ជម្រើសវត្តចំនួន០៥នៅជិតៗភ្នំពេញដែលអាចជាគោលដៅពិសេសសម្រាប់រដូវបុណ្យភ្ជុំ
TRAVEL & LIVING 6 years agoជាទូទៅ នៅរដូវបុណ្យភ្ជុំបិណ្ឌប្រជាពលរដ្ឋខ្មែរទូទាំងប្រទេសតែងត្រលប់ទៅស្រុកកំណើតជួបជុំក្រុម គ្រួសារនៅតាមបណ្តាខេត្តនានា។ ប៉ុន្តែក៏មានអ្នកដែលមានស្រុកកំណើតនៅភ្នំពេញតែម្តង ឬ អ្នកដែលមមាញឹកការងាររបររកស៊ីដែលមិនអាចឆ្លៀតពេលទៅស្រុកបាន នោះពួកគេប្រាកដជាចង់ធ្វើដំណើរទៅធ្វើបុណ្យ និង ដើរកំសាន្តជាមួយមិត្តភក្តិ មិត្តរួមការងារ ឬ ក្រុមគ្រួសារនៅវត្តដែលស្ថិតនៅជិតៗរាជធានីភ្នំពេញ។ ក្នុងឱកាសពិធីបុណ្យកាន់បិណ្ឌនិងភ្ជុំបិណ្ឌឆ្នាំនេះ សូវរីនសូមណែនាំទីអារាមទាក់ទាញខ្លះៗដែលលោកអ្នក គប្បីកុំមើលរំលង៖
១ វត្តស្អាងភ្នំៈ ស្ថិតនៅភូមិពាមសាលា ឃុំស្អាងភ្នំ ស្រុកស្អាង ខេត្តកណ្តាល ដែលមានចម្ងាយប្រមាណ៣០ គីឡូម៉ែត្រពីរាជធានីភ្នំពេញ តាមផ្លូវជាតិលេខ២១។ ពេលទៅដល់ផ្សារទីរួមស្រុកស្អាង ត្រូវបត់ស្តាំតាម ស្ថានីយប្រេងឥន្ទនៈរហូតចម្ងាយ២គីឡូម៉ែត្រទើបឃើញខ្លោងទ្វារវត្ត។ ស្អាងភ្នំជារមណីយដ្ឋានបែបវប្បធម៌និង ធម្មជាតិដ៏ស្រស់ត្រកាលប្រៀបដូចកោះព័ទ្ធដោយផ្ទៃទឹកបឹងធំល្វឹងល្វើយនៅរដូវវស្សា។ នៅលើកំពូលភ្នំ មានព្រះវិហារ សាលាប្រាំបីជ្រុង អាស្រមព្រះអង្គចេកព្រះអង្គចម និង អាស្រមព្រះគោព្រះកែវ សម្រាប់សាសនិកជនគោរពបូជា។ រីឯនៅជើងភ្នំមានដុំថ្មធំៗដុះរកេតរកូតគួរឲ្យចង់ថតរូបកម្សាន្ត។ មិនត្រឹមតែប៉ុណ្ណោះ ក៏មានរោងលក់ម្ហូបអាហារបែបជនបទជាច្រើនសម្រាប់រង់ចាំស្វាគមន៍ទទួលភ្ញៀវទេសចរជិតឆ្ងាយទាំងឡាយផងដែរ។
២ វត្តអង្គរជ័យៈ ស្ថិតនៅភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល ចម្ងាយជាង៣០គីឡូម៉ែត្រ ពីភ្នំពេញ តាមផ្លូវជាតិលេខ១។ វត្តនេះក៏ជារមណីយដ្ឋានដ៏ល្បីប្រចាំតំបន់ ជាទីពេញនិយមសម្រាប់រដូវបុណ្យទានដែរ ព្រោះវត្តនេះមានសំណង់អគារដែលមានលក្ខណៈស្ថាបត្យកម្មប្លែកៗខុសពីវត្តដទៃ ព្រមទាំងមានបរិស្ថានស្រស់បំព្រង មានស្រះឈូក មានស្រះចិញ្ចឹមត្រី ផ្ទះទឹកអង្គុយសម្រាកលេង ឬ ឲ្យចំណីត្រីជាការកំសាន្តសប្បាយ។ ក្រៅពីនេះ វត្តក៏នៅមានកន្លែងបារមីសក្តិសិទ្ធិមួយទៀតដែលអ្នកស្រុកហៅថា ទួលដំបូកខ្មៅ។ នៅលើទួលដែលប្រកបដោយអប្បិយជំនឿនោះ មានការសាងសង់នូវអាស្រមរូបសំណាក់តូចធំ ជាច្រើនសម្រាប់អ្នកដំណើរ និង អ្នកស្រុកគោរពប្រតិបត្តិបួងសួងសុំសេចក្តីសុខចម្រើន។ វត្តកំពុងមមាញឹករៀបចំកែតុបតែងសួនច្បារថ្មីមុខមហាកុដិសម្រាប់ត្រៀមប្រារព្ធពិធីបុណ្យភ្ជុំបិណ្ឌខាងមុខនេះ។
៣ វត្តជ្រោយអំពិលៈ មនុស្សភាគច្រើនស្គាល់ឈ្មោះវត្តនេះ សូម្បីតែយុវវ័យសព្វថ្ងៃក៏និយាយរត់មាត់ដែរ ព្រោះវត្តនេះធ្លាប់ត្រូវបានគេជ្រើសរើសជាទីតាំងប្រារព្ធពិធីបុណ្យភូមិដ៏ធំសម្បើមកាលពីឆ្នាំ២០១៦។ វត្តនេះមានទីតាំងស្ថិតក្នុងសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។ ទីនោះមានសោភ័ណភាពនិង សណ្តាប់ធ្នាប់របៀបរៀបរយល្អព្រោះវាជាវត្តរបស់ព្រះសពសម្តេចព្រះឧត្តមមុនី យឿង យ៉ាត់ អតីតសមាជិក ថេរសភាសង្ឃនៃព្រះរាជាណាចក្រកម្ពុជា និង ជាអតីតព្រះមេគណខេត្តកណ្តាល។ ទីធ្លាវត្តចាក់បេតុងមាន ភាពធំទូលាយងាយស្រួលរៀបចំកម្មវិធីបុណ្យទានជួបជុំនានា និងមានដាំដើមឈើលម្អរៀបចំជាសួនច្បារ មើលទៅខៀវស្រងាត់គួរជាទីមនោរម្យ។ លោកអ្នកក៏អាចឆៀងចូលទៅវត្តផ្សេងៗទៀតដែលស្ថិតនៅជិតៗ នោះបានដែរ តួយ៉ាង វត្តកៀនស្វាយក្រៅ វត្តកៀនស្វាយក្នុង វត្តកោះប្រាក់ និង វត្តវិចិត្តារាម ជាដើម ឬ សល់ពេលទៅទស្សនារមណីយដ្ឋានកៀនស្វាយក្រៅ ដើរទិញចំណីអាហារថ្មីៗស្រស់ៗរបស់អ្នកស្រុក និង អង្គុយទទួលទានអាហារក្នុងខ្ចុះមាត់ទឹក ឬ ជិះទូកលេងកំសាន្តតាមដងទន្លេបានថែមទៀតផង។
៤ វត្តស្វាយអណ្តែតៈ ស្ថិតក្នុងភូមិតាស្គរ ឃុំសារិកាកែវ ស្រុកល្វាឯម ខេត្តកណ្តាល មានចម្ងាយត្រឹមជាង១០ គីឡូម៉ែត្រប៉ុណ្ណោះពីភ្នំពេញ។ ដើម្បីទៅដល់វត្តនេះ លោកអ្នកត្រូវឆ្លងដអរិយក្សត្រម្តុំគល់ស្ពានកោះពេជ្រ (អតីតឌ្រីមលែន)។លុះទៅដល់ត្រើយម្ខាង ត្រូវជិះទៅត្រង់ដល់ចំណុចវត្តពេជ្រម្កុដ បត់ស្តាំកាត់តាមភូមិ ទួលមាសរហូតដល់ភូមិតាស្គរ។ វត្តនេះជាទីតាំងវត្តបុរាណដែលមានកេរ្តិ៍ឈ្មោះល្បីរន្ទឺតាំងពីដើមរៀងមក ដោយសារទីនេះជាប្រភពកំណើតនិងជាថ្នាលបណ្តុះសិល្បៈល្ខោនខោលដ៏ធំមួយនៅប្រទេសកម្ពុជា។ រោង ល្ខោនខោលដ៏ថ្មីប្រណិតមួយទើបនឹងត្រូវបានសម្ពោធជាផ្លូវការក្រោមអធិបតីភាព លោកជំទាវ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ និងលោកជំទាវ អាន ឡឺមេស តំណាងអង្គការយូនេស្កូ នៅកម្ពុជា ដែលនឹងរឹតតែបន្ថែមមុខមាត់និងប្រជាប្រិយភាពវត្តនេះទ្វេដង។ ស្របជាមួយគ្នានេះដែរ វត្តក៏បាន ខ្នះខ្នែងរៀបចំដាក់តាំងរទេះសាឡីបុរាណខ្មែរតម្កល់ក្នុងទីធ្លាវត្តសម្រាប់ឲ្យកូនខ្មែរជំនាន់ក្រោយបានស្គាល់។
៥ វត្តឥន្ទលីបូណ៌ ហៅវត្តពុកប្ញស្សីៈ មានទីតាំងស្ថិតនៅឃុំពុកឫស្សី ស្រុកខ្សាច់កណ្តាល ខេត្តកណ្តាល ចម្ងាយជាង៧គីឡូម៉ែត្រពីស្ពានព្រែកតាមាក់ ឬ ប្រមាណ១៧គីឡូម៉ែត្រពីកំពង់ចម្លងអរិយក្សត្រតាមផ្លូវ លេខ៣៨០ កាត់តាមវត្តស្វាយជ្រុំ និង វត្តព្រែកបង្កង ឆ្ពោះទៅទិសខាងជើង។ ដោយសារវត្តពុកប្ញស្សីស្ថិត នៅជាប់មាត់ទន្លេមេគង្គ ធ្វើឲ្យវត្តនេះហាក់មានបរិយាកាសស្រស់ស្រាយមិនសូវអួអាប់ដូចវត្តក្នុងទីក្រុង។ លក្ខណៈពិសេសៗសំខាន់ៗរបស់វត្តនេះគឺ មានព្រះវិហារបុរាណដែលកសាងតាំងពីឆ្នាំ១៩៣៦ រជ្ជកាល ព្រះបាទស៊ីសុវត្ថិមុនីវង្ស។ ក្នុងព្រះវិហារមានគំនូរពុទ្ធប្បវត្តិចំនួនពីរផ្ទាំងដែលនៅសេសសល់ពីរបបខ្មែរ ក្រហមហើយនៅមានសភាពល្អច្បាស់នៅឡើយ។ ក្រៅពីព្រះវិហារ វត្តនេះមានសមិទ្ធផលពុទ្ធសាសនាថ្មីជា ច្រើនដែលទើបធ្វើពិធីឆ្លងកាលពីខែមីនាកន្លងទៅ។ ក្រោយពីធ្វើបុណ្យទានរួច លោកអ្នកដើរលេងកំសាន្តនៅ បរិវេណខាងក្រោយវត្តដែលមានព្រៃព្រឹក្សាធំៗចោលម្លប់ត្រឈឹង ព្រមទាំងសាលាមាត់ទឹកដែលអាចអង្គុយ លេងស្រូបយកខ្យល់ជំនោរមាត់ទន្លេធម្មជាតិពិតៗ ជាពិសេសលោកអ្នកអាចឃើញខ្លោងទ្វារកំផែងដែលមាន រចនាបថប្លែកកម្រមានដែលមានចារឹក “ព.ស.២៥០៥” ពោលគឺ ជាសមិទ្ធផលសម័យសង្គមរាស្រ្តនិយម។
Article by SRIN SOKMEAN