×

«នំឃ្មោះ» នំ​ដែល​ល្បី​ខ្លាំង​នៅ​ឧដុង្គ​បាន​ទាំង​រូបរាង​ បាន​ទាំង​រសជាតិ​

TRAVEL & LIVING 6 years ago
 
 

          រមណីយដ្ឋាន​ភ្នំ​ព្រះរាជទ្រព្យ​ ដែល​ខ្មែរ​និយម​ហៅ​ជាទូទៅ​ថា ភ្នំឧដុង្គ​ ឬ ​ភ្នំអដ្ឋរស្ស​ នោះ​ បាន​ក្លាយ​ជា ជង្រុក​ចំណី​អាហារ​ខ្មែរ​ដ៏សំបូរ​បែប​ជាទី​ពេញ​និយម​បំផុត​របស់​ទេសចរ​លក្ខណៈ​គ្រួសារ​ និង មិត្តភក្តិ​ នៅថ្ងៃ ​ចុង​សប្តាហ៍​ និង ​ថ្ងៃឈប់​សម្រាក​ពេល​បុណ្យ​ទាន​ផ្សេងៗ​។ នៅទី​នោះ ប្រជា​ពលរដ្ឋ​ក្នុង​តំបន់​នាំគ្នា​ដាក់​តាំង ​លក់​ម្ហូប​អាំង​ បំពង​ចៀន​ ខ្យងក្តាម​ គ្រឿង​ជ្រក់ ជា​ពិសេស​នំ​ចំណី​ចំណុក​បែប​ខ្មែរ​យ៉ាង​ច្រើន​សន្ធឹក​សន្ធាប់​ ថ្មីៗ​ស្រស់ៗ​ដែល​ពិបាក​នឹង​រក​នៅ​កន្លែង​ដទៃ​ទៀត​។ ក្នុង​ចំណោម​នំខ្មែរ​ជា​ច្រើន​ដែល​ទេសចរ​ឃើញ​មាន​លក់​ នៅ​តំបន់​នោះ​ នំបង់​ខ្លាញ់​មួយ​ប្រភេទ​ដែល​មាន​ពណ៌​លឿង​ស្រស់​ជាប់​គ្នា​ជា​បន្ទះៗ​ស្រដៀង​បន្ទះ​កំពឹស​ចៀន​ គឺ​ជានំ​ដែល​មាន​ប្រជាប្រិយ​ភាព​កម្រ​នឹង​មាន​អ្នក​ទេសចរ​ណាម្នាក់​មើល​រំលង​ភ្នែក​ណាស់​ ព្រោះអ្នក​ធ្វើ​នំនេះ ​លក់​មាន​ចំនួន​ច្រើន​តូប​នៅ​ជើង​ភ្នំឧដុង្គ​ ហើយ​ម្យ៉ាង​ទៀត​គេធ្វើ​វាភ្លាមៗ​ក្តៅៗ​មិន​ច្រកថង់​ទុកយូរទេ​។

          អ្នកស្រី​ មុំ ឃី ​អាជីវករ​ធ្វើនំ​បង់ខ្លាញ់​លក់​ម្នាក់​នៅទីនោះ​ បាន​ប្រាប់​សូវរីន​ថា ​នំ​ដែល​បាន​រៀប​រាប់​ខាង​ លើ​នោះ​មាន​ឈ្មោះថា​ នំឃ្មោះ​។ អ្នក​មីង​មិន​ដឹង​នំ​នេះ​មាន​ប្រវត្តិ​កកើត​តាំង​ពីសម័យ​ណាទេ​ ប៉ុន្តែ​អ្នក​មីង​ដឹង ​ថា នំនេះ​មាន​ជា​យូរយារ​ណាស់​មក​ហើយ ព្រោះ​អ្នកមីង និង​អ្នកភូមិ​ដទៃទៀត​ក៏​ចេះតៗ​គ្នា​ពី​មនុស្ស​ចាស់ ជំនាន់​មុនៗ​ដែរ។ កំពុង​តែ​និយាយ​បណ្តើរ បង់នំ​ចូលក្នុង​ខ្ទះខ្លាញ់​បណ្តើរ​យ៉ាង​មមាញឹក អ្នកមីង​បាន​ណែនាំ ពី​គ្រឿង​ផ្សំ និង​វិធី​ធ្វើ​នំ​ឃ្មោះ​ដែល​អ្នកស្រុក​ឧដុង្គ​នេះ​ចេះ​ធ្វើ​ពី​ដូនតា​យ៉ាង​ប៉ិនប្រសប់។​ គ្រឿង​ផ្សំ​សំខាន់ៗ​ រួម​មាន សណ្តែកបាយ ស្ករស ខ្ទិះដូង ម្សៅអង្ករខ្សាយ និង​ពងមាន់ស្រែ។ ចំពោះ​វិធី​ចម្អិន​នំ​នេះវិញ​គឺ ដំបូង គេ​ត្រូវ​លាយ​ស្នូលនំ​ដែល​ផ្សំ​ឡើង​ពី​សណ្តែក​កិន​អោយ​ម៉ដ្ឋលាយ​ជា​មួយ​ស្ករស និង​ខ្ទិះដូង​បន្តិច។ ស្នូល​ដែល លាយ​ហើយ​ត្រូវ​យក​មក​លុញរាង​មូល​ទ្រវែង​ប្រមាណ​ប៉ុន​កូនដៃ ហើយ​តម្រៀប​ស្នូល​ទាំង​នោះ​ដាក់​ក្នុង​ចង្អេរ ឫស្សី​ទុក​មួយ​អន្លើ ទើប​លាយ​ម្សៅ​អង្ករខ្សាយ​ជា​មួយ​នឹង​ទឹក ថែម​ពងមាន់​កូរលាយ​ចូលគ្នា​ឲ្យ​បាន​សព្វ​ល្អ​ក្នុង ចាន​ដែក​មួយ។ បន្ទាប់​មក គេ​ត្រូវ​យក​ស្នូល​ទៅ​ជ្រលក់​ក្នុង​ល្បាយម្សៅ​ក្នុង​ចានដែក​សឹមបង់​ចូលខ្លាញ់​ដែល កំពុង​ក្តៅ​ម្តងមួយៗ​ដំណាល​គ្នា​ជា​បន្ទះៗ​។ ពេល​វា​ឆ្អិនភ្លាម គេស្រង់​វា​ចេញ​ពី​ខ្ទះ ដាក់​កញ្ច្រែង​ឬ​របស់​ដែលអាច​ស្រក់​ខ្លាញ់​បាន ដើម្បី​ឲ្យ​ស្រក់​ខ្លាញ់ បន្តិច​សិន​ទើប​លើក​យក​ដាក់​លក់​ជា​បន្ទះៗ​គរ​លើគ្នា។

          អាជីវករ​ដដែល​បាន​បង្ហើប​ប្រាប់​ថា ដើម្បី​ធ្វើ​នំឃ្មោះ​ឲ្យ​ឈ្ងុយឆ្ងាញ់​គួរ​ឲ្យ​ចង់​ទទួលទាន​នោះ​ រូបមន្ត ពិសេស​នោះ​គឺ​គុណភាព​ស្នូល និង ល្បាយម្សៅ​ដែល​ជ្រលក់​នោះឯង។ នំឃ្មោះ​ខុស​ពី​នំខ្មែរ​ភាគច្រើន​ព្រោះ គេ​ប្រើ​តែ​ស្ករស ពុំ​ប្រើ​ស្ករត្នោត​មក​ធ្វើ​ស្នូល​ឡើយ «តាំង​ពី​ជំនាន់​ចាស់ៗ​មក គេ​ពុំ​ដែល​ប្រើ​ស្ករត្នោត​ធ្វើ​ទេ គេ​ធ្វើ​តែ​ស្ករស​ហ្នឹង​ឯង។ បើ​ស្ករត្នោត គឺ​ធ្វើ​មិន​កើត​តែម្តង!» រីឯ​ម្សៅ​ត្រូវ​តែ​ធ្វើ​ពី​អង្ករខ្សាយ ដែល​អង្ករខ្សាយ មួយគីឡូក្រាម​ត្រូវ​ដាក់​ពងមាន់​ចំនួន​ពីរគ្រាប់ «ក្បួន​គេ​គឺ​ដាក់​ពង​ពីរគ្រាប់​ល្មម​តែម្តង!» ។ ការ​ប្រើ​ពងមាន់​ស្រែ​ជា​គុណ​ប្រយោជន៍​បង្កើន​ឱជារស​នំទ្វេដង​បន្ថែម​លើ​រសជាតិ​ផ្អែម​របស់​សណ្តែក​ធម្មជាតិ និង​បាន​ជួយ​ធ្វើ​ឲ្យ​នំឃ្មោះ​មាន​ពណ៌​លឿង​ស្អាត​ទាក់ទាញ​គួរ​ឲ្យ​ចង់​ទទួលទាន។ គាត់​បន្ថែម​ទៀត​ថា នំនេះ​បើ​លាយ​មិន​ត្រូវក្បួន​ដាក់ម្សៅ​ច្រើន​តែ​ស្ទើរ​ពងមាន់​នោះ​នំមិន​ស្អិត​ជាប់​គ្នា​ល្អ​នោះទេ ហើយ​រសជាតិ​ក៏​ញ៉ាំ​មិន​ឆ្ងាញ់​ដែរ។

          គួរបញ្ជាក់​ផង​ដែរ​ថា តាម​ទំលាប់​អ្នកស្រុក​ឧដុង្គ នំឃ្មោះ​មួយ​បន្ទះ​មាន​នំ​ចំនួន​១០គ្រាប់ គេ​មិន ដែល​ដាក់តិច ឬ ច្រើនជាង​នេះ​នោះ​ទេ ពោល​គឺ​គេ​មាន​កំណត់​ចំនួន​គ្រាប់​ត្រឹមត្រូវ។ ចំពោះ​តម្លៃ​វិញ គឺ​មាន​តម្លៃ​សមរម្យ ដែល​មួយ​បន្ទះ​លក់​ត្រឹម​តែ ២០០០រៀល​តែ​ប៉ុណ្ណោះ។ បើ​យក​បីបន្ទះ​ត្រឹម​តែ ៥០០០រៀល​ទេ។ គួរ​កត់សម្គាល់​ដែរ​ថា នំឃ្មោះ​ជា​នំខ្មែរ​ដែល​ធ្លាប់​ត្រូវ​បាន​សាលារាជធានីភ្នំពេញ​ជ្រើសរើស​យក​មក​ដាក់​តាំង​ក្នុង​កម្មវិធី​ពិព័រណ៍នំ និង​បង្អែមខ្មែរ​ក្នុង​ចំណោម​ប្រភេទ​នំខ្មែរ ៩៨មុខ​ដែល​ត្រូវ​បាន​ដាក់​តាំង​បង្ហាញ​ក្នុង​ពេល​នោះ។ សព្វថ្ងៃ​ក្រៅ​ពី​មាន​លក់​នៅ​ទីតាំង​ភ្នំឧដុង្គ​ដែល​ជា​កន្លែង​ផលិត​ផ្ទាល់​ ជារឿយៗ​គេ​ឃើញ​អ្នក​លក់ដូរ​ នំនែក​តាម​ផ្លូវ​យក​នំនេះ​ពី​ឧដុង្គ​រួម​ជាមួយ​នំដទៃទៀត​ដូចជា​ នំលម្អងចេក នំក្រឡោជី នំចង្កឹះ និង នំជើងឆ្នាំង ជាដើម មក​លក់​នៅ​ទីក្រុង​ភ្នំពេញ​ថែម​ទៀតផង។ យើង​សង្ឃឹម​យ៉ាង​មុតមាំ​ថា កូនខ្មែរ​នឹង​ជួយគាំទ្រ មត៌ក​ចំណី​អាហារខ្មែរ​តួយ៉ាង​នំឃ្មោះ​នេះ​ឲ្យ​បាន​គង់វង្ស​ស្ថិតស្ថេរ​ទៅ​ថ្ងៃ​អនាគត​កុំ​ឲ្យ​បាត់បង់​ជាយថាហេតុ៕

Article by SRIN SOKMEAN


SUGGESTIONS