×
SOVRIN

ការ​បរិភោគ​បាយ​អាច​នឹង​ធ្វើ​ឱ្យ​អ្នក​ធាត់​មែន​ទេ!

 
 

          អស់​ជា​ច្រើន​សតវត្សរ៍​មក​ហើយ​ ប្រជាជន​អាស៊ី​នៅ​តែ​មាន​វប្បធម៌​បុរាណ​មួយ​ដោយ​យក​បាយ​ធ្វើ​ជា​អាហារ​ចម្បង​សម្រាប់​ទ្រទ្រង់​ជីវិត​ប្រចាំថ្ងៃ​ រហូត​មក​ដល់​បច្ចុប្បន្ន​នេះ​ចំនួន​តួរលេខ​បង្ហាញ​ថា​ប្រជាជន​អាស៊ី​ទទួល​ទាន​បាយ​ប្រហែល​90%​ នៃ​បរិមាណ​អង្ករ​ទូទាំង​ពិភពលោក។​ អ្វី​ដែល​គួរ​ឲ្យ​ចាប់​អារម្មណ៍​គឺ​ថា​ចំនួន​នៃ​អ្នក​ទទួលទាន​បាយ​ក៏​បាន​កើន​ឡើង​នៅ​ប៉ែក​ផ្សេង​ទៀត​ដូច​ជា​នៅ​សហរដ្ឋអាមេរិក​ សហភាពអឺរ៉ុប​ និង​អាហ្រ្វិក​ជាដើម។​ អង្ករ​គឺ​ជា​ប្រភព​ប្រមូល​ផ្ដុំ​នៃ​សារធាតុ​កាបូអ៊ីដ្រាត​ ហើយ​វា​ផ្តល់​ជាតិ​ប្រូតេអ៊ីន​ឬ​ជាតិ​ខ្លាញ់​តិច​តួច​ប៉ុណ្ណោះ។​ ទៀត​សោត​ អង្ករ​ត្រូវ​បាន​គេ​ចាត់​ទុក​ជា​កាបូអ៊ីដ្រាត​ចម្រាញ់​ដែល​ជា​អាហារ​មាន​ជាតិ​ស្ករ​ខ្ពស់​ ឬ​អាច​និយាយ​បាន​ថា​វា​ជា​អាហារ​ដែល​បង្កើន​កម្រិត​ជាតិ​ស្ករ​នៅ​ក្នុង​ឈាម​ភ្លាមៗ​ បន្ទាប់​ពី​ទទួល​ទាន​រួច។​ បើ​និយាយ​ពី​ការ​ទទួល​ទាន​វិញ​ វា​អាច​បង្កើន​ហានិភ័យ​នៃ​ការ​កើត​ជំងឺ​ទឹកនោម​ផ្អែម​ ការ​ឡើង​ទម្ងន់​ ឬ​បញ្ហា​សុខភាព​ផ្សេងៗ​ទៀត​ ប៉ុន្តែ​សំនួរ​សួរ​ថា​តើ​ការ​បរិភោគ​បាយ​ពិត​ជា​អាច​ធ្វើ​ឲ្យ​ប្រិយមិត្ត​ធាត់​មែន​ឬ​ទេ?​ កុំ​ថា​ឡើយ​ការ​ទទួល​ទាន​បាយ​ ក្រៅ​ពី​បន្លែ​ និង​ផ្លែឈើ​អាហារ​ផ្សេង​ទៀត​ក៏​អាច​ធ្វើ​ឲ្យ​ប្រិយមិត្ត​ធាត់​បាន​ដែរ​ ប្រសិន​បើ​ប្រិយមិត្ត​ទទួល​ទាន​ច្រើន​ ហើយ​មិន​ហាត់​ប្រាណ​ជា​ប្រចាំ​នោះ។​ យ៉ាង​ណា​មិញ​ អត្ថបទ​មួយ​នេះ​នឹង​ធ្វើ​ការ​បកស្រាយ​ពត៌មាន​មួយ​ចំនួន​ទាក់ទង​នឹង​ការ​បរិភោគ​បាយ​ និង​ភាពធាត់​ ដើម្បី​ឲ្យ​ប្រិយមិត្ត​យក​មក​គិត​ពិចារ​ណា​ រួច​កាត់​សេចក្ដី​ដោយ​ខ្លួន​ឯង​ថា​ការ​ញ៉ាំបាយ​ធ្វើ​ឲ្យ​ធាត់​ឬ​ក៏​អត់!

          ខ្លាញ់​ក្បាល​ពោះ​ និង​ការ​ឡើង​ទម្ងន់៖​ ដូច​បាន​រៀបរាប់​ត្រួសៗ​ខាង​លើ​ការ​ញ៉ាំ​អាហារ​តួ​យ៉ាង​ដូច​ជា​បាយ​អាច​បង្កើន​កម្រិត​ជាតិ​ស្ករ​ក្នុង​ឈាម​ភ្លាមៗ​ បន្ទាប់​ពី​បរិភោគ​ហើយ​ នៅ​ពេល​ដែល​កម្រិត​ជាតិ​ស្ករ​នៅ​ក្នុង​ឈាម​កើន​ឡើង​ អាំងស៊ុយលីន​ក៏​ត្រូវ​បាន​បញ្ចេញ​ចេញ​ពី​លំពែង។​ គួរ​រំលឹក​ដែរ​ថា​មុខងារ​របស់​អាំងស៊ុយលីន​គឺ​យក​ជាតិ​គ្លុយកូស​ចេញ​ពី​ចរន្ត​ឈាម​ហើយ​នាំ​វា​ចូល​ទៅ​ក្នុង​កោសិកា​នៃ​រាងកាយ​សម្រាប់​ជា​ថាមពល​ឬ​កន្លែង​ផ្ទុក។​ ឧទាហរណ៍​ ប្រសិន​បើ​ប្រិយមិត្ត​ទើប​តែ​បញ្ចប់​ការ​ហាត់ប្រាណ​ដែល​មាន​រយៈ​ពេល​ពីរបី​ម៉ោង​ភ្លាមៗ​នោះ​ជាតិ​គ្លុយកូស​ក្នុង​រាងកាយ​នឹង​មាន​សភាព​ទាប។​ ប៉ុន្តែ​បន្ទាប់​ពី​ញ៉ាំ​បាយ​ហើយ​កម្រិត​ជាតិ​គ្លុយកូស​នឹង​ត្រលប់​មក​ដូច​ដើម​វិញ។​ ក្នុង​ករណី​មួយ​ទៀត​ ប្រសិន​បើ​ប្រិយមិត្ត​ទទួល​ទាន​បរិមាណ​បាយ​ដូច​គ្នា​ តែ​ប្រិយមិត្ត​មិន​បាន​ធ្វើ​លំហាត់​ប្រាណ​អ្វី​ក្រៅ​ពី​អង្គុយ​ទល់​មុខ​នឹង​កុំព្យូទ័រ​ នោះ​សាច់​ដុំ​មិន​បាន​បំលែង​ជាតិ​គ្លុយកូស​ដែល​បាន​ផលិត​ឡើង​ (បាន​មក​ពី​ការ​ញ៉ាំ​បាយ)​ ទេ​ ជា​លទ្ធផល​វា​នឹង​ក្លាយ​ទៅ​ជា​ចំណែក​លើស​ដោយ​វា​ចូល​ទៅ​កោសិកា​សាច់ដុំ​ និង​ត្រូវ​បាន​ចាត់​ទុក​ជា​ខ្លាញ់។​ ដូច្នេះ​អាច​និយាយ​បាន​ថា​ការ​ទទួលទាន​បាយ​លើស​បរិមាណ​ដែល​ត្រូវ​ការ​ (សារ​ជាតិ​កាបូអ៊ីដ្រាត​ចម្រាញ់​ខ្ពស់)​ អាច​ជំរុញ​ការ​បញ្ចេញ​អាំងស៊ុយលីន​ច្រើន​ ជា​ហេតុ​នាំ​ឲ្យ​បង្កើន​ការ​ស្តុក​ជាតិខ្លាញ់​ផង​ដែរ។

          កាឡូរី​នៅ​ក្នុង​បាយ៖​ បើ​និយាយ​ពី​អង្ករ​ (White​ Rice)​ និង​អង្ករ​សម្រូប​ (Brown​ Rice)​ កាឡូរី​ដែល​ទទួល​បាន​ពី​ការ​បរិភោគ​បាយ​ពីរ​ប្រភេទ​នេះ​មាន​ភាព​ខុស​គ្នា​បន្តិច​បន្ដួច​ប៉ុណ្ណោះ​ ដោយ​ក្នុង​មួយ​ពែង​នៃ​បាយ​ស​មាន​ 205កាឡូរី​ ហើយ​បាយ​សម្រូប​មាន​ 216កាឡូរី។​ អ៊ី​ចឹង​សរុប​មក​ បើ​ប្រើ​ទស្សនៈ​កាឡូរី​ដែល​មាន​ក្នុង​បាយ​តែ​មួយ​មុខ​នោះ​ ការ​ទទួលទាន​បាយ​មិន​បាន​ធ្វើ​ឲ្យ​ប្រិយមិត្ត​ធាត់​នោះ​ទេ​ ដរាប​ណា​កាឡូរី​ដែល​បាន​មក​ពី​ការ​ញ៉ាំ​បាយ​មិន​លើស​ចំនួន​កំណត់​កាឡូរី​ដែល​រាងកាយ​​ប្រិយមិត្ត​ត្រូវ​ការ​ក្នុង​មួយថ្ងៃៗ។​

          ជាតិ​សរសៃ​ក្នុង​បាយ៖​ ប្រិយមិត្ត​ធ្លាប់​បាន​ដឹង​រួច​មក​ហើយ​ថា​ការ​ទទួល​ទាន​បន្លែ​ ផ្លែឈើ​ និង​គ្រាប់​ធញ្ញជាតិ​មួយ​ចំនួន​កម្រ​នឹង​ធ្វើ​ឲ្យ​ប្រិយមិត្ត​ធាត់​ឬ​ឡើង​ទម្ងន់​ណាស់​ ពី​ព្រោះ​ថា​ពួក​វា​សម្បូរ​ដោយ​ជាតិ​សរសៃ។​ មិន​ខុស​គ្នា​ពី​ពពួក​អាហារ​ទាំង​នោះ​ បាយ​សម្រូប​សម្បូរ​ដោយ​ជាតិ​សរសៃ​បើ​ធៀប​ទៅ​នឹង​បាយ​ស​ ដោយ​សារ​អង្ករ​សម្រូប​នៅ​តែ​មាន​ជាតិ​សរសៃ​ធម្មជាតិ​ទាំង​អស់​ (ពេល​ដែល​គេ​ផលិត​វា)។​ ចំណែក​ឯអង្ករ​វិញ​ ពេល​ដែល​គេ​ផលិត​កន្ទក់​​ និង​មេរោគ​មាន​ប្រយោជន៍​មួយ​ចំនួន​ត្រូវ​បាន​គេ​ចម្រាញ់​ចេញ​ នោះ​មាន​ន័យ​ថា​វា​ក៏​បាត់​បង់​នូវ​ជាតិ​សរសៃ​ និង​សារធាតុ​ចិញ្ចឹម​ច្រើន​ផ្សេង​ទៀត​ស្ទើរ​តែ​ទាំង​ស្រុង​ដែរ។​ ទោះ​ជា​អង្ករ​ធម្មតា​សម្បូរ​ដោយ​រ៉ែ​ និង​វីតាមីន​ ជាតិ​សរសៃ​ដែល​បាត់បង់​អំឡុង​ពេល​ដែល​បំលែង​ពី​ស្រូវ​ជា​អង្ករ​នោះ​មិន​បាន​ត្រឡប់​មក​វិញ​ទេ។​ ជាក់​ស្ដែង​ ក្នុង​មួយ​ពែង​នៃ​ប្រភេទ​បាយ​នីមួយៗ​មាន​កាបូអ៊ីដ្រាត​ 45ក្រាម​ ដូច​គ្នា​ ប៉ុន្តែ​បាយ​សម្រូប​មាន​ជាតិ​សរសៃ​ 3.5ក្រាម​ ខណៈ​បាយ​ស​មាន​តែ​ 0.6ក្រាម​ ខុស​គ្នា​រហូត​ដល់​ 6ដង​ឯ​ណោះ។

          ជាតិ​សរសៃ​ និង​ទម្ងន់៖​ ប្រិយ​មិត្ត​ច្បាស់​ជា​ឆ្ងល់​ហើយ​ថា​ហេតុ​អ្វី​បាន​ជា​និយាយ​ពាក់ព័ន្ធ​នឹង​ជាតិ​សរសៃ​នៅ​ចំណុច​មុន​នេះ​ ហើយ​ត្រង់​ចំណុច​នេះ​ក៏​និយាយ​ពី​វា​ទៀត​ អ៊ី​ចឹង​តើ​ជាតិ​សរសៃ​មាន​ទំនាក់ទំនង​យ៉ាង​ម៉េច​ជា​មួយ​នឹង​ទម្ងន់?​ ប្រភេទ​កាបូអ៊ីដ្រាត​នៅ​ក្នុង​របប​អាហារ​ធ្វើ​ឱ្យ​មាន​ភាព​ខុសគ្នា​នៅ​ពេល​ដែល​និយាយ​ដល់​ការ​គ្រប់គ្រង​ទម្ងន់។​ ការ​ស្រាវជ្រាវ​បាន​បង្ហាញ​ថា​អ្នក​ដែល​ញ៉ាំ​ជាតិ​សរសៃ​ច្រើន​ហាក់​ដូច​ជា​មិន​សូវ​ឡើង​ទម្ងន់​ទេ។​ យោង​តាម​ Harvard​ School​ of​ Public​ Health​ បាន​អះអាង​ថា​ធញ្ញជាតិ​ចម្រាញ់​ (តួ​យ៉ាង​ដូច​ជា​អង្ករ)​ ធ្វើ​ឱ្យ​ជាតិ​ស្ករ​ក្នុង​ឈាម​ និង​អាំងស៊ុយលីន​កើន​ឡើង​យ៉ាង​ឆាប់​រហ័ស​ដែល​ធ្វើ​ឱ្យ​អ្នក​មាន​អារម្មណ៍​ថា​ឃ្លាន​ក្នុង​រយៈ​ពេល​វែង​ ជាតិ​ស្ករ​ក្នុង​ឈាម​នោះ​អាច​ធ្វើ​ឱ្យ​អ្នក​ឡើង​ទម្ងន់។​

          សរុប​មក​ការ​ទទួល​ទាន​បាយ​អាច​ធ្វើ​ឲ្យ​ប្រិយមិត្ត​ធាត់​ ឬ​ក៏​អត់​អាស្រ័យ​លើ​បរិមាណ​នៃ​ការ​បរិភោគ​ និង​សកម្មភាព​ប្រចាំ​ថ្ងៃ​របស់​ប្រិយមិត្ត​ (មាន​ហាត់​ប្រាណ​ឬ​ទេ​ ប្រសិន​បើ​ញ៉ាំ​បាយ​ច្រើន)។​ រីឯ​បរិមាណ​នៃ​ការ​ទទួល​ទាន​ប្រិយមិត្ត​មិន​គួរ​បរិភោគ​បាយ​ ដោយ​លើស​ចំណុះ​មួយ​ពែង​កន្លះ​ក្នុង​មួយ​សប្ដាហ៍​ (ប្រសិន​បើ​ប្រិយមិត្ត​ទទួល​ទាន​ផលិតផល​ផ្សេង​ទៀត​ដែល​ផលិត​ចេញ​ពី​អង្ករ)។​ ផ្ទុយ​ទៅ​វិញ​ប្រសិន​បើ​ប្រិយមិត្ត​ទទួលទាន​ផលិតផល​ផ្សេងៗ​ទៀត​ដែល​ផលិត​ចេញ​ពី​ស្រូវ​ ឬ​អង្ករ​ ប្រិយមិត្ត​គប្បី​បរិភោគ​បាយ​តិច​ជាង​ចំនួន​ដែល​បាន​ប្រាប់​ខាង​លើ។ ​សម្រាប់​វិធី​ដែល​ធ្វើ​ឲ្យ​មាន​សុខភាព​ល្អ​ព្រម​ទាំង​រួម​បញ្ចូល​បាយ​ទៅ​ក្នុង​របប​អាហារ​ប្រចាំថ្ងៃ​នោះ​ ប្រិយមិត្ត​ត្រូវ​បរិភោគ​បាយ​តិចតួច​បាន​ហើយ​ ជា​ពិសេស​ត្រូវ​ទទួល​ទាន​អាហារ​ដែល​មាន​ជាតិ​សរសៃ​ឲ្យ​បាន​ច្រើន​ដូច​ជា​ផ្លែឈើ​ និង​បន្លែ​ជា​ដើម៕

Article by Hem Hy




SUGGESTIONS