អតីតសិស្សអង្គការ PSE ម្នាក់សម្រេចមហិច្ឆតាបង្កើតភោជនីយដ្ឋានសួនមេអំបៅដំបូងបង្អស់លើទឹកដីសៀមរាបអង្គរ
NEWS 4 years agoកន្លងមក ប្រិយមិត្តអ្នកអានច្បាស់ជាធ្លាប់ឃើញច្រើនដងមកហើយនូវគំនិតនៃការបង្កើតភោជនីយដ្ឋានបែបផ្ទះឈើដំបូលប្រក់ក្បឿងតាមលំនាំស្ថាបត្យកម្មប្រពៃណីខ្មែរ ឬបែបជាសំណង់វីឡាសម័យអាណានិគមបារាំង ឬជាលក្ខណៈភោជនីយដ្ឋានមានខ្ចុះអង្គុយលេងដំបូលប្រក់ស្បូវបែបជនបទស្រុកស្រែស្ថិតនៅពាសពេញទាំងក្នុងតំបន់ទីរួមខេត្ត និងទាំងតំបន់ជាយក្រុងសៀមរាបផងដែរ។ យ៉ាងណាមិញ លោក ឌុក ដេត អតីតសិស្សផ្នែកចុងភៅនៃអង្គការដើម្បីភាពញញឹមនៃកុមារ (Pour un Sourire d' Enfant) ហៅកាត់ថាអង្គការ PSE ដែលជាអង្គការបារាំងនៅកម្ពុជាល្បីឈ្មោះ ខាងបណ្តុះបណ្តាលជំនាញវិជ្ជាជីវៈដល់កុមារកំព្រា និងទីទ័លក្រជាយូរឆ្នាំមកហើយនោះ បានច្នៃប្រតិដ្ឋទីតាំងដីទំនេរមួយកន្លែងនៅក្នុងក្រុងសៀមរាបឲ្យក្លាយជាសួនមេអំបៅចម្រុះពណ៌គ្រប់ប្រភេទដែលភ្ញៀវទេសចរអាចទទួលទានអាហារចម្អិនដោយថ្វីដៃសិស្សអង្គការពិតៗ ព្រមទាំងបានទស្សនាហ្វូងមេអំបៅស្អាតៗហិចហើរយ៉ាងរស់រវើកបង្កើតបានជាផ្ទាំងទស្សនីយភាពដ៏ស្រស់ស្រាយមិនធ្លាប់មាននៅតំបន់នោះពីមុនមក។ តោះ! មកឈ្វេងយល់អំពីលក្ខណៈពិសេសនៃហាងនេះ និងផ្នត់គំនិតរបស់ស្ថាបនិកទាំងអស់គ្នា!
ភោជនីយដ្ឋានដ៏ត្រកាលប្លែកមួយកន្លែងនេះមានឈ្មោះថា ភោជនីយដ្ឋាន សួនមេអំបៅ ឬ Butterflies Garden Restaurant ជាភាសាអង់គ្លេស។ វាត្រូវបានស្ថាបនាឡើងដំបូងក្នុងឆ្នាំ២០០៦ នៅភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប ប៉ុន្តែចាប់តាំងពីខែកក្កដា ឆ្នាំ២០១៩ មក សួនមេអំបៅត្រូវបានផ្លាស់ប្តូរទីតាំងមកភូមិចុងកៅស៊ូ សង្កាត់ស្លក្រាម ក្រុងសៀមរាប វិញ ដែលមានផ្ទៃដីកាន់តែធំទូលាយ បរិយាកាសកាន់តែសែនមនោរម្យ។ បរិយាកាសនៅក្នុងភោនីយដ្ឋានត្រូវបានរៀបចំឲ្យមានលក្ខណៈរ៉ូមែនទិច ដោយមានការតុបតែងដើមឈើផ្សេងៗតាមបែបធម្មជាតិ និងមានពាសសំណាញ់ឲ្យហ្វូងមេអំបៅចាប់ទ្រនំសម្រាប់ភ្ញៀវទស្សនាកម្សាន្ត។ គួរបញ្ជាក់ផងដែរថាមេអំបៅទាំងនោះមិនមែនជាពូជមេអំបៅនាំចូលពីបរទេសនោះទេ ប៉ុន្តែជាពូជមេអំបៅក្នុងស្រុកនៅតំបន់សៀមរាបអង្គរតែម្តង ដែលកុមារៗបានរកបាននៅតាមភូមិ ហើយត្រូវបានយកមកចិញ្ចឹមអភិរក្សនៅទីនេះ ក្នុងគោលបំណងដើម្បីទាក់ទាញភ្ញៀវ ឲ្យក្មេងជំនាន់ក្រោយបានឃើញ និងស្គាល់ប្រភេទមេអំបៅខ្មែរ និងផ្តល់ចំណូលខ្លះដល់កុមារៗឲ្យបានរៀនសូត្រ ទិញកង់ជិះទៅរៀន ទិញសម្លៀកបំពាក់ថ្មី និងសម្ភារសិក្សាដែលចាំបាច់ក្នុងជីវភាពរស់នៅរបស់ពួកគេ ។
លោក ឌុក ដេត ដែលជាស្ថាបនិក បានប្រាប់ សូវរីន ថា លោកជាអតីតមេចុងភៅមួយរូបដែលធ្លាប់មានបទពិសោធន៍ផ្នែកចម្អិនម្ហូបពីអង្គការ PSE ផង និងពីរីសតសណ្ឋាគារ Shinta Mani ដែលជាសណ្ឋាគារលំដាប់ខ្ពស់ល្បីល្បាញមួយប្រចាំខេត្តសៀមរាប។ ដោយសារតែបទពិសោធន៍ជាយូរឆ្នាំលើឯកទេសនេះ លោក ឌុក ដេត មានគំនិតចង់បើកភោជនីយដ្ឋានដោយខ្លួនឯងដើម្បីមានឱកាសបង្កើតបញ្ជីប្រជុំមុខម្ហូបបែបប្រពៃណីខ្មែរដែលមានរូបមន្តចម្អិនច្បាស់លាស់ គួបផ្សំនឹងគ្រឿងផ្សំធម្មជាតិស្រស់ៗដែលអាចរកបាននៅមូលដ្ឋានខេត្តសៀមរាបតែម្តង “ខ្ញុំចង់បម្រើជូនភ្ញៀវនូវមុខម្ហូបខ្មែរដែលផ្តល់សុខភាពដោយការប្រើប្រាស់គ្រឿងផ្សំស្រស់បំផុតពីសួនដំណាំរបស់យើង ពីប្រជាកសិករ និងពីទីផ្សារតាមភូមិដោយផ្ទាល់។”
លោក ឌុក ដេត បានបន្តទៀតថា មូលហេតុមួយទៀតគឺ លោកចង់ផ្តល់ឱកាសការងារឲ្យយុវជនក្រីក្រអាចរកចំណូលទ្រទ្រង់ជីវភាពគ្រូសារ ជាពិសេសឲ្យពួកគេស្គាល់ពីតម្លៃនៃការតស៊ូ ឆ្លងកាត់ទុគ៌តភាពដើម្បីឈានទៅរកភាពជោគជ័យក្នុងឆាកជីវិតតាមរយៈការបង្កើតស្នាដៃច្នៃប្រតិដ្ឋ រិះរកមុខរបរអ្វីដែលថ្មីប្លែកក្នុងន័យអភិវឌ្ឍសង្គម ដោយមិនចាំបាច់ពឹងផ្អែក សង្ឃឹមតែលើការងាររាជការ ឬការងារក្រុមហ៊ុនក្រោមការដឹកនាំត្រួតត្រាពីជនបរទេស។ ទន្ទឹមនឹងនេះ ការបង្កើតអាជីវកម្មមួយនេះក៏ដើម្បីចូលរួមចំណែកក្នុងចលនាជួយសង្គមថែមទៀតផងតាមរយៈ ការឧបត្ថម្ភថវិកាចំពោះកុមារ និងយុវជនក្រីក្រ និងការបង្កើតថ្នាក់បណ្តុះបណ្តាលភាសាអង់គ្លេសបន្ថែមដល់បុគ្គលិកភោជនីយដ្ឋាន។ លោកបានសង្កត់ធ្ងន់ថាប្រាក់ចំនេញ 20% នៃចំណូលភោជនីយដ្ឋានត្រូវបានចែកចាយឲ្យបុគ្គលិកបន្ថែមពីលើប្រាក់ខែ និងប្រាក់ចំនេញ 10% ទៀតត្រូវបានឧបត្ថម្ភទៅកាន់មន្ទីរពេទ្យកុមារ អង្គការ សហគមន៍ និងការងារសង្គមផ្សេងៗដែលពាក់ពន្ធ័ទៅនឹងការងារបរិស្ថាន “វាពិតជាសំខាន់ណាស់ក្នុងការផ្តល់ទៅវិញ និងបង្កើតកាលានុវត្តភាពដល់អ្នកដែលពិតជាកំពុងត្រូវការ”។ ដោយសារតែស្ថាបនិករូបនេះធ្លាប់ឆ្លងកាត់ជីវិតក្រីក្រលំបាកមានប្រវត្តិជាក្មេងអង្គការ ទើបលោកមិនដែលបំភ្លេចយុវជន និងកុមារដែលមានស្ថានភាពរស់នៅដូចដែលលោកធ្លាប់ឆ្លងកាត់កន្លងមក! លោកសង្ឃឹមថា ទៅថ្ងៃអនាគត ពួកគេទាំងនោះនឹងក្លាយជាធនធានមនុស្ស ជាសសរទ្រូងប្រទេសជាតិក្នុងវិស័យណាមួយដូចជារូបលោកជាក់ជាមិនខាន។
លើសពីនេះទៅទៀត ភោជនីយដ្ឋាន សួនមេអំបៅ មិនត្រឹមតែជាកន្លែងទទួលទានអាហារយ៉ាងរ៉ូមេនទិកនោះទេ ប៉ុន្តែទីនេះក៏មានរៀបចំសេវាកម្មថ្នាក់រៀនធ្វើម្ហូបខ្មែរផងដែរ។ លោក ឌុក ដេត នឹងនាំភ្ញៀវដែលចុះឈ្មោះចូលរៀនទៅកាន់ទីផ្សារសហគមន៍ដើម្បីស្វែងរកគ្រឿងផ្សំស្រស់ៗបំផុតដោយផ្ទាល់នឹងភ្នែក ព្រមទាំងពន្យល់ប្រាប់ពីគន្លឹះសំខាន់ក្នុងការចម្អិនមុខម្ហូបខ្មែរនីមួយៗឲ្យឆ្ងាញ់ថែមទៀតផង។ នៅក្រោយពេលបញ្ចប់ការសិក្សា ភ្ញៀវនឹងទទួលបានវិញ្ញាបនបត្របញ្ជាក់ការសិក្សាមួយភ្លាមពីភោជនីយដ្ឋាន។ តោះ! មកមើលទាំងអស់គ្នាថាភោជនីយដ្ឋាន សួនមេអំបៅ មានបរិយាកាសស្រស់បំព្រងកម្រិតណា? មុខម្ហូបត្រូវបានចម្អិនប្រកបដោយសិល្បៈច្នៃប្រតិដ្ឋកម្រិតណា? ហើយភ្ញៀវទទួលបានភាពសប្បាយរីករាយកម្រិតណា? សូមទស្សនាកម្រងរូបភាពខាងក្រោម
Article by SRIN SOKMEAN
Image Courtesy: Butterflies Garden Restaurant