បើបានឆ្លងកាត់ខេត្តក្រចេះ កុំភ្លេចឈានចូលមកភ្លក់ណែមរបស់អ្នកស្រុកថ្មគ្រែ
TRAVEL & LIVING 6 years agoបើនិយាយពីស្រុកថ្មគ្រែនៅខេត្តក្រចេះ គេប្រាកដជានឹកភ្នកពីផលិតផលប្រចាំស្រុកនេះ នោះគឺក្រឡាន។ ក្រឡានថ្មគ្រែ មិនត្រឹមតែមានភាពល្បីល្បាញតែក្នុងស្រុកនោះទេ តែវាក៏ជាផលិតផលនៃភូមិមួយផលិតផលមួយរបស់ខេត្តក្រចេះផងដែរ។ ស្រុកថ្មគ្រែមិនត្រឹមតែមានភាពល្បីល្បាញតែក្រឡានប៉ុណ្ណោះទេ ស្រុកនេះក៏នៅមានផលិតផលមួយទៀតដែលភ្ញៀវទេសចរនិងអ្នកដំណើរដែលបានឆ្លងកាត់បានស្គាល់គឺ ណែមសាច់ត្រីដែលប្រជាជនស្រុកថ្មគ្រែនិយមធ្វើតាំងពីយូរលង់ណាស់មកហើយ។ ណែមស្រុកថ្មគ្រែមានរសជាតិឆ្ងាញ់ខុសពីតំបន់ដទៃនៅប្រទេសកម្ពុជា ព្រោះដោយសារតែការធ្វើមានអនាម័យនិងការលាយគ្រឿងផ្សំពិតជាគួរឲ្យឆ្ងាញ់ពិសា។ អ្នកនាង ហុង អ៊ីម ដែលជាអ្នកលក់ក្រឡាននិងណែមមួយកន្លែងនៅស្រុកថ្មគ្រែ ខេត្តក្រចេះបានប្រាប់ឲ្យដឹងថា “ការធ្វើណែមនេះគឺយើងធ្វើយ៉ាងប្រុងប្រយត្ន័ជាទីបំផុត ធ្វើយ៉ាងណាកុំឲ្យមានរុយនិងសត្វមមង់ទំ បើមិនអ៊ីចឹងវានឹងពងដាក់ហើយកើតជាដង្កូវនៅក្នុងសាច់ណែមជាមិនខាន”។ មែនទែនទៅ ណែមជាអាហារសម្រន់មួយប្រភេទដែលធ្វើឡើងពីសាច់ត្រីឆៅ លាយជាមួយគ្រឿងទុកឲ្យយូរដើម្បីមានរសជាតិជូរដែលនេះគឺជារសជាតិដើមរបស់ណែម។ ខុសប្លែកពីណែមនៅស្រុកផ្សេង អ្នកធ្វើណែមនៅស្រុកថ្មគ្រែនេះបានប្រើប្រាស់ម្ទេសក្រៀម ជំនួសឲ្យម្ទេសស្រស់ដែលយើងហាក់កម្រប្រទះឃើញនៅក្នុងទីផ្សារកម្ពុជាយើងបច្ចុប្បន្ននេះណាស់។ អ្នកនាង ហុង អ៊ីម បានបន្តថា “យើងមិនប្រើម្ទេសស្រស់នោះទេព្រោះម្ទេសស្រស់អាចនឹងធ្វើឲ្យណែមដុះផ្សិតនៅពេលយើងទុកវាយូរ អ៊ីចឹងយើងយកម្ទេសស្រស់ទាំងនោះទៅហាលឲ្យក្រៀមសិន ទើបយើងយកទៅបុក រួចទើបជ្រលក់ជាមួយណែម”។
ចំពោះប្រភេទត្រីដែលគេយកមកធ្វើណែមនេះផងដែរ អ្នកនាង ហុង អ៊ីម បានបញ្ជាក់ថា សាច់ត្រីគេយកតែ ត្រីក្អែក ត្រីស្លាត ត្រីឆ្តោរ មកផលិតតែប៉ុណ្ណោះ ព្រោះត្រីប្រភេទផ្សេង មានសាច់ផុយដែលធ្វើឲ្យសាច់ណែមមិនមានសភាពណែនល្អឡើយ។ អ្នកនាងបានបន្ថែមទៀតថា ក្នុងមួយគីឡូនៃសាច់ត្រីអាចផលិតណែមបានរហូតដល់ ១២ចង្កោម។ អ្នកធ្វើណែមដែលមានមុខមាត់ស្រស់សោភានិងសម្តីផ្អែមរូបនេះបានរៀបរាប់ពីរបៀបធ្វើណែមដោយមិនលាក់លៀមថា ដំបូងឡើយគេត្រូវយកសាច់ត្រីទៅកិនឬចិញ្រ្ចាំឲ្យម៉ដ្ឋបន្ទាប់មកត្រូវលាយជាមួយនឹងគ្រឿងដែលក្នុងនោះមានដូចជា៖ រំដេង ស្លឹកខ្ទឹម អង្ករលីង អំបិល ។ល។ រួចទើបយើងធ្វើការវេចខ្ចប់ជាមួយនឹងស្លឹកកន្ទួតនិងម្ទេសក្រៀមនេះជាការស្រេច។ កាផលិតណែមមិនត្រឹមតែទាមទារនូវការអនាម័យនៅពេលធ្វើតែមួយមុខនោះទេ ក៏ប៉ុន្តែការវេចខ្ចប់ក៏អ្នកផលិតណែមត្រូវតែប្រាកដថាបានខ្ចប់ជិតល្អហើយឬនៅ ប្រសិនបើនៅសល់ចន្លោះប្រហោងត្រង់កន្លែងណា នោះសត្វល្អិតប្រាកដជាពងដាក់ជាក់ជាមិនខានឡើយ។ ជាទូទៅនៅពេលដែលគេធ្វើណែមហើយនោះ យើងមិនអាចបរិភោគបានភ្លាមនោះឡើយ យ៉ាងហោចណាស់ក៏ត្រូវទុករយៈពេល ២៤ម៉ោងបន្ទាប់ពីធ្វើរួចទើបវាមានរសជាតិជូរនិងឆ្ងាញ់ពិសា។
អ្នកនាងហុងអ៊ីមបានចាប់ផ្តើមចេះធ្វើណែមនេះពីម្តាយនិងចាស់ក្នុងភូមិតាំងពីឆ្នាំ២០០៩មកម្ល៉េះ។ មកទល់សព្វថ្ងៃនេះអ្នកនាងមានមុខរបរជាអ្នកលក់ណែមនិងក្រឡានដែលមានតូបមួយនៅខាងមុខផ្ទះផ្ទាល់តែម្តង។ ក្នុងមួយថ្ងៃ អ្នកនាងហុងអ៊ីមអាចលក់ណែមបានពី មួយគីឡូកន្លៈ ទៅពីរគីឡូ ទៅតាមម៉ូយកុម្ម៉ង់។ តាមធម្មតាឈ្មួញតែងតែចុះមកយកណែមផ្ទាល់ដល់ផ្ទះអ្នកនាងដើម្បីចែកចាយបន្តនៅ ខេត្តមណ្ឌលគិរី ស្រុកស្នួលខេត្តកំពង់ស្ពឺនិងរាជធានីភ្នំពេញផងដែរ។ មានពេលខ្លះក៏មានម៉ូយមួយចំនួនបានកុម្ម៉ង់ណែមលាយជាមួយសាច់ជ្រូកដែលគេគិតថាមានរសជាតិឆ្ងាញ់ជាងណែមត្រីសុទ្ធ ខ្លះក៏បញ្ជាទិញណែមខ្ចប់ស្លឹកចេកដោយសារតែក្លិនឆ្ងុយដែលចេញពីស្លឹកចេកនោះអាចបន្ថែមរសជាតិណែមបានមួយកម្រិតទៀតផងដែរ។
ដូច្នេះប្រសិនបើអ្នកធ្វើដំណើរឆ្លងកាត់ខេត្តក្រចេះកុំភ្លេចឈានចូលមកភ្លក្សរសជាតិណែមរបស់អ្នកស្រុកថ្មគ្រែណា!
Article by KEO SONG