ឯម ច័ន្ទរិទិ្ធកុរ “DoyDoy” កើតពីក្តីស្រលាញ់ដើម្បីការអប់រំបែបវិទ្យាសាស្រ្តសម្រាប់កុមារកម្ពុជា
NEWS 6 years ago“កុំធ្វើអ្វីមួយតាមគ្នា! ស្វែងរកទេពកោសល្យខ្លួនឯង ហើយសាកល្បងធ្វើវា យើងនៅក្មេងបរាជ័យម្តងអាចព្យាយាមម្តងទៀតបាន ឲ្យតែការងារនោះគឺជាសេចក្តីស្រលាញ់ពិតប្រាកដរបស់យើង!” ល្បែងលេងរបស់កុមារមានច្រើនប្រភេទ ភាគច្រើនត្រូវបាននាំចូលមកពីបរទេសនិងមានតម្លៃថ្លៃ។ ដោយមើលឃើញអំពីតម្រូវការនិងចង់សម្រេចក្តីប្រាថ្នារបស់ខ្លួន យុវជនកម្ពុជាម្នាក់បានបង្កើតល្បែងលេងមួយឡើងដែលមានលក្ខណៈវិទ្យាសាស្ត្រយ៉ាងទាក់ទាញនោះគឺសម្ភារសម្រាប់កុមារដែលមានឈ្មោះថា “DoyDoy”។ បើគិតដល់ខែកញ្ញាឆ្នាំ២០១៧ DoyDoy មានអាយុកាលមួយឆ្នាំគត់ ប៉ុន្តែអ្វីដែលជាការកត់សម្គាល់ DoyDoyត្រូវបានសាធារណមតិភាគច្រើនទទួលស្គាល់ពីគុណភាព និងគុណតម្លៃរបស់សម្ភារក្មេងលេងនេះជានិច្ច។ មានអាយុ២១ឆ្នាំ យុវជន ឯម ច័ន្ទរិទិ្ធកុរ ដែលជាស្ថាបនិករបស់DoyDoy បានបរិយាយអំពីលក្ខណៈពិសេសរបស់ DoyDoy ដូច្នោះថា “DoyDoy គឺសម្ភារក្មេងលេងដែលផលិតឡើងដោយពឹងផ្អែកលើទ្រឹស្តីបែបវិទ្យាសាស្ត្រ បច្ចេកវិទ្យា វិស្វករ និងគណិតវិទ្យា ឬហៅកាត់ថា STEM ដែលជាប្រភពយ៉ាងសំខាន់ក្នុងការអភិវឌ្ឍន៍ខួរក្បាលរបស់កុមារឈានទៅរកការរីកចម្រើននាពេលអនាគត”។ DoyDoy អាចមានអត្ថន័យថា អ្វីមួយដែលបង្កើតសុភមង្គលក្នុងគ្រួសារ។ ក្នុងមួយប្រអប់ DoyDoy មានបំពង់ទុយោប្លាស្ទិច និងជ័របង្គំ (ផលិតដោយ 3D Printer) ដែលធ្វើពីកាកពោត ទុកតភ្ជាប់បំពង់ទុយោនីមួយៗ ដើម្បីបង្កើតចេញជារូបរាងអ្វីមួយតាមការស្រមៃរបស់កុមារ។ ជាគោលការណ៍ DoyDoy បង្កើតឡើងសម្រាប់កុមារដែលមានអាយុចន្លោះពី០៤ដល់០៦ឆ្នាំ ប៉ុន្តែមនុស្សគ្រប់វ័យក៏អាចសាកល្បងលេងល្បែងនេះបានដែរ។ និយាយអមដោយកាយវិការយ៉ាងស្វាហាប់ផងនោះ រិទ្ធិកុរ ជឿជាក់យ៉ាងជ្រាលជ្រៅបំផុតចំពោះគុណភាព និងគុណតម្លៃរបស់សម្ភារក្មេងលេងប្រភេទនេះ។ ហេតុអ្វី? ទី១ DoyDoy ជួយអភិវឌ្ឍខួរក្បាលកុមារ។ ទី២ DoyDoy បង្កើតពេលវេលារីករាយក្នុងគ្រួសារ។ ទី៣ ពង្រឹងផ្នែកវិទ្យាសាស្ត្រ STEM និងទី៤ វត្ថុធាតុដើមបានពីធម្មជាតិដែលមិនប៉ះពាល់ដល់បរិស្ថាន។
រំលឹកដល់មូលហេតុនៃការបង្កើត DoyDoy ដែលពេលនេះបានក្លាយទៅជាស្លាកសញ្ញាពាណិជ្ជកម្មមួយក្នុងទីផ្សារសម្ភារលេងសម្រាប់កុមារកម្ពុជា គឺតាមរយៈបទពិសោធន៍ការងារសង្គមទាក់ទងនឹងប្រព័ន្ធអប់រំដែល រិទ្ធិកុរ បានអនុវត្តកន្លងមកជាមួយមិត្តភក្តិ និងអង្គការសង្គមស៊ីវិលមួយចំនួន។ គំនិតអាជីវកម្មដើមដែលមានការណែនាំបន្ថែមពី USAID រិទ្ធិកុរ បានប្រឹងប្រែងបង្កើតវាឡើងដូចពេលសព្វថ្ងៃនេះ។
ដើម្បីគិតពីអាជីវកម្មមួយមិនមែនជារឿងងាយស្រួលឡើយ។ កុរកំពុងសិក្សានៅ IFL ឆ្នាំទី៣នៅឡើយ ហើយថែមទាំងគ្មានដើមទុនគ្រប់គ្រាន់ទៀត ជាពិសេសអត់មានបទពិសោធន៍ទាល់តែសោះទាក់ទងនឹងការរកស៊ី។ “ក្រុមគ្រួសារខ្ញុំសុទ្ធតែជាអ្នករាជការ។ តើខ្ញុំទៅរកបទពិសោធន៍អាជីវកម្មនៅទីណា?” សំណាងល្អ រិទ្ធិកុរ បានទទួលការបណ្តុះបណ្តាលខ្លះៗទាក់ទងនឹងរបៀបធ្វើអាជីវកម្មពីអង្គការសង្គមស៊ីវិលដែលធ្លាប់ធ្វើការជាមួយ រហូតចុងក្រោយទទួលបានជ័យលាភីលេខ១ក្នុងកម្មវិធីគំនិតអាជីវកម្មថ្មីដែលរៀបចំដោយក្រុមហ៊ុនប្រព័ន្ធទូរស័ព្ទក្នុងស្រុកមួយដោយទទួលបានទឹកប្រាក់ ៥០០០ដុល្លារ។ ពេលនោះហើយជំនឿចិត្ត និងការខិតខំប្រឹងប្រែងបានលេចចេញពីរូបរាងកាន់តែត្រចះត្រចង់។ “ខ្ញុំសន្សំបាន១០០០ដុល្លារ ហើយឈ្នះរង្វាន់បាន៥០០០ដុល្លារ និងដើមទុនពីប៉ាម៉ាក់ខ្លះ ខ្ញុំអាចដំណើរការមុខរបរនេះបានប្រសើរ!”
និយាយបណ្តើរញញឹមបណ្តើរ រិទ្ធិកុរ បានពណ៌នាអំពីឧបសគ្គដែលខ្លួនបានជួបប្រទះដូច្នោះថា “ខ្ញុំគឺជានិស្សិតអក្សរសាស្ត្រអង់គ្លេស ខុសជំនាញ ប៉ាម៉ាក់មិនសូវពេញចិត្តនឹងគំនិតអាជីវកម្មនោះ! ហើយបទពិសោធន៍រកស៊ីក៏មិនមានទៀត។ ម្យ៉ាងទៀត ស្វែងរកក្រុមការងារដែលមានក្តីស្រមៃរួមគ្នាក៏មិនមែនជារឿងងាយស្រួលឡើយ។ ជួនកាលក្នុងគម្រោងសរសេរ១ខែ តែពេលអនុវត្តគម្រោងក៏ជួបបញ្ហាជាយថាហេតុណាមួយទៅបង។” ក្នុងខែដំបូងនៃការផលិតរបស់ខ្លួន DoyDoy អាចលក់បានចន្លោះពី១០ប្រអប់ ដល់២០ប្រអប់ប៉ុណ្ណោះ។ ប៉ុន្តែចំនួននេះបានកើតឡើងគួរឲ្យកត់សម្គាល់នាបច្ចុប្បន្ននេះ ដែលDoyDoyអាចលក់បានក្នុងរង្វង់ ២០០ប្រអប់ក្នុង១ខែ។ តួលេខនេះអាចវាស់វែងបានពីភាពជោគជ័យរបស់ DoyDoy បានមួយកម្រិត។ ក្នុងនាមសហគ្រិនវ័យក្មេងមួយរូប រិទ្ធិកុរ ពោលថា “ពីមុនខ្ញុំចាយលុយមិនចេះគិតទេ ដឹងតែលាដៃសុំលុយម៉ាក់តែពេលនេះបានដឹងថា លុយលំបាករកខ្លាំងណាស់! ម្យ៉ាងទៀតយល់អំពីនិយមន័យសង្គមកាន់តែច្បាស់ជាងមុនថែមទៀតផង។” ដូច្នោះដើម្បីស្វែងរកក្តីស្រមៃ និងភាពលេចធ្លោរបស់ខ្លួនឯងលើផ្នែកណាមួយ រិទ្ធិកុរ បានលើកឡើងអំពីការស្គាល់ខ្លួនឯង ការហ៊ានសាកល្បង និងបង្កើតគំនិតថ្មីដែលខ្លួនយើងមានការជឿជាក់ថាអាចនឹងធ្វើបាន។
ជាកិច្ចតបស្នងសម្រាប់រិទ្ធិកុរ ពី DoyDoy បានក្លាយទៅជាសហគ្រិនវ័យក្មេងមួយរូប ដែលអាចឈរជើងជាមួយសហគ្រិនផ្សេងៗទៀតក្នុងពិភពជំនួញនេះ។ អង្គការសង្គមស៊ីវិល (USAID), ស្ថាប័នជាតិ (ក្រសួងអប់រំ យុវជន និងកីឡា) ស្ថានទូតអាមេរិកនៅកម្ពុជា បានទទួលស្គាល់ពីកិច្ចខិតខំនេះ និងបានផ្តល់កិត្តិយសសហការជាមួយរិទ្ធិកុរ ទៅតាមប្រភេទគម្រោងរបស់ពួកគេ។ DoyDoy កំពុងសិក្សា និងកែច្នៃបន្ថែមដើម្បីសម្រេចគម្រោងដ៏ធំមួយក្នុងការកសាងសំណង់ប្រាសាទអង្គរវត្ត ចេញពីសម្ភារក្មេងលេង DoyDoy។ លើសពីនេះទៀត រិទ្ធិកុរ ក៏នឹងផលិតសម្ភារលេងទាំងនេះសម្រាប់ប្រធានបទ រូបរាងកាយមនុស្សនិងផ្នែកអគ្គិសនីផងដែរ។ ជាពិសេសទីផ្សារអន្តរជាតិក៏ស្ថិតក្នុងទស្សនវិស័យរបស់អ្នកជំនួញវ័យក្មេងនេះដែរ។ ដោយស្ថាបនិកវ័យក្មេងនេះកំពុងសិក្សាអំពីមធ្យោបាយផលិតកម្មឲ្យអស់ថ្លៃតិច និងមិនមានផលប៉ះពាល់ធ្ងន់ធ្ងរដល់បរិស្ថាន។ រិទ្ធិកុរ ជឿជាក់ថា បើផលិតផលផលិតក្នុងស្រុក មានគុណភាព ហើយតម្លៃអាចទទួលយកបានទៀតនោះ ប្រាកដណាស់ អតិថិជននឹងគាំទ្រ DoyDoy កាន់តែច្រើនជាងពេលនេះមិនខានឡើយ។ “ម៉ាក់ប៉ាគួរជ្រើសរើសល្បែងលេងណាដែលចំណេញទាំងការកម្សាន្ត និងការអប់រំ!” សព្វថ្ងៃ DoyDoy មានក្រុមការងារប្រហែល១០នាក់។ លោកអ្នកអាចតាមដានសកម្មភាពរបស់ DoyDoy និងអាចទិញបាននៅលើទំព័រហ្វេសបុករបស់DoyDoy ឬតាមរយៈ Website ២ ទៀត The Buy me local (សម្រាប់ជនជាតិខ្មែរ) និង Style and Soul Cambodia (សម្រាប់ជនបរទេស) ឬទៅទិញដោយផ្ទាល់នៅហាង ENGINOU Cambodia #១១ ផ្លូវលេខ៣១៥។ DoyDoyនឹងពង្រីកវិសាលភាពតាមហាងលក់សម្ភារក្មេងលេងជាច្រើនទៀតនៅទូទាំងព្រះរាជាណាចក្រកម្ពុជា។
សូមរំលឹកថា តាមរយៈ DoyDoy ឯម ច័ន្ទរិទ្ធិកុរត្រូវបានជ្រើសរើសជាបេក្ខភាពចុងក្រោយដើម្បីប្រកួតយកពានរង្វាន់សហគ្រិនវ័យក្មេងនៅកម្ពុជាឆ្នាំ២០១៧ (Cambodian Young Entrepreneur Awards 2017)៕
Article by SVAY LEEMENG