ខែកក្កដាជាខែពាក់កណ្តាលរដូវវស្សាពោរពេញដោយទឹកភ្លៀង និងសំណើម។ ក្រុមការងារ ទស្សនាវដ្តី សូវរីន យើងខ្ញុំបានសម្រិតសម្រាំងបង្កើតផ្ទាំងទស្សនីយភាពហ្វេហ្សិនបែបសហសម័យអមដោយភាពបៃតងស្រស់នៃរុក្ខជាតិក្នុងវស្សានរដូវនៅកន្លែងដ៏ប្រណិតមួយកណ្តាលក្រុងសៀមរាបដ៏អច្ឆរិយៈ។ ឈុតហ្វេហ្សិនដ៏ពិសេសសម្រាប់លេខចេញផ្សាយខែនេះត្រូវបានប្រសូតក្រោមទឹកដៃរចនាម៉ូដរបស់អ្នករចនាម៉ូដអន្តរជាតិប្រចាំខេត្តសៀមរាបគឺ លោក អេរិក រ៉ៃស៊ីណា (Eric Raisina) ដែលមានកេរ្តិ៍ឈ្មោះជាយូរឆ្នាំក្នុងវិស័យនេះ។
ទឹកជាប្រធានបទសំខាន់ក្នុងរដូវកាលនេះ ទើបសិល្បៈផលិតទឹកថ្នាំគំនូរដ៏កម្រម្យ៉ាងចម្រាញ់ពីផ្កាឈូកដ៏ស្រស់បំព្រងរបស់ខ្មែរយើងត្រូវបានលើកមកបង្ហាញដោយសិល្បករបរទេសមួយរូប។ សូរសៀងតន្រ្តីមត៌កដើមដែលបង្កប់នូវអត្តសញ្ញាណជាតិប្រៀបបាននឹងទឹកមន្តសណ្តំហប្ញទ័យប្រជាជនខ្មែរទាំងក្នុង និងក្រៅប្រទេសមិនចេះសាបរលាបត្រូវបានអភិរក្ស និងអភិវឌ្ឍដោយកវី និងតន្រ្តីករជើងចាស់ អ៊ុក សំអាត រួមជាមួយសិស្សជំនិតជំនាន់ថ្មីរបស់លោក។ ជាមួយគ្នានេះ សាដៀវ ឬ ឯកតន្រ្តី ដែលជាមត៌កតន្រ្តីបុរាណខ្មែរមានឆ្លាក់ជាប់នឹងជញ្ជាំងប្រាសាទរាប់ពាន់ឆ្នាំមកហើយក៏កំពុងត្រូវបានយុវជនខ្មែរមួយរូបយកចិត្តទុកដាក់ថែរក្សា លើកតម្កើង និងផ្សព្វផ្សាយ មិនឲ្យបាត់បង់ផងដែរ។
ខែកក្កដានេះក៏នឹងពាំនាំមកនូវរសជាតិមុខម្ហូបដ៏ពិសេសជាច្រើនប្រភេទព្រមជាមួយវិធីសាស្រ្តថែទាំសម្រស់ដែលសុទ្ធសឹងតែចម្រាញ់ពីមើមឆៃថាវក្រហមដែលពិភពលោកកំពុងពេញនិយម។ ជាចុងក្រោយ សូវរីន សូមធ្វើជាមគ្គុទ្ទេសក៍ទាក់ទាញអារម្មណ៍ប្រិយមិត្តអ្នកអានទាំងអស់ទៅស្វែងយល់អំពីតំបន់សក្តានុពលទេសចរណ៍ធម្មជាតិ-វប្បធម៌យ៉ាងច្រើនអនេកប្បការនៅភូមិភាគខាងត្បូងខេត្តតាកែវទឹកដីចំណាស់នៃប្រវត្តិសាស្រ្តនគរភ្នំដ៏រីកចម្រើន៕