Sovrin
Sovrin
គួរមានវិធានការអ្វីខ្លះដើម្បីធ្វើឲ្យការងារនៅផ្ទះមានប្រសិទ្ធភាព?
TRAVEL & LIVING 3 years ago
ស្ថាប័នការងារសំខាន់ៗជាច្រើនត្រូវបានកាត់បន្ថយបុគ្គលិកមួយភាគតាមសំណើរសេចក្តីប្រកាសផ្លូវរបស់រាជរដ្ឋាភិបាល ដើម្បីរក្សាគម្លាតសុវត្ថិភាពដែលអាចកាត់បន្ថយហានិភ័យនៃការរីករាលដាលវីរុសកូវីដ១៩ពីបុគ្គលម្នាក់ ទៅបុគ្គលម្នាក់ទៀត ឬអាចជាការចម្លងទ្រង់ទ្រាយក្នុងសហគមន៍ផងដែរ ដូច្នេះហើយបុគ្គលិកមួយចំនួនតម្រូវឲ្យបំពេញកាតព្វកិច្ចរបស់ខ្លួនតាមគេហដ្ឋានជំនួសវិញ។ ជាក់ស្តែង បុគ្គលិកមួយចំនួនដែលមានភារកិច្ចបំពេញការងាររបស់ខ្លួនតាមគេហដ្ឋានមួយភាគពុំមានទំនួលខុសត្រូវកិច្ចការងាររបស់ខ្លួននោះទេដែលនេះអាចនឹងមានផលប៉ះពាល់ដល់ប្រសិទ្ធភាពរបស់ស្ថាប័នយ៉ាងខ្លាំង ហេតុនេះតើអ្នកគួររៀបចំវិធានសំខាន់ៗអ្វី ដើម្បីក្លាយខ្លួនជាបុគ្គលិកដែលមានទំនួលខុសត្រូវនឹងការងារ?
១. រក្សាទំនាក់ទំនងល្អជាមួយនឹងក្រុមការងារ
ដើម្បីឲ្យការងារនៅក្នុងស្ថាប័នកាន់តែរលូនដូចដែលអ្នកធ្វើការនៅក្នុងការិយាល័យនោះ អ្នកគួរតែមានទំនាក់
ទំនងជាមួយនឹងសមាជិកក្រុមការងារជានិច្ចតាមប្រព័ន្ធអនឡាញនានាដូចជា៖ តាមបណ្តាញសង្គម អ៊ីម៉ែលជាដើម ដើម្បីពិភាក្សា ឬដោះស្រាយបញ្ហានានាបានឆាប់រហ័ស។ ជាទូទៅ រាល់ពេលដែលអ្នកកំពុងបំពេញការងារនៅគេហដ្ឋាន អ្នកគួរតែធ្វើរបាយការណ៍ច្បាស់លាស់មួយដែលពណ៌នាពីសកម្មភាពរបស់អ្នក ម៉្យាងវិញទៀត អ្នកគួរតែរៀបចំការប្រជុំឲ្យបានច្រើនដងតាមដែលអាចធ្វើទៅបាន ដើម្បីធ្វើឲ្យទំនាក់ទំនងកាន់តែល្អប្រសើរ។ យ៉ាងណាមិញ បើទោះបីជាការងារអ្នកពុំមានភាពមមាញឹកជាមួយក្រុមការងារទេនោះ អ្នកក៏គួរតែរក្សាទំនាក់ទំនងដដែល ក៏ព្រោះតែការងារខ្លះក៏ត្រូវការវត្តមានរបស់អ្នកសម្រាប់បញ្ចេញមតិយោបល់។
២. ការរៀបចំពេលវេលាសម្រាក
មតិខ្លះតែងលើកឡើងថា «អ្នកធ្វើការនៅផ្ទះមានភាពងាយស្រួលជាងនៅក្នុងការិយាល័យ» ពោល មតិនេះបញ្ជាក់ពីសកម្មភាពរបស់បុគ្គលិកដែលធ្វើការនៅគេហដ្ឋានមានសេរីភាពច្រើនជាងការធ្វើការនៅក្នុងការិយាល័យ ក៏ព្រោះតែគេពុំចាំបាច់បំពេញការងារច្រើន។ យ៉ាងណាមិញ អ្នកបំពេញការងារនៅផ្ទះក៏មានកាតព្វកិច្ចច្រើនជាងនៅការិយាល័យក៏ថាបាន ព្រោះគេមានពេលវេលាច្រើនដូច្នេះគេអាចធ្វើការងារទាំងនោះបានគ្រប់ពេល។ រីឯអ្នកធ្វើការងារមួយចំនួនតូចណាស់ដែលតែងយកពេលវេលាទាំងនោះប្រើប្រាស់ជាមួយនឹងការកម្សាន្ត ហេតុដូចនេះប្រសិនបើអ្នកកំពុងស្ថិតនៅក្នុងស្ថានភាពនេះ អ្នកគួរតែផ្លាស់ប្តូរទម្លាប់នោះដោយជំនួសធ្វើការតាមដែលអាចធ្វើទៅបាន រីឯពេលសម្រាករបស់អ្នកគួរតែជាពេលដែលអ្នកបានបំពេញកាតព្វកិច្ចរួចរាល់។
៣. គ្រប់គ្រងអារម្មណ៍
ជួនកាលការធ្វើការនៅផ្ទះក៏អាចធ្វើឲ្យមានផលប៉ះពាល់ដល់អារម្មណ៍ផ្លូវកាយ ឬផ្លូវចិត្តផងដែរ។ ហេតុដូចនេះ ទើបអ្នកជំនាញតែងផ្តល់យោបល់ដូច្នេះថា «គួរតែស្រូបយកខ្យល់អាកាសបរិសុទ្ធប្រមាណជា៣០នាទី ដើម្បីធ្វើឲ្យអារម្មណ៍ស្រស់ថ្លាអាចនឹងធ្វើការងារបានលឿន និងពុំមានការស្មុគស្មាញជាមួយនឹរងការងារផងដែរ។
៤. រៀបចំកិច្ចការងារ ឬតួនាទីឲ្យបានច្បាស់លាស់
ប្រសិនបើអ្នកពុំទាន់មានការរៀបចំតួនាទី ឬគម្រោងការដែលព័ន្ធជាមួយនឹងការងានោះទេ អ្នកគួរតែសិក្សា និងចាប់ផ្តើមទម្លាប់ពីពេលនេះ ក៏ព្រោះតែការរៀបចំគម្រោងការច្បាស់លាស់តែងទទួលបាននូវផលវិជ្ជមានជានិច្ច។ ទន្ទឹមនឹងនេះផងដែរ ប្រសិនបើអ្នកមានចម្ងល់ ឬពុំអាចរៀបចំបានល្អនោះទេ អ្នកគួរពិភាក្សាជាមួយនឹងអ្នកជំនាញ ឬសិស្សច្បងរបស់អ្នក ដើម្បីធ្វើឲ្យការរៀបចំ និងគម្រោងនោះមានប្រសិទ្ធភាពទ្វេរដង៕
Article by PAN SIVLY
