Sovrin
Sovrin
សៀវភៅត្រូវបានចាត់ទុកជាចំណីដ៏ចាំបាច់សម្រាប់បំប៉នខួរក្បាល។ ដូច្នេះសៀវភៅរាប់លានចំណងជើងត្រូវបានផលិតទូទាំងពិភពលោក ក្នុងនោះក៏មានកម្ពុជាផងដែរ។ យើងនឹងនាំមិត្តអ្នកអានទៅដឹងពីគន្លឹះសំខាន់ៗបំផុតក្នុងការសរសេរ ដែលអ្នកនិពន្ធកម្ពុជាល្បីឈ្មោះ០៥រូប បានប្រើប្រាស់ក្នុងស្នាដៃរបស់ពួកគាត់។
ចាប់ផ្តើមពីអ្នកនិពន្ធរៀមច្បង យូ សុភា ឬអ្នកនិពន្ធដែលទទួលបានពានរង្វាន់ច្រើនជាងគេក្នុងជំនាន់គាត់។ អ្នកនិពន្ធមិនពូកែវោហាររូបនេះប្រាប់ថា «ទី១គឺត្រូវចេះស្តាប់ សង្កេត វិភាគ និងវិនិច្ឆ័យលើហេតុការណ៍ ដែលបានកើតឡើងនៅជុំវិញខ្លួនឱ្យបានសុក្រឹត ហើយទី២គឺគួរយកស្នាដៃដែលនិពន្ធបាន ប្រកួតប្រជែងក្នុងវេទិកានានាតាមដែលអាចធ្វើទៅបាន។ ធ្វើរបៀបនេះ គឺជាការវាស់ស្ទង់លើកម្រិតស្នាដៃរបស់ខ្លួនឯង។ បើមិនទទួលបានចំណាត់ថ្នាក់ល្អ មានន័យថា កម្រិតសរសេរយើង ត្រូវតែប្រឹងប្រែងបន្តទៀត តែបើទទួលបានចំណាត់ថ្នាក់ល្អ មានន័យថា យើងត្រូវតែបន្ថែមភាពច្នៃប្រឌិតថ្មីទៀត នៅក្នុងស្នាដៃបន្តរបស់យើង។» ស្នាដៃថ្មីបំផុតរបស់គាត់ គឺរឿងភាគទូរទស្សន៍ រាជិនីភូមិគ្រឹះ និងសៀវភៅប្រលោមលោកបុរាណ ប្រស្នាបីរាត្រី។
យូ សុភា
គឹម ឌីណា ម្ចាស់ប្រលោមលោក ភរិយាខ្ញុំអាយុ១៨ឆ្នាំ។ អ្នកនិពន្ធនារីដែលចូលចិត្តសរសេររឿងរ៉ាវស្នេហា Cute Cute ម្នាក់នេះបានប្រាប់ថា «ទី១ ត្រូវដឹងថា ខ្លួនឯងចូលចិត្តសរសេររឿងប្រភេទអ្វី? ទី២កុំខ្វល់ពីការរិះគន់ ដែលមានចេតនាបន្ទោសបង្អាប់ច្រើនពេក។ ទី៣គឺបង្កើនទំនាក់ទំនងល្អនឹងមនុស្សនៅជុំវិញខ្លួន (អ្នកគាំទ្រនិងអ្នកនិពន្ធគ្នាឯង)។ និងទី៤គឺកុំភ្លេចចូលរួមវេទិកាអប់រំផ្សេងៗឱ្យបានច្រើន។» ក្រៅពីទេពកោសល្យនិពន្ធ កញ្ញា គឹម ឌីណា ក៏អាចច្រៀង សម្តែង និងជាអ្នកសម្របសម្រួលកម្មវិធីអប់រំនានាដ៏ល្បីឈ្មោះម្នាក់ដែរ។ កញ្ញាក៏បានបង្ហើបពីប្រលោមលោកថ្មីដែលត្រៀមនឹងចេញឆ្នាំ២០១៨នេះ មានចំណងជើងថា បវរកញ្ញាសាកលវិទ្យាល័យ ផងដែរ។
គឹម ឌីណា
លោក សួង ម៉ាក ម្ចាស់ប្រលោមលោក ព្រិលធ្លាក់កណ្តាលសមុទ្រខ្សាច់ (រឿងរ៉ាវស្នេហាថ្នាក់វិទ្យាល័យប្រុសស្រឡាញ់ប្រុស)។ អ្នកនិពន្ធដែលធ្លាប់ចាញ់បោកសំណេររបស់អ្នកនិពន្ធ នាពេលអានសៀវភៅកាលពីវ័យកុមារម្នាក់នេះ បានប្រាប់ថា «ទី១គឺត្រូវអានឱ្យបានច្រើន។ ទី២គឺស្វែងរកអត្តសញ្ញាណខ្លួនឯង តើយើងជាស្មេរប្រភេទណា (ស្នេហា ខ្មោច រន្ធត់ ឬការលើកទឹកចិត្ត)? និងចុងក្រោយ ត្រូវហ្វឹកហាត់សរសេរជារៀងរាល់ថ្ងៃ។» ក្រៅពីការនិពន្ធប្រលោមលោក អតីតអ្នកសរសេរប្លុកដ៏ល្បី ម្នាក់នេះ ក៏ជាអ្នកវិភាគកុនម្នាក់ដ៏លេចធ្លោ លើ បណ្តាញសង្គមហ្វេសប៊ុក (អ្នកនិពន្ធវ័យក្មេង-Khmer Copywriter) ទៀតផង។
សួង ម៉ាក
ចំណែកឯកញ្ញា សែត ហត្ថា ហៅកូនចាបមាស ម្ចាស់ស្នាដៃ វិញ្ញាសារជីវិត ដែលជាប្រភេទសៀវភៅលើកទឹកចិត្តដ៏ល្បីមួយនៅខណៈពេលនេះ។ អ្នកនិពន្ធនារីដែលមានវោហារមិនចាញ់អ្នកសម្របសម្រួលប៉ុន្មានដែរនោះ បាននិយាយថា «គន្លឹះរបស់ខ្ញុំ ទី១គឺគន្លឹះរបស់លោកគ្រូ យូ សុភា។ ទី២គឺរបស់បង សួង ម៉ាក។ ទី៣គឺរបស់កញ្ញា គឹម ឌីណា និងទី៤គឺខ្ញុំខ្លួនឯង ដែលត្រូវចេះសង្កេតលើការវិវត្តរបស់ធម្មជាតិនិងរាងកាយ។ ជាក់ស្តែង ដូចជាដំបៅដែលខ្ញុំធ្លាប់មាន អ៊ីចឹង។» សែត ហត្ថា បានប្រកាសជាសាធារណៈថា កាដូជីវិត គឺជាចំណងជើងសៀវភៅលើកទឹកចិត្តទី២ ដែលកញ្ញានឹងបោះពុម្ពផ្សាយនាឆាប់ៗនេះ។
សែត ហត្ថា
ចុងបញ្ចប់នោះគឺ លោក សុខ ចាន់ផល អ្នកនិពន្ធពោរពេញទៅដោយមនោសញ្ចេតនាច្រើនជាងគេ នេះបើសង្កេតលើទំនុកច្រៀង និងស្នាដៃភាគច្រើនបំផុតដែលគាត់បានផលិត។ គាត់បានប្រាប់ថា គន្លឹះសរសេររបស់គាត់គឺត្រូវសរសេរនូវអ្វី ដែលយើងបានដឹងច្បាស់ ឬធ្លាប់ឆ្លងកាត់ ហើយសរសេរវាដោយប្រើអារម្មណ៍ឱ្យបានចូលទៅដល់បេះដូងនៃសាច់រឿងមួយនោះ។ ធ្វើបានប៉ុណ្ណឹងគ្រប់ស្នាដៃ អ្នកអាននឹងចងចាំនូវពាក្យចាក់ដោតទាំងនោះមិនខាន។ ថ្មីៗនេះ សង្សារ១៤ថ្ងៃ គឺជាចំណងជើងប្រលោមលោកប្រភេទស្នេហានិងការលើកទឹកចិត្ត ដែលលោក សុខ ចាន់ផល ទើបបានសម្ពោធកាលពីថ្ងៃទី១៤ខែកក្កដានេះ ហើយច្បាស់ណាស់ វាក៏កំពុងទទួលបានការគាំទ្រពីមិត្តអ្នកអានជាច្រើនផងដែរ។
សុខ ចាន់ផល
ក្រៅពីគន្លឹះផ្ទាល់ខ្លួនរបស់អ្នកនិពន្ធទាំង០៥ខាងលើ ចំណុចរួមដែលពួកគាត់មានដូចគ្នានោះគឺ និស្ស័យចូលចិត្តអានសៀវភៅ ឬមើលភាពយន្ត និងទេពកោសល្យបង្កើតសាច់រឿង ព្រមទាំងការប្តេជ្ញាចិត្តលើកិច្ចការតែងនិពន្ធទាំងនោះយ៉ាងយកចិត្តទុកដាក់បំផុត។
ដូចនេះ តើអ្នកធ្លាប់សរសេរកំណត់ហេតុខ្លួនឯងទេ? តើអ្នកធ្លាប់សរសេររឿងមួយមិនចប់ចុងចប់ដើមដែរឬទេ?
ដូច្នេះតោះចាប់ផ្តើមសរសេរ បើសិនអ្នកបានដឹងរឿងរ៉ាវអ្វីមួយ!
Article by SVAY LEEMENG
