តើក្លិនទឹកអប់ប្រាប់អ្វីខ្លះពីបុគ្គលិកលក្ខណៈរបស់មនុស្សម្នាក់ៗ?
TRAVEL & LIVING 4 years agoទឹកអប់ ប្រើសម្រាប់ឱ្យមានក្លិនក្រអូបឈ្ងុយឈ្ងប់ ឬលុបបំបាត់ក្លិនមិនល្អនៅជាប់រាងកាយដែលក្លិនទឹកអប់នីមួយៗមានច្រើនយ៉ាងច្រើនប្រភេទរួមមាន ក្លិនផ្កា ក្លិនផ្លែឈើ ក្លិនស្ករគ្រាប់ ឬការលាយធាតុផ្សំផ្សេងទៀតរវាងក្លិនមួយទៅក្លិនមួយថ្មី ដើម្បីបង្កើតនូវជម្រើសថ្មីៗ សម្រាប់អ្នកនិយមប្រើប្រាស់ទឹកអប់។ ជាក់ស្តែង តាមរយៈក្លិនទឹកអប់នីមួយៗនេះដែរ ការសិក្សាស្រាវជ្រាវមួយបានបង្ហាញថា វាបានប្រាប់ពីបុគ្គលិកលក្ខណៈនៃមនុស្ស ម្នាក់ៗ។ ហេតុដូចនេះ សូវរីន នឹងបង្ហាញក្លិនទឹកអប់ប្រាំប្រភេទដែលគេនិយមប្រើប្រាស់ដែលអាចបង្ហាញពីអត្ចរឹករបស់មនុស្ស ម្នាក់ៗដូចខាងក្រោម៖
១. ក្លិនក្រូចឆ្មារ រាងហឹរ ឬក្លិនមេនតុល (Mentol)
ជាប្រភេទមនុស្សដែលមានការផ្តោតអារម្មណ៏ខ្លាំងនៅពេលគេធ្វើអ្វីមួយ ពោលគឺផ្ជិតផ្ជង់ក្នុងការងារ ពួកគេភាគច្រើនគឺជាមេដឹកនាំក្នុងក្រុមណាមួយ។ ពួកគេមានមហិច្ចតាខ្ពស់ក្នុងការសម្រេចបំណងឱ្យខានតែបាន។ ជាមនុស្សដែលមិនសូវចូលចិត្តលេងសើចច្រើន និយាយម៉ាត់ៗត្រង់ៗច្បាស់ៗ និងមិនសូវបត់បែនច្រើន ហើយក៏ជាអ្នកដែលលេចធ្លោខ្លាំងនៅកន្លែងដែលគេរស់នៅឬធ្វើការផងដែរ។
២. ក្លិនទឹកអប់ជាលក្ខណៈផ្កាកុលាប រាងប្រហើរឈ្ងុយតិចៗ និងស្រដៀងនឹងតែបៃតង
មនុស្សដែលមានការប្រុងប្រយ័ត្នខ្ពស់ មិនថាពេលធ្វើការ ការនិយាយស្តី ឬការធ្វើដំណើរទៅណាមកណានោះទេ។ ពួកគេមានការគិតគូបានវែងឆ្ងាយ គិតមុនបានធ្វើតាមក្រោយក៏ជាបុគ្គលិកលក្ខណៈពិសេសរបស់អ្នកដែលចូលចិត្តក្លិនផ្កាកុលាបនេះដែរ។ ដោយហេតុនេះហើយបានជាពួកគេមានការសម្រេចចិត្តខ្ពស់ មួយដឹងមួយ មិនវៀចវេរ ឬលំអៀងទៅខាងណាមួយឡើយ។ បើទោះបីជាយ៉ាងនេះក្តី ការសិក្សាស្រាវជ្រាវក៏បានបង្ហាញដែលថា ពួកគេក៏ជាមនុស្សឆាប់ភ្លេចផងដែរ។
៣. ក្លិនផ្កាឡាវេនឌ័រ
ជាប្រភេទមនុស្សរួសរាយរាក់ទាក់។ ពួកគេទៅណាមកណារមែងតែងមានមនុស្សរាប់អានច្រើន។ ពួកគេមានមិត្តច្រើន និងមានបណ្តាញគ្រប់ទិសទី។ ជាអ្នកចូលចិត្តធ្វើការជាក្រុម មិនចូលចិត្តភាពឯកោនិងគិតច្រើន។ ពួកគេក៏មានចំណង់ផ្លូវភេទ និងភាពសប្បាយរីករាយផងដែរ។
៤. ក្លិនវ៉ានីឡា ផ្កាម្លិះ ស្ករគ្រាប់ សូកូឡា ឬក្លិនផ្អែម
អ្នកដែលនិយមប្រើប្រាស់ក្លិនប្រភេទនេះ គេច្រើនមានភាពសប្បាយ រីករាយខ្លាំង និងមានរសនិយមខ្ពស់នៃជីវភាពរស់នៅរបស់គេ។ ប្រសិនបើឱ្យពួកគេរៀបចំកម្មវិធីជប់លៀង ឬកម្មវិធីផ្សេងៗ ពួកគេប្រាកដណាស់ច្បាស់ជាពេញចិត្ត និងរៀបចំបានយ៉ាងល្អ។ ពួកគេក៏ចូលចិត្ត ធ្វើនូវអ្វីចម្លែកៗ និងរបស់ប្លែកៗ ដែលនេះបានញ៉ាំងឱ្យពួកគេមានគំនិតថ្មីៗ និងមានភាពច្នៃប្រឌិតខ្ពស់។ នៅក្នុងវិស័យការងារ អ្នកដែលចូលចិត្តក្លិនវ៉ានីឡាភាគច្រើនជាមនុស្សស្វាហាប់ រហ័សរហួន និងរប៉ិលរប៉ូចផងដែរ។
៥. ក្លិនផ្លែឈើ ផ្លែប៉ោម និងផ្លែប័ររី
ជាប្រភេទមនុស្សឆាប់ខឹង ហើយក៏ឆាប់បាត់ទៅវិញ។ មិនចូលចិត្តនិយាយលេងច្រើន មិនចូលចិត្តឱ្យគេមករំខាន ពួកគេចូលចិត្តឱ្យអ្នកដ៏ទៃសម្រូបតាមខ្លួនជាដ៏រាប។ ពួកគេពូកែខាងតែបញ្ជាគេ ប្រសិនបើនរណាម្នាក់ធ្វើអ្វីមួយមិនសមដូចបំណងទេនោះ ពួកគេនឹងខឹងច្រឡោតជាក់ជាមិនខាន ប៉ុន្តែពួកគេជាមនុស្សខិតខំប្រឹងប្រែងក្នុងការងារ ឬធ្វើអ្វីមួយ មិនរារែក និងមិនខ្ចិលច្រអូសឡើយ។
ទាំងអស់នេះគឺសុទ្ធសឹងតែជាការសម្គាល់ពីបុគ្គលិកលក្ខណៈរបស់មនុស្សម្នាក់ៗក្នុងការប្រើប្រាស់ទឹកអប់ទៅតាមចំណង់ចំណូលចិត្តរបស់ពួកគេ។ ដូចនេះតើប្រភេទក្លិនទឹកអប់អ្វីដែលអ្នកដែលនៅជុំវិញខ្លួនអ្នកកំពុងតែប្រើប្រាស់? តើធ្វើដូចម្តេចទើបដឹងចរិកពិតរបស់ពួកគេបាន? ដូច្នេះសង្ឃឹមថាតាមរយៈការសិក្សាស្រាវជ្រាវពីខាងដើមអាចធ្វើឱ្យអ្នកសម្គាល់បុគ្គលិកលក្ខណៈរបស់ពួកគេជាក់ជាពុំខាន៕
Article by SOVRIN