ពីក្មេងម្នាក់ដែលរៀនលេងព្យាណូដោយខ្លួនឯង ក្លាយទៅជាតន្រ្តីករល្បីពេញបណ្តាញសង្គម
NEWS 6 years ago សម្លេងព្យាណូនៃបទចម្រៀងនិពន្ធថ្មីរបស់អ្នកចម្រៀងខ្មែរ កំពុងអង្រួនអារម្មណ៍អ្នកតាមដានបណ្តាញសង្គម YouTube ជាពិសេសយុវវ័យដែលចូលចិត្តស្តាប់តន្រ្តី។ យុវជនវ័យ ២០ឆ្នាំ ឱសិរីរម្យនា ដែលជាម្ចាស់គណនី YouTube ឈ្មោះថា "Romnirរម្យនា" កំពុងតែទាក់ទាញយុវវ័យដែលគាំទ្រការបញ្ចេញទេពកោសល្យប្រគំព្យាណូរបស់ខ្លួនកាន់តែច្រើនឡើងៗ តាមរយៈការប្រគំបទភ្លេង Original Song របស់ខ្មែរជាប្រចាំ។ បទចម្រៀងដំបូងដែល រម្យនា បានប្រគំព្យាណូហើយថតដាក់ទៅក្នុងបណ្តាញសង្គម YouTube ទើបតែចាប់ផ្តើមកាលពីប្រមាណ៣ខែមុនប៉ុណ្ណោះ។ បើទោះជាទើបតែចាប់ផ្តើមបង្ហាញទេពកោសល្យសិល្បៈរបស់ខ្លួនក្តី ប៉ុន្តែរម្យនាបានទទួលការគាំទ្រយ៉ាងខ្លាំងក្លារហូតដល់មានការកោតសរសើរពីទស្សនិកជន និងកំណើនការចូលមើលរហូតដល់ច្រើនពាន់ដង រួមទាំងការចែករំលែកនៅលើបណ្តាញសង្គមនានាជាច្រើនទៀត។ បទចម្រៀងដែលរម្យនាលេង (Cover) ភាគច្រើនសុទ្ធសឹងតែជាបទ Original ដែលកំពុងតែល្បីល្បាញនៅក្នុងស្រទាប់យុវវ័យទៀតផង។
ជួបជាមួយនឹងម្ចាស់គណនី Romnirរម្យនា យុវជនវ័យក្មេងរូបនេះបានថ្លែងថា ការប្រគំព្យាណូគឺជាចំណង់ចំណូលចិត្តរបស់ខ្លួនតាំងពីមានវ័យ១៣ឆ្នាំ។ លោកបានថ្លែងថា លោកចាប់ផ្តើមចង់លេងព្យាណូដោយសារតែលោកបានឃើញក្មេងប្រុសដែលមានវ័យស្របាលលោកមានសមត្ថភាពលេងព្យាណូយ៉ាងពូកែ។ ចាប់ពីពេលនោះមកលោកក៏ចាប់ផ្តើមរៀនលេងព្យាណូដោយខ្លួនឯង រាល់ពេលទំនេរពីការសិក្សាជាប្រចាំរហូតមានជំនាញអាចប្រើប្រាស់បានយ៉ាងប៉ិនប្រសប់។ គន្លឹះសំខាន់នៃការហ្វឹកហាត់ព្យាណូគឺជាការអនុវត្តឲ្យបានច្រើនបំផុតតាមដែលអាចធ្វើទៅបាន ដែលលោកជឿថាសម្រាប់អ្នកដែលចង់រៀនលេងដើម្បីកំសាន្ត មិនចាំបាច់ទៅហ្វឹកហាត់ជាមួយគ្រូផ្ទាល់ក៏បាន។ និយាយបណ្តើរចុចព្យាណូផ្ទាល់ខ្លួនបណ្តើរ រម្យនាពន្យល់ថា ដំបូងឡើយអ្នកចាប់ផ្តើមរៀនចុចព្យាណូត្រូវហ្វឹកហាត់កម្លាំងម្រាមដៃ ដើម្បីធ្វើឲ្យដៃទន់ងាយស្រួលរលាស់ និងមានកម្លាំង ដោយសារខ្ទង់ព្យាណូនីមួយៗត្រូវប្រើទម្ងន់ដៃធ្ងន់ដើម្បីបញ្ជា។ "ខ្ញុំចាប់ផ្តើមដោយហ្វឹកហាត់ចុចព្យាណូមួយថ្ងៃ៨ម៉ោង រយៈពេល២ឆ្នាំ រាល់ពេលទំនេររហូតទាល់តែស្ទាត់" លោករម្យនានិយាយ។ លោកបន្តថា ការចុចដើម្បីយកកម្លាំងដៃ មិនចាំបាច់ឲ្យត្រូវភ្លេងអ្វីនោះឡើយ ពោលគឺត្រូវហ្វឹកហាត់ចុចឲ្យបានគ្រប់ខ្ទង់ព្យាណូតែម្ដង។ ក្នុងរយៈពេល៣ខែ បន្ទាប់ពីហ្វឹកហាត់ដោយខ្លួនឯង រម្យនាអាចប្រគំបទភ្លេងបានមួយបទ ដោយពឹងលើការចងចាំតែម្ដង។ ដោយមានទេពកោសល្យសិល្បៈផងនោះ បច្ចុប្បន្នរម្យនាអាចរៀនប្រគំបទចម្រៀងមួយបទក្នុងរយៈពេលត្រឹមតែ៣ម៉ោងប៉ុណ្ណោះ បន្ទាប់ពីព្យាយាមស្តាប់ទំនុកភ្លេងនៃបទចម្រៀង។ លោកបានបញ្ជាក់ថា សម្រាប់អ្នកដែលចង់ចាប់ជាអាជីព គប្បីរៀនជាមួយគ្រូភ្លេង ដើម្បីរៀនពីអក្សរភ្លេងឲ្យបានច្បាស់លាស់ បូកផ្សំជាមួយការហ្វឹកហាត់បន្ថែមដោយខ្លួនឯងឲ្យបានច្រើនម៉ោង ក៏ប៉ុន្តែរម្យនា គឺជាអ្នកប្រគំព្យាណូ ដោយរៀនសូត្រដោយខ្លួនឯង តាមរយៈការស្រាវជ្រាវពីគន្លឹះនៃការលេងតន្រ្តីនៅលើបណ្តាញសង្គមនិងនៅលើ Internet។
ដោយឡែករាល់បទចម្រៀងដែល រម្យនា យកមកប្រគំនិងថតដាក់ទៅក្នុងបណ្តាញសង្គម YouTube នីមួយៗសុទ្ធតែត្រូវបានសុំសិទ្ធពីម្ចាស់បទចម្រៀងដោយផ្ទាល់ មុននឹងយកមកដាក់ផ្សាយ។ លោកនិយាយថា ការបង្កើតគំនិតប្រគំព្យាណូនៅលើបណ្តាញសង្គមនេះ គឺដើម្បីផ្តល់ជូនអ្នកគាំទ្រការស្តាប់តន្រ្តីដែលជាបទចម្រៀងរបស់ខ្មែរ ឲ្យមានជម្រើសកាន់តែច្រើនជាងមុន និងដើម្បីចែករំលែកការកំសាន្តដល់មនុស្សគ្រប់គ្នាផងដែរ។ លោកបាននិយាយថា មិនមានអ្នកនៅលើបណ្តាញសង្គមដែលជាជនជាតិខ្មែរច្រើននោះទេ ដែលប្រគំព្យាណូហើយចែករំលែកនៅលើបណ្តាញសង្គមដូចលោក ដូច្នេះហើយទើបគំនិតផ្តួចផ្តើមនេះបានទាក់ទាញអ្នកគាំទ្រយ៉ាងច្រើន។ លោកបញ្ជាក់ថា "ភាគច្រើនអ្នកដែលចូលទស្សនាវីដេអូនៅក្នុង Chanel YouTube របស់ខ្ញុំគឺជាជនជាតិខ្មែរ ហើយអ្នកមើលភាគច្រើនតែងតែសុំសំណូមពរឲ្យខ្ញុំធ្វើបទចម្រៀងដែលពួកគាត់ពេញចិត្ត បន្ទាប់ពីមើលវីដេអូរួច"។ ត្រឹមតែចេះលេងព្យាណូមិនអាចធ្វើឲ្យរម្យនាល្បីនោះទេ ដោយមានជំនាញផ្នែកផលិតភាពយន្តផងនោះរាល់វីដេអូការប្រគំតន្រ្តីរបស់ រម្យនាសុទ្ធសឹងតែបានប្រើប្រាស់បច្ចេកទេសថតយ៉ាងល្អ និងមានវិជ្ជាជីវៈ ញ៉ាំងឲ្យការទស្សនានិងស្តាប់តន្ត្រីពីរម្យនាកាន់តែមានភាពសោមនស្ស និងអន្លូងអន្លូចជក់ចិត្តដិតអារម្មណ៍ជាពន់ពេក។
បច្ចុប្បន្ន រម្យនាកំពុងមមាញឹកនឹងការសិក្សាផ្នែក Professional Design នៅឯសាកលវិទ្យាល័យ លីមកុកវីង។ លោកបន្តថា ក្រៅពីការផលិតវីដេអូប្រគំតន្រ្តីរបស់ខ្លួន លោកក៏កំពុងហ្វឹកហាត់ការផលិតភាពយន្តខ្នាតខ្លីផងដែរ។ ពោរពេញទៅដោយទេពកោសល្យសិល្បៈរម្យនាធ្លាប់ទទួលបានប័ណ្ណសរសើរនិងការទទួលស្គាល់ពីស្ថាប័នជាច្រើន លើសមត្ថភាពថតរូប របស់យុវជនរូបនេះ។ លោកបានបញ្ជាក់ផងដែរថា ត្បិតតែការប្រគំព្យាណូគឺជាការចែករំលែកការកំសាន្ត ប៉ុន្តែលោកនឹងបន្តចែករំលែកបទចម្រៀងថ្មីៗទៀតនៅលើ Chanel YouTube របស់លោកឲ្យបានញឹកញាប់បន្ថែមទៀតទន្ទឹមនឹងការគាំទ្រកំពុងមានសន្ទុះកាន់តែច្រើនឡើងៗ៕
Article by VA SONYKA