ហ៊ុន ចាន់សាន ជនជាតិខ្មែរតែម្នាក់គត់ដែលជាប់ឈ្មោះក្នុងតារាងបុគ្គលអាស៊ីល្បីៗទាំង៥០នាក់ ចុះផ្សាយដោយសារព័ត៌មានអន្តរជាតិសិង្ហបុរី
NEWS 6 years agoគេហទំព័រកាសែតសឹង្ហបុរីដ៏ល្បីឈ្មោះមួយឈ្មោះថា The Straits Times បានចុះផ្សាយអត្ថបទមួយកាលពី ថ្ងៃទី១៩ ខែឧសភា ថ្មីៗនេះ ក្រោមចំណងជើងថា “50 Asians To Watch” ឬ ជាភាសាខ្មែរមានន័យថា “ជនជាតិអាស៊ី ៥០នាក់ដែលត្រូវមើល”។ ក្នុងចំណោមបុគ្គលដ៏មានឥទ្ធិពលក្នុងទ្វីបអាស៊ីទាំង៥០នាក់ដែលត្រូវបានគេជ្រើសតាំងនោះ មានស្ថាបត្យករខ្មែរដ៏ល្បីឈ្មោះម្នាក់នាពេលបច្ចុប្បន្នគឺ លោក ហ៊ុន ចាន់សាន។
កាសែតនោះបានផ្សាយថា “លោក ហ៊ុន ចាន់សាន មានអាយុ៣៨ឆ្នាំ មកពីប្រទេសកម្ពុជា ជាស្ថាបត្យករដែលទទួលបានការអប់រំនៅសហរដ្ឋអាមេរិក និង ប្រទេសអូស្រ្តាលី ហើយបានជាប់ជ័យលាភី “Cambodia Real Estate Personality of The Year” (បុគ្គលិកលក្ខណៈអចលនវត្ថុ នៃកម្ពុជាប្រចាំឆ្នាំ) នៅក្នុងកម្មវិធី Cambodia Property Awards កាលពីខែមីនា ឆ្នាំ២០១៨។ ក្រុមហ៊ុន Re-Edge Architecture+Design ដែលបានបើកអស់រយៈពេល ៧ឆ្នាំ របស់លោកបាននិងកំពុងបង្កើតស្ថាបត្យកម្មនិមិត្តរូបជាច្រើនគួរឲ្យកត់សម្គាល់សម្រាប់រាជធានីភ្នំពេញ ដូចជា អគារ Noro Mall និងសណ្ឋាគារ Lumiere ។ ស្ថាបត្យកម្មកម្ពុជាមានទំនោរទៅរកការផ្សារភ្ជាប់ទៅនឹងរចនាបថខ្មែរ ទំនើបក្រោយសម័យអាណានិគម របស់អតីតស្ថាបត្យករតំណាងជាតិ លោក វណ្ណ ម៉ូលីវណ្ណ។ លោក ហ៊ុន ចាន់សាន កំពុងតែតម្រង់ទិសដៅបន្ទាប់របស់វា។”
សូមអញ្ជើញប្រិយមិត្តអ្នកអានទាំងឡាយមកស្តាប់ប្រសាសន៍ផ្ទាល់របស់លោក ហ៊ុន ចាន់សាន ស្ថាបត្យករ តំណាងជាតិកម្ពុជាដ៏ឆ្នើមដែលត្រូវបានជ្រើសតាំងនៅលើឆាកអន្តរជាតិនោះ!
១. តើលោកអាចជួយរៀបរាប់ត្រួសៗអំពីកម្មវិធីនោះបានទេ?
50 Asians To Watch គឺនិយាយអំពីតារាអាស៊ីដែលកំពុងរះនៅក្នុងវិស័យពាណិជ្ជកម្ម សិល្បៈ និង កីឡា នៃ ប្រទេសកំណើតរបស់ពួកគេ។ វាផ្តោតទៅលើបុគ្គលទាំងនោះដែលពួកគេកំពុងប្រើប្រាស់ ចំណង់ចំណូលចិត្ត គំនិត ច្នៃប្រតិដ្ឋ និង ចំណេះដឹងរបស់ពួកគេ ដើម្បីផ្លាស់ប្តូរជីវិតរស់នៅឲ្យកាន់តែមានភាពប្រសើរឡើង និង ធ្វើឲ្យវត្តមាន របស់ពួកគេដក់ជាប់ក្នុងអារម្មណ៍មហាជន។
២. តើលោកមានអារម្មណ៍យ៉ាងណានៅពេលដែលលោកបានឃើញការផ្សាយព័ត៌មាននេះភ្លាម?
វាជារឿងធំធេងណាស់សម្រាប់ខ្ញុំដែលបានខាងសារព័ត៌មាន Straits Times ទាក់ទងមកប្រាប់ខ្ញុំថា ខ្ញុំកំពុង បង្កើតឥទ្ធិពលដ៏ធំមួយ (ក្នុងវិស័យស្ថាបត្យកម្មនៅកម្ពុជា)។ ពេលនោះខ្ញុំភ្ញាក់ផ្អើល ហើយឥឡូវខ្ញុំមានកិត្តិយស និង មោទនភាពក្នុងនាមជាប្រជាពលរដ្ឋកម្ពុជាម្នាក់ដែលបានជាប់ក្នុងបញ្ជីជនជាតិអាស៊ីដែលចាប់ផ្តើមទទួលបាននូវភាពជោគជ័យនិងដែលកំពុងមានឥទ្ធិពលវិជ្ជមានចំពោះសង្គមជាតិរបស់ខ្លួន។ វាជាការងារតានតឹង និង ទាមទារទឹកចិត្ត ស្រលាញ់ខ្លាំង ដើម្បីព្យាយាមឲ្យក្លាយជាស្ថាបត្យករម្នាក់នៅក្នុងបរិបទជំនួញ។ ទោះបីជាយ៉ាងណាក៏ដោយ ការទទួល ស្គាល់នេះ ព្រមទាំងសមិទ្ធផលជាច្រើនផ្សេងទៀតនឹងជួយពង្រឹងក្តីសុបិនរបស់ខ្ញុំក្នុងការធ្វើអ្វីៗឲ្យកើតមានឡើងក្នុង នាមជាស្ថាបត្យករ និង ត្រួសត្រាយផ្លូវសម្រាប់អ្នកដទៃឲ្យធ្វើបានល្អដូចនេះដែរ។
៣. តើលោកគិតថាវាមានសារៈសំខាន់យ៉ាងដូចម្តេចខ្លះសម្រាប់លោកជាស្ថាបត្យករម្នាក់ និង សម្រាប់ប្រទេស ជាតិទាំងមូល?
វាពិតជាមានសារៈសំខាន់ណាស់ចំពោះខ្ញុំជាស្ថាបត្យករម្នាក់ពីព្រោះស្ថាបត្យកម្មមិនមែនគ្រាន់តែជាលក្ខណៈ ពិសេសប្លែកដាច់គេ (unique) ឬ ផ្លាស់ប្តូរជីវិតរស់នៅដោយរំញោចសរសៃប្រសាទណាមួយ (ធ្វើឲ្យមានភាពរំភើប) នៅក្នុងរាងកាយរបស់យើងនោះទេ ប៉ុន្តែវាគឺជាការអភិវឌ្ឍបរិស្ថានជុំវិញនិងការបង្កើតគោលនយោបាយសង្គម សេដ្ឋកិច្ច និង នគរោបនីយកម្មផងដែរ។ ការក្លាយជាប្រជាជនកម្ពុជាម្នាក់ដែលជាប់ឈ្មោះនៅក្នុងបញ្ជី 50 Asians To Watch គឺជាការឆ្លុះបញ្ចាំងអំពីការលូតលាស់នៃប្រទេសកម្ពុជាដែលជាប្រជាជាតិទំនើប រួមផ្សំនឹងរលកថ្មីនៃធនធាន មនុស្សប្រកបដោយសមត្ថភាពដែលអាចប្រៀបធៀបទៅនឹងប្រទេសអភិវឌ្ឍដទៃទៀតបានសម្រាប់ដឹកនាំប្រទេសកម្ពុជាទៅមុខ៕
Article by SRIN SOKMEAN