Sovrin
Sovrin
សត្វព្រៃកំពុងតែប្រឈមមុខទៅនឹងការបាត់បង់បន្តិចម្តងៗ ដោយសារតែសកម្មភាពរបស់មនុស្សដែលពេលខ្លះពួកគាត់បានធ្វើឡើងដោយចេតនា និងអចេតនា។ ក្នុងគំនិត ប្រកបដោយសុឆន្ទៈ និងក្តីស្រឡាញ់ សូវរីន បានបង្កើតបេសកកម្មមួយឡើងដើម្បីជាការបង្ហាញពីការអភិរក្ស និងថែរក្សាកុំឱ្យពូជសត្វទាំងនោះបាត់បង់ដោយកត្តាណាមួយ។ ក្នុងន័យសំដៅដល់ការចូលរួមផ្តល់ក្តីស្រឡាញ់ទៅលើសត្វព្រៃទាំងប៉ុន្មានប្រភេទនេះ ព្រោះជីវិតសត្វក៏ប្រៀបបាននឹងជីវិតរបស់មនុស្សយើងដែរ។ បើអ្នកបានការពារជីវិតសត្វមួយក្បាល នោះមានន័យថា ជីវិតមួយត្រូវបានអ្នកសង្គ្រោះដែលប្រកបទៅដោយគុណធម៌ខ្ពស់ក្នុងខ្លួន។ មួយវិញទៀតនៅសម្រាប់ការចេញផ្សាយក្នុងខែនេះ សូវរីន បានចំណាយកម្លាំងកាយចិត្តដើម្បីចង់បង្ហាញពីការចូលរួមស្តោកស្តាយពីឱនភាពពូជរបស់សត្វព្រៃនៅកម្ពុជា ដែលជាមនសិកាលើកយកមក បង្ហាញក្នុងការសិក្សាស្វែងយល់ទាំងអស់គ្នា។ បើយើងមើល ហើយពិចារណាទៅលើកម្រងរូបភាពដែល សូវរីន បានរៀបចំឡើងនេះគឺបង្កប់ទៅដោយភាពទួញសោក សម្រែកដង្ហោយហៅរៀបរាប់ពីទុក្ខវេទនារបស់សត្វព្រៃទាំងអស់នោះ ដោយមិនមានអ្នកណាម្នាក់ចាប់អារម្មណ៍នោះឡើយ។ ជាក់ស្តែង នាបច្ចុប្បន្នកាលនេះ សត្វព្រៃដ៏កម្រប៉ុន្មានប្រភេទនេះ ត្រូវបានរងនូវការបាត់បង់ជីវិតម្តងបន្តិចៗ ដែលមានពេលខ្លះ ស្ទើរតែផុតពូជអស់ទៅហើយ ដែលសកម្មភាពទាំងនោះរួមមាន៖ ការប្រមាញ់យកសាច់ជាអាហារ ពីសំណាក់ក្រុមព្រានព្រៃមួយចំនួន។ លើសពីនេះទៀត មិនមែនគ្រាន់តែការយារយីតាមប្រមាញ់តែមួយនោះទេ ក្នុងនោះការបំពុលបរិស្ថានគឺបានជះឥទ្ធិពល យ៉ាងខ្លាំងទៅដល់ដំណកដង្ហើមរបស់សត្វទាំងអស់នោះ។ ឧទាហរណ៍ ដូចជាការបោះចោលសំរាម ការប្រើប្រាស់កាកសំណល់គីមី ហើយបង្ហូរទៅក្នុងទឹកទន្លេ ដែលសកម្មភាពទាំងអស់នេះអាចធ្វើឲ្យពពួកមច្ឆាស្លាប់ទៅទាំងអស់ដូចជា ផ្សោត ឬត្រីរាជនេះជាដើម។ បន្ថែមពីនេះទៀត សត្វព្រៃ ក៏ត្រូវបានក្លាយជាទីផ្សារមួយយ៉ាងសំខាន់ ក្នុងការជួញដូរដោយឥតប្រណីពីសំណាក់ឈ្មួញផងដែរ ដោយហេតុថា មនុស្សបានប្រមាញ់យកសត្វទាំងនោះ ដើម្បីយកទៅលក់ក្នុងគោលបំណងចិញ្ចឹមក្រពះ ឬតម្រូវការរបស់ខ្លួន ក៏ប៉ុន្តែផ្ទុយទៅវិញ មនុស្សមិនបានគិតពីការឈឺចាប់ និងទុក្ខវេទនារបស់ពួកគេឡើយ។ នេះហើយ ដែលជាការស្វែងយល់ និងក្រើនរំលឹកទៅដល់អារម្មណ៍អ្នកអានគ្រប់គ្នាឱ្យយល់ពីជីវិតរបស់សត្វព្រៃអស់ទាំងនោះ ដើម្បីបញ្ចៀសឲ្យឆ្ងាយពីការប៉ុនប៉ង និងមហិច្ឆតាគ្មានត្រាប្រណីរបស់មនុស្ស។ មួយវិញទៀត សម្រាប់អារម្មណ៍ និងក្តីស្រឡាញ់របស់ សូវរីន នៅពេលនេះ គឺមិនមែន គ្រាន់តែចង់បង្ហាញពីការបាត់បង់របស់សត្វព្រៃប៉ុណ្ណោះទេ លើសពីនេះទៀត គឺដើម្បីចូលរួម អភិរឌ្ឍន៍វិស័យទេសចរណ៍ក្នុងសហគមន៍សត្វព្រៃនេះ ឲ្យទទួលបានភាពល្អប្រសើរ និងសបញ្ជាក់ឱ្យពិភពលោកទាំងមូល បានឃើញថា កម្ពុជាដែលជាតំបន់ត្រូពិច ក៏ជាជម្រកសត្វព្រៃបានយ៉ាងកក់ក្តៅផងដែរ។ ដែនអភិរក្សសត្វក្រៀលមួយកន្លែងនៅក្នុងភូមិសាស្រ្តសហគមន៍អន្លង់ព្រីង ឃុំបងសាលាខាងត្បូង ស្រុកកំពង់ត្រាច ខេត្តកំពត ជាទីតាំងដ៏សក្តិសមសម្រាប់បង្ហាញសម្រស់នៃម៉ូដដែល សូវរីន បានសហការជាមួយឡាឈូក ច្នៃប្រឌិតឡើងជាឈុតតំណាងឱ្យសត្វ ត្រយង ក្រៀល កន្ធាយក្បាលកង្កែប ផ្សោត និងត្រីរាជ។ គ្រប់រូបភាពនៃការច្នៃម៉ូដសម្លៀកបំពាក់ជារូបរាងសត្វព្រៃនេះគឺមើលទៅ ហាក់ដូចជាមានភាពរស់រវើកយ៉ាងខ្លាំង ដែលមានលាយឡំជាមួយនឹងទឹកមុខដ៏ស្រងូតស្រងាត់ពីតួសម្តែងរបស់យើង។ ទន្ទឹមនឹងការចងក្រងនូវកម្រងរូបភាពសត្វព្រៃទាំងអស់នេះ បើយើងក្រលេកមើលទៅលើការរចនាម៉ូដសម្លៀកបំពាក់វិញគឺវាមានសភាពស្មុគស្មាញបន្តិច ប៉ុន្តែទោះជាយ៉ាងនេះក្តី ក៏អ្នកជំនាញរបស់យើងនៅតែបន្តធ្វើវាឲ្យបាន។ ជាមួយនឹងទឹកមុខហត់បន្តិច ក្រោមកម្តៅថ្ងៃ ញើសហូរសស្រាកនោះ តារាសម្តែងខ្នាតអន្តរជាតិ កញ្ញា ទឹម រដ្ឋា បានបង្ហាញពីអារម្មណ៍របស់ខ្លួនដ៏ថ្មីស្រឡាងថានេះជាលើកទីមួយដែលខ្លួនបានថតជាលក្ខណៈហ្វេសហ្សិនឈុតសត្វព្រៃបែបនេះ។ “ការថតនេះ ខ្ញុំជួបឧបសគ្គច្រើន ព្រោះសម្លៀកបំពាក់មានសណ្ឋានជារូបសត្វ ដែលផ្នែកខ្លះមុតទៅដល់រាងកាយរបស់នាងខ្ញុំ ហើយងាកមើលទៅក្រោម គឺសុទ្ធតែទឹក និងវាលស្មៅ នាងខ្ញុំខ្លាចមានឈ្លើងណាស់ ប៉ុន្តែនាងខ្ញុំពេញចិត្តនឹងថតដើម្បីចូលរួមចំណែកបង្ហាញដល់ការអភរិក្សសត្វព្រៃជាមួយនឹងក្រុមការងារ សូវរីន”។ បន្ថែមពីនេះទៀត កញ្ញា ថែមទាំងបង្ហើបពីអារម្មណ៍ ភ្ញាក់ផ្អើលថាវាជាហ្វេសហ្សិនបែបថ្មី មិនធ្លាប់មានពីមុនមកនោះទេ ដោយការឆ្លងកាត់ ថតជាច្រើនរូបភាពរួចមកហើយ ប៉ុន្តែដោយឡែក នៅលេខនេះ សូវរីន ពិតជាបានបង្កើតនូវគំនិតច្នៃប្រឌិត ហ្វេសហ្សិនឈុតសត្វព្រៃក្នុងន័យអប់រំ ដែលមើលទៅមានលក្ខណៈខុសប្លែកពីគេទៀតផង។ តួយ៉ាង ដូចជាការរៀបចំជាម៉ូដសម្លៀកបំពាក់សត្វព្រៃ ទាំងការរចនានៅលើរាងកាយរបស់កញ្ញា និងការផាត់មុខមានមុខមាត់ជាសត្វពិតជាក្លាយជាផ្ទាំងទស្សនីយភាពមួយដ៏កម្រ ខ្លាំងណាស់។ រដ្ឋា បានបន្តទៀតថា លេខទី៨៤ នេះ សូវរីន ហាក់ដូចជា បានបំពេញនូវការងារសង្គមមួយដ៏មានតម្លៃ និងគួរឲ្យកោតសរសើរ។
គ្រប់រូបភាពនៃការបង្ហាញពីឈុតសត្វព្រៃទាំងនេះសត្វព្រៃនីមួយៗ ពោរពេញទៅដោយភាពទុក្ខសោក ស្រងេះស្រងោច ហាក់ដូចជាខ្លួនកំពុងតែបាត់បង់នូវ សេចក្តីស្រឡាញ់ពីមនុស្សយ៉ាងដូច្នោះឯង។ បើយើងក្រឡេកមើលទៅរូបសត្វក្រៀលឯណោះវិញ គឺដូចជាកំពុងសម្តែងនូវភាពហត់នឿយនឹងការដែលបាត់បង់សមាជិករបស់ខ្លួន ពីមួយថ្ងៃទៅមួយថ្ងៃ ដោយត្រូវរស់នៅយ៉ាងវេទនាជាមួយនឹងទីវាលដែលស្ទើរតែគ្មានម្លប់ឈើ សម្រាប់ជាជម្រកទៅហើយ។ ចំណែកឯ សត្វផ្សោតឯណោះវិញ ក៏កំពុងតែខំរើបម្រើពីផ្ទៃទឹកដែលពោរពេញទៅដោយ ជាតិពុល ដែលស្ទើរតែឆក់យកជីវិតខ្លួនបន្តិចម្តងៗ ជាមួយនឹងស្រកាស្ទើរតែស្ងួតរីងរៃ អស់ទាំងខ្លួនតែម្តង។ ងាកមកសត្វត្រយងជាប្រភេទសត្វមិនសូវជាជួបប្រទះនោះបានហោះហើរ ស្វែងរកដើមឈើសម្រាប់ជាទីជម្រក ប៉ុន្តែដោយសារតែការកាប់បំផ្លាញព្រៃឈើរបស់មនុស្ស គឺប្រៀបបានទៅនឹងការកាប់កំទេចនូវជម្រករបស់ពួកគេយ៉ាងដូច្នោះដែរ និងពពួកសត្វដទៃទៀតក៏កំពុងតែទទួលរងនូវការវិនាសហិនហោចគួរឱ្យសោកសង្រេងផងដែរ។
សរុបជារួមមកវិញ ដូចអ្វីដែល សូវរីន បានរៀបរាប់ជូនខាងលើនេះរួចមកហើយ គឺការបង្កើតជាកម្រងរូបភាពឈុតហ្វេសហ្សិនសត្វព្រៃទាំងនេះ គឺក្នុងន័យមួយអប់រំទៅដល់មនុស្សទាំងអស់ឱ្យងាកមកស្រឡាញ់ និងអភិរក្សសត្វព្រៃដែលជាពូជសត្វកម្រនៅក្នុងស្រុក របស់យើងវិញ។ មួយវិញទៀត ក៏ចង់បង្ហាញឱ្យឃើញថា នាពេលបច្ចុប្បន្ននេះសត្វព្រៃ កំពុងតែត្រូវបាត់បង់វត្តមានរូបរាងនៅលើផែនដីនេះហើយ ក៏ដោយសារតែសកម្មភាពរបស់មនុស្ស និងការមិនថែរក្សាបរិស្ថាន។ ជាសារអប់រំមួយដែរ សូមចូលរួមចំណែកអភិរក្សជីវិតសត្វព្រៃទាំងអស់គ្នា ដើម្បីកុំឲ្យសត្វទាំងអស់នោះផុតពូជពីលោកនេះទៅ ក៏ដើម្បីបម្រើដល់វិស័យទេសចរណ៍ មួយយ៉ាងសំខាន់សម្រាប់ភ្ញៀវមកកម្សាន្តនៅក្នុងកម្ពុជារបស់យើង៕
Article by HENG CHANMAKARA
