ត្មាត ជាសត្វស្លាបដ៏កម្រមួយដែលនៅក្នុងផ្នត់គំនិតរបស់មនុស្សទូទៅ ច្រើនតែគិតថា ប្រភេទ សត្វនេះ ជាសត្វចង្រៃ និងមិនតែប៉ុណ្ណោះ ក៏មិនបានយកចិត្តទុកដាក់ ផ្តល់ក្តីស្រឡាញ់ដូចជាសត្វដទៃទៀតឡើយ។ ក្រោមការសហការជាមួយស្ថាប័ន រួមជាមួយអង្គការដែលពាក់ព័ន្ធ BirdLife International Cambodia Programme បានរៀបចំទិវាយល់ដឹងអំពីសត្វត្មាតអន្តរជាតិ២០១៨ ក្រោមប្រធានបទ “ត្មាតនាំសំណាង” ចំពោះការប្រារព្ធកម្មវិធីនេះទៀតសោត គឺសម្ដៅដល់ការឧទ្ទេសនាមសត្វត្មាតជិតផុតពូជបំផុតទាំងបីប្រភេទ ដែលមានក្នុង ប្រទេសកម្ពុជា និងផ្តល់ចំណេះដឹងអំពីតួនាទីរបស់វានៅក្នុងប្រព័ន្ឋអេកូឡូស៊ី រួមទាំងអប់រំផ្សព្វផ្សាយ ពីការងារអភិរក្សសត្វត្មាត និងគុណតម្លៃរបស់សត្វត្មាតផងដែរ។ មួយវិញទៀតគឺក្នុងគោលបំណងធ្វើការផ្សព្វផ្សាយដល់សាធារណៈជនពីកត្តាគម្រាមកំហែង ជាពិសេសផលវិបាកនៃការបំពុល និងបរិភោគសត្វព្រៃ។ ជុំវិញការបង្កើតកម្មវិធី ត្មាតនាំសំណាង នេះដែរ ក៏មានសហការគ្នាពីក្រុមការងារអភិរក្សសត្វត្មាតកម្ពុជា ក្រសួងបរិស្ថាន រដ្ឋបាលព្រៃឈើ អង្គការសមាគមអភិរក្សសត្វព្រៃ(WCS), អង្គការមូលនិធិសកលសម្រាប់អភិរក្សធនធានធម្មជាតិ(WWF), មជ្ឈមណ្ឌលអង្គរសម្រាប់អភិរក្សជីវៈចម្រុះ(ACCB) អង្គការជីវិតសត្វស្លាបប្រចាំកម្ពុជា (BirdLife) និងអង្គការជីវិតធម្មជាតិនៅកម្ពុជា ដែលនឹងប្រព្រឹត្តទៅនៅថ្ងៃទី០៧ ខែកញ្ញា ឆ្នាំ២០១៨ វេលាម៉ោង១១ព្រឹកដល់ម៉ោង៧យប់។ ក្នុងនោះដែរក៏មានការតាំងបង្ហាញជាពិពរណ៌រូបថតរបស់សត្វត្មាតទាំងបីប្រភេទរួមជាមួយការអត្ថាធិប្បាយយ៉ាងលម្អិតអំពីប្រភេទនីមួយៗ។ ក្រៅពីការតាំងបង្ហាញរូបថតក្នុងនោះអ្នកចូលរួមទស្សនាអាចសាកល្បងឆ្លើយសំណួរដើម្បីទទួលបានកាដូពីខាងក្រុមការងាររៀបចំកម្មវិធីផងដែរ៕
Article by HENG CHANMAKARA