«Be Wild Be Free» Wild Bar បង្កើត Cocktail រូបមន្តផ្ទាល់ខ្លួនក្នុងបរិយាកាសធម្មជាតិដ៏ស្រស់ស្រាយ
TRAVEL & LIVING 6 years agoនៅក្នុងបរិវេណទីធ្លាខាងមុខផ្ទះមួយដែលក្រាលដោយស្មៅខៀវខ្ចី អមជាមួយនឹងពន្លឺភ្លើងពណ៌ទឹកក្រូចដ៏ស្រទន់លាយឡំនឹងភ្លេងរណ្តំរហឹមៗ ជាមួយនឹងការតុបតែងតាមបែបធម្មជាតិគួរឲ្យស្រស់ស្រាយនាក្រុងសៀមរាបនោះគឺជា បាថ្មីមួយដ៏រ៉ូមែនទិកដែលទើបតែចាប់បដិសន្ធិឡើងដោយជនបរទេសពីររូប។ Wild Bar ទើបតែបង្កើតឡើងនៅក្នុងខែ ឧសភាឆ្នាំ ២០១៨ នេះតែប៉ុណ្ណោះ ក៏ប៉ុន្តែបានេះគេសង្កេតឃើញមានភ្ញៀវចេញចូលឥតដាច់ ជារៀងរាល់ថ្ងៃ ជាពិសេសគឺភ្ញៀវទេសចរបរទេសដែលកំពុងតែស្នាក់នៅនិងទស្សនាទីក្រុងប្រវត្តិសាស្រ្តនៃទឹកដីអង្គរ។ ទាំងការរៀបចំ ភេសជ្ជៈ អារហារ តម្លៃ និងសេវាកម្ម សុទ្ធតែជាអ្វីដែលអតិថិជនទូទៅភាគច្រើនពេញចិត្ត និងតែងតែនិយមនាំគ្នាមកម្តងហើយមកម្តងទៀតដើម្បីពិភាក្សា និងជជែកកំសាន្តក្រោមបរិយាកាសដ៏រីករាយជាទីបំផុត។
នរណាក៏ដោយគ្រាន់តែឆ្លងកាត់បាមួយនេះតែងតែនាំគ្នាងាកមើលនិងក្រឡេកមិនដាក់ភ្នែកឡើយពីការរៀបចំបរិយាកាសតាមបែបធម្មជាតិគួរឲ្យចង់រស់នៅជាទីបំផុតរបស់ Wild Bar។ មានតុនិងកៅអីតូចៗជាច្រើនត្រូវបានគេរៀបដាក់នៅលើស្មៅខ្ចីសម្រាប់ពិសាភេសជ្ជៈនិងអាហារយ៉ាងមានសណ្តាប់ធ្នាប់។
Wild bar បង្កើតឡើងដោយប្តីប្រពន្ធជនជាតិបារាំងពីររូបដែលបានចាប់ចិត្តប្រតិព័ទ្ធជាមួយនឹងវប្បធម៌ ប្រពៃណី និងប្រជាជនកម្ពុជាពីយូរណាស់មកហើយ។ ដោយសារតែការស្រលាញ់ធម្មជាតិនិងបរិស្ថានបានធ្វើឲ្យប្តីប្រពន្ធជនជាតិបារាំងទាំងពីរមានគំនិតចាប់ផ្តើមអាជីវកម្មនឹងការបង្កើតបាដ៏ផ្អែមល្ហែមនេះឡើង។ លើសពីការរចនានិងការរៀបចំហាក់ដូចជាសហគមន៍បរិស្ថានបែបនេះ ម្ចាស់ហាងទាំងពីរក៏បានបង្កើតរូបមន្តភេសជ្ជៈដោយខ្លួនឯងជាមួយនឹងក្លិននិងរសជាតិធម្មជាតិដែលពួកគេចម្រាញ់ចេញពីរុក្ខជាតិដាំដោយខ្លួនឯងនៅក្នុងសួនបន្លែដ៏តូចមួយនៅក្នុងបរិវេណទីធ្លាបានិងខ្លះទៀតបានទិញពីឈ្មួញដែលបានបោះដុំផ្ទាល់តែម្តង។ ភេសជ្ជៈជាច្រើនដូចជា Cocktail គឺសុទ្ធសឹងតែមានរសជាតិឆ្ងាញ់ខុសប្លែកពីបាផ្សេងៗទៀត ដែលភ្ញៀវណាក៏ដោយដែលបានមកភ្លក់នៅទីនេះលាន់មាត់ថាឆ្ងាញ់និងជាប់ចិត្តគ្រប់ៗគ្នា ។ Wild Bar មាន Cocktail ជាច្រើនដែលមានឱជារសជាតិឈ្ងុយឆ្ងាញ់និងមានក្លិនជាច្រើនប្រភេទដែលម្ចាស់ហាងផ្ទាល់បានផលិតឡើងដោយខ្លួនឯងផ្ទាល់តួយ៉ាងដូចជា៖ ក្លិនផ្កា Rossel, ក្លិនវ៉ាន់នីឡា ក្លិនម្រេចកំពត ជាដើម ។
Tamara Venn គឺជាឈ្មោះរបស់សិល្បៈករគំនូរមួយរូបដែលបានគូសវាសអក្សរគំនូរ Wild នៅលើជញ្ជាំងបាប្រកបដោយសិល្បៈនិយម និងស្រស់ស្អាតជាទីបំផុត ត្រូវបានម្ចាស់ហាងទាំងពីររូបបានយកមកបញ្ចូលជាឈ្មោះ Cocktail មួយដែលលក់ដាច់ជាងគេបំផុតរបស់បាមួយនេះ។ បន្ថែមពីនេះទៅទៀត Caipirinha ក៏ជាភេសជ្ជៈCocktail មួយទៀត ដែលមានឱជារសឈ្ងុយឆ្ងាញ់ពិសេសដែលមានការពេញនិយមពីអតិថិជននិងភ្ញៀវទេសចរបរទេសជាច្រើនទៀតផងដែរ។ ជាងនេះទៅទៀត Wild Bar ក៏មានបម្រើជូននូវមុខម្ហូបអ៊ឺរ៉ុបនិងខ្មែរជាច្រើនមុខដែលមានឱជារសឈ្ងុយឆ្ងាញ់ពិសាជាទីបំផុតចម្អិនដោយចុងភៅចំណានរបស់ Bar ថែមទៀតផង។ Wild Bar ចាប់ផ្តើមបើកទ្វាទទួលស្វាគមន៍ភ្ញៀវជាតិនិងអន្តរជាតិជារៀងរាល់ថ្ងៃចាប់ពីម៉ោង ៥ល្ងាច រហូតដល់ម៉ោង ១១យប់ ជាមួយនឹងការបម្រើជូនដោយម្ចាស់បាផ្ទាល់តែម្តង៕ Read in English
Article by KEO SONG