ទំលាប់នៃការថែរក្សាសម្រស់គឺជារឿងសំខាន់ជាពិសេសគឺមិត្តនារីៗមិនថាពេលចេញទៅខាងក្រៅដើម្បីចូលរួមកម្មវិធីនានាឬក៏ការដើរផ្សារនោះទេ សូម្បីតែទំលាប់មុនពេលចូលគេងក៏ជាកត្តាដែលអាចធ្វើឲ្យយើងខូចសម្រស់ផងដែរ។ ដូចនេះដើម្បីថែរក្សាសម្រស់ឲ្យនៅតែស្រស់ស្អាតមុនពេលចូលគេង យើងសូមបង្ហាញនូវទំលាប់ងាយៗប្រាំយ៉ាងដែលអ្នកគួរតែអនុវត្ត៖
1. សម្អាតផ្ទៃមុខ៖ ការសម្អាតផ្ទៃមុខជាប្រចាំមុនចូលគេង អាចធ្វើឲ្យផ្ទៃមុខរបស់អ្នកមានភាពស្រស់ថ្លានិងអនាម័យ។ ការសម្អាតផ្ទៃមុខនេះទៀតសោត យើងត្រូវតែសម្អាតជាមូយនឹងហ្វមលាងមុខ ឬសាប៊ូលាងមុខ ព្រោះវាអាចលុបលាងនូវម្សៅផាត់មុខនិងលម្អងធូលីដែលជាភ្នាក់ងារបង្កឲ្យមានស្លាកស្នាម នៅលើមុខជាដើម។
2. ដុះធ្មេញឲ្យបានស្អាត៖ ជាការពិតណាស់ ការសម្អាតធ្មេញមុនទទួលទានដំណេក អាចធ្វើឲ្យសស្អាតនិងមិនមានដង្កូវស៊ីឡើយ។ ធ្មេញក៏អាចជួយលើកសម្រស់យើងមួយចំណែកដែរ ពិសេសនៅពេលដែលយើងញញឹមបង្ហាញនូវធ្មេញសចាំងក៏ជាការទាក់ទាញម្យ៉ាងដែរ។
3. បួងសក់៖ សម្រាប់មិត្តនារីដែលមានសក់វែង ការសម្រាកដោយមិនបួងសក់ឬមិនចងឲ្យបានត្រឹមត្រូវអាចធ្វើឲ្យខូចសម្រស់នៃសរសៃសក់ ព្រោះការគេងពីលើសក់ដែលរញ៉េរញ៉ៃអាចធ្វើឲ្យសក់បែកចុង និងរួញខុសពីធម្មតា។
4. បោះសម្អាតខ្នើយ៖ ការសម្អាត ភួយនិងខ្នើយក៏អាចជួយថែរក្សាសម្រស់របស់យើងបានមួយផ្នែកផងដែរ ព្រោះភួយនិងខ្នើយអាចមានធូលីនិងកម្ទេចកំទីរ ដែលអាចប្រឡាក់ផ្ទៃមុខរបស់យើងពេលកំពុងទទួលដំណេក។
5. ពិសាទឹកមុនគេង៖ ពិសាទឹកមួយកែវ ជួយសម្រួលដល់ដំណើរការកោសិការបស់អ្នកពេលកំពុងគេង។ ការទទួលទានទឹកមុនចូលគេង នឹងធ្វើឲ្យស្បែកអ្នកមានសំណើមនិងជួយថែរក្សាសម្រស់ផ្ទៃមុខថែមទៀតផង៕
Article by KEO SONG