សម្ភារប្រើប្រាស់ជាច្រើនក្នុងជីវភាពប្រចាំថ្ងៃសុទ្ធសឹងតែអាចកែច្នៃជាសម្ភារដទៃទៀតដែលពុំចាំបាច់ត្រូវការសារធាតុជ័រប្លាស្ទិចនោះឡើយ តួយ៉ាង ការប្រើប្រាស់ថង់ក្រណាត់ជំនួសដោយថង់ប្លាស្ទិចសម្រាប់ការវេចខ្ជប់ ការប្រើប្រាស់ទុយោដែកជំនួសទុយោជ័រជាដើម ប៉ុន្តែភាគរយនៃការអនុវត្តតាមវិធីសាស្ត្រនេះស្ថិតក្នុងកម្រិតមធ្យមនៅឡើយ ក៏ព្រោះតែសម្ភារដែលអាចប្រើជំនួសប្លាស្ទិចជារឿយៗមានទំហំ ឬទម្ងន់ធ្ងន់ពិបាកនឹងយកតាមខ្លួន។ ដូច្នេះ តើមានសម្ភារណាខ្លះដែលអាចប្រើជំនួសប្លាស្ទិច និងផ្តល់ភាពងាយស្រួល?
ដើម្បីដោះស្រាយនូវបញ្ហា និងជាផ្នែកមួយដែលអាចកាត់បន្ថយនូវសារធាតុប្លាស្ទិចប្រកបដោយប្រសិទ្ធភាព យុវជន ពិសិដ្ឋ ម៉ូលីរតនា និងយុវតី តូច នីតា ជាស្ថាបនិក និងសហស្ថាបនិកនៃទំព័របណ្តាញសង្គម «Domner2 Eco» បានបង្កើតនូវសម្ភារមួយចំនួនដែលជាភាពស្រួលក្នុងការប្រើប្រាស់ និងការសម្អាត តួយ៉ាង ទុយោដែកអាចកាច់បាន សម ស្លាបព្រា ចង្កឹះ ដែលអាចដោះចេញពីគ្នា និងថង់ក្រណាត់មានរាងតូចច្រឡឹងអាចផ្ទុកសម្ភារបានច្រើន។ យ៉ាងណាមិញ កត្តាដែលបានជំរុញឲ្យយុវជន រតនា និងយុវតី នីតា សហការគ្នាបង្កើតសម្ភារទាំងអស់នេះ ក៏ព្រោះតែពួកគេសង្កេតឃើញថាប្រជាជនខ្មែរនៅមានកង្វះខាតនូវការប្រើប្រាស់វត្ថុកែច្នៃដែលផ្ទុយពីផ្នត់គំនិតបរទេសកំពុងគាំទ្រនូវផលិតផលធម្មជាតិ ឬកែច្នៃនានាដែលពុំផ្តល់នូវភាពអវិជ្ជមានដល់បរិស្ថាន។ យុវជន រតនា បានបង្ហាញថា «ដំបូងឡើយខ្ញុំបានចូលរួមកម្មវិធីមួយទាក់ទងនឹងការ start-up របស់ក្រុមហ៊ុនឯកជនមួយ ហើយពេលនោះខ្ញុំបានអ្នកជួយសម្របសម្រួលជាជនជាតិបរទេស ហើយថ្ងៃមួយពួកយើងបានណាត់គ្នាពិភាក្សាអំពីគម្រោងរបស់ពួកយើង ប៉ុន្តែពេលដែលអ្នកជួយសម្របសម្រួល ឬសិស្សច្បងរបស់ពួកខ្ញុំនោះគាត់មកកាន់ដបទឹកដែកជាប់ជាមួយគាត់រហូត ហើយខ្ញុំក៏គិតក្នុងចិត្តថា ហេតុអីបានជាជនបរទេសដែលមករស់នៅស្រុកយើងគាត់ខ្វល់ខ្វាយពីបញ្ហាទាក់ទងនឹងបរិស្ថានជាងយើងខ្លួនឯងទៅទៀត? ហើយចាប់តាំងពីពេលនោះមកខ្ញុំក៏បានកត់ចំណាំ និងផ្លាស់ប្តូរទម្លាប់នោះរហូតមកដល់សព្វថ្ងៃ មួយវិញទៀតខ្ញុំក៏ចាប់ផ្តើមពិភាក្សាគ្នាធ្វើសម្ភារណាដែលជាផ្នែកមួយសម្រួលដល់អ្នកប្រើប្រាស់។» ម៉្យាងវិញទៀត ស្ថាបនិកវ័យក្មេងម្នាក់នេះបង្ហាញថា ជាទូទៅ ប្រជាជនខ្មែរភាគច្រើនតែងនិយមប្រើប្រាស់សម្ភារ ឬផលិតផលណាមួយដែលមានលក្ខណៈប្លែក ស្រស់ស្អាត គុណភាពល្អ ងាយយកទៅតាមខ្លួន ដូច្នេះ ដើម្បីឲ្យប្រជាជនខ្មែរងាកមកស្វែងរកផលិតផលធម្មជាតិ ឬសម្ភារដែលមិនប៉ះពាល់បរិស្ថានប្រកបដោយប្រសិទ្ធភាពលុះត្រាតែអ្នកពាក់ព័ន្ធទាំងអស់ជួយដោះស្រាយបញ្ហាទាំងនោះជាមួយគ្នាទើបប្រសើរឡើង។
«Domner2 Eco» ជាស្លាកយីហោបង្ហាញពីការធ្វើដំណើរបន្តិចម្តងៗរបស់យើងទាំងអស់គ្នាដែលមានកាតព្វកិច្ចរួមគ្នាថែរក្សាបរិស្ថាន និងជួយសង្គ្រោះពិភពលោកផងដែរ។ ទន្ទឹមនឹងនេះ យុវជន ពិសិដ្ឋ ម៉ូលីរតនា និងយុវតី តូច នីតា បានបង្ហាញនូវចំណាប់អារម្មណ៍របស់ខ្លួនយ៉ាងដូច្នេះថា «រួមគ្នាថែរក្សាបរិស្ថានគឺសុទ្ធតែជាការចាប់ផ្តើមពីសកម្មភាពបន្តិចបន្តួចរបស់យើងទាំងអស់គ្នា ប្រសិនបើយើងចាប់ផ្តើមផ្លាស់ប្តូរទម្លាប់នោះយើងនឹងទទួលបានជោគជ័យរស់នៅដោយគ្មានសារធាតុជ័រប្លាស្ទិចដែលប៉ះពាល់សុខភាពនោះឡើយ»៕
Article by PAN SIVLY