អ៊ុក វណ្ណដេ ស្ថាបនិកសាលាដូងច្នៃពីសម្រាមដើម្បីជួយដល់កុមារក្រីក្រ និងបរិស្ថាន
NEWS 6 years agoពេលធ្វើដំណើរមកដល់កំពង់ចម្លងកោះដាច់ យើងបត់ឆ្វេងបន្តដំណើរតាមផ្លូវឆ្ពោះទៅកាន់រមណីយដ្ឋានឆ្នេរខ្សាច់កោះដាច់ប្រមាណជាង២គីឡូម៉ែត្រ យើងនឹងឃើញផ្ទះមួយនៅខាងស្តាំដៃដែលមានខ្លោងទ្វារចម្រុះពណ៌ ស្រស់ឆើតសរសេរជាស្លាកសញ្ញាធំៗយ៉ាងច្បាស់ក្រឡែតថា សាលាដូង ឬ Coconut School។ កាលបើបានឮឈ្មោះនេះ អ្នកដំណើរច្បាស់ជាមានការងឿងឆ្ងល់ថា តើសាលាដូងជាកន្លែងសម្រាប់ធ្វើអ្វី? ហេតុអ្វីបានជាហៅថា សាលាដូង? ជាក់ជាមិនខាន។
ស្ថិតនៅលើទីតាំងភូមិរនះ សង្កាត់កោះដាច់ ខ័ណ្ឌជ្រោយចង្វា សាលាដូងត្រូវបានបង្កើតឡើងកាលពីឆ្នាំ២០១៣ ក្រោមគំនិតផ្តួចផ្តើមរបស់លោក អ៊ុក វណ្ណដេ ដែលជាស្ថាបនិកតែម្នាក់គត់ ក្នុងគោលដៅបណ្តុះបណ្តាលជំនាញភាសាអង់គ្លេស និងជំនាញមូលដ្ឋានគ្រឹះកុំព្យូទ័រដល់កុមារនៅក្នុងមូលដ្ឋាននេះផ្ទាល់។ លោក អ៊ុក វណ្ណដេ គឺជាបុគ្គលម្នាក់ដែលមានការកោតសរសើរយ៉ាងខ្លាំងពីមជ្ឈដ្ឋានទូទៅ រហូតដល់ស្ថាប័នធំៗ ពីគំនិតច្នៃប្រឌិត និងចិត្តសប្បុរសរបស់លោក ជាក់ស្តែងថ្មីៗនេះ លោកឯកអគ្គរាជទូតកម្ពុជាប្រចាំសហរដ្ឋអាមេរិកក៏បានអញ្ជើញលោកទទួលទានអាហារពេលល្ងាចជាមួយគ្នា ក៏ដូចជាមានការទទួលស្វាគមន៍ពីបងប្អូនខ្មែរដែលរស់នៅក្នុងសហគមន៍ខ្មែរនៅរដ្ឋ Philadelphia ខណៈដែលលោកបានធ្វើដំណើររហូតដល់ទៅ ១០រដ្ឋនៅក្នុងទឹកដីអាមេរិកកាលពីឆ្នាំ២០១៧ កន្លងទៅ។ នេះបើតាមទំព័រហ្វេសប៊ុករបស់ស្ថានទូតអាមេរិកប្រចាំកម្ពុជាបានបង្ហោះជាសាធារណៈកាលពីថ្មីៗនេះ។ ស្ថាបនិកសាលាវ័យក្មេងរូបនេះបានរំឭកឡើងវិញពីប្រវត្តិនៃការបង្កើតសាលានេះថា កាលពីឆ្នាំ២០១៣ លោកបានធ្វើដំណើរមកដល់ទីតាំងកោះដាច់នេះ ហើយបានសិក្សាឃើញថា ភូមិរនះជាភូមិក្រីក្រ និងសំបូរកុមារស្ថិតក្នុងវ័យសិក្សាជាច្រើននាក់។ លោកមើលឃើញពីការលំបាករបស់កុមារក្នុងការឆ្លងសាឡាងទៅត្រើយម្ខាងដើម្បីសិក្សាភាសាអង់គ្លេសព្រោះក្នុងភូមិនេះពីមុនមកគ្មានសាលាបង្រៀនភាសាអង់គ្លេសឡើយ។ ទិដ្ឋភាពដែលលោកបានឃើញជាក់នឹងភ្នែកដក់ក្នុងការចងចាំរបស់លោកហើយបានជំរុញទឹកចិត្តលោកឲ្យចាប់ផ្តើមស្វែងរកទីតាំងដីសមរម្យមួយក្នុងភូមិដើម្បីសម្រេចក្តីបំណងរបស់លោកក្នុងការសាងសង់សាលារៀនសម្រាប់ក្មេងលើកោះ។ ចំពោះមូលហេតុដែលលោកដាក់ឈ្មោះសាលារបស់លោកថាជា សាលាដូង ព្រោះនៅពេលសាងសង់ដំបូង លោកបានប្រើប្រាស់ដើមដូងចាស់ៗដែលដុះនៅក្នុងតំបន់ មកកែច្នៃជាតុកៅអីសម្រាប់ក្មេងអង្គុយរៀន និងជាក្តារខៀនសម្រាប់ការបង្រៀនផងដែរ។ លោកបានបន្ថែមថា សាលាដូង នេះត្រូវបានស្ថាបនាឡើងដោយថវិកាផ្ទាល់ខ្លួនរហូត ៨០ភាគរយ រីឯ២០ភាគរយទៀតបានមកពីអ្នកចូលរួមផ្សេងៗ។
លោកបញ្ជាក់ថា ដំបូងឡើយសាលាជួបផលលំបាកជាច្រើន ជាពិសេសគឺការមិនយល់ពីតម្លៃនៃការសិក្សារបស់អាណាព្យាបាលសិស្ស និងសិស្សផ្ទាល់តែម្ដង “បើបង្រៀនក្មេងឲ្យរៀនពូកែវាងាយស្រួលទេ តែបើធ្វើឲ្យពួកគេ ភ្ញាក់រំឭករៀនដោយខ្លួនឯងទើបជាការលំបាក។” ទោះបីជាយ៉ាងនេះក្តី ដោយសារស្មារតីតស៊ូព្យាយាមអស់រយៈ ពេលបីឆ្នាំកន្លងមក ប្រជាជនមូលដ្ឋាន និងកុមារភាគច្រើនមានការយល់ដឹងច្រើនអំពីតម្លៃនៃការសិក្សារៀនសូត្រ ។ ។ ក្នុងមួយឆ្នាំ សាលាជ្រើសរើសកុមារចំនួន៦០នាក់ឲ្យចូលសិក្សាដោយ ឥតគិតថ្លៃ។ សូមបញ្ជាក់ផងដែរថា នៅទីនោះសិស្សទាំងអស់ត្រូវសិក្សាចំណេះដឹងទូទៅផ្នែកភាសាអង់គ្លេសរយៈ ពេលមួយឆ្នាំសិនមុននឹងមានឱកាសប្រឡងចូលរៀនថ្នាក់កុំព្យូទ័រនៅក្នុងអគារផ្ទះសំរាម។ ថ្នាក់ភាសាអង់គ្លេស ចាប់ផ្តើមនៅម៉ោង ៥ និង ៣០នាទីល្ងាច ពីថ្ងៃច័ន្ទដល់ថ្ងៃសុក្រ។ ចំពោះថ្នាក់កុំព្យូទ័រ គឺថ្ងៃសៅរ៍ពីម៉ោង១ រសៀល ដល់ម៉ោង៦ល្ងាច និងថ្ងៃអាទិត្យ ពីម៉ោង៨ព្រឹក ដល់ ម៉ោង៧យប់។
លោក អ៊ុក វណ្ណដេ បានបង្ហាញអំពីសកម្មភាពជួយកុមារនាពេលកន្លងមកថា សាលាដូងធ្លាប់បានជួយ ឧបត្ថម្ភកង់ជាច្រើនសម្រាប់ក្មេងដែលមានផ្ទះនៅឆ្ងាយពិបាកធ្វើដំណើរមករៀននៅសាលា ប៉ុន្តែឪពុកម្តាយមួយ ចំនួនបែរជាបង្ខំកូនឲ្យជិះកង់នោះយកបន្លែទៅលក់ឬប្រើការផ្សេងៗហើយបោះបង់ចោលការសិក្សាទៅវិញ។ដូច្នេះសព្វថ្ងៃនេះ ខាងសាលាបង្វែរវិធីសាស្រ្តពីការឧបត្ថម្ភកង់មកជាការផ្តល់កង់កម្ចីទៅវិញដែលកង់ទាំងនោះ បានមកពីការឧបត្ថម្ភរបស់សប្បុរសជន។ ក្រៅពីមធ្យោបាយក្នុងការធ្វើដំណើរ សាលាក៏បានចាត់ចែងផ្តល់សម្ភារ សិក្សាចាំបាច់ដូចជា កាតាប សៀវភៅ ប៊ិច ខ្មៅដៃ ជ័រលុប ដល់សិស្សទាំងអស់ដោយឥតគិតថ្លៃ ប៉ុន្តែសាលា មានល័ក្ខខ័ណ្ឌមួយត្រង់ថា សិស្សដាច់ខាតត្រូវតែយកសម្ភារចាស់ៗមកដូរយកសម្ភារថ្មីទៅប្រើប្រាស់ ព្រោះ សាលានឹងយករបស់របរចាស់ទាំងនោះទៅជួសជុលប្រើប្រាស់ឡើងវិញតាមលទ្ធភាពជាក់ស្តែង។ លើសពីនេះទៅ ទៀត សាលាក៏ធ្លាប់បានរៀបចំបង្កើតកម្មវិធីជិះកង់សប្បុរសធម៌ដែលមានអ្នកចូលរួមជាច្រើន នាក់ ដើម្បីផ្តល់ឱកាសឲ្យអ្នកផងទាំងពួងបានស្គាល់និងយល់ដឹងអំពីបេសសកកម្មរបស់សាលាដូង និងចូលរួមចំណែក ជួយចំពោះការអប់រំរបស់កុមារទាំងអស់គ្នា។ សម្ភារសិក្សាដែលទទួលបានពីអ្នកជិះកង់ក្នុងព្រឹត្តិការណ៍ត្រូវបាន ផ្តល់ជូនកុមារទាំងអស់ដែលរស់នៅលើកោះដើម្បីផ្តល់លទ្ធភាពឲ្យពួកគេយកទៅប្រើប្រាស់ក្នុងការសិក្សារបស់ ពួកគេនៅតាមសាលារៀនរដ្ឋក្នុងឆ្នាំសិក្សាថ្មី។ ក្រៅពីនេះ ក្នុងពេលឆាប់ៗនេះសាលានឹងគ្រោងពង្រីកទីតាំងសាលា មួយទៀតដែលជាប់នឹងសាលាដូង គឺ សាលាកង់ឡាន ដើម្បីឆ្លើយតបទៅនឹងកំណើនតម្រូវការនៃវិស័យអប់រំក្រៅ ប្រព័ន្ធនៅក្នុងភូមិរនះ សង្កាត់កោះដាច់។ តាមគម្រោង អគារសាលាថ្មីនេះមានទំហំ ៦ ម៉ែត្រ គុណនឹង ៨ ម៉ែត្រ ដែលនឹងត្រូវសាងសង់អំពីសំបកកង់ឡានចាស់ៗ ហើយត្រូវចំណាយទឹកប្រាក់ប្រមាណ១៥០០ ដុល្លារ។
សូមបញ្ជាក់ថា សាលាដូងលេចចេញជារូបរាងតាមរយៈការកែច្នៃឡើងវិញនូវសម្ភារកាកសំណល់ដែលរក បាននៅក្នុងមូលដ្ឋានដូចជា សំបកដបនិងកំប៉ុងភេសជ្ជៈ សំបកកង់ឡានចាស់ៗ គំរបដបទឹកសុទ្ធ ក្រវិលកំប៉ុង ទឹកក្រូច ស្រាបៀរ ស្រកីដូង ជាដើម ដែលសុទ្ធសឹងជាស្នាដៃសិល្បៈរបស់ប្អូនៗកុមារសិស្សសាលាដូង។ ក្នុង ទីតាំងសាលាដូងត្រូវបានចែកចេញជាបីកន្លែងសំខាន់ៗ គឺ ថ្នាក់រៀនភាសាអង់គ្លេសនៅផ្នែកខាងមុខ ផ្ទះសំរាមនៅ ផ្នែកខាងក្រោយដែលបានប្រើប្រាស់ជាកន្លែងបង្រៀនកុំព្យូទ័រ (បំពាក់កុំព្យូទ័រ១៨គ្រឿង)និងជាបណ្ណាល័យសម្រាប់ ប្អូនៗកុមារអានសៀវភៅផ្សេងៗ។ រីឯវាលផ្នែកខាងក្រោយជាប់នឹងទន្លេគឺជាទីលានសម្រាប់លេងកីឡា។ ម្ចាស់ សាលាបានបញ្ជាក់ថា បច្ចុប្បន្ននេះ ក្នុងមួយខែ សាលាត្រូវចំណាយប្រមាណពី ១២០ ដុល្លារ ទៅ ១៥០ដុល្លារ លើ ថ្លៃទឹកភ្លើង អង្ករ សម្ភារបង្រៀនផ្សេងៗ និងចំណីចំណុកបន្ថែមសម្រាប់កុមារ។
សាលាដូងមានគម្រោងជាច្រើនសម្រាប់ជួយជ្រោមជ្រែងកុមារដែលជួបការខ្វះខាតក្នុងផ្នែកជីវភាព។ ជាក់ស្តែងដូចជាសាខាសាលាដូងមួយទៀតដែលជា សាលាសំរាមនៅលើភ្នំគិរីរម្យ ស្រុកភ្នំស្រួច ខេត្តកំពង់ស្ពឺហើយទើបតែបង្កើតឡើងក្នុងឆ្នាំ ២០១៧នេះ។ ទាក់ទិននឹងសាខាទីពីរនេះ ម្ចាស់ គម្រោងបានបង្ហើបប្រាប់ថា “សាលានេះឆ្លើយតបទៅនឹងតម្រូវការក្មេងជាង ៣០០ នាក់ នៅលើភ្នំនោះ។ គ្រូនៅទី នោះទើបនឹងស្លាប់ថ្មីៗដោយសារជំងឺគ្រុនចាញ់។ គ្រូនៅទីនោះបង្រៀនតែភាសាខ្មែរពីថ្នាក់ទី១ដល់ទី៦ រីឯខាងខ្ញុំ មានជំនាញភាសាអង់គ្លេសនិងកុំព្យូទ័រ ប៉ុន្តែបើមានអ្នកចូលរួមច្រើន យើងនឹងសង់សាលាភាសាខ្មែរថែមទៀត។” សាខាសាលារៀននៅក្នុងឧទ្យានជាតិព្រះកុសុមៈគិរីរម្យនេះក៏ជាផ្នែកមួយចូលរួមចំណែកកាត់បន្ថយបញ្ហា កាកសំណល់រឹងដែលកើតឡើងដោយសារកំណើនភ្ញៀវទេសចរនៅក្នុងតំបន់រមណីយដ្ឋាននោះ។ ម្ចាស់សាលា ដូងស្វាគមន៍ជានិច្ចចំពោះរាល់អង្គការស្ថាប័នទាំងឡាយដែលមានបំណងបង្កើតគម្រោងកែច្នៃកាកសំណល់ដើម្បី អភិរក្សផ្នែកបរិស្ថានតាមរយៈការផ្តល់បទបង្ហាញចែករំលែកគំនិតនិងបទពិសោធន៍ល្អៗដែលលោកធ្លាប់ឆ្លងកាត់។ លោកវណ្ណដេក៏មានបំណងប្រាថ្នាមួយទៀត ក្នុងឆាកជីវិត របស់លោក គឺ គម្រោងកសាងសាលារៀនបណ្តែតទឹកសង់អំពីសំបកដបនៅលើផ្ទៃបឹងទន្លេសាប។
“ខ្ញុំមិនមែនជាអាទិទេព ឬមិនមែនមនុស្សបែងភាគបានទេ។ បើផ្អែកលើបុគ្គលដូចខ្ញុំ គឺជួយបានតិចណាស់តែគម្រូរបស់ខ្ញុំនឹងផុសឡើងនៅពេលដែលយុវជនទាំងអស់យល់ថាវាជារឿងត្រឹមត្រូវហើយចូលរួមទាំងអស់គ្នា។” លោកបានអំពាវនាវប្រជាពលរដ្ឋខ្មែរទូទាំងប្រទេសឲ្យរួបរួមសាមគ្គីគ្នាចូលរួមក្នុងការងារសង្គមដើម្បីប្រយោជន៍ ដល់សង្គមជាតិខ្មែរយើងទាំងមូល ចៀសវាងការមើលបំណាំគ្នាទៅវិញទៅមក។
យ៉ាងណាមិញ ប្រសិនបើសប្បុរសជនទាំងឡាយមានចំណាប់អារម្មណ៍ចង់សាកសួរព័ត៌មានបន្ថែម ឬធ្វើការឧបត្ថម្ភដល់គម្រោងអភិវឌ្ឍន៍របស់សាលាដូង សូមធ្វើការទាក់ទង តាមរយៈលេខទូរស័ព្ទ ០១២ ៩៤៥ ២៥២ ឬទំព័រហ្វេសប៊ុក Coconut School Cambodia ដោយមេត្រីភាព៕
Article by SRIN SOKMEAN/ KEO SONG