ទីក្រុងប៉ារីស ល្ខោនព្រះរាជទ្រព្យខ្មែរនាំអារម្មណ៍ទស្សនិកជនទៅកាន់សម័យ១០២ឆ្នាំមុន
TRAVEL & LIVING 6 years agoរបាំព្រះរាជទ្រព្យត្រូវបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ នៅថ្ងៃទី ០៧ ខែវិច្ឆិកា ឆ្នាំ២០០៣ ដោយអង្គការយូនេស្កូ។ នេះគឺជាសញ្ញាណនៃការទទួលស្គាល់ពីលក្ខណៈដ៏ពិសិដ្ឋគ្មាន២របស់ពិភពលោកចំពោះសិល្បៈកម្ពុជា។ ខណៈមិត្តអ្នកកំពុងអានអត្ថបទនេះ ក្រុមរបាំព្រះរាជទ្រព្យកម្ពុជា ដឹកនាំដោយសម្តេច ព្រះរាជបុត្រី នរោត្តម បុប្ជាទេវី ចំនួន៤០នាក់ កំពុងសម្តែងរបាំក្បាច់បុរាណខ្មែរនៅប្រទេសស្វីស និងប្រទេសបារាំង។ ការសម្តែងដ៏ពិសេសនោះ គឺលើកយករឿង វឌ្ឍនាទេវី ឬ Métamorphosis ដែលជាទេវកថារបស់ក្រិក Psyche ដោយយកលំនាំសម្តែងទាំងស្រុងកាលពី១០២ឆ្នាំមុន មិនថាក្បាច់រាំ ការតុបតែងខ្លួន (មុខស) និងសម្លៀកបំពាក់។ ការសម្តែងនោះរៀបចំដោយ ក្រុមហ៊ុន Zaman Production ដើម្បីរំលឹកដល់ជំនួបលើកដំបូងរបស់វិចិត្រករដ៏ល្បីល្បាញបារាំង អូហ្គូស រ៉ូដាំង ជាមួយនឹងក្រុមនាដកាល្ខោនព្រះរាជទ្រព្យខ្មែរ នាសម័យដែលក្រុមល្ខោនហ្លួងបានដង្ហែព្រះបាទស៊ីសុវត្ថិទៅប្រទេសបារាំងក្នុងឆ្នាំ១៩០៦ និងខួប១០០ឆ្នាំនៃរបាំព្រះរាជទ្រព្យខ្មែរផងដែរ។
ក្រៅពីការសម្តែងដ៏មហស្ចារ្យនោះ មានព្រឹត្តិការណ៍សំខាន់២ទៀត ដែលចាត់ទុកថា គឺជាការផ្សព្វផ្សាយពីអច្ឆរិយនៃសិល្បៈខ្មែរដែរនោះ គឺការសម្តែងរបស់នាដកា៣រូបនៅមុខទ្វារនរកក្នុងសារមន្ទីររ៉ូដាំង និងការថតរូបដោយស្លៀកពាក់បុរាណនៅមុខអច្ឆរិយៈវត្ថុរបស់បារាំង (Tour Eiffel)។
Credit: Jean-Francois Mousseau
ផ្តល់សម្ភាសន៍ខ្លីពីទីក្រុងប៉ារីស ព្រះអង្គម្ចាស់ស៊ីសុវត្ថិ តេសូ ទីប្រឹក្សាពិសេសរបស់សម្តេចព្រះរាមបុប្ជាទេវី បានមានបន្ទូលថា ការរាំនៅមុខទ្វារនរកក្នុងសារមន្ទីររ៉ូដាំងបានប្រព្រឹត្តទៅកាលពីថ្ងៃទី១៣ ខែឧសភា គឺដើម្បីរំលឹកដល់វិចិត្រករ អូហ្គូស រ៉ូដាំង ដែលបានជាប់ចិត្តនឹងនាដកាខ្មែរ ហើយតាមគូររូបនាដកាខ្មែរគ្រប់ទីកន្លែង បានរហូតដល់ចំនួន១៥០ផ្ទាំង ក្នុងអំឡុងពេលទស្សនកិច្ចរបស់ព្រះបាទស៊ីសុវត្ថិកាលពីឆ្នាំ១៩០៦។ រូបគំនូរទាំងនោះបានបង្ហាញពីថាមពល និងសម្រស់នៃក្បាច់រាំដ៏ល្អឥតខ្ចោះរបស់នាដកាខ្មែរជំនាន់នោះ។ ហើយ១០២ឆ្នាំក្រោយ យើងក៏ចង់រំលឹកព្រឹត្តិការណ៍នោះឡើងវិញ ដើម្បីឱ្យវិចិត្រករ និងប្រជាជននៅសម័យនេះបានឃើញ តើវានឹងមានលក្ខណៈពិសេសអ្វីខ្លះ? ការណ៍នេះគឺស្របគ្នានឹងសារមន្ទីររ៉ូដាំងបានបង្កើតពិព័រណ៍មួយស្តីពីគំនូរ និងចម្លាក់របស់វិចិត្រករ អូហ្គូស រ៉ូដាំង នៅក្នុងសារមន្ទីរនេះ។ ជាលទ្ឋផល វិចិត្រករ និងអ្នកចូលរួមគូររូបទាំងអស់សុទ្ធតែបានកោតសរសើរពីប្រណីតភាពនៃរបាំក្បាច់បុរាណខ្មែរយ៉ាងកុះករ។ និយាយពីព្រឹត្តិការណ៍ទី២ ដែលជាការថតរូបរួមគ្នារបស់ក្រុមនាដការបាំព្រះរាជទ្រព្យខ្មែរនៅមុខអច្ឆរិយវត្ថុរបស់បារាំង (ប៉ម Tour Eiffel) វិញម្តង។ ការណ៍នេះ, កញ្ញា ចាប ចំរើនតុលា ដែលជាសមាជិកក្រុមរបាំព្រះរាជទ្រព្យខ្មែរមួយរូប និងក៏មានវត្តមានក្នុងការថតរូបនោះដែរ បានប្រាប់ថា “មូលហេតុដែលពួកយើងថតរូបដោយពាក់អាវល្ខោនចងក្បិន (ឈុតសម្រាប់ស្លៀកនៅពេលហាត់របាំ) និងទ្រង់គ្រឿងទាំងស្រុងខ្លះផង ព្រោះក្តីស្រឡាញ់របស់ពួកយើងទៅលើរបាំ និងចង់ផ្សព្វផ្សាយពីសម្រស់នៃក្បាច់រាំ និងសម្លៀកបំពាក់របស់អ្នករបាំ ដែលដូនតាយើងបានបង្កើតមកយ៉ាងអស្ចារ្យនេះដល់ពិភពលោកទាំងមូល។ ជាពិសេសក៏ដូចជាការរំលឹកដល់ដំណើរមកដល់ដំបូងរបស់ក្រុមនាដកាខ្មែរនៅទឹកដីបារាំងកាលពី១០២ឆ្នាំផងដែរ។”
គួរជាទីរីករាយបំផុត រូបថតដ៏ស្រស់សោភាទាំងនោះត្រូវបានចែកចាយយ៉ាងច្រើនលើបណ្តាញសង្គម ដែលនេះអាចជាសញ្ញាដ៏ល្អរបស់អ្នកប្រើប្រាស់បណ្តាញសង្គមកម្ពុជា ដើម្បីរួមចំណែកផ្សព្វផ្សាយពីវប្បធម៌ខ្មែរ។ តុលា ក៏ឆ្លៀតបញ្ចេញមតិបន្ថែមទៀតថា ខ្ញុំជឿជាក់ថា ប្រជាជនកម្ពុជានឹងរួមគ្នាគាំទ្រសិល្បៈកម្ពុជាគ្រប់ទម្រង់ គ្រប់មធ្យោបាយ គ្រប់រូបភាព គ្រប់ពេលវេលា និងគ្រប់ទីកន្លែង។ សូមរំលឹកថា កាលពីឆ្នាំ១៩០៦ គឺ១០២ឆ្នាំមុន ក្រុមល្ខោនព្រះរាជទ្រព្យខ្មែរបានដង្ហែព្រះបាទស៊ីសុវត្ថិទៅទស្សនកិច្ចផ្លូវការនៅប្រទេសបារាំង និងចូលរួមពិព័រណ៍របស់ប្រទេសក្រោមអាណានិគម ដើម្បីផ្សព្វផ្សាយពីវប្បធម៌ខ្មែរ។ ឆ្នាំនោះគឺជាលើកដំបូងបង្អស់ដែលក្រុមល្ខោនព្រះរាជទ្រព្យខ្មែរទៅសម្តែងនៅប្រទេសបារាំង។ យើងសូមជូនពរឱ្យបេសកកម្មផ្សព្វផ្សាយវប្បធម៌ជាតិរបស់ក្រុមរបាំព្រះរាជទ្រព្យកម្ពុជាលើកនេះទទួលបានជោគជ័យយ៉ាងត្រចះត្រចង់!
Photo by Chap Chamroeun Tola
Article by SVAY LEEMENG