វិចិត្រករ ចូវ ធានលី បង្ហាញជីវិតនៃការតស៊ូរបស់មនុស្សតាមរយៈគំនូរដែលបង្កប់អត្ថន័យជាច្រើន
NEWS 4 years agoឆាកជីវិតរបស់មនុស្សម្នាក់ៗ ជាញឹកញាប់តែងតែជួបនូវការលំបាក និងឧបសគ្គជាច្រើនរៀងៗខ្លួន ក៏ប៉ុន្តែការបង្ហាញឲ្យនរណាម្នាក់ដឹងពីទុកលំបាករបស់ខ្លួននោះវារឹតតែពិបាកនឹងប្រាប់ទៅទៀតសម្រាប់មនុស្សមួយចំនួន។ ដូច្នេះហើយទើបបានជាសិល្បករគំនូរមួយរូបបានបង្កើតនូវបណ្ដុំផ្ទាំងគំនូរជាច្រើន ក្នុងន័យបង្ហាញ ពីការប្រឹងប្រែងជំនៈនូវរនាំងឧបសគ្គជីវិតហើយឲ្យឈ្មោះបណ្ដុំនៃរូបគំនូរនោះថា «ប្រឹងរស់»។ រូបគំនូរដ៏ប្លែកនិងពោរពេញទៅដោយចម្ងល់នេះ គឺជាស្នាដៃគំនូររបស់ វិចិត្រករ ចូវ ធានលី ហើយត្រូវបានគេលួចកោតសរសើរនិងស្ងប់ស្ញែងពីសំណាក់មហាជនទូទៅជាពិសេសជនបរទេសអ៊ឺរ៉ុប ថាជាគំនូរមួយដែលបង្កប់នូវអត្ថន័យនិងសារលើកទឹកចិត្តជាច្រើនទៀតផង។ បណ្ដុំផ្ទាំងគំនូរ «ប្រឹងរស់» ដែលមានរូបគំនូរ ប្រមាណ ជាងដប់ផ្ទាំងនេះ ត្រូវបានធានលី បកស្រាយនូវអត្ថន័យថា មនុស្សគ្រប់ស្រទាប់វណ្ណៈទាំងអស់សុទ្ធសឹងតែបានជួបនូវទុកលំបាកនៃជីវិតគ្រប់ៗគ្នាហើយម្នាក់ៗសុទ្ធសឹងប្រឹងប្រែងពុះពារនូវទុកលំបាកនេះដើម្បីរស់ដូចគ្នា ដូច្នេះហើយទើបលោកគូរចេញជាមនុស្សមួយចំហរខ្លួនឈរសំកាំងងើបក្បាលហាក់ដូចប្រឹងដកដង្ហើមពីក្នុងទឹក ដែលមានទាំងរូបមនុស្សចាស់ ក្មេង ប្រុសស្រី ភេទទីបី អ្នកមាននិងអ្នកក្រ លាយឡំជាពណ៌ចម្រុះនៅពីក្រោយដែលជាការបង្ហាញពីភាពស្រស់បំព្រងនៃជីវិត នៅពេលណាដែលមនុស្សប្រឹងប្រែងជំនៈនូវឧបសគ្គទាំងអស់នេះ។ «ប្រឹងរស់» បណ្ដុំរូបគំនូរដ៏សាមញ្ញ ក៏ប៉ុន្តែបង្កប់នូវអត្ថន័យដ៏ជ្រៅបានធ្វើឲ្យវិចិត្រករ ចូវ ធានលី មានឳកាសបង្ហាញនូវស្នាដៃរបស់ខ្លួននៅក្នុងវិចិត្រសាលជាច្រើន នៅកម្ពុជា ហើយបានបង្ហាញខ្លួនទៅដល់ទីក្រុងនិងប្រទេសមួយចំនួនទៀតដូចជាទីក្រុងប៉ារីស ប្រទេសសឹង្ហបុរី សហរដ្ឋអាមេរិក និង ថៃ ថែមទៀតផង។
ជីវិតហាក់ដូចមានសម្ពាធនៅពេលដែល ធានលី បានត្រលប់មករស់នៅស្រុកកំណើតនៅឯខេត្តបាត់ដំបងវិញបន្ទាប់ពីខ្លួនបានបំពេញការងារមួយរយៈធំឲ្យក្រុមហ៊ុនឯកជនមួយនៅក្រុងភ្នំពេញដូច្នេះហើយទើបបានធ្វើឲ្យលោកមានគំនិតថាចង់គូរនូវរូបគំនូរទាំងអស់នេះឡើង។ ជាអ្នកស្រលាញ់ការគូរតាំងតែពីកុមារភាពនិងជាមនុស្សដែលមិនសូវចូលចិត្តនិយាយ តែចង់បង្ហាញពីឆាកជីវិតរបស់មនុស្សម្នាក់ៗ វិចិត្រករ ចូវ ធានលី គូររូបជាច្រើនបង្កើតបានជាសាច់រឿងនិងសោភ័ណភាពនៃការរស់នៅរបស់មនុស្សនៅក្នុងសង្គមនីមួយៗ។
និយាយអំពីជីវប្រវត្តិវិចិត្រករដែលពោរពេញទៅដោយភាពច្នៃប្រតិដ្ឋរូបនេះ យើងអាចសង្កេតបានថាលោកបានផ្សារភ្ជាប់ជីវិតរបស់ខ្លួនរបស់នឹងសិល្បៈគំនូរនេះតាំងពីក្មេងមកម្ល៉េះ ក៏ប៉ុន្តែលោកបានចាប់ផ្តើមប្រឡូកស៊បនៅឆ្នាំ ១៩៩៩ គឺនៅពេលដែលលោកបានជួយឳពុកមារខ្លួនក្នុងមុខរបរជាអ្នកគូរស្លាកយីហោមួយនាឯខត្តបាត់ដំបូង។ ក្រោយមកលោកក៏មានឳកាសបានទៅសិក្សានៅមជ្ឈមណ្ឌលមួយក្នុងជំនាញរចនាក្រាហ្វិក។ ឆ្នាំ ២០១១ បន្ទាប់ពីបានបញ្ចប់ការសិក្សាថ្នាក់ទុតិយភូមិនៅខេត្តបាត់ដំបងរួចមក លោកបានបន្តការសិក្សាផ្នែកច្បាប់នៅក្រុងភ្នំពេញ ហើយលោកក៏បានទទួលបានការងារមួយជាអ្នករចនាក្រាហ្វិកក្នុងពេលជាមួយគ្នា។ ធ្លាប់ឆ្លងកាត់បទពិសោធន៍ក្នុងវស័យសិល្បៈគំនូរជាច្រើនឆ្នាំមកនេះ ធានលី ចង់បង្ហាញស្នាដៃរបស់ខ្លួនក្នុងការគូរគំនូរជាសាច់រឿងប្រវត្តិសាស្រ្ត ទុកសម្រាប់កូនខ្មែរជំនាន់ក្រោយ ហើយលោកក៏រីករាយក្នុងការសហការជាមួយនឹងអ្នកប្រវត្តិសាស្រ្តមួយចំនួននៅកម្ពុជាផងដែរ៕
Article by KEO SONG