Sovrin
Sovrin
ការតុបតែងគេហដ្ឋានជារឿងចាំបាច់មួយ ដើម្បីបង្កើតនូវបរិយាកាសរស់នៅដែលប្រកបដោយផាសុកភាព និងសោភ័ណភាព។ ជាការពិតណាស់ ក្រៅពីគ្រឿងសង្ហារិមចាំបាច់នានា គ្រឿងតុបតែងលម្អមួយចំនួនត្រូវបានប្រើប្រាស់ ដូចជារូបចម្លាក់ គំនូរ រូបថត។ល។ ទៅតាមចំណង់ចំណូលចិត្តរបស់មនុស្សម្នាក់ៗ។ នាវេលានេះ សូវរីន សូមបង្ហាញនូវគំនិតច្នៃប្រឌិតមួយចំនួនក្នុងការប្រើប្រាស់រុក្ខជាតិមកតុបតែងលម្អនៅបរិវេណខាងក្នុងនៃគេហដ្ឋាន។
១. ផ្កាស្រស់ក្នុងថូ
ការប្រើផ្កាស្រស់មកលម្អក្នុងផ្ទះ ពិតជាគំនិតល្អមួយ ប៉ុន្តែវាហាក់សាមញ្ញបន្តិច។ ដូច្នេះ ការជ្រើសរើសថូផ្កា គឺជាមេរៀនដែលស្ដ្រីមេផ្ទះគួរសិក្សាបន្ថែម។ ក្រៅពីថូផ្កាទូទៅ អ្នកគួរស្វែងរកថូផ្កាជ្រុង ថូខ្ពស់ ថូមូល ឬរាងប្លែកៗមករៀបផ្កាស្រស់វិញ វានឹងជួយបន្ថែមសោភ័ណភាពបន្ទប់ទទួលភ្ញៀវ ឬជ្រុងមួយនៃផ្ទះរបស់អ្នក។ ការប្រើថូរូបរាងប្លែកៗបែបនេះ អ្នកអាចជ្រើសរើសជាថូកញ្ចក់ថ្លាជាមួយនឹងផ្កាតែមួយ ឬពីរប្រភេទបានហើយ ធ្វើបែបនេះអាចរំលេចពណ៌ផ្កាបានយ៉ាងល្អប្រពៃ។
២. ដាំរុក្ខជាតិដើមខ្ពស់
បំពេញចន្លោះទំនេរ ឬកាច់ជ្រុងនៃបន្ទប់គេហដ្ឋានរបស់អ្នក ដោយដាក់ផើងដែលដាំរុក្ខជាតិបៃតងកម្ពស់ខ្ពស់ល្មម (ប្រមាណ១ម៉ែត្រកន្លះ ឬល្មមសមនឹងកម្ពស់ពិតាន)។ អ្នកក៏អាចប្រើវាលម្អនៅជិតទូតាំង ឬជញ្ជាំងលាតទំនេរក៏បាន។ ជាងនេះទៅទៀត បើលម្អវាក្នុងបន្ទប់ទឹក ដែលមានចាំងពន្លឺថ្ងៃចូលរឹតតែបង្កើនភាពស្រស់ស្រាយមួយកម្រិតទៀត។
៣. ព្យួររុក្ខជាតិវល្លិ៍ពីជញ្ជាំង
ដាំរុក្ខជាតិវល្លិ៍ឲ្យលូតលាស់សំយុងចុះក្រោមពីលើជញ្ជាំងរបស់អ្នកជាគំនិតល្អមួយទៀត ដែលអាចជំនួសការប្រើប្រាស់ផ្ទាំងគំនូរនានា ឬព្យួរវាលម្អជានឹងរូបភាពគ្រួសារអ្នក។ របៀបព្យួរវិញអាចមាន២របៀប ទី១ ចាប់ជាប់នឹងជញ្ជាំង ដោយធ្វើដូចជាស៊ុមរូបថត ទី២ ប្រើលួសទ្រផើងថ្ពក់ផ្ជាប់នឹងទំពក់លើជញ្ជាំង (ដូចទំពក់ព្យួរខោអាវ)។ ប្រសិនបើជញ្ជាំងអ្នកសល់ផ្ទៃធំ អាចព្យួរជាជួរ ជាមួយនឹងវល្លិ៍ចម្រុះប្រភេទ ឬមួយប្រភេទតាមចំណូលចិត្ត។
៤. ដាំរុក្ខជាតិក្នុងដបកញ្ចក់
បង្កើតជាកូនសួនច្បារមួយក្នុងដបថ្លា ឬថូរាងស៊ីឡាំងថ្លាធំមួយ ដោយមានដាំកូនរុក្ខជាតិតូចៗខ្ពស់ទាប ក្រាលគ្រួស ដុំថ្មតូចៗ និងមានកូនតុក្កតាឬរូបសត្វនានាលម្អ។ គ្រាន់តែស្រមៃក៏ឃើញឡូយ និងធ្វើឲ្យអ្នកមានអារម្មណ៍សប្បាយដែរ។ យ៉ាងណាមិញ អ្នកក៏អាចបញ្ចូលទឹក ហើយដាំជារុក្ខជាតិដែលដុះក្នុងទឹកវិញក៏បាន វាពិតជាប្លែក និងបង្កើតជាទស្សនីយភាពថ្មីមួយបែបទៀត។ អ្នកអាចតាំងវានៅលើតុទាប ឬដាក់រាបស្មើនឹងការ៉ូបន្ទប់ ក្បែរជ្រុងមួយនៃបន្ទប់ដែលមិនមានពន្លឺថ្ងៃចាំងដល់ ធ្វើដូចនេះទឹកក្នុងថូមិនងាយដុះស្លែ។ បើប្រើដបតូចល្មមអាចតាំងលើធ្នើរ ឬថ្ពក់ជាប់ជញ្ជាំងក៏បាន។
៥. ប្រទាលតូចៗក្នុងកូនផើង
តាំងលម្អពូជប្រទាលតូចៗនៅលើតុ ធ្នើរ ឬទូនានា ជាមួយនឹងគ្រឿងលម្អនានា បានបន្ថែមភាពទាក់ទាញមួយកម្រិតទៀត។ ប្រិយមិត្តអាចជ្រើសកូនផើងដែលមានពណ៌ឆើតឆាយមកដាំប្រទាលទាំងនោះជាក្រុម នោះពិតជាគួរឲ្យចាប់អារម្មណ៍ ហើយប្រទាលទាំងនោះគឺធន់នឹងអាកាសធាតុណាស់ ព្រមទាំងងាយស្រួលក្នុងការថែទាំ ព្រោះវាត្រូវការទឹកតិច ហើយទោះគ្មានពន្លឺថ្ងៃគ្រប់គ្រាន់ ក៏អាចរស់បានយូរដែរ។
៦. អប់ផ្កាក្នុងផ្តិលទឹក
ខ្មែរយើងនិយមអប់ផ្កាក្នុងទឹក ដើម្បីប្រើជាទឹកមន្ដ ឬប្រើសម្រាប់ប្រោះព្រំលើមុខលើខ្លួនឲ្យសាយកិ្លនក្រអូប។ ខណៈពេលនេះ យើងនឹងតុបតែងផ្ទះជាមួយនឹងផ្តិលប្រាក់ដែលមានអប់ផ្កាម្លិះ ឬស្រទាប់ផ្កាកុលាបវិញម្ដង វាមិនត្រឹមតែផ្ដល់នូវសោភ័ណភាព ព្រមទាំងផ្តល់នូវក្លិនពិដោរដ៏ឈ្ងុយឈ្ងប់។ ការអប់ផ្កាក្នុងទឹកនេះ ក៏បានបង្កើតជាបរិយាកាសដ៏ត្រកាលមួយ ព្រោះវាបានជួយបន្ថយសីតុណ្ហភាពក្ដៅក្នុងបន្ទប់របស់អ្នកបានមួយផ្នែកផងដែរ។
៧. ដាំពពួកជីរ
ប្រិយមិត្តអាចដាក់ដាំពពួកជីរនានាលម្អក្នុងផ្ទះបាយ ដូចជាជីរនាងវង ជីររណា ជីរអង្កាម និងជីរវ៉ាន់ស៊ុយជាដើម។ ដាំក្បែរបង្អួច ឬកន្លែងដែលមានថ្ងៃជះដល់ នឹងជួយឲ្យដំណាំជីរទាំងនោះលូតលាស់បានល្អ ហើយបន្ថែមភាពរស់រវើកដល់ផ្ទះបាយរបស់អ្នកទៀតផង។ ដំណាំជីរទាំងអស់សុទ្ធតែអាចប្រើជាគ្រឿងផ្សំក្នុងការធ្វើម្ហូប និយាយរួមគឺទទួលបានគុណប្រយោជន៍ទ្វេដងតែម្ដង។ ដោយសារពូជជីរទាំងនេះមិនត្រូវការទំហំដីធំ ដូច្នេះអ្នកអាចដាំវាក្នុងក្រឡដែលសល់ទំនេរបាន សន្សំប្រាក់ ហើយកាត់បន្ថយសំណល់សំរាមបានទៀត៕
Article by LENG CHANREASEY
