អាហារបំពងអាចមើលទៅមានរសជាតិឆ្ងាញ់ ប៉ុន្តែប្រាកដណាស់ពួកវាមិនមែនជាអាហារដែលមានសុខភាពល្អទេ
TRAVEL & LIVING 6 years agoអាហារមួយចំនួនដូចជាគាវចៀន ដំឡូងបារាំងបំពង និងស្ករគ្រាប់បានផ្តល់នូវតម្លៃអាហារូបត្ថម្ភតិចតួចណាស់ ខណៈពេលដែលវាធ្វើឲ្យលក្ខខណ្ឌសុខភាពរបស់អ្នកស្ថិតក្នុងគ្រោះថ្នាក់ខ្ពស់។ អ៊ីចឹងតើការទទួលទានអាហារបំពងផ្ដល់គុណវិបត្តិអ្វីខ្លះ?
ជាដំបូង អាហារបំពងផ្ដល់នូវការព្រួយបារម្ភម្យ៉ាងនោះគឺបរិមាណនៃជីវជាតិអាហារដែលទទួលទាន។ អាហារបំពងភាគច្រើនមានជាតិខ្លាញ់ខ្ពស់ ហើយជាទូទៅប្រភេទនៃជាតិខ្លាញ់នោះមានផលអាក្រក់សម្រាប់សុខភាពរបស់អ្នក។ ភោជនីយដ្ឋានជាច្រើនតែងតែចម្អិន(ចៀន) អាហារជាមួយនឹងប្រេងដែលមានផ្ទុកអាស៊ីតខ្លាញ់ (Trans Fats) ហើយដោយសារអាហារបំពងជាច្រើនត្រូវបានតប់ថ្នមៗក្នុងម្សៅលាយទឹក ដូច្នេះពួកវាស្រូបយកជាតិខ្លាញ់បានច្រើនជាងពួកវាយកទៅបំពងដោយមិនបានជ្រលក់តប់ៗនឹងម្សៅ។
ហេតុតែពួកវាផ្ទុកដោយជាតិខ្លាញ់ខ្ពស់នេះ ពួកវាក៏ផ្ដល់នូវកាឡូរីខ្ពស់ដែរ ដែលវាហាក់ដូចជាធ្វើឲ្យអ្នកបរិភោគអាហារទទួលកាឡូរីខ្ពស់ច្រើនជាងអ្វីដែលត្រូវការ ហើយជាលទ្ធផលអ្នកនឹងអាចឡើងទម្ងន់។ បន្ថែមទៅលើចំណុចទីមួយ ដូចអ្វីដែលបានបរិយាយខាងលើអ្នកដែលញ៉ាំអាហារបំពងច្រើនប្រឈមនឹងការឡើងទម្ងន់ ព្រោះថាវាសម្បូរជាតិខ្លាញ់ ដែលមានន័យថាក៏មានកាឡូរីច្រើនដែរ តួយ៉ាងមួយក្រាមនៃជាតិខ្លាញ់នោះ ផ្ដល់នូវកាឡូរី 9 បើធៀបទៅនឹងការរកឃើញក្នុងក្រាមនីមួយៗនៃប្រូតេអ៊ីន ឬកាបូអ៊ីដ្រាតដែលផ្ដល់កាឡូរីតែ4ប៉ុណ្ណោះ។ ប្រសិនបើប្រិយមិត្តបរិភោគអាហារចៀនឬបំពងជារៀងរាល់ថ្ងៃ នោះអ្នកទំនងនឹងក្លាយជាមនុស្សលើសទម្ងន់ឬកើតជំងឺធាត់ជ្រុល។ ការសិក្សាក៏បានបញ្ជាក់ដែរថាការទទួលទានអាហារបែបហ្នឹងលើសពីបួនដងក្នុងមួយសប្តាហ៍ នោះវានឹងបង្កើនហានិភ័យនៃការធាត់បើធៀបនឹងការញ៉ាំអាហារទាំងនេះតិចជាងពីរដងក្នុងមួយសប្តាហ៍។ ផលអវិជ្ជមានមួយទៀតដែលទទួលបានពីការញ៉ាំអាហារបំពងគឺបញ្ហាសុខភាព។ អាស៊ីតខ្លាញ់ពីរប្រភេទ (Saturated Fat និង Trans Fat) ដែលមានក្នុងអាហារបំពងធ្វើឲ្យអត្រានៃការកើនជាតិកូឡេស្តេរ៉ុលនិងជំងឺបេះដូងខ្ពស់។ ក្នុងករណីរបបអាហាររបស់ប្រិយមិត្តច្រើនតែជាប្រភេទអាហារបែបនេះ អ៊ីចឹងមានន័យថាក្រៅពីភាពធាត់ ប្រិយមិត្តនឹងប្រឈមខ្ពស់ក្នុងការកើតជំងឺមហារីកមួយចំនួន ពីព្រោះថាអាហារដែលចៀនឬបំពងដោយប្រើសីតុណ្ហភាពខ្ពស់ ឬយូរងាយនឹងបង្កើតនូវសារធាតុ Acrylamide (សារធាតុគ្មានពណ៌ថ្លាដែលបង្កើតទៅជាប៉ូលីម៊ែររលាយក្នុងទឹក) និងCarcinogen (សារធាតុដែលអាចបង្កជាជំងឺមហារីក) ជាងការប្រើសីតុណ្ហភាពទាបក្នុងរយៈពេលខ្លី។
មួយវិញទៀត ការញ៉ាំអាហារបំពងនោះអាចនាំឲ្យដំណើរការខួរក្បាលមនុស្សខុសប្រក្រតី។ ប្រភេទប្រេងឆាមួយចំនួនដូចជាប្រេង Flaxseed នឹងធ្លាក់គុណភាពពេលដែលរងកម្ដៅច្រើនម៉ោង ហើយបន្ទាប់មកពួកវានឹងបង្កើតជាសារធាតុពុល Aldehyde (សមាសធាតុសរីរាង្គដែលមានពួកមេតាណុល (Methanol) និងអេតាណុល(Ethanal) ខ្លាំងបំផុតក្នុងរយៈពេលខ្លីប៉ុណ្ណោះពេលដែលចម្អិន។ ម្យ៉ាងទៀតនោះ ប្រេងទាំងនេះក៏មានអាស៊ីតខ្លាញ់ប្រភេទ Polyunsaturated Fats ច្រើន ហើយពួកវានឹងធ្វើការបំបែកខ្លួនយ៉ាងរហ័ស ដើម្បីបង្កើតជាសមាសធាតុ Health-demoting aldehyde ដែលជ្រាបចូលខ្យល់ ហើយក៏ជ្រាបចូលក្នុងអាហារ។ យ៉ាងណាមិញ មានប្រេងមួយចំនួនដូចជាប្រេងអូលីវ ត្រូវបានស្គាល់ថាជាប្រេងដែលមានអាស៊ីតខ្លាញ់ Mono-Saturated Fat ខ្ពស់ តែផលិត Aldehyde ក្នុងកម្រិតទាបទោះបីជាស្ថិតក្នុងកម្ដៅប៉ុណ្ណាក៏ដោយ។ ដូច្នេះប្រិយមិត្តគប្បីជៀសវាងការចម្អិនម្ហូបដែលប្រើប្រេងណាដែលបញ្ចេញសារធាតុ Aldehyde ខ្ពស់ ព្រោះវាជាអ្នកបង្កឲ្យមានហានិភ័យក្នុងការកើតជំងឺសរសៃប្រសាទ។ ឧទាហរណ៍វាអាចធ្វើឲ្យមុខងាររបស់ខួរក្បាលដំណើរការមិនត្រឹមត្រូវជាដើម។
សរុបសេចក្ដីចុងក្រោយដែលប្រិយមិត្តគួរពិចារណាគឺថាដរាបណារបបអាហារប្រចាំថ្ងៃរបស់អ្នកមានកម្រិតជាតិខ្លាញ់ទាប (Saturated Fat និងTrans Fat) នោះអ្នកនឹងអាចញ៉ាំរបស់បំពងយូរៗម្ដង។ ឬក៏ប្រិយមិត្តអាចបរិភោគវាក្នុងបរិមាណតិចតួច ហើយគួបផ្សំនឹងអាហារផ្ដល់សុខភាពល្អផ្សេងៗ ដូចជាបន្លែ និងផ្លែឈើដែលមានកាឡូរីទាប។ វិធីមួយវិញទៀតនោះគឺប្រិយមិត្តអាចប្រើប្រេងឆាណាដែលជាUnsaturated Oils មានប្រេងផ្កា Canola ប្រេងពោត ប្រេងសណ្ដែកដី ប្រេងផ្កា Safflower ប្រេងសណ្ដែកសៀង និងប្រេង Sunflower មកបំពងឬចៀនអាហារ។ ប្រិយមិត្តក៏ត្រូវប្រយ័ត្នប្រយែងសីតុណ្ហភាពផងដែរ ដោយហេតុថាប្រសិនបើប្រើភ្លើងតិចនោះរបស់ដែលកំពុងតែបំពងនឹងជក់ខ្លាំងច្រើន ជាពិសេសត្រូវឲ្យច្បាស់ថាគ្រប់ពេលដែលដាក់របស់បន្ទាប់ចូលបំពងត្រូវឲ្យកម្ដៅប្រេងស្ថិតក្នុងសីតុណ្ហភាពដំបូង៕
Article by HEM HY