Sovrin
Sovrin
រយៈពេល ដប់មួយថ្ងៃ ដោយគិតចាប់តាំងពីថ្ងៃបើកកម្មវិធីប្រកួតកីឡាជាតិ ដំបូងនៅថ្ងៃទី ២៥ ខែឧសភា រហូតដល់ថ្ងៃទី ០៤ ខែមិថុនាឆ្នាំ ២០១៨ កីឡាជាតិលើកទីពីរបានប្រព្រឹត្តទៅយ៉ាងរលូនជាមួយនឹងប្រភេទកីឡាចំនួនរហូត ២៧ ប្រភេទ ស្មើនឹង ២៧៤ វិញ្ញាសា។ ក្នុងកម្មវិធីបិទបញ្ចប់កីឡាជាតិលើកទីពីរកាលពីល្ងាចថ្ងៃទី ០៤ ខែមិថុនា ឆ្នាំ ២០១៨ នេះក៏មានការចូលរួមជាកិត្តិយសពីសម្តេចអគ្គមហាសេនាបតីតេជោ ហ៊ុនសែន និងអ្នកមុខអ្នកការជាច្រើនរូបនៅឯពហុកីឡាដ្ឋានជាតិអូឡាំពិកផងដែរ ។ អស់រយៈពេលដប់មួយថ្ងៃនេះមានការចូលរួមពីសំណាក់កីឡាករដែលមកពីទូទាំងប្រទេសចូលរួមយ៉ាងច្រើនកុះករដែលមានការប្រកួតប្រជែងគ្នាយ៉ាងស្វិតស្វាញស្វាហាប់ នៅតាមកីឡដ្ឋាននានាទូទាំងប្រទេសដែលក្នុងនោះរួមមាន៖ ពហុកីឡដ្ឋានជាតិអូឡាំពិក ពហុកីឡដ្ឋានមរតកតេជោ មជ្ឈមណ្ឌលកីឡាកម្ពុជា-ជប៉ុន ក្លឹបកីឡា៩១១ បឹងសំរឹទ្ធខេត្តកំពង់ធំ មជ្ឈមណ្ឌលបាទី វិទ្យាស្ថានអប់រំកាយនិងកីឡា សាកលវិទ្យាល័យភូមិន្ទភ្នំពេញ ក៏ដូចជាឆ្នេរកែបផងដែរ។
បើយោងតាមរបាយការណ៍សង្ខេបរបស់ឯកឧត្តមបណ្ឌិត ហង់ជួនណារ៉ុន ស្តីអំពីលទ្ធផលនៃការប្រកួតកីឡាជាតិលើកទីពីរដែលបានចេញផ្សាយនៅព្រឹកមិញនេះបានបង្ហាញថាចាប់តាំងពីថ្ងៃទី ២៥ ខែឧសភា ដល់ថ្ងៃទី ៤ ខែមិថុនា ឆ្នាំ ២០១៨ មានការចូលរួមពីប្រតិភូកីឡារាជធានី-ខេត្ត ទាំង២៥ ក្រសួងមហាផ្ទៃ ក្រសួងការពារជាតិ និងក្រសួងសេដ្ឋកិច្ច និងហិរញ្ញវត្ថុ និងមានកីឡាករ កីឡាការិនី មន្ត្រីដឹកនាំ និងគ្រូបង្វឹក អ្នកចូលរួមសរុប ៤១៦៣ នាក់ និងមានមេដាយសរុបចំនួន ៨៨៥ ក្នុងនោះមេដាយមាសចំនួន ២៦៤ មេដាយប្រាក់២៦៤ និង មេដាយសំរឹទ្ធចំនួន ៣៥៧។ ដោយឡែកចំណាត់ថ្នាក់លេខមួយក្នុងការប្រកួតកីឡាជាតិលើកទីពីរនេះបានទៅលើ ក្រសួងមហាផ្ទៃដែលបានទទួលមេដាយសរុបចំនួន ១៤៩ ក្នុងនោះមេដាយមាស៨៣ មេដាយប្រាក់៤៣ និង មេដាយសំរឹទ្ធិ ២៣។ ចំណាត់ថ្នាក់លេខពីរបានទៅរាជធានីភ្នំពេញដែលទទួលបានមេដាយសរុបចំនួន ១២៤ ក្នុងនោះមេដាយមាស៤២ មេដាយប្រាក់៣៦ និងមេដាយសំរឹទ្ធ ៤៦។ ចំណាត់ថ្នាក់លេខបី បានទៅក្រសួងការពារជាតិទទួលបានមេដាយសរុបចំនួន ៦៧ ក្នុងនោះមេដាយមាស៣៣ មេដាយប្រាក់១៨ និងមេដាយសំរឹទ្ធ១៦។ លេខបួនបានទៅលើ ខេត្តកណ្តាលដែលទទួលបានមេដាយសរុបចំនួន៧៨ ក្នុងនោះមេដាយមាស១២ មេដាយប្រាក់២៣ និងមេដាយសំរឹទ្ធ៤៣។ ចំណែកឯចំណាត់ថ្នាក់លេខប្រាំបានទៅលើ ខេត្តព្រៃវែងដែលទទួលបានមេដាយសរុបចំនួន ៤៣ ក្នុងនោះមេដាយមាសចំនួន ១០ មេដាយប្រាក់ ១៦ និងមេដាយសំរឹទ្ធ១៧។
សូមគូសបញ្ជាក់ផងដែរ កីឡាជាតិនេះបានរៀបចំឡើងដោយក្រសួងអប់រំយុវជននិងកីឡា រួមសហការជាមួយគណៈកម្មាជាតិអូឡាំពិកកម្ពុជា ក្នុងរយៈពេលពីរឆ្នាំម្តងក្នុងគោលបំណងដើម្បីកម្ពុជាបានត្រៀមខ្លួនទុកជាមុនក្នុងការចូលរួមក្នុងព្រឹត្តិការណ៏ស៊ីហ្គេមអន្តរជាតិ ដែលនឹងរៀបចំឡើងនៅកម្ពុជាក្នុងឆ្នាំ ២០២៣ ខាងមុខ។ បើយោងតាម ឧត្តមសេនីយឯក តែមម៉ឺន នាយកមជ្ឈមណ្ឌលកីឡាកងយោធពលខេមរៈភូមិន្ទ និងជាប្រធានសហព័ន្ធប្រដាល់គុនខ្មែរ ថ្លែងក្នុងកម្មវិធីបិទបញ្ចប់ប្រភេទកីឡាប្រដាល់គុនខ្មែរកាលពីព្រឹកថ្ងៃទី ០៤ ខែមិថុនា នៅពហុកីឡដ្ឋានមរតកតេជោ បានមានប្រសាសន៍ថា កម្ពុជានឹងប្រារព្ធធ្វើកម្មវិធីកីឡាជាតិលើកទី ៣ នៅឆ្នាំ ២០២០ និង កីឡាជាតិលើកទី៤ ឆ្នាំ ២០២២ ផងដែរ៕
Article by KEO SONG
