សម្រាប់ការបើកទំព័រថ្មីនៃផលិតផលជាស្នាដៃខ្មែរ ធ្វើដោយដៃ នេះ Sovrin ក៏សូមណែនាំមិត្តអ្នកអានទាំងអស់មកស្គាល់ពីគំនិតច្នៃប្រឌិតខ្ពស់របស់ខ្មែរមួយ និងដំបូងគេ ដែលទើបតែលេចមុខមាត់ថ្មីនៅក្នុងទីផ្សារមុខជំនួញនោះ គឺការច្នៃយកអំបោះទៅចាក់ចេញ ជាវត្ថុប្រើប្រាស់ផ្សេងៗទៀតផង ។ គ្រាន់តែឈានជើងមកដល់ខាងមុខហាង រតនាខ្មែរអំបោះចាក់ ភ្លាមមានអារម្មណ៍ថារាល់វត្ថុដែលដាក់តាំងនៅក្នុងហាងបង្កប់ទៅដោយក្ដីស្រឡាញ់យ៉ាងផ្អែមល្ហែម ធ្វើឱ្យស្រស់ថ្លាអារម្មណ៍មួយបែបពិបាកនឹងពណ៍នាក៏ព្រោះពណ៌ចម្រុះនៃម៉ូដផ្កា តុក្កតា និងសម្ភារៈប្រើប្រាស់មួយចំនួនទៀតបានជះឥទ្ធិពលឆក់បេះដូងភ្ញៀវដែលបានដើរកាត់ទីតាំងនោះឱ្យឈប់គយគន់មិនជិនណាយ។
អ្នកនាង រតនា បានរំលឹកឡើងវិញថា “ខ្ញុំ មិនដែលមានគំនិតថាយកការចាក់អំបោះទៅជាវត្ថុប្រើប្រាស់ផ្សេងៗនេះធ្វើអាជីវកម្មនោះទេ រហូតដល់ថ្ងៃមួយកាលពី៥ឆ្នាំមុន ដោយសារតែខ្ញុំជាអាជីវករលក់សម្លៀកបំពាក់កុមារនៅផ្សារធំថ្មីស្រាប់ផងនោះ ខ្ញុំក៏នឹកឃើញថាចង់សាកល្បងយកវត្ថុដែលចាក់ដោយដៃ មកសាកល្បងដាក់លក់ដែលកាលនោះមានដូចជា ស្បែកជើង មួក រ៉ូប របស់កុមារតូចៗជាដើម។ បន្ទាប់ពីការសាកល្បងលក់ក្នុងរយៈពេល៥ឆ្នាំមកនេះខ្ញុំក៏ទទួលបានសន្ទុះនៃការគាំទ្រយ៉ាងច្រើន។ បន្ទាប់មក ក៏ចាប់ផ្ដើមរកទីតាំងមួយសមរម្យដែលអាចឱ្យអតិថិជនងាយស្រួលក្នុងការទស្សនាផលិតផលដែលចាក់ពីអំបោះផ្ទាល់ដៃផងដែរ”។
ដោយសារតែ ទទួលបានការកម្មុង់ច្រើនពីអតិថិជន ទើបអ្នកនាងសម្រេចចិត្តបើកជាហាងធំនៅក្នុងផ្សារសូរិយាតែម្តង ដែលក្នុងនោះ អ្នកនាងមានទទួលចាក់ជារូបតុក្កតាផ្សេង របស់ប្រើប្រាស់មួយចំនួនសម្រាប់ កូនក្មេង ដូចជា ស្បែកជើង មួក កន្ត្រកផ្កា ហើយសុទ្ធសឹងតែផ្តើមចេញពីការយកចិត្តទុកដាក់ធ្វើដោយដៃយ៉ាងចំណានផងដែរ។ មួយវិញទៀតសោត អ្វីដែលគួរឱ្យចាប់អារម្មណ៍ខ្លាំងទៅលើផលិតផលអំបោះចាក់នេះ គឺរាល់សរសៃអំបោះដែលអ្នកនាងយកមកចាក់ សុទ្ធសឹងតែមានគុណភាព ល្អ មានការនាំចូលពីប្រទេស ថៃ កូរ៉េ ចិនជាដើម ហើយអ្នកនាងបានបែងចែកយ៉ាងច្បាស់លាស់ទៅលើការប្រើប្រាស់សរសៃអំបោះ ដូចជា សម្រាប់កូនក្មេង យើងប្រើប្រភេទដែល ទន់ មិនបង្កឱ្យមានការរមាស់លើស្បែកនោះឡើយ។ ក្នុងនោះដែរ អ្នកនាងបញ្ជាក់ទៀត ដែរថា នៅកម្ពុជា សម្រាប់ការបើកជាហាងទទួលសេវាកម្មចាក់អំបោះនេះ គឺជាលើកដំបូងគេ ព្រោះនៅប្រទេសជិតខាង ដូចជាប្រទេសថៃ គេមិនទាន់មាននៅឡើយទេ ដោយគេគ្រាន់តែ លក់ជាសរសៃអំបោះ ឧបករណ៍ចាក់ និងសៀវភៅគំរូតែប៉ុណ្ណោះ។ ដូចនេះហើយ ទើបអ្នកនាង គិតថា ចង់បង្កើតអ្វីដែលប្លែក ដោយមិនត្រឹមតែលក់អំបោះតែមួយមុខនោះទេ គឺថែមទាំងទទួលចាក់ចេញជារូប ឬវត្ថុទៅតាមការកុម្មង់របស់ភ្ញៀវទៀតផង។ បើទោះបីជា ផលិតផល អំបោះចាក់នេះ ធ្វើឡើងដោយដៃផ្ទាល់ក៏ពិតមែន ក៏ប៉ុន្តែវាមិនចំណាយពេលយូរពេកទេ គឺអាស្រ័យទៅទំហំនៃវត្ថុនោះ និងការប៉ិនប្រសប់ពីអ្នកធ្វើ ដូចជាការចាក់ចេញជាមួក រូបផ្កា និងរបស់ប្រើប្រាស់តូចៗផ្សេងទៀត គឺចំណាយពេលត្រឹមតែ ១ថ្ងៃតែជាការស្រេច។
ជាការពិតណាស់ នៅសម័យមុន ការងារចាក់អំបោះនេះ វាជាការងារផ្ទះរបស់មនុស្សស្រី ដែលមិនមែនជាលក្ខណៈធំដុំ ឬគ្រាន់តែបំបាក់ការអផ្សុកមួយ ប៉ុន្តែបើយើងសិក្សាមើលឱ្យច្បាស់ទៅ ការងារចាក់អំបោះនេះ អាចរកចំណូលបានច្រើន និងជាការងារមួយ ដែលទីផ្សារឱ្យតម្លៃខ្ពស់ជាផលិតផលចេញពីរោងចក្រទៀតផង។ ដូចនេះហើយ ទើបអ្នកនាង គិតថា ការបើកអាជីវកម្មមួយនេះ ពិតជាមិនខកបំណងឡើយ ដោយអ្នកនាង បានផ្តល់ឱកាស ការងារទៅដល់បងប្អូនស្រ្តីៗនៅតាមផ្ទះក្នុងការទទួលចាក់អំបោះនេះផងដែរ។ ក្នុងនោះដែរ អ្នកនាង រតនា ក៏ជាអ្នកចេញម៉ូដផ្ទាល់តែម្តង ហើយរាល់គំរូដែលត្រូវចាក់នោះ អ្នកនាង តែងតែ មើលពីតម្រូវការទាន់សម័យរបស់មនុស្ស។ ឆ្លៀតពេលសម្ភាសន៍ពីបទពិសោធន៍ និងសេវាកម្មក្នុងហាងនេះផ្ទាល់ អ្នកនាងរតនា ក៏បានបង្ហើបប្រាប់ប្រវត្តិរឿងរ៉ាវខ្លះៗ ទៅលើការបើកហាងចាក់អំបោះនេះអាចនិយាយបានថា ផ្តើមចេញពីចំណង់ចំណូលចិត្ត ភាពអំណត់ និងទេពកោសល្យដែលមានតាំងពីកំណើតទើបអាចធ្វើបានយ៉ាងល្អ ដោយអ្នកនាង ចេះចាក់រូបតាំងពីរៀននៅថ្នាក់ទី៥ មកម្ល៉េះ ហើយរហូតមកដល់រៀនចប់ថ្នាក់មហាវិទ្យាល័យគឺនៅតែបន្តស្រឡាញ់ការងារចាក់អំបោះនេះទៀត រហូតចុងក្រោយសម្រេចបើកជាហាងតែម្តង។ ជាមួយនឹងទឹកមុខស្រស់ស្រាយ អ្នកនាងបានរៀបរាប់ទាំងអស់សំណើចតិចៗទៀតថា បើទោះបីជាកាលនៅពីក្មេង គ្រួសារពុំទាន់មានលទ្ធភាពធូរធារ ហើយមិនសូវមានឧបករណ៍ចាក់ដូចជាសម័យនេះក៏ពិតមែន ប៉ុន្តែអ្នកនាងនៅតែជម្នះចិត្តធ្វើឱ្យបានដោយពេលខ្លះត្រូវយកធាងដូងមកជិតធ្វើជាម្ជុល និងរុះយកសរសៃអំបោះចេញពីអាវផ្ទាល់តែម្តងមកចាក់។ ដោយសារតែការតាំងចិត្ត និងព្យាយាម បែបនេះហើយ ទើបអ្នកនាងទទួលបានជោគជ័យលើមុខជំនួញមួយនេះ ហើយមិនត្រឹមតែប៉ុណ្ណោះ ថែមទាំងបានបង្ហាញឱ្យឃើញថា ខ្មែរមានគំនិតច្នៃប្រឌិតខ្ពស់ ហើយក្នុងនាមជាស្រ្តីម្នាក់ គឺមានសមត្ថភាពមិនចាញ់បុរសឡើយ។
ជាចុងក្រោយ អ្នកនាងបានសម្តែងនូវអារម្មណ៍រំភើបរីករាយជាពន់ពេក ដោយផលិតផលអំបោះចាក់របស់ខ្លួន ត្រូវបានគេស្គាល់កាន់តែច្រើន ហើយទទួលបានការគាំទ្រពីសំណាក់ភ្ញៀវ យកទៅប្រើប្រាស់ ដែលទាំងអស់នេះអាចនិយាយបានថា អាចជួយផ្តល់ការងារដល់ស្ត្រីៗដែលជាមេផ្ទះ ដើម្បីលើកកម្ពស់ការងារយេនឌើក្នុងសង្គមបានយ៉ាងល្អប្រសើរមួយកម្រិតទៀត៕
Article by HENG CHANMAKARA