Sovrin
Sovrin
គ្រប់គ្នាប្រាកដជាធ្លាប់បានទស្សនាវីដេអូរបស់បុរសម្នាក់ដែលមានសាច់ដុំធំ និងតុបតែងកាយជាមនុស្សស្រី ហើយពាក់ស្បែកជើងកែងចោតកម្រាស់ជិត១តឹក ដើរកាច់រាងល្វត់ល្វន់បង្ហាញម៉ូតតាមដងផ្លូវ ឆ្នេរខ្សាច់ និងក្នុងក្លឹបហាត់ប្រាណហើយមែនទេ? ស្គាល់ឈ្មោះគាត់អត់? គាត់ឈ្មោះ Sinon Loresca ឬ THE KING OF CATWALK ។
Sinon Loresca ឬ KING OF CATWALK គឺជាតារាទូរទស្សន៍ និងបង្ហាញម៉ូតភេទទី៣ជនជាតិហ្វីលីពីនម្នាក់។ តែអាជីពទាំងនោះមិនបានធ្វើឱ្យគាត់ក្លាយទៅជាមនុស្សល្បីម្នាក់ក្នុងចំណោមបុគ្គលល្បីនៅហ្វីលីពីនតាមសុបិនរបស់គាត់ទេ។ រហូតដល់ថ្ងៃមួយ ឧកាសនោះក៏បានមកដល់ ខណៈដែលប្រទេសហ្វីលីពីនត្រូវបានជ្រើសរើសជាម្ចាស់ផ្ទះរៀបចំព្រឹត្តិការណ៍បង្អួតសម្រស់ខ្នាតយក្ស Miss Universe 2016 របស់ពិភពលោកទាំងមូល. នាពេលនោះ Sinon Loresca បានថតវីដេអូមួយដោយស្លៀកតែលីអូមនុស្សស្រី ពាក់ស្បែកជើងកែងចោត ហើយរាំញាក់ ក្នុងបំណងលើកទឹកចិត្តដល់ Miss Universe ហ្វីលីពីន, Maxine Medina. តែរឿងនឹកស្មានមិនដល់បានកើតឡើង ត្រឹមតែមួយថ្ងៃសោះ វីដេអូនោះមានទស្សនាជិត៣លាននាក់ និងបន្តកើតឡើងជារៀងរាល់ថ្ងៃ។ Sinon Loresca ភ្ញាក់ផ្អើល និងសប្បាយចិត្តខ្លាំងណាស់។
ខណៈបារាំងទទួលតំណែង Miss Universe 2016, Sinon Loresca បានថតវីដេអូមួយទៀតដោយតុបតែងកាយយកលំនាំតាម Miss Universe 2015 ដែលជាជនជាតិហ្វីលីពីនដើរនៅលើផ្លូវមួយស្វាគមន៍អ្នកគាំទ្ររបស់គាត់។ ក្រោយព្រឹត្តិការណ៍នោះ សារពត៌មានដ៏ល្បីរបស់អង់គ្លេស daily mail បានចុះផ្សាយពីទេពកោសល្យនោះ និងហៅ Sinon Loresca ថា king of catwalk. ជាបន្តបន្ទាប់ សារពត៌មានតូចធំជុំវិញពិភពលោកបានចុះផ្សាយពី Sinon Loresca ហើយគាត់ក៏បានក្លាយទៅជាមនុស្សដ៏ល្បីល្បាញម្នាក់របស់ហ្វីលីពីនតាមសុបិនរបស់គាត់។
និយាយដល់ចំណុចនេះ តើមនុស្សប្រុសមានសាច់ដុំធំៗ តែបែរជាបញ្ចេញឬកម្ញ៉ិកម្ញ៉ក់ដូចជាមនុស្សស្រីបែបនេះ ពិតជាទទួលបានការគាំទ្រ១០០ភាគរយ? Sinon Loresca ឆ្លើយថា មិនបាន១០០%ទេ យ៉ាងណាក៏មាន៣០%មិនគាំទ្រ ប៉ុន្តែគាត់គិតថា មនុស្សមានសិទ្ធិបញ្ចេញមតិទៅតាមការគិតរបស់គេបាន គឺដូចជាគាត់ដែលធ្វើអ្វីទៅការស្រឡាញ់របស់គាត់ដែរ។ បណ្តាញសង្គមគឺជាទីកន្លែងដែលមនុស្សអាចសរសេរ និងបង្ហាញអ្វីដែលគេមានជាសាធារណៈបាន ដូច្នេះ វាជារឿងធម្មតា។ ប្រការសំខាន់ គឺគាត់គិតតែបន្តសុបិនរបស់គាត់ ដើម្បីភាពរីករាយ និងសុភមង្គលរបស់មនុស្សគ្រប់គ្នា ប៉ុណ្ណឹងគឺគ្រប់គ្រាន់ហើយ។ Life is beautiful. Be Kind with all Peoples and Do not forget Be yourself! រៀងរាល់ខែ Sinon Loresca តែងតែបញ្ចេញវីដេអូថ្មីៗរបស់គាត់ដែលថតនៅតាមតំបន់កម្សាន្ត និងប្រទេស នានា ដែលគាត់ត្រូវបានគេអញ្ជើញទៅ។ ក្រៅពីបំពេញការងារក្នុងអាជីពរបស់គាត់ Sinon Loresca ក៏បានចំណាយពេលក្នុងកិច្ចការមនុស្សធម៌ជាមួយក្មេងៗនៅតាមចិញ្ចើមផ្លូវ ដោយចែកអាហារ និងបង្កភាពរីករាយដល់ពួកគេតាមដែលអាចធ្វើទៅបានផងដែរ។
Sinon Loresca បានមកដល់កម្ពុជាកាលពីយប់ថ្ងៃទី១៨ ឧសភា ដោយមានអ្នកគាំទ្រមួយចំនួនទៅចាំទទួលដល់ព្រលានយន្តហោះ។ ជាន់ទឹកដីកម្ពុជាជាលើកដំបូង The King of Catwalk បានចូលរួមកម្មវិធីមនុស្សធម៌ផ្សេងៗជាមួយ Miss Universe កម្ពុជា និងកញ្ញាឯកផ្សេងៗទៀត និងក៏បានចូលរួមក្នុងកម្មវិធីរបស់សហគមន៍ស្រលាញ់ភេទដូចគ្នា (LBGT) មួយចំនួនដែរ។ តែគួរឱ្យសោកស្តាយសម្រាប់ Sinon Loresca ក្នុងដំណើរស្នាក់នៅ កម្សាន្ត និងបំពេញកិច្ចការរយៈពេល៥ថ្ងៃនៅកម្ពុជានេះ គាត់គ្មានពេលទៅទស្សនាអច្ឆរិយៈវត្ថុរបស់កម្ពុជាលើទឹកដីសៀមរាបឡើយ។ ពោលដោយញញឹមយ៉ាងស្រស់បំព្រង Sinon Loresca សន្យាថា ខ្លួននឹងវិលត្រឡប់មកកាន់កម្ពុជាម្តងទៀត ដើម្បីថតរូបជាមួយប្រាសាទអង្គរវត្តឱ្យខានតែបាន។
សម្រាប់ Sinon Loresca កម្ពុជាគឺជាប្រទេសដ៏ស្រស់ស្អាតមួយ។ ប្រជាជនមានភាពរួសរាយរាក់ទាក់។ ពួកគេញញឹមដាក់គាត់គ្រប់ពេល ហើយម្អូបក៏ឈ្ងុយឆ្ងាញ់ទៀត។ The King of Catwalk ថា គាត់នឹងផ្សព្វផ្សាយពីភាពអស្ចារ្យរបស់កម្ពុជាទៅកាន់មិត្តភក្តិនៅជុំវិញពិភពលោករបស់គាត់។ លើសពីនេះទៀត គាត់ក៏មិនភ្លេចលើកទឹកចិត្តដល់អ្នកគាំទ្ររបស់គាត់ សូមបន្តរង់ចាំឱកាសល្អណាមួយដែលនឹងកើតឡើងសម្រាប់ខ្លួនឯង ហើយចូរដើរតាមក្តីស្រមៃរបស់ខ្លួនឯងចុះ! កុំខ្វល់ពីសម្តីមនុស្សនៅក្នុងបណ្តាញសង្គមច្រើនពេក។ ហើយចុងក្រោយ THE KING OF CATWALK ក៏មិនភ្លេចផ្តល់ដំបូន្មានដល់សុភាពបុរស និងនារីទាំងឡាយ ដែលប្រាថ្នាចង់បានរាងកាយមាំមួនដូចជារូបគាត់ សូមកុំភ្លេចទៅហាត់ប្រាណ និងជ្រើសរើសររបបអាហារឱ្យបានត្រឹមត្រូវបំផុត។ ជួបគ្នានាពេលខាងមុខទៀត, អ្នកគាំទ្រកម្ពុជា!
Article by SVAY LEEMENG
