Sovrin
Sovrin
“ចេកអាំងកាកដូង” អាហារល្បីប្រចាំក្រុងកំពង់ឆ្នាំងទាក់ចិត្តអ្នកដំណើរគ្រប់ទិសទី
TRAVEL & LIVING 6 years ago
អ្នកណាក៏ស្គាល់ចេកអាំងដែលជាចំណីបុរាណខ្មែរតាំងពីយូរលង់ណាស់មកហើយដែរ ហើយវាត្រូវបានប្រជាជនខ្មែរធ្វើលក់តាមផ្លូវ តាមភូមិស្រុក ខេត្តក្រុងនានាស្ទើរគ្រប់ច្រកល្ហក។ ឥឡូវនេះ គេហទំព័រ សូវរីន បានស្រាវជ្រាវរកឃើញចេកអាំងមួយបែបផ្សេងទៀតដែលប្លែកខុសពីចេកអាំងប្រលាក់ទឹកអំបិលធម្មតាដែលលោកអ្នកធ្លាប់បានទទួលទាននាពេលកន្លងមកនោះគឺចេកអាំងកាកដូងដែលល្បីល្បាញពេញទីរួមខេត្តកំពង់ឆ្នាំងជាយូរឆ្នាំណាស់មកហើយ។ អ្នកដំណើរដែលធ្វើដំណើរចុះឡើងតាមផ្លូវជាតិលេខ៥ ទិសដៅ ភ្នំពេញ-កំពង់ឆ្នាំង-បាត់ដំបងតែងតែនិយមឈប់ឡានឈានចូលទិញតិចឬច្រើនមិនសូវខាន ប៉ុន្តែអ្នកខ្លះក៏មិនដឹងដែរថាជាប្រភេទចេកអាំងពិសេសបើពុំបានចាប់ភ្លឹកសង្កេតមើល ស្មានតែចេកអាំងធម្មតាដូចកន្លែង ផ្សេងៗដែរ។ តោះមកស្គាល់ថាតើចេកអាំងកាកដូងពិសេសនេះមានលក់នៅម្តុំណាឲ្យប្រាកដ? វាមានរសជាតិឆ្ងាញ់ដល់កម្រិតណា?
បើយើងធ្វើដំណើរពីភ្នំពេញមកដល់ត្រង់ចំណុចសួនច្បារទីរួមខេត្តកំពង់ឆ្នាំង ហើយបន្តដំណើរទៅមុខត្រង់បន្តិចហួសធនាគារអេស៊ីលីដាសាខាខេត្តកំពង់ឆ្នាំង លោកអ្នកនឹងបានឃើញស្ថានីយ៍សាំងតេលាមួយនៅខាងឆ្វេងដៃ។ បន្ទាប់មក លោកអ្នកត្រូវបត់តាមផ្លូវចំហៀងខាងស្តាំជាប់ការ៉ាស់សាំងនោះ (ទិសដៅទៅ ខេត្តបាត់ដំបង) តែបន្តិចប៉ុណ្ណោះ លោកអ្នកនឹងបានឃើញមានអ្នកលក់ចេកអាំងក្រោមឆ័ត្រលើចិញ្ចើមថ្នល់ ជាហូរហែនៅខាងស្តាំដៃប្រហែលប្រាំពីរតូប។ ចេកអាំងហុយៗក្តៅៗតម្រៀបដោតជាចង្កាក់ៗកំពុងបង្ហួត កាយសម្ងំលើរងើកធ្យូងនៃចន្ទាសអាំងបែបបុរាណដែលមានអ្នកស្រុកកំពង់ឆ្នាំងជាអ្នកចម្អិនផ្ទាល់ដៃ។
អ្នកមីង ធី វ័យខ្ទង់៥០ឆ្នាំ អ្នកលក់ចេកអាំងកាកដូងម្នាក់ដ៏ល្បីឈ្មោះនៅម្តុំនោះ បាននិយាយប្រាប់ថា គាត់ប្រកបមុខរបរនេះអស់រយៈពេលជាង១០ឆ្នាំហើយ។ ចេកអាំងគាត់លក់ដាច់ណាស់ ពោលគឺមួយថ្ងៃ គាត់អាចលក់បានចេកអាំងជាមធ្យម២០០ចង្កាក់ បើគិតជាចំនួនចេកគឺ១០០ស្និតឯណោះ។ ដោយឡែក បើក្នុងរដូវកាលបុណ្យទានឬថ្ងៃឈប់សម្រាកធំៗដែលមានអ្នកធ្វើដំណើរជិតឆ្ងាយឆ្លងកាត់ទៅតាមបណ្តា ខេត្តនានាច្រើននោះ គាត់អាចលក់ចេកអាំងដាច់ច្រើនជាងនេះទៅទៀត ព្រោះគេឈប់ទិញច្រើនជាងថ្ងៃធម្មតា។ ចេកអាំងដែលគាត់លក់មានពីរប្រភេទគឺប្រភេទប្រលាក់ទឹកអំបិលធម្មតា និងប្រភេទប្រលាក់កាកដូងលាបល្ងពីលើ។ ប៉ុន្តែចេកអាំងកាកដូងដែលជាប្រភេទចំណីពិសេសប្រចាំតំបន់គឺត្រូវបានលក់ដាច់ជាងព្រោះភ្ញៀវចង់សាកចង់ដឹងថារសជាតិឆ្ងាញ់ដូចដែលគេល្បីៗតៗគ្នាមែនឬអត់។
អតិថិជនចេកអាំងកាកដូងម្នាក់ឈ្មោះ ដាលីន មកពីខេត្តពោធិ៍សាត់ បានអះអាងពីគុណភាពរសជាតិ ចេកអាំងបែបកំពង់ឆ្នាំងនេះថា «ចា៎!ឆ្ងាញ់មែនតើហ៍! បងមិនដែលឲ្យហួសទេ ញ៉ាំចេកអាំងហ្នឹងជាង១០ឆ្នាំ ហើយតាំងពី (តម្លៃ) ៥០០(រៀល) រហូត១៥០០(រៀល) ហើយ! ។» បងស្រីម្នាក់ទៀត (សុំមិនបញ្ចេញឈ្មោះ) ជាអ្នកដំណើរមកពីក្រុងភ្នំពេញ ក៏បានស្ញើចសរសើរពីអាហារប្រភេទនេះដែរថា «ចេកអាំងកំពង់ឆ្នាំង ឆ្ងាញ់! ត្រឹមម៉ោង៣រសៀលលក់អស់ហើយ!!! ធ្លាប់បានញ៉ាំចេកអាំងរូបមន្តបែបនេះតាំងពីទសវត្សរ៍ទី៨០ និង៩០ តែបច្ចុប្បន្នអ្នកលក់បាត់ភាពឧស្សាហ៍បែបនេះអស់ហើយ (កិនចេកឲ្យសំប៉ែត ហើយរោយកាកដូង និងល្ងឲ្យ ឈ្ងុយឆ្ងាញ់ជាប់មាត់)។»
ដោយសារតែរសជាតិឆ្ងាញ់ប្លែកពីគេនៃចេកអាំងកំពង់ឆ្នាំង ទើបធ្វើឲ្យអាជីវកម្មតាមចិញ្ចើមផ្លូវនេះ ចេះតែរីកចម្រើនអាចឈរជើងជាប់រហូតជាង១០ឆ្នាំ ហើយទទួលបាននូវការគាំទ្រទាំងពីអ្នកដំណើរប្រុសស្រី និងទាំងប្រជាជនដែលរស់នៅទីរួមខេត្តកំពង់ឆ្នាំងផងដែរ។ បើចង់បានរសជាតិដើម សូមមកទទួលទាន ដោយផ្ទាល់នៅលើទឹកដីខេត្តកំពង់ឆ្នាំង ព្រោះនៅកន្លែងផ្សេង រសជាតិមិនដូចម្ចាស់ដើមនោះទេ! តម្លៃត្រឹម តែ១៥០០រៀលប៉ុណ្ណោះក្នុងមួយចង្កាក់! តម្លៃសមរម្យហើយ រសជាតិពិសេសទៀត រកឯណាបាន!
Article by SRIN SOKMEAN
