Sovrin
Sovrin
នារីប្រពៃ ឬ Proper Woman សៀវភៅរឿងពិតដែលបានរួមចំណែកជម្រុញក្តីស្រមៃរបស់ស្ត្រីកម្ពុជាគ្រប់រូប
NEWS 6 years ago
“ ស្ត្រីមិនមែនកើតមកដើម្បីតែបោសផ្ទះ និងធ្វើម្ហូបឡើយ! ”
នារីប្រពៃ គឺជាសៀវភៅមួយ ដែលគេឃើញសឹងតែនៅគ្រប់ទីកន្លែងលក់សៀវភៅទាំងអស់ និងសឹងតែឃើញគ្រប់កម្មវិធីពិព័រណ៍ជាច្រើននៅប្រទេសកម្ពុជាយើងនេះ។ សៀវភៅ នារីប្រពៃនេះត្រូវបានបោះពុម្ពផ្សាយជាពីរភាសាដែលក្នុងនោះក៏មានជាភាសាអង់គ្លេសក្រោមចំណងជើងថា “Proper Women”ផងដែរ។ មែនទែនទៅសៀវភៅដ៏មានប្រជាប្រិយមួយនេះបានចេញផ្សាយដំបូងជាភាសាអង់គ្លេស បន្ទាប់មកដោយសារតែមានសារជម្រុញពីក្រុមការងារ និងអ្នកអានគ្រប់ទីកន្លែងជុំវិញពិភពលោក ៥ខែក្រោយមក អ្នកនិពន្ធក៏បានសម្រេចចិត្តនិពន្ធរឿងនេះជាភាសាខ្មែរតែម្តង។
នារីប្រពៃ ឬ Proper Woman គឺជាសៀវភៅប្រលោមលោកបែបជីវិតពិតរបស់អ្នកនិពន្ធស្ត្រីវ័យក្មេងរបស់កម្ពុជាមួយរូប គឺកញ្ញា ថុន ថាវរី ដែលរៀបរាប់ពីទស្សនរបស់ក្មេងស្រីសម័យថ្មីក្នុងការសម្រេចសុបិនរបស់ខ្លួនឱ្យក្លាយជាការពិត ចាកចេញ ពីគំនាបប្រពៃណីមិនស្មើភាពមួយចំនួន ពីការគិតដែលខុសប្លែកពីបុព្វការីរបស់ខ្លួន ហើយបង្កើតនូវប្រវត្តិសាស្ត្រថ្មីសម្រាប់ជីវិតខ្លួនឯងជារៀងដរាប។ ថាវរី ចាប់ផ្តើមនិពន្ធរឿងនារីប្រពៃនេះពីបទពិសោធន៍ជីវិតពិតគ្រួសាររបស់ខ្លួនបីជំនាន់ចាប់តាំងពីជំនាន់ម៉ា កុង រហូតដល់ជំនាន់ម្តាយ ឪពុក និងបងប្អូនប្រុសទាំង២ ដែលសុទ្ធសឹងជាមនុស្សមានឥទ្ធិពលក្នុងសំណេររបស់ថាវរីទាំងស្រុង។
ជាកូនទី២ក្នុងគ្រួសារកសិករមួយ ដែលរស់នៅលើដីកោះ នៃភូមិក្បាលកោះ ឃុំខ្សាច់ទន្លា ស្រុកស្អាង ខេត្តកណ្តាល ថាវរី ធំធាត់ជាមួយបងប្អូនប្រុស២នាក់ទៀត ក្រោមការចិញ្ចឹមបីបាច់ និងអប់រំ ពីឪពុកម្តាយដែលធ្លាប់ឆ្លងកាត់រសជាតិជីវិត ទាំងមុន នៅកំឡុងពេល និងក្រោយសង្គ្រាម។
នារីប្រពៃ បើពន្យល់តាមអត្ថន័យរបស់ពាក្យនេះ មានន័យថា ស្ត្រីគ្រប់លក្ខណ៍ ដែលក្នុងផ្នត់គំនិតប្រពៃណីខ្មែរ ត្រូវតែពូកែធ្វើម្ហូប និងកិច្ចការផ្ទះជាច្រើនទៀត។ ប៉ុន្តែបើតាមការពន្យល់របស់ ថាវរី កញ្ញាថា អ្នកអាននឹងភ្ញាក់ផ្អើលនៅពេលអានសៀវភៅនេះចប់ ហើយនឹងឱ្យនិយមន័យចំនងជើង នារីប្រពៃ ដោយខ្លួនឯងជាក់ជាមិនខាន។
“ខ្ញុំគោរពប្រពៃណីទំនៀមទំលាប់ខ្មែរ ប៉ុន្តែទស្សនៈណាដែលបានបង្កើតអសមភាពរវាងបុរស និងស្ត្រី ខ្ញុំមិនគាំទ្រឡើយ!”
នារីប្រពៃបានបោះពុម្ពផ្សាយជាភាសាខ្មែរលើកទី១ចំនួន៤០០០ក្បាល ដោយក្នុងនោះ២៥៣០ក្បាល សម្រាប់ចែកជូនដោយឥតគិតថ្លៃដល់សាលារៀន និងអង្គការដែលធ្វើការទាក់ទងនឹងការអប់រំ ជាពិសេសការលើកកម្ពស់ការអប់រំសម្រាប់ស្រ្តី។ ហើយចំនួន ១៤៧០ក្បាលទៀត សម្រាប់លក់ដល់សាធារណជនទូទៅ។ ជាលទ្ធផលកញ្ញាបានទទួលសារជាច្រើនពីអ្នកអាន ជាពិសេសពីស្ត្រីជាច្រើន។
“សង្គមមិនគួរកំណត់ទីឱ្យមនុស្សស្រី និងមនុស្សប្រុសខុសគ្នាទេ។”
ថាវរី ចូលចិត្តគូរគំនូរ សរសេររឿង និងដើរត្រាច់ចរគ្រប់ទីកន្លែងដើម្បីផ្សងព្រេងរកអ្វីដែលថ្មី និងអស្ចារ្យបន្ថែមទៀតសម្រាប់រសជាតិជីវិត និងការសរសេររបស់គាត់។ ប្រហែលជាសកម្មភាពទាំងនេះហើយដែលធ្វើឱ្យអត្ថន័យក្នុងសៀវភៅនារីប្រពៃទទួលបានការគាំទ្រយ៉ាងខ្លាំងដូច្នេះ។ ថាវរី និយាយដោយញញឹមថា គាត់បានឱ្យម្តាយរបស់គាត់អានសៀវភៅនេះមុនពេលបោះពុម្ពផ្សាយ។ ហើយម្តាយគាត់បានជួយផ្តល់មតិកែលម្អដល់គាត់វិញទៀតផង។ លើសពីនេះទៀត កាលពីសៀវភៅ ជាភាសាអង់គ្លេសនេះចេញផ្សាយដំបូង ប្អូនប្រុសរបស់គាត់គឺជាអ្នកបានអានសៀវភៅនេះដំបូងគេក្នុងរយៈពេលតែមួយយប់ប៉ុណ្ណោះ។ គ្រប់គ្នានៅក្នុងគ្រួសារសុទ្ធតែបានលើកទឹកចិត្តឱ្យថាវរីធ្វើរឿងដ៏អស្ចារ្យនេះឡើង។ ពួកគាត់គិតថា ការចែករំលែករឿងរ៉ាវផ្ទាល់ខ្លួនដល់អ្នកដទៃ វាអាចជួយឱ្យពួកគេបានដឹងពីលទ្ធផលមួយដែលពួកគេត្រូវតែជួបប្រទះនៅពេលខាងមុខ។
“ស្ត្រី និងបុរសរស់នៅដើម្បីបង្កើតសង្គមមួយនេះឱ្យរីកចម្រើនជាមួយគ្នា”
“បើអ្នកមានសុបិន ត្រូវតស៊ូឱ្យដល់ទីបំផុត។”
ត្រឹមរយៈពេល ១៥ខែ និង២ថ្ងៃ សៀវភៅនារីប្រពៃ ឬ Proper Woman ទាំងភាសាខ្មែរ និងអង់គ្លេសបានទៅដល់ដៃអ្នកអានគ្រប់ទីកន្លែងលើពិភពលោក ជាពិសេសដៃរបស់អ្នកអានដែលជានារីកម្ពុជាទាំងអស់។ នារីប្រពៃ មាន២០ជំពូក ហើយរហូតមកដល់ពេលនេះ សៀវភៅបែបលើកទឹកចិត្តនេះទាំងភាសាខ្មែរ និងអង់គ្លេស ត្រូវបានបោះពុម្ពផ្សាយចំនួន២លើកមកហើយ និងចែកចាយជុំវិញប្រទេសកម្ពុជា និងទៅក្រៅប្រទេស ប្រហែលជិត១ម៉ឺនក្បាល។ សៀវភៅអានទំហំ A3 មួយនេះមានដាក់លក់នៅតាមបណ្ណាគារនានា និងហាងកាហ្វេ ឬក៏អាចកម្មង់តាម Online ក៏បានដែរ។ លើសពីនេះទៀត លោកអ្នកក៏អាចតាមដានពត៌មាន និងគម្រោងថ្មីៗរបស់កញ្ញា ថុន ថាវរី ឬនារីប្រពៃ នៅលើបណ្តាញទំនាក់ទំនងសង្គមផ្សេងៗផងដែរ។
“អានសៀវភៅគឺជាកាតព្វកិច្ចដែលត្រូវធ្វើសម្រាប់ខួរក្បាលជារៀងរាល់ថ្ងៃ!”
ក្រៅពីការសរសេរ អ្នកនិពន្ធស្ត្រីដែលមានវ័យ២៨ឆ្នាំរូបនេះ ក៏ជា នាយកគ្រប់គ្រងមួយរូប នៅក្រុមហ៊ុនទេសចរណ៍បែបផ្សងព្រេងមួយផងដែរ។ ស្នាដៃដំបូងរបស់ ថាវរី គឺជាប្រភេទរឿងសម្រាប់កុមារថា្នក់ទី១ ដែលមានចំណងជើងថា ស្បែកជើងថ្មីរបស់កូនស្រី បោះពុម្ពផ្សាយដោយអង្គការ Room To Read កម្ពុជា។
តើមិត្តអ្នកអានបានអានសៀវភៅណាមួយរបស់គាត់ ឬនារីប្រពៃ ចប់ហើយឬនៅ?
Article by Svay LeeMeng
