Sovrin
Sovrin
«អ្នកត្បាញក្រមាពិបាកណាស់ទម្រាំធ្វើបានក្រមាមួយ ដូច្នេះយើងត្រូវឲ្យតម្លៃខ្ពស់បន្តិច»
លោកអ្នកប្រាកដជាបានឃើញឈុតសម្លៀកបំពាក់ប្រចាំថ្ងៃ និងឈុតសម្រាប់កម្មវិធីជាច្រើនដែលមានក្រមាជាវត្ថុធាតុដើមចម្បងសម្រាប់ការច្នៃម៉ូដរួចមកហើយ។ ពិសេសនៅក្នុងការដើរបង្ហាញម៉ូដ នៃកម្មវិធីបំបែកឯកត្តៈកម្មក្រមាវែងជាងគេលើពិភពលោក ដែលប្រទេសកម្ពុជាទើបបំបែកកំណត់ត្រាកាលពីពេលថ្មីៗនេះ ក៏មានឃើញឈុតសម្លៀកបំពាក់ច្នៃពីក្រមាជាច្រើនឈុត បានយកមកបង្ហាញនៅលើវេទិកានេះផងដែរ។ ទន្ទឹមនឹងភាពស្រស់ស្អាតនៃឈុតទាំងនេះ យើងប្រាកដជាចង់ដឹងថា តើនរណាជាអ្នកនៅពីក្រោយឈុតក្រមាដ៏ស្រស់ស្អាតទាំងនោះ?
មានវ័យទើបតែ ២៣ឆ្នាំ កញ្ញា ឈុន ម៉ាលៀង គឺជាអ្នកច្នៃម៉ូដនិងជាអ្នកកាត់ដេរសម្លៀកបំពាក់២៣ម៉ូដ សម្រាប់ការបង្ហាញម៉ូដនៃកាលបំបែកកំណត់ត្រាពិភពលោកនៃក្រមាវែងជាងគេ កាលពីសប្តាហ៍មុន។ ជួបជាមួយ សូវរីន ដោយទឹកមុខស្វាហាប់ អ្នកច្នៃម៉ូដវ័យក្មេងរូបនេះបានឲ្យដឹងថា ការនាំក្រមាឲ្យប្រជាជនខ្មែរមានការគាំទ្រ ក៏ដូចជានាំឲ្យពិភពលោកបានស្គាល់ គឺជាភាពជោគជ័យមួយដែលកញ្ញាបានរំពឹងទុកយូរមកហើយ។ កញ្ញានិយាយថា «តាមពិតទៅខ្ញុំប៉ងទុកថាចង់មានកម្មវិធីថ្នាក់ជាតិមួយដែលជំរុញឲ្យប្រជាជនខ្មែរទទួលស្គាល់ក្រមា ប៉ុន្តែខ្ញុំមិននឹកស្មានដល់ថានឹងអាចបំបែកឯកត្តៈកម្មនោះទេ នេះលើសអ្វីដែលខ្ញុំប៉ងទៅទៀត។»
កញ្ញា ឈុន ម៉ាលៀង
ចំណាយពេល ត្រឹមតែ២សប្តាហ៍ប៉ុណ្ណោះ សម្រាប់ច្នៃម៉ូដនិងកាត់ដេរឈុតចំនួន ២៣ អ្នកច្នៃម៉ូដដែលបញ្ចប់ការសិក្សាថ្នាក់បរិញ្ញាប័ត្រផ្នែក Interior Design ឬ ដេគ័រ នៃសាកលវិទ្យាល័យភូមិន្ទវិចិត្រសិល្បៈ បានបន្តទៀតថា ដោយឡែកការច្នៃម៉ូដ គឺមានម៉ូដខ្លះមានការគ្រោងទុកពីមុនមក ហើយម៉ូដខ្លះទើបតែច្នៃភ្លាមៗ ប៉ុន្តែទោះយ៉ាងណាក្តី កញ្ញាត្រូវចំណាយពេល២សប្តាហ៍ពេញដើម្បីកាត់ដេរ និងយកមកបង្ហាញឲ្យទាន់ពេលវេលា។ នៅក្នុងយុទ្ធនាការក្រមា ១០០០ ម៉ែត្រ កញ្ញាម៉ាលៀង បានចូលរួមធ្វើការបង្ហាញម៉ូដសម្លៀកបំពាក់ពីក្រមា ចំនួន២ដងរួចមកហើយ នៅឯវាលព្រះមេរុ។ សរុបម៉ូដសម្លៀកបំពាក់ក្រមាដែលកញ្ញាបាន ច្នៃគឺមានដល់ទៅ ៥០ម៉ូដ ដែលសុទ្ធសឹងតែជាការចូលរួមដោយស្ម័គ្រចិត្ត ដើម្បីលើកកម្ពស់ផលិតផលក្រមា។
បេសកកម្មជំរុញសក្តានុពលក្រមា របស់អ្នកច្នៃម៉ូដរូបនេះចាប់ផ្តើមតាំងពីឆ្នាំ ២០១៤មកម្ល៉េះ។ កាលពី ៤ឆ្នាំមុន កញ្ញានិយាយថា៖ «កាលនោះខ្ញុំបានជិះទៅរកផ្ទះដែលមានត្បាញក្រមាលក់ ផ្ទះនោះនៅឆ្ងាយសឹងតែរកមិនឃើញ ហើយមានតែមួយផ្ទះប៉ុណ្ណោះដែលមានត្បាញក្រមាលក់។» ចំណាយពេលជាច្រើនឆ្នាំ កញ្ញាម៉ាលៀង តែងចូលរួមជាច្រើនកម្មវិធីក្នុងនាមជាអ្នកច្នៃម៉ូដ ក៏ដូចជាទទួលកាត់សម្លៀកបំពាក់និងច្នៃម៉ូដពីក្រមា ដើម្បីជំរុញការផលិតក្រមាឲ្យបានច្រើន។ ការខិតខំរបស់ ម៉ាលៀង កំពុងទទួលជោគជ័យខ្លាំងដោយបច្ចុប្បន្ន តម្លៃក្រមាខ្មែរកំពុងហក់ឡើងជាងមុន ដែលធ្វើឲ្យជីវភាពអ្នកតម្បាញមានភាពល្អប្រសើរជាងមុនមួយកម្រិត។ «ពេលនេះតម្លៃក្រមាឡើងថ្លៃជាងមុនបន្តិចហើយ មានគេបន្ទោសខ្ញុំថា ឃើញទេ ខំប្រឹងផ្សាយពីក្រមាទាល់តែក្រមាឡើងថ្លៃ» កញ្ញាសើចបន្តិច មុននឹងបន្តថា «មែនហើយ ព្រោះការខិតខំរបស់ខ្ញុំ គឺចង់ឲ្យក្រមាឡើងថ្លៃ ព្រោះអ្នកត្បាញក្រមាពិបាកណាស់ទម្រាំធ្វើបានក្រមាមួយ ដូច្នេះយើងត្រូវឲ្យតម្លៃខ្ពស់បន្តិច»។
Image Courtesy: MALEANG
បច្ចុប្បន្ននេះ សិប្បកម្មត្បាញក្រមាមានការរីកចម្រើនជាងមុន ដោយនៅតាមផ្ទះនីមួយៗមានកីតម្បាញច្រើនជាងមុន រហូតដល់ ៣០ទៅ៤០កីក្នុងមួយផ្ទះ រីឯចំនួនអ្នកត្បាញក្រមាក៏កើនឡើងច្រើនជាងមុនផងដែរ។ កញ្ញាម៉ាលៀង សង្កេតឃើញថា បច្ចេកទេសនៃការត្បាញក្រមាទៀតសោត ក៏មានការច្នៃប្រឌិតគួរឲ្យកត់សម្កាល់ ដែលអាចច្នៃពណ៌និងគោមក្រមាឲ្យមានភាពស៊ីវីល័យតាមទាន់នឹងសម័យកាលនិងតម្រូវការរបស់អតិថិជន។ «សម្រាប់ខ្ញុំ ខ្ញុំចង់ឲ្យមានអ្នកច្នៃម៉ូដពីក្រមាច្រើន ហើយនាំយកម៉ូដទៅក្រៅប្រទេស ពិសេសគឺការបោះទីផ្សារទៅក្រៅប្រទេស នោះគុណភាពក្រមាកាន់តែកើនឡើង ហើយតម្លៃក៏កើនឡើងតាមគុណភាពផងដែរ» ឈុន ម៉ាលៀងនិយាយ។ ខណៈដែលក្រមាដែលត្បាញដោយម៉ាស៊ីនស្វ័យប្រវត្តិ កំពុងមានសន្ទុះនៅលើទីផ្សារ កញ្ញាម៉ាលៀងកំពុងយកចិត្តទុកដាក់ លើការលើកកម្ពស់ការផលិតក្រមាដោយដៃ ប៉ុន្តែផ្តោតទៅលើប្រភេទក្រមាសូត្រវិញម្ដង។ «ក្រមាសូត្រមានតម្លៃថ្លៃ ហើយមានគុណភាពខ្ពស់ ពិសេសគឺសាច់ក្រមាស្អាតខុសគ្នាដាច់ពីក្រមាត្បាញដោយម៉ាស៊ីន ព្រោះវា ហាប់ ស្មើ និងរលោង។ ដោយសារការត្បាញក្រមាដោយដៃមានការលំបាក ដូច្នេះបើជំរុញឲ្យអ្នកត្បាញដែលត្បាញដោយដៃ ងាកមកត្បាញក្រមាសូត្រវិញ នោះពួកគាត់នឹងអាចរកចំណូលបានច្រើនដូចគ្នា ហើយងាយស្រួលនាំចេញទៅក្រៅប្រទេស»។ បន្ថែមពីនេះ កញ្ញាម៉ាលៀងក៏កំពុងសិក្សាពីការផលិតកីតម្បាញ ដែលអាចផលិតក្រមាបានត្រឹមតែទទឹងប្រវែង ៨០សង់ទីម៉ែត្រ ទៅជាកីដែលអាចត្បាញក្រមាដែលមានទទឹងប្រវែង ១៥០សង់ទីម៉ែត្រ ដើម្បីស្របតាមស្តង់ដារ ងាយយកមកប្រើប្រាស់ក្នុងការច្នៃម៉ូដសម្លៀកបំពាក់ និងសម្ភារៈផ្សេងៗ៕
Article by VA SONYKA
