យុវវ័យកម្ពុជាបច្ចុប្បន្នស្ទើរតែទាំងអស់សុទ្ធតែបានស្តាប់បទចម្រៀង “បុណ្យភូមិ” ដ៏ល្បីល្បាញដែលលាន់ឮ មិនសូវលោះក្នុងកម្មវិធីរាំកំសាន្តផ្សេងៗនៅគ្រប់ទីកន្លែងក្នុងផ្ទៃប្រទេស សូម្បីតែកុមារាកុមារីតូចៗក៏និយមយកបទ នេះច្រៀងលេងយ៉ាងសប្បាយរីករាយក្នុងរយៈពេលប៉ុន្មានឆ្នាំចុងក្រោយនេះ ហើយបទនេះដែរក៏ត្រូវបានរៀបចំផលិត ជាភាគបន្តក្រោមចំណងជើងថា “បុណ្យភូមិកុកគ្រូ” សម្រាប់អបអរឱកាសពិធីបុណ្យចូលឆ្នាំថ្មីប្រពៃណីជាតិដែលទើប តែកន្លងផុតទៅថ្មីៗនេះ។ អត្ថន័យនៃទំនុកច្រៀង សូរស័ព្ទតន្រ្តីអម ក្បាច់រាំ ព្រមទាំងគំនិតច្នៃប្រឌិតថ្មីប្លែកក្នុងការរៀប ចំផលិតវីដេអូចម្រៀងថ្មីនេះ បានគោះអង្រួនដួងចិត្តទស្សនិកជនកម្ពុជារាប់ម៉ឺននាក់ឲ្យសម្រុកគាំទ្រកោតស្ញប់ស្ញែង និងចែករំលែកតគ្នាៗពាសពេញបណ្តាញសង្គមក្នុងរយៈពេលតែមួយប៉ប្រិចភ្នែកប៉ុណ្ណោះ។
ក្រុមតន្រ្តី Smallworld Smallband ជាក្រុមតន្រ្តីយុវជនខ្មែរសុទ្ធសាធដែលមានសមាជិកសរុបចំនួនប្រាំនាក់ ហើយដែលពួកគេទាំងអស់មានតួនាទីរៀងៗខ្លួនដើម្បីចូលរួមចំណែកអភិវឌ្ឍក្រុមនេះឲ្យដំណើរការទៅមុខ ដែលក្នុង នោះរួមមាន យុវជន រៀម សុខភិរម្យ (ប្រធានក្រុមចាត់ការទូទៅ និងតន្រ្តីករហ្គីតាបាស) កញ្ញា រិទ្ធី លំអរកេសរ (អ្នក ចម្រៀង) យុវជន ម៉ម ពេជ្ជរិទ្ធ (អ្នកចម្រៀង តន្រ្តីករហ្គីតា និង អ្នករៀបចំការផលិត) យុវជន ជា ដានីញ៉ែល (តន្រ្តីករ ព្យ៉ាណូ និង ជំនួយការផលិត) និង យុវជន រ៉ុង សុភីដេវីដ (អ្នកវាយស្គរ)។ អ្វីដែលគួរឲ្យកោតសរសើរមែនទែន នោះគឺ ពួកគេម្នាក់ៗសុទ្ធតែជាយុវជនវ័យក្មេង អាយុក្រោម២៥ឆ្នាំទាំងអស់ ហើយមិនត្រឹមតែប៉ុណ្ណោះ សមាជិកនីមួយៗសុទ្ធ តែមានសមត្ថភាពពហុជំនាញ ជាអាទិ៍ភិរម្យ ជាកីឡាករសីដក់។ ដេវីដ ជាកីឡាករតេក្វាន់ដូ រីឯ ដានីញ៉ែល ជាអ្នកឯក ទេសព័ត៌មានវិទ្យា។ ថ្វីត្បិតតែពួកគេមានប្រភពជំនាញទីទៃពីគ្នា តែពួកគេសុទ្ធតែមានចំណង់ចំណូលចិត្តផ្នែកសិល្បៈ និងចក្ខុវិស័យការងាររួមគ្នាតែមួយ។
យុវជន រ៉ុង សុភីដេវីដ
យុវជន រ៉ុង សុភីដេវីដ បានបកស្រាយថា “នៅពេលដំបូង ខ្ញុំមិនរំពឹងទុកថាក្លាយជាធំដុំបែបនេះទេ តែនៅ ពេលខ្ញុំបានចូលក្រុម ខ្ញុំបានរៀនសូត្រពីគ្នាច្រើន។ ជាពិសេស ពួកខ្ញុំមិនមែនរៀនតែជំនាញនោះទេ តែវាជាចំណង គ្រួសារមួយ។ ចំណងគ្រួសារនេះហើយដែលធ្វើឲ្យពួកយើងចុះសម្រុងគ្នាល្អ។ បើគ្រាន់តែជាក្រុមតន្រ្តីមួយសាមញ្ញ ពួកយើងអាចចេញចូលតាមចិត្ត ប៉ុន្តែចំណងនេះហើយដែលធ្វើឲ្យខ្ញុំគិតថាយើងអាចរីកដុះដាលជាងក្រុមដទៃ។”
ក្រោមទស្សនៈវិស័យផលិតស្នាដៃថ្មីមិនចម្លងពីគេ បម្រើប្រយោជន៍ប្រជាជាតិខ្មែរទាំងមូល ក្រុម Smallworld Smallband បានខិតខំព្យាយាមយកចិត្តទុកដាក់ពិភាក្សាការស្វែងរកគំនិតថ្មីក្នុងការបង្កើតបទចម្រៀងជាបន្តបន្ទាប់ ដែលទទួលបានការនិយមគាំទ្រយ៉ាងសម្បើមពីសំណាក់មហាជនខ្មែរនៅគ្រប់ទិសទីទាំងនៅក្នុងទីក្រុងនិងតាមបណ្តា ខេត្ត។ ជាក់ស្តែង នាពេលកន្លងមក ក្រុមនេះត្រូវបានគេអញ្ជើញទៅសម្តែងនៅក្នុងកម្មវិធីផ្សេងៗ តួយ៉ាង កម្មវិធីយើង នាំគ្នាសសំអាតទីក្រុង (Let’s do it! Phnom Penh 2012) កម្មវិធីវប្បធម៌ខ្មែរ អរិយធម៌ខ្មែរ កម្មវិធីបុណ្យភូមិ កម្មវិធីបើក សម្ពោធការប្រកួតកីឡាជាតិកម្ពុជាលើកទី១ ព្រឹត្តិការណ៍កីឡាបាល់បោះយុវជន ការប្រកួតបាល់ទាត់ ពានរង្វាន់សម្តេចអគ្គសេនាបតីតេជោ ហ៊ុន សែន ឆ្នាំ២០១៦ កម្មវិធីពានរង្វាន់អត្តពលិកកម្ពុជាដែលមានប្រជាប្រិយ បំផុត (CAMBODIA SPORTS AWARD CEREMONY) នៅសណ្ឋាគារណាហ្គាវើល កម្មវិធីតន្រ្តី SMART Mega Concert នៅកោះពេជ្រ កម្មវិធីបើកសម្ពោធផ្ទះស្រឡាញ់ និងការប្រគំតន្រ្តីមួយចំនួននៅខេត្តសៀមរាប ខេត្តព្រះសីហនុ ខេត្តកំពត ខេត្តបាត់ដំបង និងខេត្តកំពង់ចាម។
កញ្ញា កេសរ
“នៅពេលដែលចុះទៅតាមខេត្ត វាជាពេលវេលាមួយដែលពួកយើងគិតចេញជាបទចម្រៀងថ្មីមួយបទ។ នោះហើយជាកត្តាជំរុញទឹកចិត្តរបស់ពួកយើងក្នុងការនិពន្ធបទចម្រៀង។ ”កញ្ញា កេសរ តារាចម្រៀងស្រីប្រចាំក្រុម បានបញ្ជាក់។ ទោះបីជាស្ថិតក្នុងភាពជោគជ័យកម្រិតណាក៏ដោយ ក៏កញ្ញានៅតែខំប្រឹងហាត់ពត់លត់ដំសមត្ថភាព របស់ខ្លួនរួមជាមួយសមាជិកដទៃក្រោមដំបូលស្ទូឌីយ៉ូថតសម្លេងរបស់ក្រុមផ្ទាល់ដែលមានឈ្មោះថា SDAB STUDIO “ពួកយើងបង្កើតវាបានពីរឆ្នាំហើយ។ យើងរស់នៅជាមួយគ្នា និងពិភាក្សាការងារនៅទីនោះជារៀងរាល់ថ្ងៃ។ ខ្ញុំមិន មែនចេញពីសាលារៀនចម្រៀងនោះទេ ដូច្នេះខ្ញុំត្រូវការចំណាយពេលហ្វឹកហាត់សម្លេងច្រៀងដោយខ្លួនឯងច្រើន។ ខ្ញុំនៅតែព្យាយាមបន្ត ព្រោះខ្ញុំគិតថាមិនទាន់ដល់អ្វីដែលខ្ញុំចង់បាននៅឡើយទេ”។
យុវជន ម៉ម ពេជ្ជរិទ្ធ
ដោយឡែក ពេជ្ជរិទ្ធ សមាជិកក្មេងជាងគេក្នុងក្រុម បានចែករំលែកបទពិសោធន៍របស់ខ្លួនថា “កាលខ្ញុំចូលដំបូង ខ្ញុំទើបមានអាយុត្រឹមតែ១៤-១៥ឆ្នាំប៉ុណ្ណោះ។ ខ្ញុំពុំទាន់ចេះធ្វើការជាមួយមនុស្សចាស់ តែនេះជាអ្វីដែលខ្ញុំបានរៀនសូត្រស្វែងយល់ ខ្ញុំចេះថយក្រោយមួយជំហាន (ការសម្របសម្រួលក្រុម) តែខ្ញុំក៏ហ៊ានបញ្ចេញមតិដែរ។ ឥឡូវខ្ញុំអភិវឌ្ឍបន្ថែមលើបច្ចេកទេសសម្លេង (vocal) ជំនាញលេងហ្គីតា ការផលិតបទចម្រៀង និងការសម្រួលតន្រ្តី។ ខ្ញុំអាចធ្វើបានកម្រិតណា ខ្ញុំធ្វើកម្រិតហ្នឹង”។
លោក រៀម សុខភិរម្យ
បើតាមការអះអាងរបស់ប្រធានក្រុម សមាជិក Smallworld Smallband គ្រប់រូបមានឆន្ទៈក្នុងការផលិតបទ ចម្រៀងដែលមានអត្ថន័យជ្រាលជ្រៅទាក់ទងនឹងតថភាពសង្គមខ្មែរនាពេលបច្ចុប្បន្នផ្ទាល់ ដូចជា ព្រឹត្តិការណ៍កីឡា សកម្មភាពគាំពារបរិស្ថាន ការអភិរក្សលើកស្ទួយព្រលឹងសិល្បៈវប្បធម៌ជាតិមានល្ខោនខោល និងស្បែកធំជាដើម។ “ខ្ញុំរំភើបមែនទែននៅពេលដែលពួកយើងត្រូវបានអញ្ជើញឲ្យច្រៀងបទ “ទឹកចិត្ត” នៅក្នុងព្រឹត្តិការណ៍ប្រកួតកីឡានៅពហុកីឡដ្ឋានជាតិអូឡាំពិក ហើយអ្នកចូលរួមជាង៦ម៉ីននាក់បានស្រែកច្រៀងបន្ទរតាម។ ពួកយើងមិនចង់ឲ្យបទចម្រៀងត្រឹមតែពីរោះប៉ុណ្ណោះទេ តែយើងចង់ផ្ញើសារឲ្យអ្នកស្តាប់។ យើងចង់ឲ្យបទទាំងអស់នៅក្នុងព្រលឹងរបស់ពួកគាត់”។
យុវជន ជា ដានីញ៉ែល
បទល្បីៗរបស់ក្រុមនេះរួមមាន បទទង់ជាតិខ្មែរ បទស្នេហ៍៩ បទទឹកចិត្ត បទស្មារតីកីឡា បទឆឺតឆឺត បុណ្យភូមិ និងបទបុណ្យភូមិកុកគ្រូ។ ដើម្បីឆ្លើយតបនឹងការគាំទ្រយ៉ាងខ្លាំងក្លាពីសំណាក់មហាជនគ្រប់មជ្ឍដ្ឋាន ក្រុមនេះកំពុងរៀបចំផលិតអាល់ប៊ុមចម្រៀងដែលមាន៨បទ ពោរពេញដោយសាច់រឿងផ្សេងៗគ្នា។ តាមរយៈ សូវរីន ក្រុម Smallworld Smallband ចង់ឲ្យប្រជាជនខ្មែរទូទាំងប្រទេសដាច់ខាតត្រូវតែគាំទ្រការផលិតនេះ មិនមែនត្រឹមតែជួយធម្មតានោះទេ ពោលគឺស្តាប់ដោយយកចិត្តទុកដាក់ ហើយសូមឲ្យស្រឡាញ់ព្រោះពិតជាស្រឡាញ់អស់ពីបេះដូង មិនមែនព្រោះតែវាស្ថិតនៅក្រោមស្លាក “ស្នាដៃកូនខ្មែរ” នោះទេ “ពួកយើងចង់ឲ្យគេស្គាល់ថាយើងជាយើង ជាជាងស្គាល់ដោយការបិទស្លាកសញ្ញារបៀបនោះ”៕
Article by SRIN SOKMEAN