×
Image Courtesy SOVRIN

ចាន់ វឌ្ឍនាកា​ កីឡាករ​បាល់ទាត់​ជម្រើស​ជាតិ​ ដែល​ទទួល​បាន​ភាព​លេចធ្លោ​ក្នុង​ការ​ប្រកួត​នា​ប៉ុន្មាន​ឆ្នាំ​ចុង​ក្រោយ​នេះ

 
 
            ខណៈ​ពេល​នេះ​ប្រជាប្រិយភាព​របស់​កីឡាករ​បាល់​ទាត់​ជម្រើស​ជាតិ​ក្នុង​ក្រុម​U23​ ចាន់​ វឌ្ឍនាកា​ កាន់​តែ​លេច​ធ្លោ​និង​ទទួល​បាន​ការ​គាំទ្រ​ពី​សំណាក់​អ្នក​ស្នេហា​វិស័យ​បាល់​ទាត់​កាន់​តែ​មាន​សន្ទុះ​ខ្លាំង​ឡើងៗ​ មិន​ចាញ់​តារា​ក្នុង​ពិភពសិល្បៈ​ប៉ុន្មាន​ទេ។​ នៅ​រាល់​មាន​ការ​ប្រកួត​ម្ដងៗ​ជា​មួយ​នឹង​សកម្មភាព​ក្នុង​ការ​ចែក​បាល់​ និង​ចុះហត្ថលេខា​លើ​គ្រាប់​បាល់​ គេ​សង្កេត​ឃើញ​ថា​ យុវវ័យ​ជា​ច្រើន​នាក់​បាន​នាំ​គ្នា​សម្រុក​ចូល​ទៅ​ ព្រោះ​តែ​ចង់​ឃើញ​ផ្ទាល់​ ចង់​ជួប​ និង​ចង់​បាន​ហត្ថលេខា​របស់​ ចាន់​ វឌ្ឍនាកា​ ដែល​ជា​កីឡាករ​ក្នុង​ដួង​ចិត្ត​របស់​ពូក​គេ។​ ចាន់​ វឌ្ឍនាកា​ ចាប់​ផ្ដើម​មាន​កេរ្តិ៍​ឈ្មោះ​នៅ​ពេល​ដែល​អ្នក​ទស្សនា​បាល់​ទាត់​សង្កេត​ឃើញ​គេ​លេង​បាន​យ៉ាង​ល្អ​កាល​ពី​ការ​ប្រកួត​កន្លង​ទៅ​នេះ​ រហូត​មាន​អ្នក​ខ្លះ​លង់​ស្នេហ៍​ជា​មួយ​ទៀត​ផង​ ដោយ​អ្នក​ខ្លះ​ស្រែក​ថា​ “លើស​ពី​ Fan​ បាន​អត់!”​ ដោយ​ពួក​គេ​មិន​បាន​ដឹង​ថា​ ចាន់​ វឌ្ឍនាកា​ មាន​ម្ចាស់​ចិត្ត​រួច​ទៅ​ហើយ។​ តាម​រយៈ​បទ​សម្ភាស​ជា​មួយ​ទស្សនាវដ្ដី​ សូវរីន​ វឌ្ឍនាកា​ បាន​បង្ហើប​ឲ្យ​ដឹង​ថា​ “ខ្ញុំ​មាន​គម្រោង​រៀប​ការ​ ក្រោយ​ពី​បញ្ចប់​ការ​ប្រកួត​ ស៊ី​ហ្គេម​ នៅ​ប្រទេស​ ម៉ាឡេស៊ី​ក្នុង​ឆ្នាំ២០១៧​ ខាង​មុខ​នេះ”។​
          សូម​រំលឹក​ផង​ដែរ​ថា​ ចាន់​ វឌ្ឍនាកា​ (Chan​ Vathanaka)​ កើត​នៅ​ថ្ងៃទី២៣​ ខែមករា​ ឆ្នាំ១៩៩៤​ នៅ​លើ​ទឹក​ដី​នា​ខេត្ត​កំពត​ មាន​បង​ប្អូន​ចំនួន​៣នាក់​ ស្រី​១នាក់​ ប្រុស​២នាក់​ វឌ្ឍនាកា​ ជា​កូន​ទី២​នៅ​ក្នុង​គ្រួសារ​ ដែល​មាន​លោក​ប៉ា​ឈ្មោះ​ ចាន់​ ចេស្ដា​ ជា​មន្រ្តីរាជការ​ និង​ម៉ាក់​ឈ្មោះ​ មិត្ត​ សុរិយា​ ជា​មេផ្ទះ។​
            រលឹក​​ឡើង​វិញ​ពី​ការ​ក្លាយ​ខ្លួន​ទៅ​ជា​កីឡាករ​បាល់​ទាត់​ ចាន់​ វឌ្ឍនាកា​ បាន​ឲ្យ​ដឹង​ថា​ “តាំង​ពី​នៅ​វ័យ​ក្មេង​អាយុ​ប្រហែល​៧ ទៅ​៨ឆ្នាំ​ ដោយ​សារ​ស្រឡាញ់​កីឡា​បាល់​ទាត់​ ខ្ញុំ​ចូល​ចិត្ត​លេង​ទាត់​បាល់​ជា​មួយ​មិត្ត​ភក្តិ​ធម្មតា​ តែ​ដោយ​សារ​ឃើញ​ថ្វី​ជើង​ល្អ​ទើប​ខាង​ក្លឹប​បាល់​ទាត់​យុវជន​ខេត្ត​កំពត​ហៅ​ឲ្យ​ចូល​ហ្វឹក​ហាត់​តាំង​ពី​អាយុ​១២ឆ្នាំ​រហូត​ដល់​អាយុ​១៦ឆ្នាំ​  ដែល​កាល​ណោះ​ខ្ញុំ​ហាត់​បណ្ដើរ​ លេង​បណ្ដើរ​ និង​ច្រើន​លេង​ក្នុង​តួនាទី​បម្រើ​ស្លាប”។​ ចាប់​ផ្ដើម​ប្រឡូក​ចូល​ជា​មួយ​វិស័យ​កីឡា​បាល់​ទាត់​នេះ​ក្នុង​អាយុ​១២ឆ្នាំ​ ដែល​កាល​ពី​ពេល​នោះ​ ក្រុម​គ្រួសារ​របស់​វឌ្ឍនាកា​ មិន​សូវ​ជា​មាន​ការ​គាំទ្រ​លោក​នោះ​ទេ​ ប៉ុន្តែ​បន្ទាប់​ពី​ពួក​គាត់​បាន​មើល​ឃើញ​នូវ​សមត្ថភាព​ និង​ទេព​កោសល្យ​របស់​កូន​ បាន​ធ្វើ​ឲ្យ​ក្រុម​គ្រួសារ​របស់​វឌ្ឍនាកា ងាក​មក​គាំទ្រ និង​មាន​ការ​ជំរុញ​កាន់​តែ​ខ្លាំង​ឡើង។ បន្ទាប់​ពី​នោះ វឌ្ឍនាកា ​បាន​ចូលហាត់​បន្ត​នៅ​ក្លឹប​ខេត្ត​ស្វាយ​រៀង ដែល​ជា​អតីត ក្លឹប​ព្រះ​ខ័ន្ធ​រាជ្យ ហើយ​នៅ​ពេល​អាយុ​១៨ឆ្នាំ​រហូត​មក​ដល់​បច្ចុប្បន្ន​នេះ​ ចាន់​ វឌ្ឍនាកា​ គឺ​ជា​កីឡាករ​បាល់​ទាត់​កម្ពុជា​ដែល​មាន​តួនាទី​ជា​ខ្សែ​បម្រើ​លេង​ឲ្យ​ក្លឹប​បាល់​ទាត់​បឹង​កេតអង្គរ​ (Boeung​ Ket​ Angkor)​ ហើយ​ក៏​លេង​ឲ្យ​ក្រុម​ជម្រើស​ជាតិ​យុវជន​ក្រោម​អាយុ​២៣ឆ្នាំ​ជា​ខ្សែ​បម្រើ​ប្រយុទ្ធ​ ចាប់​តាំង​ពីឆ្នាំ២០១៣។​ កន្លង​ទៅ​កាល​ពី​ពេល​ថ្មីៗ​នេះ​ ក្នុង​ឆ្នាំ២០១៥​ វឌ្ឍនាកា​ បាន​ទៅ​ចូល​រួប​ប្រកួត​នៅ​សាំង​ហ្គាពួរ​ក្នុង​ការ​ប្រកួត​ ៤ប្រកួត​គឺ​គេ​ទាត់​ចូល​បាន​ ៣​គ្រាប់​តែ​ម្នាក់​ឯង​ ដែល​ចាប់​ពី​ពេល​នោះ​មក​មាន​ការ​កោត​សរសើរ​ថា​ វឌ្ឍនាកា​ លេង​បាល់​បាន​ល្អ​ និង​ទទួល​បាន​ការ​ចាប់​អារម្មណ៍​យ៉ាង​ច្រើន​ពី​សំណាក់​អ្នក​គាំទ្រ​គួរ​ឲ្យ​កត់​សម្គាល់។​ ពាន​រង្វាន់​ដែល​ វឌ្ឍនាកា​ ទទួល​បាន​រួម​មាន​៖ 2012​ Cambodia​ Best​ Young​ Player​ of​ The​ Year​, 2013​ Hun​ Sen​ Cup​ Top​ Scorer​ &​ 2014​ Cambodian​ League​ Most​ Valuable​ Player។​ វឌ្ឍនាកា​ បាន​ធ្វើ​ការ​បង្ហាញ​ខ្លួន​ជា​លើក​ដំបូង​លើ​ឆាក​អន្តរ​ជាតិ​ជាន់​ខ្ពស់​នៅ​ថ្ងៃទី22​ ខែមីនា​ ឆ្នាំ2013​ នៅ​ក្នុង​ការ​ប្រកួត​វគ្គ​ជម្រុះ​ AFC​ Challenge​ Cup​ ការ​ប្រកួត​ក្នុង​ឆ្នាំ2014​ ជា​មួយ​នឹង​ប្រទេស​ តុក​មេននីស្ថាន​ (Turkmenistan)។ នៅ​លើ​ទី​លាន​ប្រកួត​ កីឡាករ​រាង​ខ្ពស់​សង្ហា​ ចាន់​ វឌ្ឍនាកា​ មាន​ជំនាញ​ខាង​បណ្ដើរ​បាល់​ស៊ុត​បញ្ចូល​ទី។ ជា​ការ​ពិត​ណាស់​ ការ​បណ្ដើរ​បាល់​ស៊ុត​បញ្ចូល​ទី​វា​មិន​មែន​ជា​រឿង​ងាយ​ស្រូល​ឡើយ​ សម្រាប់​កីឡាករ​គ្រប់​រូប​ ជាក់​ស្ដែង​ វឌ្ឍនាកា ក៏​បាន​រង​របួស​ខ្លះៗ​ដែរ​ខណៈ​ពេល​ដែល​កំពុង​តែ​ប្រកួត​ឬ​កំពុង​តែ​ហ្វឹក​ហាត់។ ក្នុង​នាម​ជា​កីឡាករ​មួយ​រូប​ វឌ្ឍនាកា​ មិន​បណ្ដោយ​ឲ្យ​ខ្លួន​ចេះ​តែ​ធ្វើ​អ្វី​តាម​ទំនើង​ចិត្ត​ឡើយ​ ពោល​គឺ​រូប​គេ​ផ្ទាល់​មិន​សេព​គ្រឿង​ស្រវឹង​នោះ​ទេ រីឯ​របប​អាហារ​ទាំង​បី​ពេល​គឺ​ត្រូវ​ញុំា​ឲ្យ​បាន​ទៀង​ទាត់​ ហើយ​ក៏​មិន​ភ្លេច​ទទួល​នូវ​ទឹក​ដោះ​គោ​ឆៅ​ដើម្បី​បំប៉ន​សុខ​ភាព​រាង​កាយ​ឲ្យ​កាន់​តែ​រឹង​មាំ​ផង​ដែរ។​ “ទាក់​ទង​ជា​មួយ​នឹង​មាឌ​នៃ​កីឡាករ​ម្នាក់ៗ​ វា​មិន​សូវ​ជា​បញ្ហា​ក្នុង​ការ​ប្រកួត​ទេ ហើយ​ក៏​មិន​ប្រាកដ​ថា​អ្នក​ដែល​មាន​មាឌ​ធំ​ជាង​លេង​បាល់​បាន​ល្អ​ទាំង​អស់​នោះ​ទេ! ភាគ​ច្រើន​ការ​លេង​ជា​ក្រុម​បាន​ល្អ​ទើប​យើង​អាច​ទទួល​ជ័យ​ជម្នះ​ជូន​ក្រុម​បាន​ ”វឌ្ឍនាកា​ បន្ថែម។
            ខ្សែ​ប្រយុទ្ធ​របស់​បឹង​កេត​អង្គរ​ ចាន់ វឌ្ឍនាកា បាន​ចូល​រួម​សម្តែង​បទ​ចម្រៀង​ខារ៉ាអូខេ​របស់​តារា​ចម្រៀង​ស្រី​ មាស សុខសោភា ប៉ុន្តែ​កីឡាករ​បាល់​ទាត់​រូប​នេះ​ទទួល​ស្គាល់​ថា​ ការ​សម្តែង​ពិត​ជា​មិន​ងាយ​ស្រួល​ដូច​ការ​លេង​បាល់​ទាត់​ឡើយ។​ កី​ឡាករ​រូប​នេះ​បន្ត​ថា​ “ខ្ញុំ​ហាក់​មាន​អារម្មណ៍​ថា​ពិបាក​ហើយ​អៀន​ខ្លួន​ឯង​ពេល​សម្ដែង​ ពី​ដំបូង​ខ្ញុំ​គិត​ថា​ការ​ហ្វឹក​ហាត់​ថ្វី​ត្បិត​តែ​ហត់​ខ្លាំង​ តែ​ដល់​ពេល​ចូល​សម្ដែង​វា​ដូច​ជា​មាន​អារម្មណ៍​ថា​ហត់​ខ្លាំង​ជាង​រត់​ពេល​កំពុង​តែ​ហ្វឹក​ហាត់​ និង​ប្រកួត​ទៅ​ទៀត​ ព្រោះ​អី​ខ្ញុំ​អត់​ទាន់​ទម្លាប់​ ហើយ​មាន​ការ​ខ្មាស​អៀន​ច្រើន”។ កីឡាករ​រូប​នេះ​បន្ថែម​ថា​ វា​ខុស​គ្នា​ឆ្ងាយ​ពី​អ្វី​ដែល​រូប​គេ​លេង​បាល់​នៅ​លើ​វាល​ស្មៅ​ បើ​ទោះ​បី​ជា​មាន​មនុស្ស​មើល​ការ​ប្រកួត​ច្រើន​យ៉ាង​ណា​ ក៏​មិន​អៀន​ខ្មាស​ដូច​ការ​សម្ដែង​ឡើយ​ ព្រម​ទាំង​អាច​បញ្ចេញ​អ្វី​ដែល​ខ្លួន​ឯង​ចង់​ធ្វើ ដួច​ជា​សកម្មភាព​ទាត់​បាល់​ជា​ដើម។ ខ្សែ​ប្រយុទ្ធ​ជម្រើស​ជាតិ​រូប​នេះ​បញ្ជាក់​ថា រូប​គេ​មិន​អាច​បោះ​បង់​អាជីព​បាល់​ទាត់​បាន​ឡើយ​ ទោះ​ស្ថិត​ក្នុង​កាលៈ​ទេសៈ​បែប​ណា​ក៏​ដោយ​ ពី​ព្រោះ​វា​ជា​អ្វី​ដែល​រូប​គេ​ពេញ​ចិត្ត​បំផុត​តាំង​ពី​តូច។ ចាន់ វឌ្ឍនាកា បាន​បង្ហើប​ពី​បំណង​ទៅ​ថ្ងៃ​មុខ​ថា​ប្រសិន​បើ​ខ្លួន​បញ្ចប់​អាជីព​ជា​កីឡាករ​បាល់​ទាត់​នៅ​ពេល​ណា​នោះ ខ្លួន​គេ​ចង់​ក្លាយ​ជា​គ្រូ​បង្វឹក​បាល់​ទាត់​ម្នាក់​ និង​បើ​មាន​ពេល​ទំនេរ​ច្រើន​នឹង​បន្ត​ការសិក្សា​ផ្នែក​រៀប​ចំ​ដែន​ដី​នៅ​សាលា​កសិកម្ម​ចំការ​ដូង​រហូតដល់​ចប់។​ ក្រៅ​ពី​ការងារ​ដែល​ពាក់​ព័ន្ធ​ជា​មួយ​នឹង​វិស័យ​កីឡា​ ចាន់ វឌ្ឍនាកា ក៏​មាន​បំណង​ចង់​បង្កើត​ជា​អា​ជីវកម្ម​ដែល​មាន​លក្ខណៈ​ជា​ក្រុម​គ្រួសារ​ផងដែរ។ 
            ជា​ចុង​ក្រោយ​ ចាន់ វឌ្ឍនាកា បាន​ថ្លែង​អំណរ​គុណ​ដល់​អ្នក​និយម និង​គាំទ្រ​វិស័យ​បាល់​ទាត់​ដែល​បាន​ផ្ដល់​ជា​កម្លាំង​ចិត្ត សម្រាប់​ពួក​គាត់​ក្នុង​នាម​ជា​កីឡាករ​រាល់​ពេល​មាន​ការ​ប្រកួត​ម្ដងៗ ហើយ​ក៏​សូម​ថ្លែង​អំណរគុណ​ដល់​ទស្សនាវដ្ដី សូវរីន ដែល​បាន​ធ្វើ​បទ​សម្ភាស​ទាក់​ទង​នឹង​ជីវិត​ឯកជន​របស់​លោក​ផង​ដែរ៕



SUGGESTIONS