ញុំាបន្លែផ្លែឈើ១០មុខនេះអាចជួយការពារស្បែកពីកម្តៅថ្ងៃបានយ៉ាងល្អ
TRAVEL & LIVING 4 years agoពន្លឺព្រះអាទិត្យអាចបង្កើតជាវីតាមីន D ធម្មជាតិដែលមនុស្សយើងអាចស្រូបបានតាមរយៈការស្ថិតនៅក្រោមកម្តៅថ្ងៃ តែយ៉ាងណាការបណ្តោយឲ្យស្បែកត្រូវកម្តៅថ្ងៃខ្លំាងក៏បង្កបញ្ហាបំផ្លាញដល់កោសិកាស្បែកដូចជាធ្វើឲ្យខ្លោចខ្មៅនិងមហារីកស្បែកជាដើម។ វិធីការពារពីកម្តៅព្រះអាទិត្យជាទូទៅគ្រប់គ្នាតែងជ្រើសរើសការលាបឡេដែលមានសារធាតុ SPF ខ្ពស់ ឬស្លៀកសម្លៀកបំពាក់ធំៗដើម្បីបិទបាំងពន្លឺ ហើយជាមួយគ្នានេះនៅមានវិធីការពារបែបធម្មជាតិមួយទៀតដែលមនុស្សភាគតិចណាស់បានដឹងនោះគឺការទទួលទានអាហារដែលសម្បូរទៅដោយសារធាតុចិញ្ចឹម និងសារធាតុប្រឆាំងការហើមរលាក។ ខាងក្រោមនេះជាអាហារធម្មជាតិ១០មុខដែលនឹងផ្តល់ទាំងសម្រស់ សុខភាព រួមទាំងការពារស្បែកពីកម្តៅថ្ងៃបានយ៉ាងល្អ។
1. ក្រូច
មិនថាក្រូចលឿង ក្រូចឆ្មារ ឬក្រូចថ្លុងជាដើមសុទ្ធសឹងផ្ទុកទៅដោយវីតាមីន C។ តាមការស្រាវជ្រាវការទទួលយកវីតាមីនC និងវីតាមីន E រយៈពេលវែងអាចកាត់បន្ថយអានុភាពបំផ្លាញពីកម្តៅថ្ងៃបានយ៉ាងល្អ។ ក្រៅពីក្រូចផ្ទុកទៅដោយវីតាមីន C ជាមួយគ្នានេះវាបានផ្ទុកនូវសារធាតុ limonene ដែលមានសមត្ថភាពបន្ថយការប្រឈមមហារីកស្បែកដល់ទៅ៣៤ភាគរយ។ ក្រូចក៏ផ្ទុកនូវសារធាតុប្រឆាំងអុកស៊ីតកម្មដែលជួយការពារកោសិកាពីការបំផ្លាញដោយរ៉ាឌីកាល់សេរីដែលនាំឲ្យកើតមហារីកស្បែក។
2. ការ៉ុត
គ្រប់គ្នាសុទ្ធតែធ្លាប់ដឹងហើយថាការ៉ុតគឺល្អបំផុតសម្រាប់សុខភាពភ្នែក ហើយលើសពីនេះវាថែមទាំងជួយការពារស្បែករបស់អ្នកផងដែរ។ សារធាតុ beta-carotene គឺជាប្រភេទវីតាមីន A ដែលមាននៅក្នុងការរ៉ុត វាដើរតួជាអ្នកជួយការពារស្បែកប្រឆាំងពីការបំផ្លាញដោយរ៉ាឌីកាល់សេរីដែលបង្កដោយរស្មីព្រះអាទិត្យ។ ការការពារស្បែកពីពន្លឺព្រះអាទិត្យនឹងកាន់តែមានប្រសិទ្ធភាពប្រសិនបើទទួលយកវីតាមីន E និងវីតាមីន A ស្របពេលតែមួយ។
3. ស្ត្រូបូរី
ផ្លែឈើមានរសជាតិជូរនិយមយកធ្វើជាភេសជ្ជៈនេះផ្ទុកយ៉ាងសម្បើមរួមគ្នានូវសារធាតុប្រឆាំងអុកស៊ីតកម្ម និងវីតាមីន C។ ធនធានទាំងពីរនេះមានតួនាទីការពារសស្បែកពីកម្តៅថ្ងៃ និងជួយឲ្យព្យាបាលស្បែករលាកដោយសារកម្តៅថ្ងៃឲ្យឆាប់វិលមករកសភាពដើមវិញ។ ក្នុងករណីស្បែករលាកដោយកម្តៅថ្ងៃចៃដន់ អ្នកអាចដោះស្រាយបានភ្លាមៗដោយគ្រាន់តែយកផ្លែស្ត្រូបូរី៣ទៅ៤ផ្លែកិនឲ្យម៉ដ្តរួចយកមកបំពោកលាបលើកន្លែងស្បែករលាករយៈពេល៥នាទី បន្ទាប់មកលាងជម្រះទឹកធម្មតាចេញជាការស្រេច។
4. តែបៃតង
នៅពេលដែលអ្នកកំពុងតែក្រេបតែបៃតងមួយពែងយ៉ាងឆ្ងាញ់ពិសា ជាមួយគ្នានេះរាងកាយរបស់អ្នកក៏កំពុងតែទទួលយកនូវសារធាតុ Catechins ដែលមានសមត្ថភាពជួយការពាររាងកាយពីជំងឺផ្សេងៗ ការពារនិងប្រឆាំងការហើមរលាក ព្រមទាំងជួយទប់ទល់កាំរស្មីយូវីពីព្រះអាទិត្យរយៈពេលយូរផងដែរ។ តែបៃតងក៏ផ្ទុកនូវអាស៊ីត Tannic សារធាតុប្រឆំាងអុកស៊ីតកម្មម្យ៉ាងហៅថា EGCGs ដែលជួយសម្រួលអាការផ្សាដោយសារការរលាកពីកម្តៅថ្ងៃ។ តាមការសិក្សាស្រាវជ្រាវរបស់សាកលវិទ្យាល័យមួយនៃរដ្ឋស៊ីស្កុនស៊ីនសហរដ្ឋអាមេរិកបានបង្ហាញថា EGCGs នេះហើយដែលជាអ្នកបញ្ឈប់ការបំផ្លាញកោសិកាពីកាំរស្មីយូវី ខណៈការសិក្សាមួយចំនួនទៀតក៏បង្ហាញថាការផឹកតែបៃតងពីរពែងក្នុងមួយថ្ងៃអាចជួយការពារស្បែកពីកម្តៅថ្ងៃផងដែរ។ ដើម្បីទទួលបានការការពារខ្ពស់នៅរដូវក្តៅនេះអ្នកគប្បីទទួលទានរួមគ្នាទាំងតែបៃតង និងផ្លែស្ត្រូបូរី។
5. ទទឹម
អស់រយៈកាលជាច្រើនទសវត្សរ៍ផ្លែទទឹមត្រូវបានក្លាយជាឱសថប្រពៃណីសម្រាប់ការព្យាបាលជំងឺច្រើនមុខរបស់ជនជាតិអេហ្ស៊ីប។ គ្រាប់នៃផ្លែឈើដែលមានរសជូរអែមក្លែមចត់តិចៗនេះគឺផ្ទុកទៅដោយសារធាតុប្រឆាំងអុកស៊ីតកម្ម ខណៈដែលសាច់ទទឹមមានផ្ទុកនូវអាស៊ី ellagic ដែលជួយការពារកោសិកាស្បែកពីការបំផ្លាញដោយកាំរស្មីព្រះអាទិត្យ UVA និង UVB។ នៅក្នុងការពិសោធន៍មួយដោយយកឡេលាបការពារកម្តៅថ្ងៃដាក់លាយចូលគ្នាជាមួយទឹកទទឹម វានឹងធ្វើឲ្យឡេនោះកើនសារធាតុការពារកម្តៅថ្ងៃ SPF រហូតដល់ទៅ២០ភាគរយពីលើបន្ថែមទៀត។ លើសពីនេះសារធាតុ glutathione និងសារធាតុប្រឆាំងអុកស៊ីតកម្ម ដែលមាននៅក្នុងផ្លែទទឹមអាចជួយឲ្យស្បែកសភ្លឺរលោង និងការពារពីការបំផ្លាដោយរ៉ាឌីកាល់សេរី។ អ្នកអាចទទួលទានទទឹមតាមរយៈញុំាផ្លែស្រស់ ឬគាបយកទឹក ហើយប្រសិនបើចង់ឲ្យកាន់តែមានប្រសិទ្ធភាពអាចគាបទឹកទទឹមចាក់លាយជាមួយតែបៃតងនិងដាក់ទឹកកកបន្តិចជាការស្រេច។
6. គ្រាប់អាល់ម៉ុន
អាល់ម៉ុនគឺជាគ្រាប់ធញ្ញជាតិដ៏សំខាន់មួយផ្ទុកទៅដោយវីតាមីន E និងសារធាតុ Quercetin ដែលជួយការពារនិងជួសជុលស្បែកបំផ្លាញដោយកំារស្មីព្រះអាទិត្យ ជាពិសេសប្រឆាំងភាពចាស់ និងការឡើងជ្រីវជ្រួញលើស្បែកដោយសារការបាត់បង់ជាតិខូឡេជិន។ តាមការសិក្សាមួយក្នុងចំណោមមនុស្សមួយក្រុមដែលគេឲ្យឈរនៅក្រោមកម្តៅថ្ងៃ ក្នុងនោះអ្នកដែលបានញុំាគ្រាប់អាល់ម៉ុន២០គ្រាប់គឺមានកម្រិតរលាកដោយកម្តៅថ្ងៃទាបជាងអ្នកដែលមិនបានញុំា។ ដូច្នេះប្រសិនបើអ្នកចូលចិត្តចេញក្រៅញឹកញាប់គួរយកគ្រាប់អាល់ម៉ុនទុកទំពាលេងតាមខ្លួនដែលមានអត្ថប្រយោជន៍ជួយបានទាំងការពារសម្រស់ ទាំងសុខភាព ព្រមទាំងចម្អែតរយៈពេលយូរផងដែរ។
7. ទំពាំងបាយជូរ
ជ្រើសរើសពពួកទំពាំងបាយជូរពណ៌ក្រហមមកទទួលទានដោយសារតែវាមានផ្ទុកនូវសារធាតុ phytonutrients ដែលអាចបន្ថយការបំផ្លាញអុកហ្ស៊ីហ្សែននៅក្នុងកោសិកាស្បែក ហើយក៏ជួយរារាំងការបំផ្លាញពីកម្តៅថ្ងៃ ការប្រឈមជំងឺមហារីកស្បែក និងករណីធ្វើឲ្យកោសិកាស្បែកងាប់ផងដែរ។ ចំណែកសារធាតុមួយចំនួនទៀតដូចជា proanthocyanidins និង polyphenols ដែករកឃើញក្នុងគ្រាប់ទំពាំងបាយជូរមានសមត្ថភាពជួយទប់ស្កាត់ការបង្កឲ្យកើតមហារីកស្បែកដោយសារកាំរស្មីយូវី។ តាមការសិក្សាស្រាវជ្រាវមួយបង្ហាញថា សារធាតុ quercetin ដែលរកឃើញនៅក្នុងទំពាំងបាយជូរមានតួនាទីបន្ថយអុកស៊ីតកម្មដែលបង្កដោយកាំរស្មី UVB និងជួយការពារស្បែកពីការហើមរលាក។
8. ស្ពៃខៀវ
តាមការសិក្សាជាច្រើន សាលាដ ស្បៃខ្មៅ ស្ពៃក្រញាញ់ ស្ពៃចង្កឹះ ជាដើមសុទ្ធតែសម្បូរទៅដោយសារធាតុប្រឆាំងអុកស៊ីកម្ម lutein និងសារធាតុ zeaxanthin ដែលមានសមត្ថភាពបញ្ឈប់ដំណើរនៃការបំផ្លាញស្បែកឆាប់រហ័សពីកាំរស្មីយូវី។ ដូច្នេះអ្នកអាចទទួលទានបន្លែពពួកស្ពៃខៀវរៀងរាល់ថ្ងៃតាមរយៈការ ឆា ស្ងោរ ឬធ្វើជាសាលាដហូបឆៅកាន់តែប្រសើរ។
9. ប៉េងប៉ោះ
នៅពេលញុំាប៉េងប៉ោះអ្នកបានកំពុងតែបន្ថែមនូវជាតិលីកូពីន(lycopene) ទៅក្នុងរបបអាហាររបស់អ្នក។ ជាតិលីកូពីនគឺជាសារធាតុខារ៉ូទីណាយណ៍(carotenoid) និងសារធាតុប្រឆាំងអុកស៊ីតកម្ម ដែលទប់ទល់នឹងរ៉ាឌីកាល់សេរីបង្កឡើងដោយពន្លឺព្រះអាទិត្យ ព្រមទាំងជួយសម្រួលការហើមរលាកទាំងផ្នែកខាងក្នុងនិងខាងក្រៅនៃរាងកាយ។ តាមការសិក្សារបស់អាឡឺម៉ងដោយឲ្យមនុស្សមួយក្រុមញុំាប៉េងប៉ោះមួយពែងជាមួយប្រេងអូលីវរៀងរាល់ថ្ងៃរយៈពេល១០សប្តាហ៍ បន្ទាប់មកឲ្យឈរនៅក្រោមកម្តៅថ្ងៃ ហើយជាលទ្ធផលឃើញថាពួកគេរងស្បែកក្រហមត្រឹមតែ៣៥ភាគរយតិចជាងអ្នកដែលមិនបានញុំា។ ចំណែកការសិក្សាផ្សេងទៀតដោយឲ្យមនុស្សមួយក្រុមញុំាប៉េងប៉ោះកិន៥ស្លាបព្រាបាយជាប្រចាំរយៈពេល៣ខែឃើញថាពួកគេទទួលបានការការពារបែបធម្មជាតិប្រឆាំងនឹងការរលាកដោយកម្តៅថ្ងៃរហូតដល់ទៅ ២៥ភាគរយ។ យ៉ាងណាមិញ ឪឡឹកវិញក៏ជាផ្លែឈើមួយដែលសម្បូរទៅដោយជាតិលីកូពីនផងដែរ បើប្រៀបធៀបជាមួយប៉េងប៉ោះ ឪឡឹកផ្ទុកនូវជាតិលីកូពីនលើសលុបឬអាចនិយាយបានថាច្រើនជាងប៉េះប៉ោះដល់ទៅ៤០ភាគរយឯណោះ។
10. រមៀត
នៅក្នុងឱសថ Ayurvedic និងឱសថប្រពៃណីចិនត្រូវបានផ្សំឡើងពីរមៀតអស់រយៈពេលជាច្រើនសតវត្សរ៍ដើម្បីព្យាបាលជំងឺផ្សេងៗ ជាពិសេសបង្កើនសារធាតុប្រឆាំងអុកស៊ីតកម្ម និងប្រឆំាងការហើមរលាកនៅក្នុងខ្លួន។ អាចនិយាយបានថារមៀតជាឱសថបុរាណនិងជាអាហារដ៏អស្ចារ្យមួយ ព្រោះសូម្បីតាមការសិក្សាពិសោធន៍ក៏រកឃើញថារមៀតអាចជួយការពារស្រទាប់ស្បែកខាងលើពីការបំផ្លាញដោយកាំរស្មីអូត្រាវីយូឡែត B ផងដែរ៕
Article by HEM SOKKHIM