SOVRIN Magazine

ហេង សុខវិសាល យុវផលិតករវីដេអូទាន់សម័យដែលមានទីផ្សារក្នុងស្រុកល្បីខ្លាំង

NEWS 4 years ago

គ្រាន់តែឮឈ្មោះថា Heng Visal ឬមានឈ្មោះពិតពេញថា ហេង សុខវិសាល ជឿជាក់ថាប្រិយមិត្តនិយមប្រើប្រាស់បណ្តាញសង្គមស្ទើរគ្រប់វ័យស្រទាប់ ជាពិសេសយុវវ័យប្រាកដជាស្គាល់ច្បាស់ដែលលោកគឺជាអ្នកផលិតមាតិកាវីដេអូ (Video Creator) ដ៏លេចធ្លោមួយរូបនៅកម្ពុជា។ ប្លែកពីអ្នកផលិតវីដេអូវ័យក្មេងដទៃដែលផ្តោតតែលើប្រធានបទបង្ហាញពី តំបន់ទេសចរណ៍ សម្រស់ និងកន្លែងអាហារឆ្ងាញ់ៗជាដើម យុវជន ហេង សុខវិសាល បានផ្តោតធ្វើវីដេអូទៅលើប្រធានបទកម្សាន្តចម្រុះហើយដែលសំខាន់រាល់វីដេអូនីមួយៗរមែងក្លែមពាក្យពេជន៍កំប្លែងដែលធ្វើឲ្យអ្នកទស្សនាសើចសប្បាយក៏ដូចជាគាំទ្រតាមដានមិនជិនណាយផងដែរ។ ជីវិតហែលឆ្លងលើវិស័យផលិតវីដេអូបង្ហោះលើបណ្តាញសង្គមរយៈពេលប្រមាណជាង៥ឆ្នាំ អ្នកផលិតវីដេអូវ័យក្មេងរូបនេះហាក់ទទួលបានជោគជ័យគួរឲ្យកត់សម្គាល់ដោយបច្ចុប្បន្នក្រៅពីអាចរកចំណូលពីបណ្តាញសង្គម YouTube Facebook និងស្ពនស័រជាច្រើន លោកក៏ជាសហស្ថាបនិកក្រុមហ៊ុនចំនួន៣ក្នុងពេលតែមួយផងដែរ។

វ័យទើបតែ ២៥ឆ្នាំ មានស្រុកកំណើតនៅទីក្រុងភ្នំពេញផ្ទាល់និងចាប់កំណើតជាកូនពៅ(បងប្អូនប្រុស២ស្រី២)នៅក្នុងគ្រួសារដែលមានឪពុកជាវេជ្ជបណ្ឌិត(មរណភាព) និងម្តាយជាស្ត្រីមេផ្ទះ បច្ចុប្បន្នលោក ហេង សុខវិសាល បានកំពុងមមាញឹកយ៉ាងខ្លាំងទៅលើការបង្កើតវីដេអូ ការអញ្ជើញចូលរួមកម្មវិធីពីបណ្តាស្ពនស័រ ហើយក៏សកម្មនឹងអាជីវកម្ម៣កន្លែងរួមមាន ក្រុមហ៊ុនលក់អាហារអនឡាញ«ចង់ញុំា» ក្រុមហ៊ុនផលិតផលសម្រស់ «Sart by Veesa» និងក្រុមហ៊ុនជំរុញលើវិស័យផលិតវីដេអូ «Veesa-The Creator»។ ចំណោមក្រុមហ៊ុនទាំង៣ ក្រុមហ៊ុនទើបបង្កើតចុងក្រោយ «Veesa-The Creator» គឺជាក្រុមហ៊ុនដែលលោកដាក់ចិត្តដាក់កាយសកម្មជាងគេ ក៏ព្រោះវាតែជាបំណងតែមួយគត់ក្នុងការជួយជំរុញដល់អ្នកស្នេហាការផលិតវីដេអូដូចជារូបលោក និងលើស្ទួយវិស័យផលិតវីដេអូនៅកម្ពុជាឲ្យកាន់តែរីកចម្រើនផងដែរ។ លោកបានបង្ហាញទស្សនៈដូច្នេះ«នៅប្រទេសជឿនលឿនវិស័យផលិតវីដេអូបង្ហោះលើបណ្តាញសង្គមត្រូវបានគេឲ្យតម្លៃនិងមានការពេញនិយមខ្លាំង ហើយបើងាកមកកម្ពុជាវិញថ្វីដ្បិតវិស័យនេះត្រូវបានគេមើលរំលងឬអាចនិយាយបានថាយើងដើរយឺតជាងគេបន្តិច ប៉ុន្តែវាគឺជាវិស័យមួយដ៏ល្អព្រមទាំងជាឱកាសដែលអ្នកស្រឡាញ់អាចឈោងចាប់ ដោយសារតែស្រុកខ្មែរនៅមិនទាន់មានអ្នកចាប់ផ្តើមច្រើនក៏ដូចជាមិនទាន់មានទីផ្សារប្រកួតប្រជែងច្រើននៅឡើយ»។ លោកបានលើកឡើងបន្ថែមដែរថា«វិស័យនេះមិនត្រឹមតែជួយយើងឲ្យមានកេរ្តិ៍ឈ្មោះក៏ដូចជាអាចរកចំណូលពីវាប៉ុណ្ណោះទេ ថែមទាំងជួយដល់មុខមាត់ប្រទេសនិងទាក់ទាញទេសចរណ៍ផងដែរ។ ឧទាហរណ៍ដូចជាអ្នកធ្វើវីដេអូយូធូបឬ YouTuber ជនជាតិស្វីសដែលមានអ្នកSubscribeច្រើនបំផុត គឺមានមនុស្សរាប់រយរាប់លាននាក់លើពិភពលោកតាមដានវីដេអូរបស់គាត់ហើយស្គាល់គាត់ច្បាស់ថាជានរណានិងមកពីណាជាដើម»។ ងាកមកសម្លឹងមើលការធ្វើវីដេអូរបស់យុវវ័យកម្ពុជាសព្វថ្ងៃវិសាលបានបង្ហាញចំណាប់អារម្មណ៍លាយឡំស្នាមញញឹមដូច្នេះ«បើប្រៀបធៀបការធ្វើវីដេអូរបស់យុវវ័យឥឡូវនិងកាលខ្ញុំធ្វើវីដេអូពីដំបូងវិញ ខ្ញុំសូមសរសើរក្មេងៗសម័យថ្មីនេះចេញពីចិត្តតែម្តង ព្រោះដ្បិតពួកគាត់ទើបតែចាប់ផ្តើមប៉ុន្តែគាត់ធ្វើបានល្អណាស់ គាត់ចេះបង្កើតប្រធានបទប្លែកៗ មានគំនិតច្នៃប្រឌិតខ្ពស់ និងរៀបចំការថតបានល្អ។ ប្រសិនបើគាត់ខិតខំបន្ថែមទៀតពី៤ទៅ៥ឆ្នាំជឿជាក់ថាពួកគាត់នឹងមានលទ្ធផលល្អដូចខ្ញុំដែរ»។ តួយ៉ាង លោក ហេង សុខវិសាល ប្រៀបបីដូចជាតារាលេចធ្លោមួយដួងនៅលើបណ្តាញសង្គមដោយមានអ្នកតាមដាននិងតែងតែចុច Like និង Share ច្រើនសន្ធឹកសន្ធាប់រាល់ពេលបង្ហោះវីដេអូនីមួយៗ។ គិតត្រឹមខែសីហាឆ្នាំ២០២០នេះបើនិយាយពីចំនួនអ្នកចុច Subscribe លើបណ្តាញសង្គម YouTube របស់លោកមានដល់ទៅជាង៨៧ម៉ឺន៧ពាន់នាក់ រីឯបណ្តាញសង្គមហ្វេសប៊ុកមានចំនួនអ្នក Follow ដល់ទៅជាង១លាននាក់។ រាល់វីដេអូដែលលោកបង្ហោះម្តងៗមានអ្នកចូលទស្សនាលើបណ្តាញសង្គមហ្វេសប៊ុកប្រមាណជាង២លាននាក់ ចំណែកបណ្តាញសង្គមយូធូបមានដល់ទៅជាង៣លាននាក់ឯណោះ។ ក្នុងមួយខែៗបើសរុបទាំងជំនួញអាជីវកម្មក្រុមហ៊ុនទាំង៣ ការរកចំណូលពីស្ពនស័រ និងពីYouTube ផងនោះ វិសាលបង្ហើបថាលោកអាចរកចំណូលជាធម្យម១ម៉ឺនដុល្លារ។

យ៉ាងណាមិញប្រជាប្រិយភាពរបស់យុវជន ហេង សុខវិសាល មិនមែនទើបតែកើតឡើងនោះទេ ពោលគឺតាំងពីវីដេអូដែលលោកបង្ហោះដំបូងបំផុតលើទំព័រហ្វេសប៊ុកផ្លូវការរបស់ខ្លួនក្រោមចំណងជើង«តើមនុស្សប្រុសសុទ្ធតែដូចគ្នាមែនទេ?»កាលពីថ្ងៃទី០៥ខែតុលាឆ្នាំ២០១៥។ មែនទែនទៅការធ្វើវីដេអូរបស់លោកបានចាប់ផ្តើមតាំងពីឆ្នាំ២០១៣ម្ល៉េះ ប៉ុន្តែគ្រោះនោះបន្ទាប់ពីធ្វើបាន៥ទៅ៦វីដេអូលោកក៏ជួបឧបទ្ទវហេតុគ្រោះថ្នាក់ចរាចរណ៍បណ្តាលឲ្យបាក់ជើងទើបផ្អាកមួយរយៈហើយក៏ចាប់ផ្តើមវិញនៅក្នុងឆ្នាំ២០១៥។លោកបានបោះបង់អាជីពការងារនៅប្រទេសជប៉ុនខណៈដែលខ្លួនទើបតែធ្វើការបានរយៈពេលពីរខែជាមួយប្រាក់ចំណូលខ្ទង់ពាន់ដុល្លារដើម្បីត្រឡប់មកបំពេញក្តីស្រមៃធ្វើវីដេអូ និងបញ្ចប់ការសិក្សាផ្នែកវិស្វករបច្ចេកវិទ្យានៅវិទ្យាស្ថានបច្ចេកវិទ្យាគិរីរម្យវិញ។ ហេតុផលនៃការចាប់ផ្តើមធ្វើវីដេអូលោកបានបង្ហើបថាដោយសារលោកចូលចិត្តលេងអ៊ីនធ័រណែត និងចូលចិត្តមើល YouTube តាំងតែពីតូច ដែលសំខាន់មួយទៀតនោះគឺដោយការបាត់បង់ស្នេហាផងដែរ។ «ខ្ញុំជាមនុស្សចូលចិត្តលេងសើចច្រើន ខ្ញុំតែងតែធ្វើឲ្យសង្សាររបស់ខ្ញុំសើចប៉ុន្តែពេលគេសុំបែកគេក៏ប្លុក(Block)ហ្វេសប៊ុករបស់ខ្ញុំ ដូច្នេះហេតុតែចង់ឲ្យគេបានឃើញបានសើចដូចរាល់ដងខ្ញុំក៏ធ្វើវីដេអូបែបនិយាយអ្វីកំប្លែងៗបង្ហោះចោល ព្រោះខ្ញុំគិតថាបើមានអ្នកចាប់អារម្មណ៍ច្រើនគេនឹងធ្វើការShareតតគ្នារហូតដល់សង្សារខ្ញុំបានឃើញហើយគាត់ក៏បានសើចដូចគ្នា»។ ភាពរួសរាយលាយឡំសម្តីពូកែវោហារកំប្លែងវិសាលនិយាយថានេះមិនមែនជាការសម្តែងឡើយ ផ្ទុយមកវិញវាគឺជាអត្តចរិតធម្មជាតិរបស់លោកបើនៅខាងក្នុងវីដេអូយ៉ាងម៉េចគឺនៅខាងក្រៅដូច្នោះដែរ។ រាល់ការបង្កើតវីដេអូកន្លងមកទាំងការបង្កើតប្រធានបទ ការថត និងការកាត់តគឺវិសាលធ្វើតែម្នាក់ឯងប៉ុណ្ណោះ លោកប្រកាន់ខ្ជាប់ការតស៊ូព្យាយាមនិងធ្វើវាចេញពីបេះដូង។ ចុះសួរថាតើអ្វីខ្លះជាគន្លឹះក្នុងការធ្វើវីដេអូរបស់លោក? ឆ្លើយទាំងឥតលាក់លៀមទី១គឺមានគំនិតច្នៃប្រតិដ្ឋខ្ពស់ទៅលើសាច់រឿង ទី២គុណភាពរូបភាពច្បាស់ត្រជាក់ភ្នែកអ្នកមើល និងទី៣សំឡេងច្បាស់ល្អ។

ដោយឡែក នៅក្នុងឆ្នាំ២០២០នេះ ក្រៅពីអាជីពផលិតមាតិកាវីដេអូ និងជាសហស្ថាបនិកក្រុមហ៊ុន កំលោះសង្ហា ហេង សុខវិសាល នឹងឆ្លៀតប្រឡូកក្នុងវិស័យសម្តែងបន្ថែមទៀត ខណៈកន្លងមកមានបណ្តាផលិតករជាច្រើនចាប់អារម្មណ៍ទំនាក់ទំនងថតសម្តែងស្របចំពេលលោកកំពុងជាប់រវល់ក្នុងការសិក្សា។ ក្តីស្រមៃរបស់លោកនាពេលអនាគតក៏មិនខុសឆ្ងាយគ្នាប៉ុន្មានដែរគឺលោកចង់ក្លាយជាផលិតករនិងអ្នកដឹកនាំសម្តែងមួយរូប៕

Article by HEM SOKKHIM

SUGGESTIONS