ខេត្តតាកែវជាខេត្តមួយដែលមានវប្បធម៌ចំណាស់ជាងគេនៅប្រទេសកម្ពុជា ដោយសារខេត្តនេះជាទីតាំងភូមិសាស្រ្តនៃប្រាសាទភ្នំដា ដែលជារចនាបថប្រាសាទទី១ក្នុងចំណោមរចនាបថប្រាសាទទាំង១៣សម័យកាលរបស់កម្ពុជា។ ដោយសារតែអាយុកាលដ៏ចំណាស់នេះហើយ ទើបធ្វើឲ្យខេត្តភាគខាងត្បូងប្រទេសមួយនេះក៏បានបង្កប់នូវ ទំនៀមទំលាប់ប្រពៃណី ម្ហូបអាហារល្បីៗប្រចាំតំបន់ និង ប្រជាជនដែលមានឯកទេសសិប្បកម្មប្រពៃណីជាច្រើនតពីជំនាន់ដូនតារហូតមកដល់សព្វថ្ងៃនេះ។ បើនិយាយអំពីផ្នែកចំណីអាហារប្រចាំខេត្តតាកែវ ប្រជាជនខ្មែរច្បាស់ជានឹកដល់បង្កងតាកែវដែលជាកំណប់ទ្រព្យធម្មជាតិនៃបឹងអង្គរបុរី ព្រមទាំងពងទាកូនឆ្ងាញ់ពីឃុំស្រែរនោង ស្រុកត្រាំកក់ មិនខាន។ ប៉ុន្តែដោយឡែក ក្នុងខណៈនេះសូវរីនសូមណែនាំផលិតផលមួយចំនួនទៀតដែលទទួលបានការពេញនិយមខ្លាំងនៅក្នុងទឹកដីខេត្តតាកែវ ក្រៅពីបង្កងនិងពងទាកូនស្រែនេះ។
១. សិប្បកម្មតម្បាញសូត្រប្រពៃណី
ក្រៅពីតំបន់កោះដាច់រាជធានីភ្នំពេញ ខេត្តតាកែវជាជង្រុកតម្បាញសូត្រដ៏ធំមួយទៀតនៃប្រទេសកម្ពុជា។ ទីតាំងតម្បាញសូត្រល្បីៗនៅក្នុងខេត្តតាកែវរួមមានឃុំត្រពាំងក្រសាំង ឃុំពារាម ស្រុកបាទី ឃុំតាំងយ៉ាប ស្រុកព្រៃកប្បាស និងឃុំស្លា ស្រុកសំរោង (ម្តុំភ្នំជីសូរ) ជាដើម។ ហូលនៅខេត្តតាកែវល្បីថាត្បាញបានស្អាត ព្រោះអ្នកត្បាញភាគច្រើនជាចាស់ទុំដែលមានបទពិសោធន៍ក្នុងការត្បាញជាច្រើនទសវត្សរ៍មកហើយ។ ក្រៅពីតម្បាញហូល អ្នកភូមិកញ្ចាងឃុំស្លាស្រុកសំរោងក៏នៅរក្សាប្រពៃណីតម្បាញហូលពិតានដែលពីដើមមកគេប្រើវាសម្រាប់ចងលើពិតានបាំងព្រះពុទ្ធបដិមាក្នុងវត្តអារាមឬទីសក្ការបូជាផ្សេងៗ ប៉ុន្តែសព្វថ្ងៃនេះគេប្រើសម្រាប់ព្យួរលើជញ្ជាំងជាគ្រឿងតែងលម្អគេហដ្ឋាន ភោជនីយដ្ឋាន និងសណ្ឋាគារប្រណិតធំៗ។ ចំពោះហូលស្លៀកមួយក្បិនតម្លៃចាប់ពី ៧០ដុល្លារឡើងទៅ រីឯហូលពិតានតម្លៃចាប់ពីជាង ១០០ដុល្លារឡើងទៅអាស្រ័យទៅតាមទំហំនិងទឹកដៃនៃអ្នកត្បាញ។
២. ស្រាសតាកែវ
ស្រាសជាប្រភេទស្រាដែលបិតចេញពីអង្ករមានប្រភពនៅក្នុងប្រទេសកម្ពុជាយូរយារមកហើយ ប៉ុន្តែវាជាកិត្តិយសដ៏ធំធេងសម្រាប់ខេត្តតាកែវដែលទទួលបាននូវការកែលម្អផ្នែកបច្ចេកទេសផលិតឲ្យស្របតាមស្តង់ដារគុណភាពអន្តរជាតិក្រោមកិច្ចសហប្រតិបត្តិការគម្រោងរវាងសាកលវិទ្យាល័យភូមិន្ទកសិកម្ម និងសាកលវិទ្យាល័យណាហ្គោយ៉ាប្រទេសជប៉ុន។ ស្រាសប្រភេទថ្មីនេះត្រូវបានផលិតដោយប្រជាកសិករខ្មែរនៅក្នុងស្រុកពីរនៃខេត្តតាកែវគឺស្រុកត្រាំកក់និងស្រុកទ្រាំង ហើយវាត្រូវបានដាក់លក់នៅផ្សារទំនើបឡាក់គី ផ្សារទំនើបបាយ័ន ហាងលក់ម្រេចគូរ៉ាតា ហាងញញឹម ហាងលក់សូត្រ Sentosa Silk និងសណ្ឋាគារកាំបូឌីយ៉ាណាជាដើម។
៣. កង្កែបបោប
កង្កែបបោបជាអាហារបែបជនបទស្រុកស្រែរបស់ប្រជាជនខ្មែរស្ទើរតែគ្រប់ស្រុកខេត្ត ប៉ុន្តែនៅខេត្តតាកែវកន្លែងលក់កង្កែបបោបដែលច្រើននិងល្បីជាងគេសម្រាប់អ្នកដំណើរទៅមកគឺម្តុំឃុំកណ្តឹងស្រុកបាទី ខេត្តតាកែវ ដែលស្ថិតនៅចន្លោះរមណីយដ្ឋានទន្លេបាទី និងរមណីយដ្ឋានភ្នំតាម៉ៅ។ កុមារីណែត អាជីវករវ័យក្មេងម្នាក់បានប្រាប់ថាក្នុងមួយថ្ងៃនាងអាចលក់កង្កែបបោបបានប្រហែល ១០០តម្បុត (ចង្កាក់) ដែលក្នុងមួយតម្បុត មានកង្កែបចំនួនពីរ តម្លៃ ៣០០០រៀល។ គ្រឿងផ្សំសម្រាប់ញាត់កង្កែបបោបរួមមានសាច់ជ្រូកបីជាន់ ស្លឹកម្រះព្រៅ សណ្តែកដី និងគ្រឿងគល់ស្លឹកគ្រៃ ហើយបន្ទាប់មកគេប្រលាក់ទឹករមៀតឲ្យឡើងពណ៌លឿង និងលាបខ្លាញ់ឲ្យរលោងមុននឹងដាក់អាំងលក់។
៤. ត្រឡនតនអាំង
ត្រឡនតនឬកង្កែបអាចម៍គោអាំងជាគ្រឿងក្លែម ជាដៃគូពិសេសនឹងទឹកត្នោតជូរស្រុកស្រែ។ ត្រឡនតនត្រូវបានគេដោតជាចង្កាក់ៗគរលើគ្នាចងព្យួរនឹងតូបលក់ជាមួយនឹងកង្កែបបោបតាមផ្លូវជាតិលេខ២ ចាប់តាំងពីឃុំទ្រា ស្រុកកណ្តាលស្ទឹង ខេត្តកណ្តាល រហូតដល់ឃុំកណ្តឹង ស្រុកបាទី ខេត្តតាកែវ។ អាជីវករម្នាក់បានប្រាប់ថាត្រឡនតនទាំងនោះត្រូវបានប្រមូលទិញពីអ្នកភូមិដែលដើរចាប់ក្នុង ១០០ក្បាល ស្មើនឹងតម្លៃ ៤០,០០០រៀល ហើយលក់ចេញជាដុំដែលមួយដុំមានតម្លៃ ៦,០០០រៀល។ ត្រឡនតនម្តុំស្រុកបាទីលក់ដាច់ណាស់ ព្រោះអ្នកដំណើរតែងតែឈប់សម្រាកគេងអង្រឹង ហើយជុំគ្នាទទួលទានទឹកត្មោតជូរឬស្រាបៀរក្លែមត្រឡនតនដែលអាំងក្តៅៗស្រួយខ្ញោកចាប់មាត់ជាទីបំផុតហើយអ្នកខ្លះទិញយកទុកហូបលេងតាមផ្លូវក៏មានដែរ។
៥. គ្រាប់ត្នោតខ្ចី
បើលោកអ្នកធ្វើដំណើរតាមផ្លូវជាតិលេខ២ឆ្ពោះទៅកាន់រមណីយដ្ឋានភ្នំតាម៉ៅ លោកអ្នកនឹងប្រទះភ្នែកនឹងត្នោតទាំងធ្លាយៗដែលអាជីវករដាក់តាំងលក់នៅតាមចិញ្ចើមផ្លូវយ៉ាងច្រើនសន្ធឹកសន្ធាប់។ គ្រាប់ត្នោតស្រស់ដែលកាប់ពីផ្លែភ្លាមៗលក់ក្នុងតម្លៃ ១០គ្រាប់ ៣,០០០រៀល ឬ ១០០គ្រាប់ ៣០,០០០រៀល។ លោកអ្នកក៏អាចទិញត្នោតទាំងធ្លាយតែម្តង ដើម្បីយកទៅដាក់តាំងក្នុងកម្មវិធីផ្សេងៗក៏បាន ដោយគេគិតថ្លៃតាមចំនួនផ្លែក្នុងធ្លាយនោះ (មួយផ្លែមានតម្លៃ ១,០០០រៀល)។ គេនិយមទិញគ្រាប់ត្នោតខ្ចីទៅញ៉ាំស្រស់ឬធ្វើជាបង្អែមបបរត្នោត ឬចិតដាក់ទឹកខ្ទិះត្រជាក់ៗបរិភោគទៅតាមចំណង់ចំណូលចិត្ត។
៦. ជ្រក់អង្រ្កង
ជ្រក់អង្រ្កងដែលដាក់តាំងលក់នៅតាមបណ្តោយផ្លូវជាតិលេខ២ក្នុងឃុំកណ្តឹងស្រុកបាទីមានពីរប្រភេទ គឺជ្រក់អង្រ្កងសុទ្ធ និងជ្រក់ទំពាំងអង្រ្កង។ បើតាមការអះអាងរបស់អ្នកលក់ផ្ទាល់ វិធីធ្វើជ្រក់អង្រ្កងនេះមានលក្ខណៈសាមញ្ញណាស់ គឺគ្រាន់តែយកអង្រ្កងលាងទឹកឲ្យស្អាតហើយដាំទឹកអំបិលក្តៅឧណ្ហៗចាក់អង្រ្កងចូលក្នុងក្រឡត្រាំលាយជាមួយអំបិល ស្ករស ប៊ីចេងបន្តិចបន្តួចជាការស្រេច។ ជ្រក់អង្រ្កងនិងជ្រក់ទំពាំងអង្រ្កងលក់ក្នុងតម្លៃស្មើគ្នាគឺមួយកូនក្រឡ ៥,០០០រៀល។ គេអាចយកជ្រក់អង្រ្កងនេះទៅញ៉ាំលេងផ្ទាប់ជាមួយត្រីអាំង កង្កែបបោប ធ្វើម្ជូរគ្រឿងសាច់គោ ឬឆាសាច់គោអង្រ្កងក៏បាន។ ជ្រក់អង្ក្រងនេះអាចទុកបានយូរសម្រាប់ហូបដោយមិនចាំបាច់ទុកក្នុងទូរទឹកកឡើយ។
៧. កសិដ្ឋានចិញ្ចឹមកង្កែបពូជ
កសិដ្ឋានលក្ខណៈគ្រួសារនេះមានទីតាំងស្ថិតនៅភូមិទួលស្លែងឃុំក្រាំងលាវស្រុកបាទី ដែលគ្រប់គ្រងដោយកសិករឈ្មោះឈីវញ៊ឺង ដែលឧបត្ថម្ភបច្ចេកទេសដោយការិយាល័យវារីវប្បកម្មនៃរដ្ឋបាលជលផល សហការជាមួយខណ្ឌជលផលខេត្តតាកែវ។ វាជាទីតាំងភ្ញាស់និងចិញ្ចឹមកង្កែបដ៏ធំមួយប្រចាំតំបន់ដែលបានបើកដំណើរការប្រមាណ១០ឆ្នាំមកហើយ។ ម្ចាស់កសិដ្ឋានបានប្រាប់ថាកង្កែបរបស់គាត់អាចប្រមូលផលលក់បានក្នុងរយៈពេល៣ខែម្តង ហើយមានឈ្មួញក្នុងស្រុកមកទិញយកទៅលក់នៅលើទីផ្សារក្នុងខេត្តតាកែវ ឬយកទៅធ្វើជាកង្កែបបោប។ កង្កែបខ្លះមានទម្ងន់ជិត១គីឡូក្រាមក៏មាន។ កង្កែបធំៗលក់ក្នុងមួយគីឡូតម្លៃ ២០,០០០រៀល។ រីឯកូនកង្កែបតូចៗសម្រាប់កសិករផ្សេងៗយកទៅចិញ្ចឹមបន្តក៏មានលក់នៅទីនោះដែរ ប៉ុន្តែគិតថ្លៃជាក្បាល៕
Article by SRIN SOKMEAN