ង់ទទួលទានជាងគេបំផុត។ កាលដើមឡើយ គុយទាវលក់ទាយាយវ៉ែនតានេះគ្រាន់តែជាអាហារចិញ្ចើមថ្នល់តែប៉ុណ្ណោះ ប៉ុន្តែដោយសារតែកំណើនអតិថិជនឥតឈប់ឈរពីមួយថ្ងៃទៅមួយថ្ងៃតាមរយៈការផ្សព្វផ្សាយពីមាត់មួយទៅមាត់មួយ និង តាមរយៈការផ្សព្វផ្សាយតាមបណ្តាញសង្គមផងនោះ សព្វថ្ងៃគុយទាវពងទាយាយវ៉ែនតាបានប្រែនក្លាយជាហាងតូចមួយ ដែលទើបតែផ្លាស់ប្តូរទីតាំងមកពីទីតាំងចាស់ផ្លូវ៤៤០ ខាងកើតផ្សារ នៅថ្ងៃទី១២ ខែមករា ឆ្នាំ២០២០ នេះទេ។ អាសយដ្ឋានហាងថ្មី គឺ ស្ថិតនៅតាមបណ្តោយផ្លូវលេខ ២៥៦ ផ្លូវទីបីខាងត្បូងផ្សារទួលទំ ពូង។ គុយទាវបាត់តាឡិតនេះមានតម្លៃចន្លោះពី៦០០០រៀល ទៅ៨០០០រៀល តែប៉ុណ្ណោះ ក្នុងមួយចាន។
៥. គុយទាវប្រហិតត្រីស្លាត ហាងគុយទាវហាវ៉ៃ
ត្រីស្លាតជាប្រភេទត្រីទឹកសាបរាងសំប៉ែតស្តើងដែលប្រជាជនខ្មែរតាំងពីដើមរៀងមករាប់ចូលជាប្រភេទត្រីមានតម្លៃ ។ ក្នុងពេលបច្ចុប្បន្ននេះ ក្រៅពីការទិញត្រីស្លាតដែលគេកោសសាច់ភ្លាមផ្ទាល់ពីទីផ្សារយកមកចម្អិនបរិភោគដោយខ្លួនឯងនៅផ្ទះនោះការស្វែងរកប្រហិតត្រីស្លាតសុទ្ធទទួលទាននៅតាមហាងគឺជារឿងពិបាកបន្តិចហើយ ព្រោះ សព្វថ្ងៃដោយសារតែតម្លៃត្រីស្លាតកើនឡើងថ្លៃ ហាងខ្លះប្រើត្រីស្លាតលាយនឹងត្រីផ្សេងៗទៀត ដូចជា ត្រីក្អែក យកមកច្នៃ ធ្វើជាប្រហិត ហើយជួនកាលអាចលាយនឹងសារធាតុគីមីធ្វើឲ្យសាច់ប្រហិតស្វិតហើយទុកបានយូរ។ ដោយឡែក សម្រាប់ហាងគុយទាវប្រហិតត្រីស្លាតហាវ៉ៃវិញ គុយទាវប្រហិតត្រីស្លាតជាគុយទាវប្រចាំត្រកូល ហើយមានរូបត្រីស្លាតជានិមិត្តសញ្ញាសម្គាល់អាជីវកម្មនេះថែមទៀតផង។ សៃព្រែហាងគុយទាវនេះបានបញ្ជាក់ប្រាប់សូវរីនថា នៅទីនេះប្រើតែប្រហិតត្រីស្លាតសុទ្ធលេខ១ដែលទិញពីម៉ូយផ្ទាល់អស់រយៈពេលជិត៣០ឆ្នាំមកហើយ ព្រោះហាងនេះបើកដំណើរការតាំងពីឆ្នាំ១៩៩៣ម្ល៉េះ។ ប្រហិតត្រីស្លាតសុទ្ធមានសាច់ស្វិតពីធម្មជាតិ និង រសជាតិឈ្ងុយឆ្ងាញ់ជាប់មាត់ គួបផ្សំនឹងរសជាតិទឹកស៊ុបបែបចិនថ្វីដៃជើងចាស់ទៀតរឹតតែមានឱជារសក្រៃលែង ធ្វើឲ្យអតិថិជនមកទទួលទានម្តងហើយម្តងទៀតមិនចេះជិនណាយ។ ហាងនេះស្ថិតនៅជាប់អតីតរោងភាពយន្តហាវ៉ៃ ខាងកើតផ្សារធំថ្មី ផ្លូវលេខ១៣០។
Article by SRIN SOKMEAN