Sovrin
Sovrin
«លម្អអង្គ» អង្រួនចិត្តយុវជនងាកមកប្រើប្រាស់ផលិតផលថែរក្សាសម្រស់ធម្មជាតិ
NEWS 4 years ago
ជាទូទៅ ផលិតផលថែរក្សាសម្រស់មួយចំនួន ច្រើនផ្ទុកទៅដោយសារធាតុដែលអាចប៉ះពាល់ដល់សុខភាពស្បែក តួយ៉ាង ផលិតផលរក្សាសម្រស់ដែលផ្លាស់ប្តូរស្ថានភាពស្បែកមានរយៈពេលលឿនជាដើម។ ជាក់ស្តែង អ្នកប្រើប្រាស់ផលិតផលមួយចំនួនពុំសូវចាប់អារម្មណ៍លើការថែរក្សាសម្រស់តាមវិធីបែបធម្មជាតិនោះឡើយ ក៏ព្រោះតែវិធីសាស្ត្រទាំងនោះត្រូវចំណាយពេលវេលាយូរក្នុងការអនុវត្តដើម្បីទទួលបានប្រសិទ្ធភាពពីវិធីសាស្ត្រទាំងនោះ។ ថ្វីដ្បិតតែ អ្នកប្រើប្រាស់ និងការគាំទ្រផលិតផលធម្មជាតិនៅមានកម្រិតពិតមែន ប៉ុន្តែយុវជនខ្មែរម្នាក់នៅតែបន្តការងាររបស់ខ្លួនក្នុងការកែច្នៃវត្ថុធាតុដើម ដើម្បីបង្កើតផលិតផលថែរក្សាសម្រស់បែបធម្មជាតិដែលមិនមានការប៉ះពាល់ដល់បរិស្ថាននោះទេ។
Image Courtesy: លម្អអង្គ
យុវជន សៀង ឆាយលី ជានិស្សិតឆ្នាំទី៤ មានការសិក្សាលើឯកទេស គំនូរសារគមនាគន៍ នៃសាកលវិទ្យាល័យភូមិន្ទវិចិត្រសិល្បៈជាស្ថាបនិកនៃស្លាកយីហោរបស់ផលិតផលថែរក្សាសម្រស់ធម្មជាតិ ឈ្មោះថា«លម្អអង្គ»។ ជាក់ស្តែង យុវជន ឆាយលី បានឲ្យដឹងពីកត្តាមួយចំនួនក្នុងការបង្កើតផលិតផលិតផលថែរក្សាសម្រស់ធម្មជាតិជាមួយនឹងការកែច្នៃនូវវត្ថុធាតុដើមនោះ ក៏ព្រោះតែធម្មជាតិផ្តល់នូវអត្ថប្រយោជន៍ដ៏ច្រើនចំពោះសុខភាព ប៉ុន្តែសន្ទុះនៃការប្រើប្រាស់ និងគាំទ្រផលិតផលធម្មជាតិធ្វើដោយដៃនៅមានកម្រិត។ ទន្ទឹមនឹងនេះ ឆាយលី ក៏បានបង្ហាញ សូវរីន យ៉ាងដូច្នេះថា «នៅពេលដែលខ្ញុំបានចូលរួមជាមួយនឹងក្រុមយុវជនអេកូយុវទូតទើបខ្ញុំដឹងថាធម្មជាតិពិតជាសំខាន់ ជាពិសេស វាជាផ្នែកមួយដែលបានធ្វើឲ្យខ្ញុំជួយបរិស្ថានផងដែរ ហេតុនេះទាំងរូបមន្តក្នុងការផលិត ការវិចខ្ចប់សុទ្ធសឹងតែប្រើប្រាស់វត្ថុដែលគ្មានប្លាស្ទិចឡើយ»។ ម៉្យាងវិញទៀត «លម្អអង្គ» ដែលទើបតែបង្ហាញខ្លួនប្រមាណជាងប៉ុន្មានខែមកនេះទទួលបាននូវការគាំទ្រយ៉ាងខ្លាំងពីស្រទាប់យុវវ័យស្ទើរតែគ្រប់មជ្ឈដ្ឋានទៅហើយ ជាពិសេស សារធាតុដែលត្រូវបានផលិតក្នុងផលិតផលនីមួយៗផ្តល់នូវសំណើមសម្រាប់ស្បែក អាចប្រើប្រាស់បានគ្រប់ប្រភេទស្បែក (សម្រាប់ស្បែកប្រតិកម្មក៏អាចប្រើប្រាស់បាន) និងផលិតផលទាំងអស់នេះក៏មានតួនាទីបំប៉នស្បែកឲ្យស្រស់ស្អាតថែមទៀត។ ស្ថាបនិកវ័យក្មេង ឆាយលី បានបង្ហាញពីអត្ថន័យនៃ «លម្អអង្គ» យ៉ាងដូច្នេះថា ជាការធ្វើឲ្យខ្លួនឯងល្អ តួយ៉ាង រាងកាយរបស់មនុស្សម្នាក់ៗ ទាំងមនុស្សប្រុស និងមនុស្សស្រីត្រូវមានការថែរក្សាសម្រស់ឲ្យបានល្អទើបប្រសើរ។
យុវជន សៀង ឆាយលី
ជាចុងក្រោយ យុវជន ឆាយលី បានឲ្យដឹងផងថា «លម្អអង្គ» ត្រូវបានប្រកាន់ខ្ជាប់នូវគោលការណ៍ចំនួនបី តួយ៉ាង កាត់បន្ថយការប្រើប្រាស់ប្លាស្ទិច ផ្សព្វផ្សាយដល់អ្នកប្រើប្រាស់ទាំងអស់ងាកមកប្រើប្រាស់ផលិតក្នុងស្រុក និងការលើកកម្ពស់អក្សរសាស្ត្រខ្មែរ។ ស្ថាបនិករូបនេះលើកឡើងផងថា «អ្នកប្រើប្រាស់ទាំងអស់គួរងាកមកប្រើប្រាស់ផលិតផលក្នុងស្រុកឲ្យបានច្រើនជាងផលិតផលក្រៅស្រុក ដោយសាតែផលិតផលក្នុងស្រុកក៏មានគុណភាពខ្ពស់មិនចាញ់បរទេសឡើយ»។
Article by PAN SIVLY
