រឿងភាគទូរទស្សន៍ដែលផលិតចេញពីសៀវភៅប្រលោមលោករបស់ម៉ានិត បេសកកម្មមួយនឹងចាក់បញ្ចាំងនៅថ្ងៃទី០២ ខែកក្កដា
NEWS 6 years ago ក្រោយពីរង់ចាំប្រហែល២ឆ្នាំ រឿងភាគទូរទស្សន៍ដែលផលិតចេញពីសៀវភៅប្រលោមលោកដ៏ល្បីល្បាញរបស់ ម៉ានិត, បេសកកម្មមួយ បានប្រកាសថ្ងៃចាក់បញ្ចាំងជាផ្លូវការហើយ កាលពីល្ងាចថ្ងៃសុក្រទី២២នេះ នៅរោងភាពយន្ត Major Cineplex ផ្សារទំនើបអ៊ីអន១។ រឿងភាគទូរទស្សន៍ដែលមាន៣៥ភាគនេះ សហការផលិតដោយ ផលិតកម្ម Studio 4 និងស្ថានីយ៍ទូរទស្សន៍ My TV.
នៅក្នុងពិធីសម្ពោធនោះ មានការចូលរួមពីផលិតករ អ្នកនិពន្ធ អ្នកដឹកនាំភាពយន្ត តួសម្តែង និងក្រុមការងារផលិតទាំងអស់របស់រឿងភាគវាយប្រហារបែបយុវវ័យនេះ។
លោក ហ៊ត់ រ៉ាវី ដែលជាអ្នកដឹកនាំរឿង អ្នកតម្លើងរូបភាព និងសំឡេង និងជាអ្នកនិពន្ធអត្ថបទភាពយន្តម្នាក់ក្នុងចំណោម៤នាក់ បាននិយាយថា «ខ្ញុំជឿជាក់លើរឿងភាគទូរទស្សន៍ថ្មីមួយនេះនឹងនាំអារម្មណ៍ទស្សនិកជនកម្ពុជាទៅកាន់ពិភពថ្មីដែលជានិយមន័យរបស់រឿងភាគទូរទស្សន៍ព្រោះគ្រប់ផ្នែករបស់រឿងភាគនេះ ក្រុមផលិតបានយកចិត្តទុកដាក់ និងសម្រិតសម្រាំងគុណភាពខ្លាំងបំផុត តាមដែលអាចធ្វើទៅបាន មិនថាអត្ថបទភាពយន្ត ទីកន្លែង តួសម្តែង និងបច្ចេកទេសតម្លើងរូបភាព និងសំឡេង នោះឡើយ។ លើសពីនេះទៀត ដោយវាគឺជារឿងភាគបែបវាយប្រហារ ស៊ើបអង្កេត និងស្នេហាបែបយុវវ័យ តួសម្តែងភាគច្រើនសុទ្ធតែទទួលបានការហ្វឹកហាត់របៀបវាយតប់ពីអ្នកជំនាញយ៉ាងច្បាស់លាស់។ ក្រៅពីនោះទៀត ទេពកោសល្យសម្តែង និងរូបសម្បត្តិរបស់ពួកគាត់នឹងធ្វើឱ្យទស្សនិកជនលាន់មាត់ថា តួសម្តែងថ្មីៗទាំងនេះពិតជាសក្តិសមសម្រាប់ប្រលោមលោកមួយនេះមែន។»
រឿងភាគ បេសកកម្មមួយ នឹងបញ្ចាំងលើកញ្ចក់ទូរទស្សន៍ My TV នៅថ្ងៃទី០២ ខែកក្កដា ចាប់ពីថ្ងៃច័ន្ទដល់ថ្ងៃព្រហស្បត្តិ៍ វេលាម៉ោង០៧យប់តទៅ។ រឿងនេះនិពន្ធអត្ថបទភាពយន្តដោយ លោក ហ៊ត់ រ៉ាវី កញ្ញា ចាន់ ស៊ីណេត លោក ប៊ុន ចាន់ពិសី និងលោក ម៉ុង ម៉ានិត ដោយពឹងផ្អែកទាំងស្រុងទៅលើសៀវភៅប្រលោមលោក បេសកកម្មមួយ។
នៅឆ្ងាយពីឆាកបន្តិច កញ្ញា ចាន់ ស៊ីណេត ដែលជាអ្នកនិពន្ធស្រ្តីម្នាក់ក្នុងរឿងភាគនេះបាននិយាយថា «ឈុតដែលខ្ញុំស្រឡាញ់បំផុតគឺពេលឆាម និងម៉ូកា ឈ្លោះគ្នា ហើយបន្ទាប់មកយល់ច្រឡំលើគ្នា។ ពេលនោះ ឆាមបានកុហកម៉ូកាថា ខ្លួនមិនដឹងពីគម្រោងអាវុធនុយក្លេអ៊ែរទេ តែតាមពិត គេបានដឹងពីរឿងនេះ។» ចំណែកលោក ប៊ុន ចាន់ពិសី វិញ បានលើកឡើងពីឈុតដែលលំបាកសរសេរជាងគេថា «ឈុតដែលពិបាកសរសេរជាងគេគឺ ឈុតដែលតួស្រីបាត់បង់ការទុកចិត្តពីតួប្រុស។ វាគឺជាឈុតមួយដែលនិយាយពីចិត្តសាស្ត្ររបស់មនុស្ស។ ខ្លួនឯងជជែកជាមួយចិត្តខ្លួនឯង លើចិត្តពីរដែលខ្វែងគ្នា។ ពេលនោះអាណិតតួស្រីខ្លាំងណាស់!»
ចំណែកឯ ម៉ានិតពោលដោយស្នាមញញឹមជានិច្ច ម៉ានិតថា «នៅថ្ងៃទី២ ខែកក្កដា ខ្ញុំនឹងអង្គុយមុខទូរទស្សន៍ ចាំមើលរឿងភាគនោះ តើពេលផលិតចេញជារូបភាពនឹងមានលក្ខណៈពិសេសអ្វីខ្លះ?»
ត្រឡប់ក្រោយបន្តិច ក្រោយពេលប្រលោមលោក បេសកកម្មមួយ ចេញលក់ ម៉ានិត បានដាក់ពាក្យធ្វើការជាអ្នកនិពន្ធអត្ថបទនៅផលិតកម្ម Studio 4 ដើម្បីទទួលបានចំណេះដឹងបន្ថែមទាក់ទងនឹងការសរសេរភាពយន្ត តែរឿងនឹកស្មានមិនដល់ Studio 4 បានជ្រើសរើសទាំងម៉ានិត និងប្រលោមលោករបស់គាត់ដើម្បីផលិតជាភាពយន្តតែម្តង។ ពោលដោយរំភើប ម៉ានិតថា «សុបិន្តថ្មីរបស់ខ្លួនកាន់តែបង្ហាញខ្លួនយ៉ាងច្បាស់លើវិថីសិល្បៈនេះហើយ។»
រឿងភាគ បេសកកម្មមួយ ក៏បានបញ្ចូលបទចម្រៀង០២បទដែលជាស្នាដៃនិពន្ធរបស់ម៉ានិតផងដែរ។ បទទី១ មានចំណងជើងថា ក្តីសុខតិចៗ ច្រៀងដោយម៉ានិត និងបទទី២ បងជាអ្នកណា ច្រៀងដោយ កញ្ញា ឆដា។
សូមបញ្ជាក់ថា សៀវភៅប្រលោមលោក បេសកកម្មមួយ គឺជាប្រលោមលោកដំបូងបំផុតរបស់ម៉ានិត។ គួរជាទីរីករាយបំផុត បេសកកម្មមួយបានក្លាយទៅជាសៀវភៅប្រលោមលោកខ្មែរបែបយុវវ័យថ្មីមួយដែលមានភាពល្បីល្បាញខ្លាំងក្នុងស្រទាប់យុវវ័យ និងត្រូវបានផលិតទៅជារឿងភាគទូរទស្សន៍។ រហូតមកដល់ពេលនេះ ម៉ានិត និពន្ធសៀវភៅប្រលោមលោកបានចំនួន៤ ចំណងជើង។ ប្រលោមលោកចុងក្រោយបំផុតរបស់គាត់គឺ ស្តេចម៉ែស្តេចកូន ហើយឆាប់ៗខាងមុខនេះ ម៉ានិតក៏ត្រៀមនឹងបញ្ចេញស្នាដៃថ្មីរបស់គាត់ជាបន្តបន្ទាប់ចំនួន២ចំណងជើងទៀតផងដែរ។ តើប្រលោមលោកណាទៀតដែលនឹងត្រូវបានផលិតចេញជាភាពយន្តបន្ត?
Article by SVAY LEEMENG