"ក្មេងខ្មែរ" ពន្លកតារាចម្រៀងដ៏មានប្រជាប្រិយក្នុងក្រអៅបេះដូងយុវវ័យសម័យថ្មី
NEWS 6 years agoបទចម្រៀងដើមដែលត្រូវបានគេស្គាល់ និងនិយាយតៗគ្នាថា (Original Song) កំពុងតែទទួលបានការចាប់អារម្មណ៍យ៉ាងច្រើនពីប្រិយមិត្តអ្នកស្តាប់ នៅក្នុងប្រទេសកម្ពុជានាពេលបច្ចុប្បន្ននេះ។ នេះជាហេតុផលមួយ ដែលធ្វើឲ្យអ្នកសិល្បៈមានទឹកចិត្តក្នុងការនិពន្ធបទចម្រៀងថ្មីៗទៅតាមស្តាយ៍និងគ្រប់រសជាតិនៃអារម្មណ៍របស់ពួកគេរៀងៗខ្លួន។ ជាក់ស្តែងថ្មីៗនេះមានក្រុមមួយឈ្មោះថា “ក្មេងខ្មែរ” ជាក្រុមថ្មីមួយដែលទើបតែបង្កើតនៅក្នុងឆ្នាំ២០១៥ តែទទួលបានការគាំទ្រយ៉ាងច្រើនដ៏គួរឲ្យកត់សម្គាល់ដែលក្នុងនោះមានសមាជិកពីររូប បានរួមគ្នាបង្កើតអារម្មណ៍ថ្មីមួយដល់ប្រិយមិត្តអ្នកស្តាប់នាពេលបច្ចុប្បន្ននេះ។ ក្មេងប្រុសវ័យជាង២០ឆ្នាំពីររូប កៅ ពន្លឺ (មានស្រុកកំណើតនៅខេត្តត្បូងឃ្មុំ) និង ជា សុជាតិ (មកពីខេត្តកំពង់ស្ពឺ) ដែលក្មេងប្រុសពីររូបនេះមានការស្រឡាញ់ប្តូរផ្តាច់ទៅលើការនិពន្ធបទចម្រៀងថ្មីៗ ព្រមជាមួយនឹងមហិច្ចតាក្នុងការសរសេរចម្រៀងបែប Hip Hop លាយឡំជាមួយនឹងមនោសញ្ចេតនាដែលផុសចេញពីអារម្មណ៍ពិតមកខាងក្រៅ និងឆ្លុះបញ្ចាំងពីជីវិតពិតរបស់មនុស្សនៅក្នុងសង្គមនាពេលបច្ចុប្បន្ននេះ។ ចង់ដឹងថាតើក្មេងខ្មែរកើតឡើងដោយរបៀបណា? តើអ្នកទាំងពីរបានបង្កើតសមិទ្ធផលអ្វីខ្លះ? ហើយអ្នកទាំងពីរនឹងមានគម្រោងថ្មីៗដើម្បីកំដរអារម្មណ៍ប្រិយមិត្តដែលតែងតែគាំទ្រដល់ពួកគេទាំងពីរអ្វីខ្លះនោះ? សម្រាប់លេខថ្មីនេះ សូវរីន បានធ្វើបទសម្ភាសន៍ជាមួយក្មេងខ្មែរ ហើយបានពាំនាំយកនូវព័ត៌មានរបស់ពួកគេទាំងពីរមកជូនប្រិយមិត្តអ្នកអានឲ្យបានជ្រាបដូចតទៅ។
“តន្ត្រីធ្វើឲ្យយើងទាំងពីរបានជួបគ្នា។ កាលពីឆ្នាំ២០១៤ ‘Smallworld Smalband’ ដែលមានខ្ញុំបាទសុជាតិគឺជាសមាជិកម្នាក់នៅក្នុងក្រុមនោះ ពួកយើងបានធ្វើគម្រោងមួយទៅលើការនិពន្ធបទ ‘ស្នេហ៍៩’ ហើយបានអញ្ចើញ ពន្លឺ ពីក្រុម ‘ដើម្បីកូនខ្មែរ’ មកច្រៀងចូលគ្នាដោយ ពន្លឺ ជាអ្នក Rap។ ស្របពេលជាមួយគ្នានោះផងដែរ ពន្លឺបានយកបទ ‘សៀវភៅកំណត់ហេតុស្នេហ៍’ ដែលពន្លឺបានសរសេរចេញពីអារម្មណ៍ពិតរបស់ខ្លួនមកឲ្យខ្ញុំមើលដើម្បីច្រៀងជាមួយគ្នា។ ហេតុផលនេះហើយគឺជាឱកាសមួយដែលធ្វើឲ្យពួកយើងស្គាល់គ្នា និងបានធ្វើការជាមួយគ្នាកាន់តែច្រើនឡើង”។ ទាក់ទងនឹងការបង្កើតក្រុមក្មេងខ្មែរវិញ ដំបូងឡើយក្រុមទាំងពីរមានគម្រោងនឹងចូលគ្នាទាំងអស់ ក៏ប៉ុន្តែដោយសារហេតុផលមួយចំនួនទាក់ទិននឹងពេលវេលាមិនអំណោយផល ទើបធ្វើឲ្យអ្នកផ្សេងទៀតមិនបានចូលរួមក្រុមជាមួយគ្នា។ ដោយឡែកពន្លឺ និងសុជាតិ ដែលអ្នកទាំងពីរមានការស្រលាញ់នឹងប្តូរផ្តាច់ទៅលើវិស័យមួយនេះ មិនថាពេលវេលាកម្លាំងកាយចិត្ត ត្រូវបានចំណាយទៅលើវិស័យមួយនេះទាំងអស់នោះ ក៏បានចាប់ដៃគ្នាបង្កើតក្រុមក្មេងខ្មែរនេះឡើងមក ដើម្បីបង្កើតបានជារូបភាពថ្មីមួយនៅក្នុងប្រទេសកម្ពុជា ដែលមានក្រុមចម្រៀងមួយក្រុមមានសមាជិកបុរសពីររូបមកដល់សព្វថ្ងៃនេះ។ អ្នកទាំងពីរក៏បានបន្ថែមទៀតថា “កាលដែលពួកយើងបង្កើតក្រុមក្មេងខ្មែរនេះឡើងមក មិនមែនមានន័យថាពួកយើងបែកគ្នាពី ‘Smallworld Smalband’ និង ‘ដើម្បីកូនខ្មែរ’ នោះទេ យើងគ្រាន់តែចង់ឲ្យមានរូបភាពថ្មីមួយដែលបញ្ជាក់ថានេះជាក្រុម ‘ក្មេងខ្មែរ’ នេះជា ‘Smallworld Smalband’ ហើយនេះជាក្រុម ‘ដើម្បីកូនខ្មែរ’ តែប៉ុណ្ណោះ។ ប៉ុន្តែយើងនៅតែជាក្រុមជាមួយគ្នាដដែល ហើយយើងនៅតែច្រៀងជាមួយគ្នានិងជួយគ្នាទៅវិញទៅមកដូចមុនអញ្ចឹង។ ជាក់ស្តែងដូចជាបទ ‘ឆឺតឆឺតបុណ្យភូមិ’ ដែលច្រៀងឡើងដោយក្មេងខ្មែរ ក៏មានការជួយគាំទ្រពី Smallworld Smalband ដែលក្នុងនោះក្មេងខ្មែរជាអ្នកច្រៀង ហើយ Smallworld Smalband ជាអ្នកលេងភ្លេង។ ដូច្នេះរូបភាពមួយនេះគឺបញ្ជាក់ឲ្យឃើញថាពួកយើងនៅតែធ្វើការជាមួយគ្នាដដែល”។និយាយពីសមិទ្ធផលរបស់ក្មេងខ្មែរវិញ អ្នកទាំងពីរបានចេញអាល់ប៊ុម១កាលពីខែមេសា ដែលក្នុងអាល់ប៊ុមនោះសុតសឹងជាបទដែលទទួលបានការពេញនិយមពីប្រិយមិត្តអ្នកស្តាប់ដូចជាបទ កុំបារម្ភ ជីវិតក្មេងកំព្រា ឆឺតឆឺតបុណ្យភូមិ និងបទ My Way ជាដើម។
បទចម្រៀងដែលអ្នកទាំងពីរបានសរសេរចេញមក គឺបានផុសចេញពីអារម្មណ៍ពិតរបស់អ្នកទាំងពីរ និងមួយចំនួនទៀតបានរៀបរាប់ពីជីវិតពិតរបស់មនុស្សមួយចំនួននៅក្នុងសង្គម។ ទាក់ទងនឹងការនិពន្ធបទចម្រៀងនេះទៀតសោធ ក្មេងខ្មែរបានលើកឡើងថា “ការដាក់អារម្មណ៍គឺជាកត្តាមួយដ៏សំខាន់។ ប្រសិនបើយើងសរសេរបទចម្រៀងដែលផុសចេញពីរឿងរបស់យើងផ្ទាល់ វាពុំមានការលំបាកនោះទេ ប៉ុន្តែយើងត្រូវការភាពស្មឹងស្មាធិ៍ដើម្បីប្រមូលអារម្មណ៍ទាំងនោះមកសរសេរជាបទចម្រៀង។ ផ្ទុយទៅវិញ ប្រសិនបើយើងសរសេរបទចម្រៀងដែលពិពណ៌នាពីរឿងអ្នកដទៃ ទើបវាជាការលំបាក ដោយសារតែអារម្មណ៍មួយនោះមិនបានកើតមកលើខ្លួនយើងផ្ទាល់ ទើបធ្វើឲ្យយើងត្រូវព្យាយាមទាញអារម្មណ៍របស់គេមកជារបស់ខ្លួនឯង ដើម្បីធ្វើការសរសេរជាបទចម្រៀងឡើងមក”។ តួយ៉ាងថ្មីៗនេះ ក្មេងខ្មែរកំពុងតែសរសេរចម្រៀងមួយបទសម្រាប់ខ្សែភាពយន្តខ្នាតធំមួយគឺរឿង “ហែកគុក” ដែលរឿងនេះកំពុងតែធ្វើការថត និងគ្រោងបញ្ចាំងនៅក្នុងឆ្នាំ២០១៧ខាងមុខនេះ។ ពួកគេបានលើកឡើកថា ដោយសាររឿងមួយនេះជាប្រភេទភាពយន្តបែបវាយតប់ (Action Movie) ទើបធ្វើឲ្យពួកគេព្យាយាមដាក់អារម្មណ៍ខ្លួនឯងឲ្យចូលក្នុងទិដ្ឋភាពមួយនោះ រហូតដល់ពួកគេត្រូវចំណាយពេល ក្នុងការមើលភាពយន្តប្រភេទនេះនិងធ្វើការហាត់រៀនពីក្បាច់វាយតប់ដើម្បីសរសេរជាបទចម្រៀងមួយបទចេញមក។ ជាការពិតណាស់ មិនថាការងារណាក៏ដោយ រមែងតែមានកំលាំងជំរុញដើម្បីទទួលបានលទ្ធផលមួយចេញមកដែលល្អ និងជាទីគាប់ចិត្តជាក់ជាមិនខាន។ ក្រៅពីការសរសេរបទចម្រៀង ក្មេងខ្មែរធ្លាប់បានឡើងបង្ហាញពី សមត្ថភាពរបស់ខ្លួនជាមួយនឹងការប្រគំតន្ត្រីរបស់ Jessie J កាលពីចុងឆ្នាំ២០១៥ ហើយក្មេងខ្មែរក៏ធ្លាប់បានចូលរួមក្នុងកម្មវិធី “Asian Music Festival” នៅឯប្រទេសថៃដែលមានការចូលរួមពីបណ្តាសិល្បករ និងសិល្បការិនីចំនួន១០ប្រទេសនៅក្នុងទ្វីបអាស៊ីផងដែរ។ ហើយអ្វីដែលធ្វើឲ្យពួកគេទាំងពីរកាន់តែមានមោទនភាពទៀតនោះ គឺពួកគេជាអ្នកដំណាងឲ្យប្រទេសកម្ពុជាជាមួយកញ្ញាLaura Mam ដែលសព្វថ្ងៃនេះកញ្ញាគឺអ្នកដឹកនាំរបស់ក្មេងខ្មែរ៕
Article by RATHA