Sovrin
Sovrin
អ្នកប្រហែលជាធ្លាប់បានប្រទះឃើញគំនូរលើជញ្ជាំងតាមដងផ្លូវមួយចំនួនតួយ៉ាងដូចជានៅក្បែរ សាកលវិទ្យាល័យបញ្ញាសាស្រ្តកម្ពុជា ខាងក្រោយស្ថានទូតបារាំង និងមួយចំនួនទៀតនៅក្នុងប្លុកខ្លះនៅកណ្តាលរាជធានីភ្នំពេញដែលគូរដោយក្រុមសិល្បករដែលចូលចិត្តនិងស្រលាញ់វិស័យគំនូរលើជញ្ជាំង(Graffiti)នេះ។ ក្នុងនោះផងដែរ សូសុទ្ធ សុវណ្ណគង់ ឬ នាមក្នុងវិស័យសិល្បៈហៅថា KWN23 គឺជាសិល្បករវ័យក្មេងមួយរូបដ៏មានទេពកោសល្យនិងភាពប៉ិនប្រសប់ក្នុងវិស័យគំនូរ Graffiti តាំងតែពីកុមារភាពមកម្ល៉េះ។
ជំនួបជាមួយនឹងសូវរីន KWN23 បានប្រាប់ថា “នៅពេលដែលខ្ញុំឃើញជញ្ជាំង ខ្ញុំតែងតែឃើញមានរូបអ្វីម្យ៉ាងនៅក្នុងជញ្ជាំងនោះ ហើយខ្ញុំក៏ចង់ចាប់ផ្តើមគូរវាតែម្តង”។ ក្នុងវ័យត្រឹមម្ភៃឆ្នាំ KWN23 បានបង្កើតស្នាដៃជាច្រើនរហូតបានជាប់ជាបេក្ខជនមួយរូបក្នុងចំណោមបេក្ខជន ៧ រូបដែលគណៈកម្មការនៃកម្មវិធីតាំងពិពរណ៍ជំនាន់នៃភាពច្នៃប្រឌិតឆ្នាំ ២០១៨ បានជ្រើសរើសដើម្បីដាក់តាំងបង្ហាញស្នាដៃនៅចាវ៉ាកាហ្វេសាខាទួលគោកកាលពីពេលថ្មីៗនេះ។ ស្នាដៃរបស់ KWN23 ត្រូវបានគេប្រទះឃើញនៅតាមសំណង់អាគារចាស់ៗជាច្រើនកន្លែងដែលគេបានបោះបង់ចោល មិនត្រឹមតែនៅក្នុងរាជធានីភ្នំពេញនោះទេ KWN23 ក៏ធ្លាប់បានគូរនៅខេត្តកំពង់ចាម, សៀមរាប, កំពតនិងមួយចំនួនទៀតនៅព្រំដែនខ្មែរ ថៃនៃក្រុងប៉ោយប៉ែតផងដែរ។ គំនូររបស់ kwn23 ភាគច្រើនគឺសុទ្ធសឹងពាក់ពន្ធ័ជាមួយនឹងអក្សរច្នៃគូរចេញជាសិល្បៈនៃអក្សរក្បាច់ដែលបង្កើតបានជាផ្ទាំងទស្សនីយភាពមួយគួរឲ្យចាប់អារម្មណ៍ផងដែរ។ និយាយពីប្រវត្តិរបស់សិល្បករវ័យក្មេងដែលគូររូបយ៉ាងអាថ៍កំបាំងនៅតាមអាគារចាស់ៗនេះវិញដែលប្រសូតនៅខេត្តបន្ទាយមានជ័យនិងធំដឹងក្តីនៅរាជធានីភ្នំពេញ។ KWN 23 ចាប់ផ្តើមស្រលាញ់សិល្បៈគំនូរនេះតាំងតែក្មេង ដែលលោកបានចូលចិត្តគូររូបតាំងតែសិក្សានៅថ្នាក់វិទ្យាល័យមកម្ល៉េះ។ កាលនោះ សុវណ្ណគង់ តែងតែឆ្លាក់ឈ្មោះឲ្យមិត្តភក្តិចេញជាអក្សរក្បាច់ និងគូររូបគំនូរដែលច្នៃពីអក្សរនៅលើគម្របសៀវភៅ សុវណ្ណគង់ ចូលចិត្តគូររូបសត្វនិងមនុស្សជាញឹកញាប់។ បន្ទាប់ពីបានស្គាល់សិល្បករបរទេសមួយចំនួនរួចមក សុវណ្ណគង់ឬ KWN23 ក៏ចាប់ផ្តើមចាប់ចិត្តស្រលាញ់គំនូរ Graffiti រហូតមកដល់សព្វថ្ងៃ។ “សម្រាប់ខ្ញុំ Graffiti គឺជាសិល្បៈម្យ៉ាងដែលនាំមនុស្សឲ្យបានជួបគ្នា ជាមួយនឹងការស្រលាញ់សាមគ្គីនិងការចែករំលែក” សូសុទ្ធ សុវណ្ណគង់ (KWN23) បានពោល។ សព្វថ្ងៃ kwn23 គឺជានិស្សិតដែលកំពុងសិក្សារផ្នែកសំណង់ស៊ីវិល ឆ្នាំទី២ ហើយក៏ជាសិល្បករវ័យក្មេងមួយរូបដ៏ល្បីឈ្មោះក្នុងវិស័យគំនូរលើជញ្ជាំងនេះផងដែរ។ ជាងនេះទៅទៀត គំនូររបស់ KWN23 គឺសុទ្ធសឹងតែគូរឡើង ដោយបង្កប់នូវអត្ថន័យនិងយកចិត្តទុកដាក់ជាទីបំផុត។ KWN23 បានប្រាប់ថា៖ “ខ្ញុំចង់ឲ្យអ្នកមើលរូបរបស់ខ្ញុំមានអារម្មណ៍ថាបានឃើញនូវអ្វីម្យ៉ាង ខ្ញុំចង់ឲ្យគេមើលឃើញទាក់ទងជាមួយនឹងវិញ្ញាណរបស់គេ ឲ្យគេចូលអារម្មណ៍ជាមួយនឹងរូបគំនូរដែលខ្ញុំបានគូរ”។ KWN23 បន្ថែម៖ “គំនូរខ្ញុំភាគច្រើនគឺមិនបានត្រៀមទុកមុននោះឡើយ នៅពេលដែលខ្ញុំឃើញជញ្ជាំងភ្លាម ខ្ញុំក៏ចាប់ផ្តើមគូរតែម្តង”។ ទោះបីជាយ៉ាងណាក៏ដោយនៅក្នុងសង្គមកម្ពុជាហាក់ពុំទាន់យល់និងឲ្យតម្លៃទៅលើសិល្បៈនៃគំនូរលើជញ្ជាំងនេះនៅឡើយ។ ដូច្នេះហើយទើបធ្វើឲ្យ KWN23 និងសិល្បករដទៃទៀតហាក់ពិបាកក្នុងការគូរជាសាធារណៈដោយហេតុតែខ្លាចអាជ្ញាធរមិនអនុញ្ញាត និងមានពេលខ្លះក៏ត្រូវសុំការអនុញ្ញាតពីសំណាក់ម្ចាស់ផ្ទះនិងម្ចាស់សំណង់ថែមទៀតផង៕
Images courtesy: KWN23
Article by KEO SONG
