កាលបើបានទៅទស្សនាតំបន់រមណីយដ្ឋាននានាក្នុងខេត្តកំពត ភ្ញៀវទេសចរភាគច្រើននិយមទទួលទានគ្រឿងសមុទ្រ ដូចជា បង្គា មឹក ក្តាម ព្រមទាំងផលានុផលដ៏សម្បូរបែប តួយ៉ាង ទុរេន មង្ឃុត ផ្ញៀវ មាក់ប្រាងនិង សាវម៉ាវ ដែលមានដាក់លក់ជាហូរហែ នៅតំបន់ទឹកឈូ និង ម្តុំផ្សារសាមគ្គីទីរួមខេត្ត ជាដើម។ ដោយឡែកសម្រាប់ដំណើរកម្សាន្តទៅកាន់ទឹកដីខេត្តកំពតក្នុងពេលសម្រាកលម្ហែកាយនៅថ្ងៃចុងសប្តាហ៍នេះ សូវរីនសូមណែនាំអាហារល្បីប្លែកៗប្រចាំតំបន់មួយចំនួនដែល លោកអ្នកមួយចំនួនប្រហែលជាពុំទាន់បានដឹងនៅឡើយទេ។ ដូច្នេះ តោះ! មកស្គាល់អាហារកំពតពិសេសទាំង៨មុខ និងទីតាំងលក់អាហារទាំងនោះ!
១. ក្រាសមុទ្រចំហុយទឹកត្រីកំពត
ក្រាសមុទ្រជាពពួករុក្ខជាតិដុះក្នុងបាតសមុទ្រមានសណ្ឋានស្រដៀងផ្កាថ្មរាងមូលទំហំប៉ុនបាតដៃមានជាយក្រាស់ជ្រួញៗដែលប្រជានេសាទនៅខេត្តកំពតរកពីសមុទ្រមកលក់រួមជាមួយខ្យងសមុទ្រនិងគ្រឿងសមុទ្រផ្សេងៗនៅផ្សារទីរួមខេត្ត។ ក្រាសមុទ្រមានរសជាតិស្រដៀងពោះគោទើបអ្នកស្រុកខ្លះហៅថាពោះគោសមុទ្រ។ គេអាចយកក្រាសមុទ្រឬពោះគោសមុទ្រនេះទៅចំហុយជាមួយស្លឹកក្រូចសើចនិងគល់ស្លឹកគ្រៃដូចពោះគោទឹកប្រហុកដែរ ហើយរៀបចំបន្លែស្រស់ផ្ទាប់ដូចជាសណ្តែកកួរ ជីររណា ជីរនាងវង ត្រសក់ ការ៉ុត ទៅតាមចំណង់ចំណូលចិត្ត រួចទទួលទានជាមួយទឹកត្រីបុកម្ចាស់ស្រុកស្នាដៃអ្នកកំពតផ្ទាល់តែម្តង (អាចជំនួសដោយទឹកប្រហុកឬអំបិលម្រេចក៏បាន)។ ចំពោះតម្លៃទីផ្សារក្រាសមុទ្រស្រស់មួយគីឡូមានតម្លៃ៤០០០០រៀល (មិនបូកបញ្ចូលថ្លៃចម្អិន)។
២. នំបញ្ចុកកំពត
បានជាគេហៅវាថាជានំបញ្ចុកកំពត ព្រោះវាមានប្រភពចេញមកពីខេត្តកំពតនេះតែម្តង។ នំបញ្ចុកកំពតជាអាហារដែលសាមញ្ញងាយស្រួលធ្វើតែមានរសជាតិឆ្ងាញ់មួយបែបខុសពីនំបញ្ចុកសម្លធម្មតា។ ចំពោះរូបមន្តដើមគឺអ្នកកំពតនិយមដាក់តែនំបញ្ចុកស្រូបទឹកត្រីនិងរោយបង្គាម៉ដ្ឋពីលើជាការស្រេចមិនមានដាក់បន្ថែមសាច់ប៉ាតេឬសាច់ជ្រូកចំណិតឬចៃយ៉ដូចបាញ់ស៊ុងរបស់ជនជាតិវៀតណាមឡើយ។ ប៉ុន្តែសព្វថ្ងៃកន្លែងលក់ខ្លះបានធ្វើក្លាយដូចបាញ់ស៊ុងឬបាញ់ហយទៅតាមតម្រូវការរបស់អតិថិជន។ បើភ្ញៀវទេសចរចង់ទទួលទាននំបញ្ចុកកំពតបែបរសជាតិដើមអាចទៅសាកល្បងជាមួយបរិយាកាសបែបស្រុកស្រែនៅខាងភូមិព្រៃត្នោត ឃុំកំពង់គ្រែង ស្រុកទឹកឈូ។
៣. នំបញ្ចុកទឹកម្ហិច
ហាងចែធូ ជាឈ្មោះតូបលក់នំបញ្ចុកទឹកម្ហិចល្បីដាច់គេនៅជិតក្រុងកំពត។ នំបញ្ចុកទឹកម្ហិចជាប្រភេទអាហារចម្លែកដែលមានតែនៅតំបន់នេះតែប៉ុណ្ណោះ។ ទឹកម្ហិចមានលក្ខណៈសថ្លាស្រដៀងទឹកស៊ុបគុយទាវផ្សំឡើងពីស្លឹកគ្រៃខ្ជាយស្ករសនិង អំបិលព្រមជាមួយសាច់ត្រីសមុទ្រម្យ៉ាងហៅថាត្រីអង្រែ។ គេស្រុះនំបញ្ចុកដែលផលិតដោយខ្លួនឯងរួចថ្មីៗ(ធ្វើមួយថ្ងៃលក់មួយថ្ងៃ)សរសៃទន់ល្មើយត្រូវនឹងទឹកម្ហិចក្តៅៗបង់ស្លឹកខ្ទឹមបន្តិចរឹតតែបន្ថែមរសជាតិទ្វេដង។ នំបញ្ចុកទឹកម្ហិចដែលមានទីតាំងស្ថិតនៅភូមិព្រៃត្នោតនេះចាប់បើកលក់ពីថ្ងៃរសៀលរហូតដល់ម៉ោង៧-៨យប់ហើយមានតម្លៃថោកលើសពីការស្មាន ពោលគឺត្រឹមតែ១៥០០រៀល (ចានតូច) និង២០០០រៀល(ចានធំ) ប៉ុណ្ណោះ។
៤. នំកងព្រៃតុម្ព
នំកងជានំបុរាណខ្មែរដែលមានលក់ស្ទើរគ្រប់ទីកន្លែងនៃប្រទេសកម្ពុជា ប៉ុន្តែនំកងព្រៃតុម្ពមានលក្ខណៈខុសឆ្ងាយពីនំកងដែលដាក់លក់នៅតាមទីផ្សារនានារហូតល្បីឈ្មោះដល់ខ្មែររស់នៅបរទេសថែមទៀតផង។ លោកយាយហែមឡាន អាយុ៨២ឆ្នាំ ជាអ្នកចម្អិននំកងបែបបុរាណដោយផ្ទាល់ដៃ ចេះជំនាញនេះតពីម្តាយក្មេករបស់គាត់តាំងពីគាត់នៅក្មេងម្ល៉េះ។ លោកយាយមានប្រសាសន៍ថានំកងធ្វើធំពេក (ដូចអ្នកភ្នំពេញ) មិនឆ្ងាញ់ទេ ហើយដើម្បីឲ្យឆ្ងាញ់ខ្លាំងត្រូវដាក់អង្ករខ្សាយមួយកំប៉ុងក្នុងអង្ករដំណើប១០កំប៉ុង កុំឲ្យម្សៅនំជ្រាយពេក ចំណែកភ្លើងត្រូវដុតអុសទើបនំកងឡើងបានល្អ។ រីឯស្ករត្រូវប្រើស្ករត្នោតសុទ្ធយកមកកម្តៅក្នុងខ្ទះទាល់តែឡើងជើងអង្រ្កងក្រហមល្អទើបដាក់ចុះលាបលើនំក្តៅៗធ្វើឲ្យទាំងស្ករត្នោតទាំងនំមានសភាពទន់ល្មើយមិនកករឹងដូចនំកងកន្លែងផ្សេង។ នំកងលោកយាយលក់ដាច់ណាស់រហូតអស់អង្ករមួយថ្ងៃបីគីឡូក៏មាន។ លោកយាយចាប់ផ្តើមធ្វើនំលក់ពីម៉ោង៤ល្ងាចរហូតដល់ម៉ោង៧-៨យប់។ នំកងមួយគូតម្លៃត្រឹមតែ៥០០រៀលប៉ុណ្ណោះ។
៥.នំប៉័ងបាក់យ៉ុងសាច់ក្តាមអាំង
បើលោកអ្នកចង់ទទួលទានអាហារសម្រន់ប្រភេទនេះលោកអ្នកគ្រាន់តែទៅដល់រង្វង់មូលទុរេនទីរួមខេត្តកំពតលោកអ្នកនឹងឃើញរទេះនំប៉័ងអាំងពីរបីដែលមានមនុស្សឈររង់ចាំទិញត្រៀបត្រានៅខាងមុខធនាគារកាណាឌីយ៉ា។ នំប៉ុងប៉ាក់យ៉ុងសាច់ក្តាមអាំងនេះប្រហែលជាទើបមានលក់ប៉ុន្មានឆ្នាំចុងក្រោយនេះទេ ប៉ុន្តែទទួលបានការគាំទ្រច្រើនពីអតិថិជន ព្រោះវាមានរសជាតិឈ្ងុយឆ្ងាញ់ និងតម្លៃសមរម្យត្រឹម២០០០រៀលក្នុងមួយដើម។ គ្រឿងផ្សំរបស់វាមាននំប៉័ងដើម សាច់ជ្រូកបាក់យ៉ុង ប្រហិតសាច់ក្តាមចិញ្ច្រាំទឹកប៉េងប៉ោះ និងម្ទេសឆា ជាពិសេសមានទឹកប៊័រធ្វើពីទឹកដោះគោខាប់លាយនឹងឈីស។ បើតាមការអះអាងរបស់អ្នកលក់ម្នាក់ក្នុងមួយថ្ងៃគាត់អាចលក់បាននំប៉័ងចន្លោះពី១០០-២០០ដើមចាប់ពីម៉ោង១រសៀលដល់ម៉ោង៨យប់។
៦.ចាហួយដូងក្រអូបនិងកាហ្វេដូងក្រអូបកំពត
នរណាមិនដឹងថាខេត្តកំពតល្បីឈ្មោះដោយសារផ្លែដូងផ្អែមឆ្ងាញ់ ប៉ុន្តែលើកនេះយើងមិននិយាយពីផ្លែដូងធម្មតានោះទេ យើងចង់បង្ហាញផលិតផលច្នៃប្រឌិតថ្មីចំនួនពីររបស់ម្ចាស់ហាងផ្ទះដូងដែលមានទីតាំងស្ថិតនៅខាងកើតស្ពានឥន្ទធនូចាស់លើបណ្តាយផ្លូវលេខ៧០០ (ផ្លូវអតីតរោងកុន៧មករា) ។ ចាហួយដូងក្រអូបដែលផ្សំឡើងពីសាច់ដូងក្រអូបក្នុងតំបន់ពិតៗ (អ្នកលក់ប្រាប់ថាយកពីឃុំកូនសត្វស្រុកទឹកឈូតែម្តង) ហើយមានការវេចខ្ចប់ស្អាតដោយប្រើរូបស្ពានឥន្ទធនូជានិមិត្តសញ្ញា។ ដោយឡែកកាហ្វេដូងក្រអូបក៏មិនធម្មតាដែរ ព្រោះមិនប្រើខ្ទិះដូងកំប៉ុង ឬម៉្សៅមេរសជាតិដូងនោះទេ។ ផ្ទុយទៅវិញគេប្រើសាច់ដូងក្រអូបកោសស្រស់ៗមកក្រឡុកឲ្យម៉ដ្ឋរួចចាក់លាយឆុងជាមួយកាហ្វេតែម្តង។ ហាងនេះបើកពីម៉ោង៨ព្រឹកដល់ម៉ោង៩យប់។ ចាហួយមួយកំប៉ុងតម្លៃ២៥០០រៀល រីឯកាហ្វេដូងក្រអូបទឹកកកមួយកែវតម្លៃ៦០០០រៀល ក្រឡុក(frappe) ៧០០០រៀល។
៧.បាយឆាសាច់ក្តាមកំពត
អ្នកក្រុងកំពតភាគច្រើនសុទ្ធតែស្គាល់ទីតាំងបាយឆាសាច់ក្តាមដ៏ល្បីប្រចាំខេត្តមួយនេះ។ វាមានទីតាំងស្ថិតនៅក្នុងសង្កាត់អណ្តូងខ្មែរក្រុងកំពតជាប់រង្វង់មូលទឹករលកដែលមានដើមត្នោតពីរដើមជាសម្គាល់។បើភ្ញៀវធ្វើដំណើរពីភ្នំពេញត្រូវជិះតាមផ្លូវជាតិលេខ៣ឆ្លងស្ពានថ្មថ្មីចុះពីស្ពានបន្តិចលោកអ្នកនឹងឃើញរង្វង់មូលនោះជាមិនខាន។ បាយឆានេះផ្សំពីសាច់ក្តាមសេះស្រស់ៗប្រចាំខេត្តកំពតលាយនឹងពងក្តាមក្រហមទាំងដុំៗគួរឲ្យចង់ទទួលទានពេកក្រៃ។ គេបរិភោគវាជាមួយត្រសក់ស្រស់និងទឹកស៊ុបក្តៅៗ ព្រមជាមួយទឹកត្រីបុកកំពតបង្កើតរសជាតិតែមួយគ្មានពីរដែលពិបាកនឹងពណ៌នា។ ចំពោះតម្លៃវិញគឺសមរម្យអាចទទួលយកបាន។ ប្រសិនបើភ្ញៀវធ្វើដំណើរទៅលេងភ្នំបូកគោឬទឹកឈូកាត់តាមផ្លូវនេះ កុំភ្លេចឆៀងចូលទៅសាកល្បងរសជាតិបាយឆាសាច់ក្តាមកំពតពិតៗ។
៨.បាយស្រូបប្រហិតសាច់ក្តាម
បាយស្រូបប្រហិតក្តាមជាអាហារកម្រសូម្បីតែនៅក្នុងក្រុងកំពតក៏យើងរកឃើញតែមួយកន្លែងគត់គឺនៅខាងក្រោយសាលាមតេ្តយ្យខេត្ត (ជាប់ខាងស្តាំហាងកាហ្វេធូដេ) ស្ថិតក្នុងភូមិ១ឧសភា សង្កាត់កំពង់កណ្តាល ក្រុងកំពត តាមបណ្តោយផ្លូវលេខ៧០១។ ទីនោះមិនមែនជាភោជនីយដ្ឋានឬហាងបាយធំនោះទេ គ្រាន់តែជាតៀមឈើ ប្រក់ដំបូលស័ង្កសីមានតុពីរបីសម្រាប់ភ្ញៀវអង្គុយ ប៉ុន្តែមានភ្ញៀវច្រើនកុះករ ខ្លះឈរ ខ្លះអង្គុយរង់ចាំទិញ។ បាយស្រូបនោះមានដាក់ប្រហិតសាច់ក្តាមដែលផ្សំពីសាច់ក្តាមសេះស្ងោរលាយនឹងសាច់ជ្រូកនិងតាំងហ៊ុនរួមជាមួយខ្ទឹមសខ្ទឹមក្រហមយកទៅចៀនក្រៀមឆ្ងាញ់ជាប់មាត់ ទទួលទានអមជាមួយទឹកស៊ុបហុយៗក្តៅៗ។ វាខុសប្លែកពីបាយស្រូបធម្មតាមួយចំណុចទៀតត្រង់ថាគេមិនប្រើជ្រក់ត្រសក់ឬល្ហុងទេ តែគេប្រើត្រសក់ចំណិតមូលស្តើងៗដាក់ចូលជាមួយទឹកត្រីជូរអែមតែម្តង។ បាយស្រូបប្រហិតសាច់ក្តាមនេះមានតម្លៃ៤០០០រៀលក្នុងមួយចាន៕
Article by SRIN SOKMEAN